The Municipality of Jagna FB Page wrote this:
“SENADOR LACSON MIDAYEG SA KALAMBUAN SA JAGNA UBOS SA LIDERATO NI MAYOR RAÑOLA. Gipakita ni Senador Panfilo “Ping” Lacson (left) ang iyang dakong pagdayeg sa kalambuan sa lungsod sa Jagna ubos sa liderato ni Mayor Joseph Rañola (right) atol sa iyang pagbisita niadtong Martes, Abril 29, 2025. Diha sa iyang pagbisita, giangkon ni Senador Lacson nga personal niyang gustong makita ang mga kalambuan nga kanunay gipasigarbo ni Mayor Rañola sa ilang mga panagtagbo sa Manila. ‘Kaya ako ang pumunta rito, curious talaga ako makita. Tuwing dadalaw siya sa office, sinasabi niya yung mga napag-usapan natin, yung napagkasunduan natin—kung paano mag-implementa ng proyekto sa isang bayan ng tama at matino. Kaya sabi ko, pagpunta ko doon, gusto ko makita yung ipinagmamalaki mong pagbabago sa bayan ng Jagna,’ matod ni Lacson. Human sa pagbiya sa Tagbilaran, si Senador Lacson ug si Mayor Rañola mipadulong dayon sa lungsod sa Jagna. Sa ilang pag-abot, gisalubong sila sa tradisyonal nga ‘patunob’ ug ang makasaysayanong ‘Sinoog Estokada’ nga nagpakita sa pagpasidungog sa mga halangdong bisita. Gidala dayon sila sa bag-ong municipal building diin ilang gisaksihan ang ‘sabwag’ nga ritwal sa lungsod. Sa panagtagbo sa buhatan sa Mayor, ang Local Finance Committee sa lungsod mipresentar sa mga datos nga nagpakita sa transparency ug limpyo nga pamunuan sa administrasyon ni Mayor Rañola. Ang senador mipadayag sa iyang pagkadani sa katakos ni Mayor Rañola sa pagdumala sa budget sa lungsod, nga nagtudlo kaniya og lawom nga pagsabot sa National Budget. ‘I am so proud to be associated with Mayor JR dahil sa kanya ako natuto mag-scrutinize, magbusisi ng National Budget,’ dugang pa ni Lacson. Gisuroy usab ni Lacson ang mga proyekto nga gipatuman ni Mayor Rañola sulod sa 6 ka tuig niyang liderato sa Jagna. Nalipay siya nga personal niyang nakita ang tinuod nga epekto niini sa komunidad. Sa katapusan sa iyang pagbisita, gihulagway ni Senador Lacson ang Jagna isip usa ka modelo sa maayong panggobyerno sa tibuok nasud ug nagpamatuod sa nagkadakong reputasyon sa Jagna isip usa ka lungsod sa Bohol nga nagpalambo sa transparency ug epektibong serbisyo sa katawhan ubos sa liderato ni Mayor Joseph Rañola ug Vice Mayor Teofisto P. Pagar Jr.” Contributed photo