Ni: Jes B. Tirol

Kiling 20, 2025

Ang Taguhom Sa Kamatayon Ni Hesukristo Nga Nataligam-an

(The Miracle During Jesus Christ’s Death That is Overlooked)

Pasiuna

Ang atong Ginoong Hesukristo adunay daghanan kaayo nga mga taguhom (miracle) nga nabuhat nga nahisulat sa Balaang Kasulatan. Ang Balaan nga Kasulatan (Holy Bible) nga atong pagakutlóan sa mga sugilanon mao ang “Ang Santos Nga Bibliya; Edisyon Katolika”. Adunay Nihil Obstat (Walay Namatikdang Sayop) ni Labing Tangba (Most Reverend) Leopoldo Tumulak, DD, ug Imprimatur (Official license to print = Tanol nga gitugotan pagpatik) ni Biki (Cardinal) Ricardo Vidal, DD, Bansunát (Archbishop) sa Sugbo.

Talagsaón Nga Taguhom

Ang labing talagsaon nga taguhom (miracle) mao ang pagbanhaw sa patáy. Sa Ebanghelyo ni San Lukas Anib 7, tudling 11 (Lukas 7:11) nahisulat nga si Hesukristo ug iyang mga tinun-an miadto sa dakbayan sa Nain. Ilang nasugatan ang patayng lawas sa usa ka lalaki nga padulong na ilubong. Ang maong minatay mao ang bugtong anak sa usa ka biyuda. Naluoy si Hesukristo sa maong babaye nga balo ug gibanhaw ni Hesukristo ang minatay.

Sa Lukas 9: 49, atong mabasa ang pagbanhaw sa anak babaye ni Jairus. Sa Ebanghelyo ni San Juan 11:44, atong mabasa ang pagbanhaw ni Ginoong Hesukristo kang Lazaro nga igsuon ni Marta ug Maria Magdalena.

Nabanhaw si Hesukristo

Ang upat (4) ka mga Ebanghelyo sa Balaang Kasulatan nagahisgot sa pagdakop, paghusay, paghukom, pagdagmal, paglansang sa balabag, ug kamatayon ni Ginoong Hesukristo. Kining maong sugilanon mao ang giimato (commemorate) karong panahona nga atong gihinganlan og Balaan nga Pitlaw ug Pasko sa Pagkabanhaw.

Ang kanunay nga hisgotan sa mga simbahan mao ang pito (7) ka kataposang mga pulongán (phrases) nga gibatbat ni Hesukristo samtang nagbitay siya sa balabag (cross). Ug sayo sa buntag sa adlaw nga Ligidligid (Sunday) mao ang pag-imato sa pagkabanhaw ni Ginoong Hesukristo.

Ang Nataligam-an

Ang nawani sa sugilanon ug nataligam-an sa mga Kristohanon mao ang taguhom sa pagkabanhaw sa mga balaan or mga santos nga didto sa lubnganan atol gayod sa pagkamatay ni Hesuskristo.

Mabasa sa Ebanghelyo ni San Mateo 27: 50-53 ang mosunod, “Ug misinggit pag-usab si Jesus sa makusog nga tingog ug unyà namatay. (51) Ug unya, ang tabíl sa templo nagisi gikan sa taas ngadto sa ubos, ug milinog, ug nangapikas ang mga bató; (52) nangaábli ang mga lubnganan, ug nabanhaw ang mga lawas sa mga santos nga nangamatay. (53) Ug nanggawas gikan sa mga lubnganan. Human sa iyang pagkabanhaw, nangadto sa balaang siyudad ug nagpakita sa daghang mga tawo.”

Batid sa Linog

Ako usa ka batid sa linog (expert in earthquakes) ug na dapit ang akong kasibot sa nahisulat sa San Mateo 27: 50-53, apan wala pa gayod ako makahibalag og agwatato (profound explanation) kabahin niining linog nga nakapabanhaw sa mga minatay. Ang makadapit ra ba sa pagtagad kay ang mga balaan o mga santos lamang ang nangabanhaw. Ang mga badlongon ug mga makasasala walâ mabanhaw.

Ang kaubang tulo (3) ka mga Ebanghelyo sa Balaang Kasulatan walâ maghisgot sa linog. Si San Mateo lamang ang naghisgot sa linog nga nakapabanhaw sa mga minatay sa higayon sa pagkamatay ni Ginoon Hesukristo. Ngano kahâ nga nangabanhaw man ang mga minatay sa lákbang (instance) nga namatay ang atong Gino-o? Mao kini ang taguhom nga angay natò nga tukibon.