Bohol Light mipatuman sa kunhod nga presyo sa kuryente sugod Marso 2025
Sinulat ni Sheryl B. Paga
Tagbilaran City – Ang residential rate sa kuryente sa bulan sa Marso 2025 sa Bohol Light mikunhod ngadto sa ₱9.04 kada kilowatt-hour (kWh), nga adunay dakong pag-ubos sa dili mominos sa ₱0.88 kada kWh kon itandi sa balayran niadtong Pebrero 2025.
Samtang ang Commercial rate mikunhod usab ug ₱1.03 kada kWh. Anaa na kini sa ₱8.75 kada kWh, kung itandi sa ₱9.78 niadtong miaging bulan sa Pebrero.
Kining maayong balita gumikan sa pagkunhod sa generation ug transmission charges diin mao kini ang adunay dako nga porsyento diha sa rate components.
Samtang ang Distribution Charge nagpabiling permanente sa kantidad nga P0.98 matag kilowatt lamang sugod pa niadtong tuig 2015.
Pananglitan, ang mga residente nga adunay average nga konsumo nga 200 kWh kada bulan makatipid ug ₱176.00 ilang bayranan sa kuryente.
Ang Bohol Light padayon nga nangita ug mga pamaagi aron mas makunhuran o dili ba kaha magpabilin ang presyo sa kuryente pinaagi sa maampingon nga pagpangita ug pagmonitor sa kumprada diha sa Wholesale Electricity Spot Market (WESM) gawas sa mga nakontrata nga Power Generator.
Sa kanunay nagpahinumdum ang Bohol Light nga ang presyo sa kuryente matag bulan dili permanente ug magdepende busa gipahinumduman ang mga konsumidor nga matngunan ang mga Energy Saving Tips.
Gihimo namo ang tanan sa Bohol Light aron makahatag ug pinakabarato ug kasaligan nga kuryente sa among mga kostumer,” sumala sa gipost sa atong kumpanya sa pahina sa ilang social media. “Kini nga pagkunhod sa rate resulta sa among estratehiyang pamaagi sa pagpalit ug kuryente ug sa among tumong nga makahatag ug bili sa among mga konsumante.”
Alang sa ubang mga pangutana ug kasayuran, mahimo kitang motan-aw sa Bohol Light FB Page, website sa https://www.bohollight.com, o tawag sa service hotline:
(038) 427-2372 / 0920-960-2372.
BWUI misalmot sa BFP kick-off ceremony alang sa Fire Prevention Month 2025
Sinulat ni Victor L. Tambis
Mga empleyado sa BWUI nga mitambong sa kick-off ceremony alang sa 2025 Fire Prevention Month.
Mahinumdoman nga kaniadtong tuig 2024, ang Bohol Water aktibong nisalmot sa kasaulugan sa Fire Prevention Month opening ceremony nga gipanguluhan sa Bureau of Fire Protection (BFP).
Kaniadtong Marso 1, 2025, ang Bohol Water nagpabilin nga aktibo sa pagsalmot pag-usan ug pagsuporta sa maong kalihokan.
Kini usa ka importanteng lakang sa pagpakabana sa katilingban aron paglikay sa kadaot ug peligro sa sunog.
Nagsugod ang maong kalihokan sa usa ka solemn nga misa. Gisundan usab kini sa usa ka motorcade nga gi-apilan sa mga nagkalain-laing public ug private stakeholders.
Kini naghatag ug awareness ug importansya sa fire prevention sa komunidad. Gipakita sa mga partisipante ang ilang tibuok suporta ug kooperasyon sa mga inisyatibo nga nagpasiugda sa kaluwasan sa komunidad, aron mapanalipdan ang kinabuhi ug kabtangan batok sa peligro sa sunog.
Giawhag sa Bohol Water ang komunidad nga mahimong alerto ug disiplinado sa kaugalingon aron padayon ang kahapsay ug paglikay sa mga peligro sa sunog.
Ang matag-usa adunay papel sa pagpanalipod sa atong pamilya ug komunidad, ug pinaagi sa aktibong pag-apil sa mga kalihokan sama niini, makahimo kita ug dako nga kausaban. Atong ipadayon ang pag-gamit sa mga safety measures ug magtinabangay kita aron masiguro ang kahimtang sa kaluwasan alang sa tanan.
