Daghang paagi kapilian sa pagbayad sa Bohol Light electric bills
Sinulat ni Sheryl B. Paga
Maayong balita!
Malipayong ipahibalo sa Bohol Light nga mas sayon ug mas paspas na karon ang pagbayad sa inyong electric bills.
Sukad niadtong Pebrero 11, 2025, mahimo nang mubayad derecho ngadto sa GCash App ug wala nay kinahanglan nga QR code.
Alang sa dugang kasayon sa pagbayad, daghang mga Third-Party Collecting Agents ang pwede kapilian sa sama niining musunod:
- Bangko (Lunes – Biyernes)
✔ First Consolidated Bank (FCB)
✔ Bank of Commerce (BOC)
✔ Security Bank (SB)
✔ Landbank of the Philippines (LBP)
✔ Banco De Oro (BDO)
✔ Philippine National Bank (PNB)
✔ Union Bank (UB)
✔ Metrobank (M)
✔ Bank of the Philippine Islands (BPI)
- Non-Bank Payment Centers (Pwede mo bayad sa Sabado, Domingo ug Holidays!)
✔ MLhuillier
✔ Palawan Express
✔ Super Service Center (SSC)
✔ Dragon Pay
✔ RD Pawnshop
✔ Piso Pay
✔ EC Pay (Connecting outlets: GCash, 7-Eleven, Home Credit, PayMaya, Shopee, Tambunting, Cebuana Lhuillier, Lazada, NATCCO Network, eBIZ, Prince, VIP Center, Express Pay, ug Growsari.)
Dugang kasayuran nag-ingon nga gikauyunan sa Bohol Light ug Bohol Water nga sugod karong Marso 1, 2025, adunay kabag-ohan sa sistema sa pagdawat sa bayad nga mao kining mosunod:
∙ Ang Bohol Light dili na mudawat ug bayad para sa Bohol Water bills.
∙ Ang Bohol Water dili na usab mudawat ug bayad para sa Bohol Light electric bills.
Kini nga lakang gihimo aron mas ma-awhag ang mga konsumidor sa pagbayad ngadto sa mga payment partners aron maminusan ang pagpundok sa opisina sa Bohol Light ug Bohol Water.
Daghang salamat sa inyong padayon nga pagsalig ug suporta.
BWUI modawat na sa aplikasyon sa tubig sa brgy. Taloto
Sinulat ni Victor L. Tambis
Mga tinugyanan sa Bohol Water nga naghimo sa hydrotesting sa bag-ong linya sa tubig sa brgy. Taloto
Sa nagpadayon nga proyekto sa pagladlad ug linya sa Barangay Taloto, gipahibalo ang mga konsumidor nga naagian sa bag-o nga linya, ilabi na sa mga dapit sa Escobilla St (tubig dako) ug ang mga kalsada pasulod nga mao ang Dote St, Zamora St, Pelias St ug ang alley road, nga mahimo na kining mo aplay alang sa koneksyon sa tubig sa buhatan sa BWUI.
Aron mahatagan ug kasayon ug aron usab Madali ang proseso sa aplikasyon, ang mga tinugyanan sa Bohol Water moanha sa opisina sa Barangay Taloto sa adlawng Myerkules ug Huebes (8:30-11:30am) aron sa pag asikaso sa mga requirements sa mga aplikante.
Ang mga tinugyanan sa Bohol Water nagpadayon karon sa pag install sa mga stub-outs alang sa mga connections sa konsumidor.
Human ma-aprobahan ang aplikasyon sa usa ka konsumidor, gibana-bana nga makonektahan kini sa tubig sulod sa duha ka adlaw depende kon aduna nay “stub-out” nga gibutang duol sa maong panimalay niini.
Dili dayon makonektahan ang usa ka konsumidor ilabi kon wala pay stub-out nga anaa duol sa maong dapit, apan gihatagan ug unang pagtagad ang paginstalar sa stub-outs sa mga konsumidor nga aduna nay aplikasyon.
Sa laing bahin, ang Bohol Water mipahibalo nga sugod karong Marso 1, 2025, dili na kini modawat ug bayad gikan sa Bohol Light ug ang Bohol Light dili na usab modawat ug bayad sa bill sa Bohol Water. Aron mahatagan ug kasayon, giawhag ang mga konsumidor nga adto kini mobayad sa mga payment partners nga mao ang: (1) First Consolidated Bank; (2) Land Bank; (3) Bank of Commerce; (4) Security Bank ug pinaagi usab sa G-Cash; (5) M. Lhuiller; (6) Palawan Express/Pawnshop ug ang (7) Bayad Center app.
