Pagsulbong sa mga Atleta sa One Gaher: Usa ka Testimonya sa Nagkahiusa Nga Komunidad
Ni ELEAZAR TUTOR ACAMPADO
SAMTANG nangandam ang Bayawan City sa pag-host sa 2025 Central Visayas Regional Athletic Association (CVRAA) Meet sa Marso 11-17, 2025, ang Garcia-Hernandez usab nangandam sa pagpadala sa labing maayong mga atleta nga namatuto ug nabansay sa lungsod sa nagkadaiyang natad sa paugnad sa kusog labi na sa football ug atheletics.
Ang gidaghanon sa mga atleta nga ipadala nagpasabot nga dako gyod og gikatabang ang dedikasyon ug suporta nga nadawat nga nagpahapsay sa dagan sa athletic program sa lungsod.
Sayon nga isalikway kini nga mga numero isip mga estadistika lamang, apan luyo sa matag kwalipikado nga atleta anaa ang dili maihap nga mga oras sa pagbansay, sakripisyo, ug dili matarog nga determinasyon. Ug luyo niana, usa ka komunidad nga nagtuo sa iyang kabatan-onan. Diin wala matulog ang namunoan, mga ginikanan, mga suporter aron labaw pa nga maugmad ang sports program sa lungsod.
Sa pagkatinuod, dili igo ang talento kon walay hustong palibot, walay hustong kahinguhaan, ug walay hustong mamunoan, kay bisan ang labing masaarong atleta maluya ug mawad-an og gana. Ang kalamposan sa mga atleta sa One Gaher maoy usa ka testamento sa proactive approach sa lokal nga kagamhanan.
Si Mayor Jess Virtudazo Baja ug ang OneSB angayan nga ilhon sa ilang pasalig sa pag-amuma sa mga batan-ong talento. Kay unsa may mahimo sa mga trainer ug coach kon ang mga lider wala maninagad sa ilang panginahanglan? Ang ilang suporta klaro nga nahimong instrumento sa pagmugna og tabunok nga yuta alang sa kalamboan sa mga atleta sa lungsod. Kini nga mga inisyatibo nakamugna og mga oportunidad alang sa mga batan-ong atleta sa tibuok lungsod, nga nagtugot kanila sa pagpadayon sa pagkab-ot sa ilang mga damgo.
Ang sugilanon sa One Gaher labaw pa sa mga numero. Nagpamatuod kini sa gahom sa kolaborasyon ug sa pagtuo sa potensyal sa mga batan-on. Si Jhul Ian Galendez Canalita, usa ka batan-on gikan sa Tabuan, nga nailhan na karon nga usa sa mga maayong sa atleta sa Southeast Asia, usa ka dakong ehemplo niini. Ang iyang nangaging mga kadaogan naglakip sa usa ka bronze medal sa 16th SEA U18 Athletics Championships sa Kota Kinabalu ug usa ka bulawan sa 2024 CVIRAA 5km race, ug daghan pang uban nga nagsilbi nga inspirasyon sa iyang mga kaubang atleta.
Ang kalamposan ni Ian, uban sa kwalipikasyon sa 56 ka mga atleta, nagpadayag sa makita nga resulta sa pagpamuhunan sa kalamboan sa kabatan-onan. Nagpamatuod kini nga sa hustong suporta, walay imposible. Kining pagsulbong sa talento sa mga atleta gikan sa One Gaher usa ka pahinumdom nga ang espiritu sa komunidad, inubanan sa epektibo nga pagpamunoan, makamugna og usa ka lig-ong pwersa alang sa positibo nga kausaban.
Samtang nangandam ang mga atleta sa One Gaher alang sa 2025 CVRAA sa Bayawan City, dalhon nila ang mga paglaom ug pangandoy sa ilang komunidad. Ang ilang panaw usa ka testamento sa gahom sa dedikasyon, sa hugot nga suporta, ug sa dili matarog nga pagtuo nga sa panaghiusa, makab-ot nila ang gipangandoyng kadaogan ug pasidungog.
Manghinaot kita nga magpadayon ang pagsuporta niining mga batan-ong atleta, aron maseguro nga ang legasiya sa kalamposan sa mga atleta sa One Gaher magapadayon sa pagdasig sa umaabot nga mga henerasyon.
Bahin sa Tagsulat:
(Si Eleazar Tutor Acampado, kanhi staff writer sa Bisaya Magazine. Nakadaog na sa Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.)