ASF gidudahan sa Inabanga,
bio-security, hugtan-Mayor
Sinulat ni Rey Anthony Chiu
Dinalian nga pagtaho, kini samtang nagpaabut ang Inabanga nga makompirmar ang namatikdan nga kasos a 12 na ka baboy ang nangamatay uban sa simtomas sa African Swine Fever (ASF), kini maoy panawagan ni Mayor Jose Jono Jumamoy sa iyang mga ka tagi-lungsod.
Sa usa ka mensahe nga gipagawas sa mayor sa iyang personal nga facebook page, Marso 19, gisugid sa batan-ong mayor nga may 12 na ka baboy ang nangamatay nga nagpakita ug timaan o simtomas sa ASF.
Ang ASF, usa ka labing mananakod nga sakit sa baboy, nga dili man makadaut sa tawo, apan ang tawo nga makahikap sa karne o dugot, o magpakaon sa iyang salin sa kusina ngadto sa iyang baboy, makapakatag sa kagaw nga hinungdan sa pagkuyanap sa sakit sa iyang silinganan.
Kon mapasagdan, mahimo sa ASF nga puohon ang tanan nga baboy sa usa ka lugar.
Dayag sa mayor nga ila na nga namatikdan ang simtomas sa sakit sa duha niini ka barangay.
“Kini giimbestigaran na sa atong agriculture team, samtang gipailawom na sa Rapid Antigen Test (RAT) ang mga baboy nga nagpakita ug simtomas sa ASF,” taho sa mayor ngadto sa iyang mga konstituwente.
Dugang sa mayor nga nagpadala na ang lungsod ug blood samples alang sa confirmatory tests ngadto sa OPV. Kini usab ipadala sa OPV ngadto sa Department of Agriculture (DA) laboratory sa Sugbo, apan kasagaran nga nagpositibo sa RAT, makompirmar usab nga positibo sa DA.
Samtang nagpaabut ang lungsod sa opisyal nga confirmation sa ilang mga blood samples nga gipadala, ming-awhag ang mayor sa. pagpalig-on sa biosecurity measures sa mga baboyan.
“Atoang giawhag ang tanan nga mas pahugtan pa nato ang biosecurity sa atong mga kababoyan,” aghat sa mayor, samtang giawhag usab sa OPV nga bantayan sa mga silinganan nga walay laing tawo o mananap ang mkasulod sa tangkal sa baboy, kay kini na usab ang magdala sa kagaw para makagawas.
Kinahanglan usab nga ang tawo nga makaduol sa mananap nga gidudahang may sakit, magdis-infect sa dili pa mosulod sa balay, ug kadtong balay sa tagbalay nga may nataho nga pangasakit, magpahimutang nag foot bath nga tumban sa mga mosulod ug mogawas sa balay.
Mosunod kita sa mga protocols nga gimandi sa Provincial Government ug sa OPV, matud sa mayor.
Isip panapos, dugang aghat sa mayor, “Kon aduna kamoy baboy nga nagpakita ug simtomas sa ASF, palihug report dayon sa BALA o sa Municipal Agriculture team sa munisipyo.”
DILI LANG SA KADAGATAN Kay apil ang mga sakop sa Philippine Coast Guard sa team nga magbantayaron dili makakatag ang ASF, sila ang nagbabag sa mamalitay’g baboy aron sutaon kon may papeles ba kini nga nagpamatuod nga nag baboy nga gikarga, luwas sa ASF. (Hulagway gikan sa PIA-Bohol/PCG Candijay Station)
Corella naghimo’g Inter-school Junior fire brigade Olympics
Sinulat ni Rey Anthony Chiu
Sa pagmatuod nga may igo nga kapasidad ang mga molupyo, ilabi na sa mga lugar nga delikado ang sunog, malampuson nga napakita sa mga taga Corella, nga kaya sa ilang mga kabataan nga una nga moresponde sa sunog hangtud makaabut na ang bombero.
Sa LGU Corella First Inter-School Fire Olympics, nga gipasiugdahan sa tinabangay nila ni Mayor ManJu Lim ug sa Bureau of Fire Protection Municipal Fire Station uban ni Station Chief Dave Caga, gikapakita sa mga estudyante nga nagcomprise sa mga junior fire brigades sa nagkadaiya nga tunghaan sa sekondarya sa lungsod nga pwede nila nga iresponde sa luwas nga paagi ang sunog.
