Unsay Angay Makat-onan sa Kalamposan ni MVP?
Ni ELEAZAR TUTOR ACAMPADO
SA usa ka tawo nga gustong magmalamposon sa kinabuhi ilabi na sa pagnegosyo, dili mawala sa ilang talaan sa mga panag-ingnan ang ngalan nila ni Henry Sy, John Gokongwei, Lucio Tan ug uban pang taipan. Apan dili usab maiwit sa listahan sa mga inspirasyon si Manny V. Pangilinan, ang tsirman ug presidente sa Metro Pacific Investments Corporation ug instrumental sa kalamposan sa dagkong kompaniya sa Pilipinas sama sa Philippine Long Distance Telephone Company kun PLDT, Smart, Talk N Text, TV5, Meralco, Maynilad, ug uban pa.
Mahimong dili pinalabi si MVP sa iyang amahan ug dili paborito sa iyang inahan, apan ang iyang mga paningkamot nga makabuhat og maayo sa tanan niyang gimbuhaton naghatag niyag kahigayonan nga makaangkon og rekognasyon. Labi pang dupot ang iyang pagtrabaho, ang iyang pagtuon ug ang iyang pagpaningkamot nga maangkon ang gipangandoy niyang kalamposan.
Nakakuha siyag pagtulun-an sa iyang mga ginikanan ilabi na sa iyang amahan nga nagsugod lang isip mensahero sa Philippine National Bank ug misaka ang ranggo hangtod nga nahimong presidente sa Traders Royal Bank. Ug usa sa labing bililhon niyang nakat-onan sa iyang amahan ang bili sa pagkamatinud-anon nga maoy gihimo niyang gabayan sa pagkab-ot niya sa iyang kalamposan.
Alang niya, ang kalamposan mahimong mamunga gikan sa naandan nga kinaiya diin nag-apil na niini ang pagkugi, pagtrabahog maayo ug pagbuhat sa mga gimbuhaton sa hustong paagi.
Ang matag kalamposan, gamay man kini ug dako, magsugod nga dunay pasalig nga manguna sa tanan, nga nagpasabot nga magtuon og maayo, dunay lig-ong pamaagi sa pagtrabaho ug dedikasyon sa pagserbisyo.
Kon ang mga tinun-an karon sa elementarya ug hayskol, dili moeskuyla kon dili pabawnan og 50 pesos, panaminan nato si MVP. Pabawnan ra tawon siyag 25 sentabos apan wala siyay reklamo sa iyang pag-eskuyla sa elementarya ug hayskol sa San Beda College sa Manila, diin gipaigo niya sa pagpalit og usa ka botelyang Coke ang 10 sentabos, 5 sentabos sa kraker ug 10 sentabos plete sa bus inigpauli niya gikan sa Legarda hangtod sa San Juan.
Gani, kasagaran magbaklay siya matag Biyerns paingon sa Quiapo kay kanunayng puno ang mga bus ug dyip. Wala niya ikaulaw nga makit-an sa iyang mga klasmeyt ni maibog nga malabyan niadtong mga hinatod ug kinuha og sakyanan sa ilang tunghaan.
Nasabtan na niya kaniadto nga ang kinabuhi sa tawo dunay iya-iyang baraha nga gihawiran. Maong iyang gisultihan ang kaugalingon nga magtuon siyag maayo ug magkugi sa pagtraho nga igo nga makahatag og kaharuhay sa iyang kaugalingon ug sa iyang pamilya. Ug wa makawang ang iyang pagpaningkamot kay nakakuha siyag libreng pagtuon sa Ateneo de Manila University ug ingon man sa Wharton School sa University of Pennsylvania.
Maoy sugyot niya sa mga kabataan nga magsugod sa kaugalingon nilang negosyo imbes nga mahimong empleyado human sa ilang pagtuon sa kolehiyo ug magsugod na sa tinuod nga pag-atubang sa mga pagsulay sa kinabuhi. Anaa nila ang labing maayong oportunidad nga moatubang sa mga risgo ug kapakyasan ug mobangon gikan niini.
Ang kalamposan ug kapakyasan mga impostor lang ug mahimong mahanaw. Busa angayng tagamtamon ang kalamposan samtang mahimo kay ang tanan magdahom nga molabaw pa niini ang imong makab-ot. Sahi sa basketball, ang kadaogan mopataas sa ekspektasyon sa mga sumusunod sa team nga labi pang modulag maayo ug magmadaogon sa sunod higayon nga mosulod kini sa kort.
Maayo ang mahimong kabos basta dili magpadayon hangtod sa hangtod. Natawo man tuod si MVP nga kabos apan ang pagkakabos wala matawo diha niya. Ug dili usab kini angay matawo diha sa imong kaugalingon. Mahimo kaayo nimo ang unsa man nga gusto nimong kab-oton karon ug sa sunod nga mga adlaw. Mahimong bagyohon usahay ang imong mga adlaw, apan molurang ra kini ug mosubang ang masanag nga kabuntagon.
Ang tawo angay nga mobangon gikan sa iyang kapakyasan. Mobarog gikan sa iyang pagkalup-og. Ang mga kapakyasan temporaryo lang ug mahimong mapapas. Mahimo kang makarekober gikan sa mga kapakyasan busa walay punto nganong mangitag Baygon ug lubid o mamugsay sa halayong lawod sa kawalaan. Mahimong batyagon ang kasub-anan sa kapildehan, apan angay lang usab nga susihon nganong napakyas. Ug wala kitay mahimo, nahitabo na busa, move on. Kay walay sugilanon sa tawo nga nakaangkon og sento porsento nga kalamposan.
Ang pag-antos magpalig-on sa imong kinaiya. Ang kinaiya magpalig-on sa imong pagtuo. Ug sa kataposan, ang hugot nga pagtuo nga makab-ot ang imong gitinguha dili makawang.
(Si Eleazar Tutor Acampado, kanhi staff writer sa Bisaya Magazine. Nakadaog na sa Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.)