DA nipasidaan batok sa mga impostor
sa ilang kalihim sa social media
Sinulat ni Elvira Bongosia
Ang Department of Agriculture (DA) nipagawas ug memorandum nga nagpasidaan sa ubang ahensya sa gobyerno batok sa mga impostor nga Kalihim ug nangayo ug pondo pinaagi sa social media ug messaging platforms.
Ang DA nipahibalo niadtong Biyernes nga nakadawat sila ug mga taho sa mga indibidwal nga may nangayo ug tabang pinansyal, ug adunay dili maayo nga mga katuyoan, ubos sa ngalan ni Kalihim Francisco Tiu Laurel Jr.
Gipasidan-an sa memo nga gigamit sa mga mangingilad ang numero sa kontak ug imahe sa kalihim, aron mahatagan ang ilang mga direktiba ug kredibilidad.
Gimanduan sa ahensya ang mga nakadawat sa mga hangyo nga gipadala pinaagi sa messaging applications o social media nga ibaliwala kini ug tawagan ang Office of the Secretary aron makumpirma ang gigikanan sa instruction.
“All instructions from the Secretary shall be through written communication with his signature and sent through the official email account of the Office of the Secretary (Ang tanan nga mga panudlo gikan sa Kalihim kinahanglan pinaagi sa sinulat nga komunikasyon sa iyang pirma ug ipadala pinaagi sa opisyal nga email account sa Opisina sa Kalihim,” ang memo nag-ingon.
Gimandoan usab sa memo ang mga kauban nga opisyal nga ipahibalo ang mga sulod niini sa mga website sa ilang mga ahensya alang sa kahibalo sa publiko.
Giklaro sa memo nga ang Kalihim sa agrikultura wala moapil sa pagpangayo ug pinansyal nga tabang, ni gitugotan ni bisan kinsa nga buhaton kini alang kaniya.
Gi-awhag ang mga opisyal sa pagkontak sa DA Chief-of-Staff Alvin John Balagbag, kinsa mipirma sa dokumento.
DHSUD: Bag-ong website sa 4PH gipahapsay
ang pag-access sa mga pabalay sa gobyerno
Sinulat ni Elvira Bongosia
Aron mapahapsay ang pag-access sa mga proyekto sa pabalay sa gobyerno, ang Department of Human Settlements and Urban Development (DHSUD) naglusad ug usa ka dedikadong website nga nagtanyag ug impormasyon ug mga serbisyo nga may kalabutan sa flagship program sa gobyerno nga Pambansang Pabahay para sa Pilipino (4PH).
Sa usa ka pahayag nga gipagawas niadtong Biyernes, si DHSUD Kalihim Jose Rizalino Acuzar miingon nga ang inisyatiba nagtumong sa paggiya sa mga potensyal nga benepisyaryo ug mga stakeholder, pagsiguro sa usa ka mas dali ug transparent nga programa sa pabalay.
Siya miingon nga ang 4PH website nga gilusad niadtong Pebrero 4 nagsilbing sentralisadong digital hub diin ang mga tiggamit maka-access sa mahinungdanong mga polisiya, mga giya sa aplikasyon, mga kalamboan sa proyekto, ug mga interactive nga bahin nga makapauswag sa pakiglambigit sa publiko.
Gidugang usab niini nga ang website nagtanyag ug gipa-simple nga proseso sa aplikasyon alang sa mga benepisyaryo ug nagpauswag sa pag-access sa mga importanteng impormasyon nga may kalabotan sa pabalay alang sa mga developers ingon man sa mga local government units (LGUs).
Gipasiugda ni Acuzar nga ang plataporma kabahin sa pasalig sa ahensya sa inklusibo ug episyente nga serbisyo sa pabalay.
Naghatag usab ang website ug seksyon sa FAQ (frequently asked questions) aron matubag ang kasagarang mga pangutana.
Ang mga aspiring homeowners mahimong makakita sa mga rekisitos ug masusi kon sila angayan ba sa programa, samtang ang mga developers ug LGUs makapangita ug mga program issuances ug DHSUD policy alang sa mas sayon nga pagsunod.
Ang government housing program mahimong ma-access pinaagi sa opisyal nga 4PH portal niini sa https://dhsud.gov.ph/4ph-program/.