Ug kay nahitabo sa buwan sa Fire Prevention, mas napahaum sa mga estudyante sa Corella National High School, Canangcaan National High School ug sa Lance Sci Academy nga ikapakita ang ilang mga kapasidad nga mobuhat sa trabahoon sa usa ka tinuod nga bombero.
Sa mga lumba nga gihimo, gipakita ang koordinasyon, kahanas ug kaabtik sa mga indibidwal nga sakop sa brigade, ang abilidad sa pagsul-ob sa fire suit, dali nga paglatag sa firehose ngadto sa lugar nga nasunogan, ilabi na kon dili na masulod sa firetruck, ang koordinasyon sa paggunit sa firehose ug pagpasirit ngadto sa tinubdan sa kayo, pag-akses sa mga lugar nga nasunog ug ang pagpas-an sa mga mamahimong biktima nga tawo sa usa ka fire incident.
Gidayeg usab ni Provincial Disaster and Risk Reduction Management Officer Dr. Anthony Damalerio, ang BFP sa pagpaseguro nga mahatagag prayoridad ang pag-ugmad sa mga kapasidad sa katawhan, ilabi na ang pagtubag sa kabataan sa katalagman.
“Ang mga makat-onan dinhi, maghatag ug dugang panudlo sa katawhan sa disiplina ug paglahutay sa mga katalagman nga mahimong moigo sa mga panimalay ug sa komunidad,” matud ni Damalerio.
Kahinumduman nga sa miaging tuig, gihimo usab sa lungsod ang ika duha nga Corella Fire Olympics didto sa Plaza sa lungsod.
Kini giapilan sa LGU Search and Rescue Team ug sa mga Community Fire Auxiliary Groups (CFAG) sa walo ka mga barangay sa lungsod sa Corella.
Ang pag-organisa sa mga CFAGs, ilabi na sa mga school based junior fire brigades, usa sa mga nakit-an nga mga maayong bansay aron pagpilo-pilo sa kapasidad sa mga bombero sa BFP, nga kasamtangan pa nga dili arang makaresponde tungod sa ilang kadaghanon batok sa katawhan nga ilang giserbisyohan.
Sa taho ni Bohol Fire Marshal Raul Bustaliño, sa 93 ka fire trucks ug 711 ra ka mga personahe, ug layo pa kini sa gikinahanglang manpower complement sa mga fire trucks.
Gawas pa, sa sunog, daku na kaayo ang kadaut kon dili kini marespondehan sa unang singko minutos, mao nga importante nga may una nga makaatiman niini, samtang nagsingabut pa ang mga kabomberohan.
Gawas usab sa mga CFAG sama sa high school students auxiliary fire brigades, gipaseguro usab sa mga taga BFP nga ang mag tunghaan, may mga himan sa pamatay sunog sama sa automatic sprinkler systems ug fire alarms sa mga bag-ong buildings, fire extinguishers ug pamatay-kayo sa mga daan nga buildings lakip na ang importante nga regular nga fire drills.
CHAMPIONS. Mas mahimong kampante ang mga komunidad kon nasayud sila nga may andam nga sistema nga molihok kon may katalagman, ang pagmugna hinuoon ani nga sistema, nagkinahanglan sa dedikasyon sa mga nangulo. (Hulagway gikan sa PIA-Bohol/PDRRMO)
1 lang ka lugar sa Bohol ang gipaubos sa area of concern
Sinulat ni Elvira Bongosia
Usa lang ka lungsod sa lalawigan sa Bohol ang gibutang sa Commission on Elections (Comelec) ubos sa yellow category subay sa Mayo 2025 midterm polls.
Atol sa Provincial Command Conference niadtong Biyernes, si Provincial Election Supervisor Atty. Eliseo Labaria miingon nga ang lungsod sa Buenavista mao lamang ang lugar nga area of concern sa tibuok lalawigan.
Base sa kriterya nga gitakda sa kapolisan, ang green walay hinungdan nga kabalak-an, ang yellow adunay kasaysayan sa kagubot sa politika, ang orange adunay presensya sa mga armadong grupo, ug ang pula kritikal o adunay grabeng kabalaka nga mahimong mogarantiya sa pagkontrolar sa Comelec.
