Mahimong Moulbo Ang Tanan
Ni ELEAZAR TUTOR ACAMPADO
MORAG gipabuthan og bombang atomiko ang Pilipinas niadtong Huwebes, Febrero 6, 2025. Ang ang bomba wala ihulog gikan sa mga eroplano apan gikan sa Ubos Balay Balaoranan sa Dakbayan sa Quezon. Niadtong adlawa, gi-impeached sa 215 ka mga magbabalaod sa Pilipinas si Bise Presidente Sara Zimmerman Duterte-Carpio.
Kalit lang ug morag gimadyik ang tanan. Bisan pa sa tulo na ka impeachment complaint ang gipasaka sa Kongreso, giun-onan pa kini sa Secretary General Reginald Velasco, kay naghuwat pa sa ikaupat nga reklamo. Apan pipila ka adlaw usa matapos ang session sa HOR, mideklarar kini nga iduso na sa opisina ni House Speaker Martin Romualdez.
Ug karon nahitabo gyod ang gipangagpas sa kadaghanan nga ipa-impeached gyod sa Kongreso si Inday Sara.
Bisan pa sa kagustohan ni Presidente Ferdinand “Bongbong” Romualdez Marcos Jr. nga dili siya gusto nga ipadayon ang pagduso og impeachment complaint batok sa bise president diha sa Kongreso, nakalusot gyod ang upat ka impeachment complaint ug na-impeached si Bise Presidente Sara Duterte.
Daghan ang miingon nga weak leader si Bongbong Marcos ug magahungan sa iyang ig-agaw nga si Speaker Ferdinand Martin Gomez Romualdez. Ang iyang ig-agaw nga hinay-hinay nang nagtukod sa iyang pundasyon aron makab-ot ang iyang pangandoy nga mahimong presidente o primero ministro sa nasod.
Daghan lagi ang mga Pilipino ang nabilar apil na ang daghang Bol-anon sa pagpangita sa mga listahan sa mga kongresista nga mipirma ug wala mopirma sa impeachment complaint batok sa bise presidente.
Dinhi sa Bohol, kompleto ang tulo ka mga magbabalaod sa unang distrito, ikaduhang distrito ug ikatulong distrito. Ug dili ikatingala nga daghan sa mga Bol-anon ang nangasuko ug nagpahugaw sa ilang gibati, sa tabitabi man o diha sa social media ilabi na sa Facebook. Naa na man gani ang meme nga bagdokan ang 118, 119 ug 120. Kini ang han-ay kon ikapila sa mga mingpirma ang mga mababalaod sa Bohol.
Wala kita masayod kon mingpirma ba sila tungod sa ilang konsensiya, gipugos sa pagpapirma o tungod ba sa ayuda. Sila ra ang nasayod.
Apan sa panan-aw sa mga Bol-anon tungod kini sa ayuda ug dugang pundo nga ihatag. Kay dili man gyod ikalimod nga sukad sa pagpamunoan ni Presidente Marcos ug sa paglingkod nga speaker ni Kongresista Martin Romualdez diha sa Ubos Balay Balaoranan sa nasod, nahimo nang dakong Ayuda Nation ang Pilipinas.
Ang tulo ka mga magbabalaod magpasubli pagpapili isip representante sa ilang mga distrito. Mahimong mapili sila pagpabalik sa umaabot nga piniliay karong Mayo 2025. Apan segurado ko nga daghan sa ilang mga supporter ang nahisagmuyo ug mahimong silent protester.
Kining dinali-dali nga pag-impeached ni Bise Presidente Sara atong gituohan nga usa ka dakong diversionary tactics sa Kongreso aron malikoy ang hunahuna sa katawhan gikan sa anomaliya sa pagpasar sa budget sa nasod karong 2025. Diin gimandoan ang Kongreso nga gipresentahan ni Speaker Martin Romualdez, ang Senado nga gipresentahan ni Senate President Francis Escudero, ug Executive Secretary Lucas P. Bersamin nga mohatag sa ilang komento sulod sa 10 ka adlaw gikan nga nadawat ang resolusyon.
Magkagubot ba ang Pilipinas sa pagka-impeached ni Bise Presidente Sara Duterte? Dili ta manalagna apan sa atong obserbasyon, ania kita sa delikadong panahon.
Kon dili mapugngan ug mabugnaw ang kainit sa nabukal nga mga dughan. Niadtong wala na makasabot sa mga panghitabo sa dagan sa pangagamhanan. Mahimong masubli ug moulbo ang tanan. Ug kini ang akong gihadlokan.
Bahin sa Tagsulat:
(Si Eleazar Tutor Acampado, kanhi staff writer sa Bisaya Magazine. Nakadaog na sa Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.)