Aron sa paggiya sa mga stakeholders, partikular na sa mga potensyal nga benepisyaryo sa Pambansang Pabahay para sa Pilipino o 4PH Program, ang DHSUD naglusad ug website nga nagtanyag ug impormasyon ug mga serbisyo nga may kalabutan sa flagship program sa gobyerno. (Hulgway gikan sa DHSUD/PIA)
Local Amnesty Board-Bohol Amnestiya sa mga kanhi rebelde ikaproseso dinhi
Sinulat ni Rey Anthony Chiu
Subli nga gipanawagan karon sa mga tinugyanan sa kahapsay ug kalinaw sa Bohol ngadto sa mga kanshi aktibo nga sakop sa kalihukang walhon, nga motahan na nga malinawon aron maka-apil sa mga tawo nga lihokon aron mahatagan sa amnestiya.
Kini samtang mismo sa Chairperson sa National Amnesty Commission nga si Atty Leah Tanodra-Armamento ang personal nga mingbisita sa Bohol dungan sa ika 15 nga kasumaran sa pagkadeklara sa Bohol nga wala nay suliran sa insurhensya, aron ipabarug nganhi ang Local Amnesty Board (LAB).
Ang LAB, us aka bahan nga langkoban sa mga tinahud nga mga lider sa Bohol nga maoy sangonan sa pagsusi ug pagtuki sa mga aplikasyon sa mga nangtahan na nga mga kanhi nanglihok sa walhong pundok, aron matimbang kon angayan ba sila nga hatagan sa amnestiya.
Matud ni Atty Armamento, ang mga mahatagan sa amnestiya, mawad-an an sa mga kaso nga gipasaka kanila samtang naglihok pa sa kalihukan, kadtong mga kaso nga nahimo aron pagpa-asdang sa politikanhong katuyuan sa Communist Party of the Philippines.
Kadtong mga mingsurrender ra ang may higayon nga makakuha sa amnestiya ug niini, mahibalik na sila sa kahimtang nga sama sa ordinaryo nga molupyo.
Kasagaran nga aktibo kanhi sa kalihukan ilabi na kadtong mga armado, may mga gipasaka nga kaso, ug kini kasagaran wala na ikatunol ang arrest warrant tungod kay kining mga gipasanginlan, nagtago-tago sa kabukiran.
Niini usab, lisud na ang pagkuha ug clearances sa National Bureau of Investigation, sa Department of Justice, sa kapolisan ug sa armadong kusog, mao nga magpabilin nga dakponon.
Apan karon nga wala nay kalihukang walhon sa Bohol, daghan na nga mga kanhi rebelde ang mingbalik sa sabakan sa kagamhanan.
Si Danilo Olaivar, tulo ka termino nga chairman sa Hugpong sa mga Mag-uuma nga Bol-anon, mipadayag nga sa nagkasubsob nga operation sa mga sundalo ug kapolisan, ug sa tanyag nga tibugtaw ni Gob Erico Aristotle Aumentado, mas mahiluna ang iyang kaugalingon ug banay kon motahan ug mosalig sa tabang sa kagamhanan aron makapanimuyo nga malinawon.
Si Olaivar, lakip na sa 19 ka mga kanhi rebelde nga mingtahan sa kagamhanan nga naproseso na ug nahatagan ug pamuhunan alang sa kapanginabuhi-an, aron makasugod nag balik sa katilingban isip yano nga molupyo.
Si Olaivar usab lakip sa 61 ka mga kanhi diha sa kalihukan nga mingtahan ngadto kang Aumentado, sa usa lamang ka adlaw.
Sa mga mingtahan, kinahanglan sila nga moduso sa aplikasyon alang sa amnestiya, nga karong dala sa pagbukas sa LAB sa Bohol, may local na nga mga tinugyanan nga gitahasan sa National Amnesty Board nga maoy moproseso sa mga aplikasyon.
Kanhi, ang mga aplikasyon sa amnestiya, iduso po ngadto sa Bacolod, o Ilo-Ilo, aron maproseso kay didto ang buhatans a LAB.
Karon, sayun na ug dili na kinahanglan pang magduso ngadto sa lay okay dinhi na himoon ang aplikasyon sa amnestiya.
Nunot niini, giaghat ni Gob Erico Aristotle Aumentado kadtong mga mingsurrender na sa pag-aghat sa ilang mga kaubanan kaniadto nga motahan na usab aron maproseso ang ilang pasaylo.