Ang hepe sa Philippine National Police-Provincial Operations and Management Unit nga si PMaj. Joseph Lopena nagkanayon nga ang Buenavista gipaubos sa yellow category base sa election related incident niadtong 2023 Barangay ug Sangguniang Kabataan Election diin adunay nahitabong pagpamusil sa Barangay Cangawa diin usa ka konsehal sa munisipyo ang gipusil-patay.
Alang sa 2025 midterm election, 3 ka kandidato ang magtigi sa pagka gobernador/bise gobernador, 105 sa mayor, 96 sa bise mayor, 26 sa Sangguniang Panglungsod ug 851 sa Sangguniang Bayan.
Alang sa mga kandidato sa pagka-Representante, 4 ang magtigi sa Unang distrito ug tag-2 sa Ikaduha ug Ikatulong distrito.
Samatang sa mga kandidato sa Sangguniang Panlalawigan, 8 ang magtigi sa Unang distrito, 5 sa Ikaduhang distrito, samtang 9 sa Ikatulong distrito.
May kinatibuk-ang 18 ka mga kandidato ang modagan nga walay kontra – 10 ka mayor ug 8 ka bise mayor, base sa datos nga gipresentar atol sa Provincial Command Conference.
Ang gipahigayong Provincial Command Conference sa Commission on Elections-Bohol niadtong Marso 21, 2025 sa syudad sa Tagbilaran aron makig-alayon ug makig-estratehiya sa mga mahinungdanong ahensya aron masiguro ang seguridad, integridad, ug hapsay nga pagpahigayon sa umaabot nga 2025 National ug Local Elections. (Hulagway gikan sa PIA7-Bohol)
PhilHealth gilibkas ang 45-day benefit limit
Sinulat ni Elvira Bongosia
Gilibkas sa Philippine Health Insurance Corporation (PhilHealth) ang 45-day benefit limit sa tinguha nga himuong “unhampered” ang serbisyo sa state health insurer.
Sa usa ka pahayag, ang presidente ug CEO sa PhilHealth nga si Edwin Mercado miingon nga ang 45-adlaw nga limitasyon sa benepisyo usa ka “outdated cost-containment strategy” nga nagpasiugda sa panginahanglan sa pagtabon sulod sa kapin sa 45 ka adlaw alang sa pipila ka mga kondisyon.
“Naiintindihan natin kung bakit ito inilagay noon, ngunit, sa pagbabago ng ating payment mechanism, napapanahon na rin talagang repormahin ito,” matud pa ni Mercado sa usa ka pahayag.
Ang 45-day benefit limit mao ang usa ka lagda sa PhilHealth diin ang mga miyembro adunay katungod sa labing taas nga 45 ka adlaw nga confinement matag tuig sa kalendaryo, ug diin ang ilang mga kwalipikado nga mga dependent nagbahin sa usa ka lahi nga labing taas nga 45 ka adlaw nga confinement matag tuig sa kalendaryo, subay sa Republic Act 7875 sa National Health Insurance Act, ingon nga giusab.
Giila na kaniadto sa PhilHealth ang panginahanglan sa pag-cover ug sobra sa 45 ka adlaw alang sa pipila ka mga kondisyon. Busa, ang paglugway sa gidaghanon sa mga sesyon nga nasakop sa among mga pakete sa hemodialysis – gikan sa una nga 90 hangtod sa karon nga 156 nga mga sesyon. Ang social health insurance karon nagpalapad niini nga katumanan sa pag-isa sa 45 ka adlaw nga limitasyon sa benepisyo.
Ang PhilHealth nagpahinumdom nga ang pag-angkon sa mga benepisyo kinahanglang i-base sa saktong medikal nga indikasyon, panginahanglan, ug pag-align sa plano sa pagtambal sa pasyente, ug kinahanglang mosunod sa halapad nga gidawat nga sumbanan sa pag-atiman, Department of Health (DOH)-approved Clinical Practice Guidelines (CPGs), ug/o PhilHealth Circulars sa kalidad nga mga sumbanan.
Aron masiguro ang responsable ug epektibo nga pagpatuman niini nga palisiya, ang PhilHealth hugot nga magmonitor sa mga admission sa pasyente, readmissions, ug paggamit sa benepisyo nga molapas sa 45 ka adlaw. Ang pagsunod sa pasilidad sa kahimsog sa mga sumbanan sa klinika ug mga lagda sa pag-reimbursement hugot nga susihon pinaagi sa Health Care Providers Performance Assessment System (HCPPAS).
