Init pa’s kape
Ni Ronie Oyao Orillosa
Aron kuno ikaw matagbaw sa kalami sa kape, kinahanglan nga imo kining imnon nga init pa ug nag aso-aso pa. Kung mabugnaw na gani ang kape, mawala ang iyang gahum uban sa pagkawala sa imong gadasig ug kahidlaw sa pag-inom sa maong kape.
Sa atong lalawigan, aduna’y mga tawo ug mga panghitabo nga matawag nato nga “INIT PA’S KAPE” ang kahimtang ug sitwasyon, maoy hinungdan nga ato gyud kining pagahisgutan ug pagatuki-on dayon kay unya ug mabugnaw ang iyang alisngaw ug uban sa abog, ilupad sa hangin ug mahanaw.
Dili pa lang dugay, gibugal-bugalan ang akong pagkatawo sa usa ka tinubdan sa Facebook nga gihinganlan ug “Bohol News Alert”. Ang lapok nga ilang gilabay nako, mas laksot pa sa ilang panagway ug mas langto pa sa ilang hugaw. Pulos pagbutang-butang ang ilang gihimo nga bisan ug usa ka pudyot sa kamatuoran, dili gyud nila ikahatag.
Mao kini ang nag-aghat niining inyong “Baruganan sa Manlalaban” sa paghimo ug mga lakang aron masakpan ang tampalasan nga “kawatan” sa dungog sa akong pagkatawo. Gitabangan kita sa atong mga kahiglaan ug kapareyentehan sa atong kawsa nga mupatigbabaw ang hustisya. Salamat sa Kahitas-an kay lamdag na ang gigikanan sa maong peke nga balita ug ang responsable sa maong buhat “INIT PA SA KAPE” nga nagtago sa usa ka lungga.
Nganong nagtago man siya? Tungod ba kay aduna kini siya’s dakong kalambigitan sa daghang mga dautang binuhatan? Nagtrabaho ba kini siya sa usa ka buhatan nga gigamit ang dili niya tinood nga pangalan? Nakig-ipon ba kini sa usa ka binuhat bisan ug aduna siya’y kabilinggan sa kinabuhi? Misibat pa gyud kini sa iyang gigikanan sa Mindanao tungod kay daghan siya’g gidaganan nga mga atraso didto? Sa lain nga pagkasulti, INIT PA UNYA SA KAPE (puhon) ang pagtaral kaniya ngadto sa bilangguan sa tukmang panahon,
Sa laing bahin, migawas na ang resulta sa usa ka survey kabahin sa atong mga kandidato sa Bohol sa uma-abot nga piniliay. Sa pagkakita sa maong resulta, adunay usa ka kandidata nga INIT PA’S KAPE nga mibutang sa iyang FB wall nga iya na nga gipaniguro ang iyang kadaugan. Wala man unta kini’y problema. Apan sa iyang pagtaho sa iyang nahimutangan sa maong survey, INIT PA’S KAPE nga iyang gipatigbabaw ang iyang pagka-garbosa, pagka-mapahitas-on, ug pagka mabiay-biayon batok sa iyang mga kaatbang sa polutika. Kini ba ang klase sa kandidata nga atong dasonan sa piniliay?
Ngani pa man nga miingon siya nga iyang “yak-an” gyud kuno (uban sa iyang kapikas sa kinabuhi) ang usa ka lungsod aron ang ilang mga kontra “ilubong” gyud panahon sa piniliay.
Unya, dili pa lang dugay, mihimo sa usa ka pakigpulong ang atong gobernador didto sa lungsod sa Inabanga. Ug sa walay kukalooy ug delicadeza, INIT PA’S KAPE nga iyang gibiay-biay ang personal nga gamit sa iyang kaatbang sa politika, ang kasamtangang bise mayor sa maong lungsod. Miingon ang gobernador nga “lawlaw ang panty” sa maong bise mayor ug nga hinimo kini sa material nga ubos kaayo ang kalidad. Mao kini ang hinungdan nga giyaga-yagaan na hinoon ang maong babaye sa mga mitambong sa kalingawan ug giyubit ug gikataw-an.
Sa pagkadungog pa sa mga katawhan nga milaban sa maong bise mayor, INIT PA’S KAPE ang maong mga dumadapig nga mipakaylap sa Social Media sa ilang panghinaway sa gipanulti sa atong gobernador.
Busa mga kahigalaan, kinahanglan nga INIT PA’S KAPE kitang magbantay sa atong katilingban kay suma pa sa akong sanglitanan, “Walay maayong binuhatan nga magbunga ug dautan.”