FDA Bohol aron ang MSMES Maka-akses sa mga libre nga Hinabang o bansaybansay
Sinulat ni Rey Anthony Chiu
Gilagdaan tali sa kagamhanan sa lalawigan sa Bohol ug sa Food and Drugs Administration ang kasabutan sa tinabangay aron makakuhag libre nga bansay ug teknikal nga tabang ang mga gagmay nga mamumuhunan sa Bohol ilabi na kadtong namuhunan sa pagkaon ug cosmetics.
Sa ngalan sa Bohol, si Gob Erico Aristotle Aumentado, samtang sa katungod sa FDA, si Director General Samuel Zacate ang minglagda sa unom ka pahina nga kasabutan nga tambayayongan ang pagplano aron ikatuboy ang kapasidad sa mga mamumuhunan sa standards o batayan alang sa luwas ug nindot nga produkto.
Sa paglagda, mahimong makakuha ang mga mamumuhunan sa Bohol sa capacity building ug pag-ugmad pa sa mga katakus niini sa pagpakete sa pagkaon, pinaagi sa mga lecturesworkshops, coaching ug mentoring ug sa pagsubay sa mga planta aton katudloan sa mga maayong sistema.
Pinaagi sa programa sa FDA nga gitawag ug Bigyang-halaga, Bangon Micro, Small ug Medium Enterprises, mahimo na nga makab-ot sa mga mamumuhunan dinhi ang tabang sa FDA, ilabi na sa pagseguro nga mapadali ang pagkuha sa business permits, certificate of product registration, certificate of product notification ug sa pagpagawas sa License to Operate.
Kon wala kining tulo ka mga importante nga dokumento, mahimong dili na tugotan ang mga mamaligyaay sa pagpamaligya.
Matud ni FDA Director General Zacate, kini nga gimbuhaton agis suporta sa MSMEs, ilang gisawhan sa Department of Trade and Industry, Department of Trade and Industry, Science and Technology apil na ang mga state colleges and universities.
Nagtuo si Zacate nga kon mahimo ra nga niini, may mga mamumuhunan na nga mahimong –adunahan.
Si DG Zacate, mipadayag nga ang pagpakigtambayayong ang FDA sa Bohol aron mas mapadali na niini ang pagproseso sa mga gikinahanglang dokumentos sa mga mamumuhunan, aron makakuhag License to Operate. (Hulagway gikan sa PIABohol)
Pag-IBIG Fund, may ‘1 Plus 1 Raffle Promo’ alang sa mga OFW ug self-employed member
Sinulat ni Elvira Bongosia
Gilusad ning bag-o lang sa Pag-IBIG Fund ang “Pag-IBIG 1 Plus 1 Raffle Promo,” usa ka inisyatiba nga nagtinguhang awhagon ang mas daghang overseas Filipino workers (OFWs), self-employed nga indibidwal, online sellers ug informal sector workers nga magparehistro isip miyembro ug makatigom kauban sa Pag-IBIG Fund.
Modagan hangtod Nobyembre 30, 2025, ang promo maghatag ug reward sa mga aktibong miyembro sa Pag-IBIG Fund nga malampuson nga nagparehistro gikan sa mga nahisgotang sektor nga maghatag ug dalan sa mga programa ug serbisyo aron makapahimos ang mas daghang Pilipino.
Ubos sa 1 Plus 1 Raffle Promo, ang mga aktibong miyembro sa Pag-IBIG nga nakatigom sa ilang Pag-IBIG Regular Savings sulod sa katapusang tulo ka buwan tawgon isip “PagIBIGfluencers” nga mahimong mang-imbita ug bisan usa ka OFW o informal sector worker aron mahimong miyembro o i-activate ug balik ang ilang Pag-IBIG membership (the“Plus 1”).
Parehong makakuha ang PagIBIGfluencer ug ang Plus 1 ug eligibility alang sa savings ug housing loan programs sa ahensya, diin ang matag mosalmot adunay kahigayonan nga makadaog ug P50,000 hangtod P500,000 sa grand draw.
Gipasugdan sa Pag-IBIG Fund ang programa aron mas makapahimos ang mga OFW, self-employed, ug mga wala kaayo naserbisyuhan nga mga kawani nga dili susama sa mga empleyado sa pribado ug gobyerno, walay mga employer nga magparehistro kanila. Kini nga sektor pasagdan nga magpatala sa ilang kaugalingon sa mga social security institutions.