Ang mga pasilidad sa panglawas gi-awhag usab sa pagpatuman sa komprehensibo nga mga polisiya sa tibuok organisasyon nga nakapunting sa kalidad ug pagpauswag sa performance. Kini mahimong kritikal sa pagtutok sa PhilHealth sa pagdasig sa mga serbisyo nga motultol ngadto sa labing maayong resulta.
Alang sa dugang mga detalye sa PhilHealth Circular 2025-0007, ang mga miyembro mahimong motawag sa 24/7 touch points sa PhilHealth sa (02) 866-225-88 o sa mga mobile numbers (Smart) 0998-857-2957, 0968-865-4670, (Globe-78) 0917-1109812. Mahimo usab kini i-download sa www.philhealth.gov.ph.
NIA-7 nipasalig sa MADFIA sa hingpit nga suporta sa ilang pagpuli sa operasyon sa Malinao Drip IS
Sinulat ni Elvira Bongosia
Ang National Irrigation Administration (NIA) Region VII, ubos sa pagpangulo ni Acting Regional Manager Engr. Antonio B. Gujeling, nipasalig sa Malinao Dam Federation of Irrigators Associations (MADFIA) sa hingpit nga suporta sa ahensya samtang nangandam sila sa pagpuli sa operasyon sa Malinao Drip Irrigation System.
Sa gipahigayong preparatory meeting niadtong Marso 14, 2025, sa Bohol Integrated Irrigation System (BIIS) Conference Room sa lungsod sa Pilar, gipasiugda ni Gujeling ang kamahinungdanon sa kolaborasyon sa mga lider sa irrigators associations (IA).
Matud pa ni Gujeling nga ang pagpangulo sa mga IA isip mga Presidente mahinungdanon gayud, ug ang pagsinabtanay sa usag-usa ug pagtinabangay sa tanan nga mga stakeholder mahinungdanon.
Gidugang pa niini nga angay nga mapasigarbuhon sila nga mahimong bahin niining groundbreaking nga pilot project ug gipasalig ang hingpit nga suporta sa NIA-7 kanila.
Ang sesyon sa buntag niadtong Marso 14 nagtutok sa pagpaila ug pag-orient sa mga partisipante sa mga bahin sa Malinao Drip Irrigation System. Ang Agronomist nga si Nena E. Mawalic sa Superb711 Engineering and Construction, nagsilbi isip speaker, nga nihatag ug importanteng kahibalo kabahin sa operasyon ug pagmentinar sa drip irrigation system.
Samtang ang sesyon sa hapon gipahinungod sa usa ka planning-workshop, nga nagpadali sa mga diskusyon sa pagdumala sa operasyon sa sistema. Ang Irrigation Development Unit Head nga si Felipa Dañoso ug Senior Irrigators Development Officer Felix Guioguio nangulo sa hands-on nga kalihokan nga gitumong sa paghatag sa mga lider sa IA ug praktikal nga mga estratehiya aron epektibong mapadagan ang sistema.
Ang Malinao Drip Irrigation System gikonsiderar nga pilot project nga gitumong sa pagpausbaw sa episyente sa irigasyon ug pagpalambo sa malungtarong mga pamaagi sa agrikultura.
Ang paningkamot sa NIA sa paghatag-gahum sa mga lider sa IA pinaagi sa husto nga pagbansay ug teknikal nga tabang nakita nga usa ka mahinungdan nga hinungdan sa pagsiguro sa kalampusan ug pagka-replicability sa proyekto sa ubang mga lugar nga gitabangan sa NIA sa umaabot.
Ang greenhouse ug ang drip irrigation system nga gitakdang e-takeover sa Malinao Dam Federation of Irrigators Associations (MADFIA) (Hulagway gikan sa NIA-7)
PhilHealth ABT Package naglangkob sa P5,850 alang sa mga serbisyo batok sa rabies
Sinulat ni Elvira Bongosia
Sa pagsumpo sa kabalaka sa rabies sa nasud karong National Rabies Awareness Month, gisubli sa Philippine Health Insurance Corporation (PhilHealth) nga adunay benefit package nga ma-avail sa mga miyembro aron malangkob ang mga serbisyo batok sa rabies.
Ang Animal Bite Treatment (ABT) package, nga gi-usbawan ngadto sa P5,850 gikan sa kanhi P3,000, naglangkob sa importanteng post-exposure prophylaxis lakip na ang rabies vaccine ug rabies immune globulin alang sa hinanaling proteksyon, lokal nga pag-atiman sa samad, tetanus toxoid ug anti-tetanus serum, antibiotics, ug mga gamit nga naglakip sa mga syringe, alcohol, ug antiseptics.
Ang ABT Package mahimong makuha sa kapin 700 ka accredited ABT Package Providers sa tibuok nasud, ug padayon pa kining dugangan sa PhilHealth.
Ning bag-o lang, gipahibalo sa Department of Health (DOH) nga alang sa tuig 2024, ang tanang 426 nga natala nga kaso sa rabies miresulta sa pagkamatay. Kap-atan ug lima ka porsyento (193) niini mga pinaakan gikan sa mga binuhi nga hayop, ug sa maong porsyento, labaw sa katunga ang wala nahibal-an nga kahimtang sa pagbakuna.
“Hinihikayat natin ang ating mga miyembro na huwag mag-atubiling magpatingin kung sila ay kinagat o di kaya’y kinalmot ng hayop, alaga man o hindi. Ang rabies ay isang lubhang nakamamatay na sakit ngunit maaari itong maiwasan kung agarang mabibigyan ng bakuna,” matud pa ni Dr. Edwin M. Mercado, PhilHealth President ug CEO.
Ang rabies nagpabilin nga usa ka hulga sa kahimsog sa kalibotan, hinungdan sa 60,000 hangtod 70,000 nga gitaho nga pagkamatay matag tuig.
Ang Pilipinas ika-unom sa mga nasud nga adunay pinakataas nga insidente sa rabies. Gani, gikan sa Enero 1 hangtod Marso 1 ning tuiga, 55 na ka kaso sa rabies ang natala.
Gipahinumdoman ang publiko nga ang unang lakang sa paglikay sa rabies mao ang pagpabakuna sa mga binuhi nga hayop.
Gi-awhag sa PhilHealth ang publiko nga mahimong responsableng tag-iya ug binuhi.
Alang sa dugang detalye sa anti-rabies benefits ug uban pang packages, ang mga miyembro mahimong motawag sa PhilHealth’s 24/7 touch points sa (02) 866-225-88 o sa mobile numbers (Smart) 0998-857-2957, 0968-865-4670, (Globe) 0917-77-18.
Ang PhilHealth nakighiusa sa National Rabies Prevention and Control Committee sa ilang kampanyang rabies-free nga mga iring ug iro ug kaluwasan sa pamilyang Pilipino pinaagi sa Animal Bite Treatment (ABT) package nga gi-usbawan ngadto sa P5,850 gikan sa kanhi P3,000. (Hulagway gikan sa PhilHealth)
BALAK
SA BABA SA KAMATAYON
Sinulat ni Engr. Rogelio Podelino
Kasagaran sa tawo mangandam apike na kaayo
Kon layo pa ang higayon wala’y gusto
Peru ang mapait nga kamatu-uran sa kinabuhi
Kamatayon angay pangandaman sa mga buhi
Ang tawo mapahimuslanon sa mga higayon
Kalibutanong kalipay sa tanang higayon
Wala niya hunahuna-a kinabuhi may utlanan
Kay ang tawo’ng buhi may katapusan
Labi na ang tawo nga adunahan
Abi niya ug mapalit sa salapi ang tanan
Kay siya guihangad sa katilingban
Tungod sa iyang pagka gamhanan
Tawo ayaw gayud hikalimti
Ang napulo ka sugo sa GINO-O permanente
Nagpakamatay ang ANAK katawhan maluwas
Guikan sa ilang mga sala aron makalingkawas
Busa tawo kamatayon dili angay kahadlokan
Sa kanunay imo kining pangandaman
Kay ang kamatayon bugtong gangha-an
Paingon sa IYANG gingharian
Karon tawo taas ang panahon pagpangandam
Kon moabot na ang imong oras ikaw andam
Ibabaw sa krus si JESUS labihan ang pag-antos
Diha SA BABA SA KAMATAYON ni JESUS katawhan natubos sa lubos