Gibutyag ni Pag-IBIG Fund Chief Executive Officer Marilene Acosta nga kapin sa 7,000 ang mga bag-o ug reactivating nga miyembro ang nisalmot na sa promo sa unang buwan niini, nga nagpataas sa membership ug savings collection sa ahensya.
Ang mga interesadong mosalmot sa Pag-IBIG 1 Plus 1 Raffle Promo mahimong mo-sign up sa https://www.pagibigfundservices.com/1plus1/.
Libreng workshop sa NA Bohol alang Sa Illustrating kid’s books Feb. 14-16
Sinulat ni Rey Anthony Chiu
Aduna pay nahibilin nga slots alang sa workshop kabahin sa pagdebuho alangs a mga libro sa Kabataan nga gitanyag sa National Museum.
Mahitabo sa Febrero 14 ngadto sa 16, ang workshop bukas alang sa 30 ka mga artists, kinsa buot nga mabuksan ang ilang pagpamamugnaon ilabi na sa pagdebuho.
Matud ni Felix Miguel, kinsa maoy resource person ug artist nga giila na sa tibuok nasud sa iyang abilidad, libre ang workshop ug kini alang sa medyo may taas na nga kapasidad ig abilidad sa pagka artist.
Ikaduha na nga hugna sa susamang workshop, kining workshop karong semanaha, tumong nga maghatag inspirasyon sa mga mosalmot, nga magiyahan usab sila sa mga kabag-ohan nga mga teknik sa paghimo ug childrens book illustrations.
Ang pagdebuho sa mga libro sa kabataan, angayan nga tun-an usab sanglit kini nga mga imahen nga mapatik sa alimpatakan sa kabataan, mamahimong motamla sa tibuok nilang kinabuhi, ug maka impluwensya sa ilang mga hunahuna sa kinabuhi.
Ang mga kabataan kasagaran mangita ug maayo ug nindot nga mga inspirasyon, mao nga gikinahanglang ang mga sugilanon nga ubayan sa pagdebuho, mobagay usab sa estorya.
Matud ni Miguel nga ang pagdebuho sa Childrens Books hinuon, dyutay ra nga bahin sa mas daku ug mas makatabang nga book design, diin ang kwarta aron makapanganabuhi ania.
Alang sa mga buot mosalmot sa workshop, adtoa alamang ang National Museum ug pagdala sa imong mga bio note ug mga portfolio sa mga trabaho ilabi na sa pagdebuho, aron, makasulod sa nahibioling slots.
Ang workshop, tanyag sa National Museum alang sa paghandum sa Arts Month.
TANYAG SA NATIONAL MUSEUM. Libre nga tulo ka adlaw nga workshop kabahin sa Illustrationg Children’s Books ang ihatag ni Felix Mago Miguel, inilang book illustrator, didto sa National Museum, agi ug paghandum sa Arts Month. (Hulagway gikan sa PIABohol)
Closed Fishing Season tun-an, ikonsulta una
Sinulat ni Rey Anthony Chiu
Sa nagpadayon nga pagnihit sa kuha sa panagat, gitun-an karon sa mga tinugyanan ang pagpahigayon ug mga buwan nga undangan una ang pagpanguha sa tumbok nga mga matang sa isda sa giila nga mga kadagatan o closed fishing season.
Kini ang susama nga mga solusyon nga napalutaw atul sa Roadshow sa Fisheries and Coastal Resilience didto sa Kew Hotel Enero 31 ug sa ug sa labing bag-o nga coastal resource management summit sa Kapitolyo.
Didto sa FISHCoRe, ang usa ka lapad nga proyekto nga ipatuman sa Bureau of Fisheries and Aquatic Resources gikan sa gisawhan nga mga kadagatan sa Ubay Bohol ug Region 8, kadagatan sa kabagatang Bohol ngadto sa kadagatan sa Tagbilaran-Dauis ug Panglao nga gisawhan usab sa Misamis Oriental.
Dinhi himoon ang sinabutan nga mga pagdumala sa kadagatan aron mas mapatunhay ang pangisdaan subay sa FISHCoRE.
Gitawag ug closed fishing season, kini usa ka sinabutan nga solusyon human matumbok ang matang sa isda nga dili una ipakuha sulod sa tulo ka buwan, aron pasagdan kining makapangitlog, mosanay ug makapanagko sa dili pa buksan ug balik ang pagpanagat dinhi.
Ang Closed Fishing Season gitugot sa Philippine Fisheries Code (Republic Act 10654) ug nagpasabut sa panahon kanus-a ang pagkuha sa giila nga matang sa isda nga dili usa ipakuha gamit ang matang sa panagatan, dili una himoon diha sa mga lugar nga gitumbok.
Gilantaw na sa mga lalawigan nga naapil sa FISHCoRe nga ang closed fishing season ipatuman sa pipila ka mga lugar sa Fisheries Management Area 9 (FMA 9).
Ang FMA 9 gilangkoban sa kadagatan nga gisawhan sa 5 ka rehiyon ug mga lalawigan sa Bohol, Southern Leyte, Surigao del Sur, Agusan del Norte, Camiguin, Misamis Oriental, Misamis Occidental ug Lanao del Norte.
Dinhi nga mga kadagatan, namatikdan nga sa mga commercial fishers nga nanagat dinhi, 95 porsyento sa ilang mabaling, pulos mga isda nga wala pa mohingkod.
Gilaraw sa mga tinugyanan nga ipaagi ug konsultasyon s amga mananagat dinhi ang pagpatuman sa temporary nga pagdili una sa pagkuha sa tamban, anduhaw ug danggit.
Hinuon, ilang gipasabut nga dili kini dunganon sa us aka lugar, kay may kapasidad man usab ang isda nga modayo sa laing mga lugar, aron dili mawad-an ang mga mangingisda sa ilang panud-an.
Hatagan usab ug laing kapilian sa panginabuhian ang mga komunidad nga maapektohan sa closed fishing season, kon mahukman.
MGA MANANAGAT, MGA TINUGYANAN. Una nga gipasabut ang tumong sa FISHCoRE ngadto sa mga apektado nga mga kadagatan, ug dinhi sa Bohol, kini gitagana alangs a mga mangingisda gikan sa Ubay ngadto sa Panglao. Sa nagkanihit nga kuha sa isda, kinahanglan na nga himoon ang maayong pagdumala sa panagatan, matud sa BFAR. (Hulagway gikan sa PIA/BFAR)
BALAK
GIMATUTO MO AKO GINOO
Sinulat ni Engr. Rogelio Podelino
Ang tawo gibuhat sama sa hulagway sa GINOO
Gihuypan aron makabaton ug kalag ang tawo
Gipapuyo sa paraiso para sa kahangturan
Sa kinabuhi nga wala’y suliran
Apan ang tawo haguka ug baruganan
Dali nalingla sa mga tam-is ug sinultihan
Nawala sa panumduman ang pahimangno
Kay gilingla sa yawa sa IYANG mga mando
Ug nahitumpawak ang tawo sa kasal-anan
Kay nakasupak sa IYANG kasugu-an
Gipapahawa sa paraiso nga gihinginlan
Nawad-an sa katungod kay gi-usikan
Gisilutan ang tawo sa kamatayon
Tungod sa iyang pagka masupilon
Apan gihigugma gihapon ang rawo sa GINOO
Gipadad-an ug manluluwas ang tawo
Naluwas tawo pinaagi sa kamatayon ni KRISTO
Didto sa bukid sa Kalbaryo
Natubos ang tawo sa IYANG dugo
Nga mibuhagay sa lawas nga nagkadugo
Sa kamatayon ni KRISTO daghan nahigmata
Nga SIYA ang manluluwas nga gipadala
Sa IYANG pagkamatay nabuak ang templo
Ang synagoga alampo-anan sa mga Hudeyo
Aron ang tawo IYANG kahimut-an
Magsubay sa gilated nga dalan
Magtuman sa IYANG napulo ka mga sugo
Aron tawo dili ka mamu-mo
Magbantay sa adlaw’ng Dominggo
Ang adlaw nga gibala-an sa GINOO
Isalikway una ang mga gimbuhaton
Paghimaya sa GINOO ang tumanon
Maglikay sa mga dapit sa kahilayan
Aron ikaw dili.mahitumpawak sa kasal-anan
Sa kanunay dalha ang imong rosaryohan
Aron ang yawa daku ug likayan
Tahura ang imong mga ginikanan
Labi na ang mga katigulangan
Sila ang nag-umol sa imong pagka tawo
KAY GIMATUTO MO AKO GINOO