Bohol Light misalmot sa “Operation Hinlo” sa Tagbilaran
Sinulat ni Sheryl B. Paga
Ang Bohol Light aktibong miapil sa panawagan sa City Government of Tagbilaran ngadto sa mga katawhan sa pagtinabangay sa paghipos sa mga materyales pinaagi sa pagkuha sa mga tarpaulins nga may kalabutan sa eleksyon sugod niadtong Mayo 15, 2025. Nagpadayon ang pagpanghinlo sa syudad.
Sa walay pagduha-duha, and Bohol Light bulontaryo nga nagpadala sa mga linemen aron pagtabang sa pagpanghinlo sa kadalanan ilabi na sa mga lugar nga adunay mga dagko nga mga tarpaulins nga nagkinahanglan ug Manlift o Boomtruck.
Ang mga nakuha nga mga gamit sa eleksyon gisumite gilayon ngadto sa Tagbilaran City Hall alang sa pag-recycle niini pinaagi sa usa ka livelihood program.
Kini nga inisyatibo sa pagtabang sa cleanup drive nagpakita sa padayon nga pagsuporta sa Bohol Light alang sa kahinlo sa syudad sa Tagbilaran ug isip kabahin sa Corporate Social Responsibility ngadto sa kumonidad.
Daghang salamat sa tanang boluntaryo nga mga kaubanang establisemento nga pridabo nga nitabang usab sa pagkuha sa mga eleksyon materyals sa madasigong kooperasyon alang sa Tagbilaran!
Dugang kalamboan sa serbisyo ngadto sa konsumidor padayon nga gihimo sa BWUI
Sinulat ni Victor L. Tambis
Sa wala: ang mga tinugyanan sa BWUI samtang nag-ayo sa pumping unit # 13; ug dugang linya giladlad sa BWUI. Contributed photo
Aron mahatagan ug dugang pagpalambo sa serbisyo ngadto sa mga konsumidor, ang Bohol Water padayon nga naghimo sa mga kalihokan nga ang katuyuan mao ang paghatag ug dugang kauswagan sa operasyon sa panubig sa maong kompanya.
Gawas sa expansion sa mga pipelines ngadto sa mga barangays nga giserbisyohan sa city waterworks, sama sa barangay Taloto ug Barangay Cabawan, gihimo usab sa maong Kompanya ang pag acquire o pagpalit ug dugang mga ekipo aron nga magamit sa pagugmad sa operasyon.
Usa sa gitutukan ug gihatagan ug dakong pagtagad sa BWUI pagkakaron mao ang pagdugang sa mga tinubdan aron sa pagtagbo sa nagsaka nga panginahanglan sa tubig sa mga dapit nga gialagaran. Gilauman sa BWUI nga sa dili pa matapos kining tuig 2025 o sayo sa sunod tuig, aduna na usa’y laing mga tinubdan o pumping stations nga magamit aron madugangan ang pagkakaron supply sa tubig.
Sa bag-ohay pa lamang, ang Bohol Water ug ang Civil Aviation Authority (CAAP), pinaagi sa Bohol-Panglao International Airport (BPIA) nagpirmahanay sa kontrata nga ang nauna mao na ang mo supply sa tubig sa operasyon sa maong tupahanan.
Atong kahinumduman nga ang BWUI mao usab ang nagsupply ug tubig sa contractor sa maong tugpahanan samtang gitrabaho pa kini ug hangtod nga nahuman.
Midagsang ang pag-abot sa mga turista sa Panglao sa 1st quarter sa 2025
Sinulat ni Elvira Bongosia
Ang unang kwarter sa 2025 nagpakita sa taas nga ihap sa mga turista nga nangabot sa isla sa Panglao, ilabina sa mga langyaw nga nangabot nga turista.
Base sa datos gikan sa Panglao Municipal Tourism Office, sa unang quarter ning tuiga, Pebrero 2025, nitala ug talagsaong peak nga 70,458 ka mga bisita.
Ang buwan sa Enero nakatala sa pag-abot sa 65,983 ka mga bisita, samtang ang Marso nakatala ug 55,431.
Si Panglao tourism officer Leonides Senica niingon nga posibleng tungod kini sa mga okasyon, long weekends, ug mas maayong promotional activities sa lungsod.
Bisan kung ang kinatibuk-ang pag-abot sa unang tulo ka bulan niining tuiga makita nga mas ubos kaysa sa parehas nga panahon sa 2024, si Senica miingon nga ang 2025 nga datos partial ug gikolekta pa.
Ang kinatibuk-ang bisita nga nangabot sa unang quarter sa 2024 mikabat sa 205,981, samtang ang partial guest arrivals sa samang quarter sa 2025 niabot na sa 191,872.
Masaligon si Senica nga ang katapusang tally gilauman nga molapas sa kasamtangan nga kinatibuk-an, ilabi na kung ang hingpit nga mga pagsumite madawat gikan sa mga establisemento sa accommodation.
“The data for 2025 is partial and still subject to increase as more reports are collected (Ang datos alang sa 2025 partial ug padayon nga motaas samtang mas daghang report ang makolekta),” pag-klaro ni Senica.
Gipakita usab sa datos ang 7.3 porsyento nga pagtaas sa mga langyaw nga nangabot (dili residente sa Pilipinas) gikan sa 102,757 sa 2024 ngadto sa 110,253 sa unang quarter sa 2025.
Si Senica miingon nga kini nagpaila sa usa ka mas lig-on nga internasyonal nga interes sa merkado o gipauswag nga accessibility.
Matud pa ni Senica, kini nga pagtaas nga uso, labi na sa mga langyaw nga merkado, mahimong magpakita sa positibo nga epekto sa nagpadayon nga promosyon sa turismo ug pagpauswag sa mga kahimtang sa pagbiyahe sa kalibotan.
Ang nag-unang 10 ka langyaw nga merkado sa isla alang sa unang quarter sa 2025 mao ang Korea (13,473), China (1,736), Taiwan (1,396), United States of America (1,622), France (1,122), Germany (823), Poland (742), Russia (728), Spain (617), ug Japan (692).
Ang Alona Beach sa Panglao. Ang Alona Beach usa ka gamay nga bahin sa tropikal nga paraiso sa isla sa Panglao, Bohol. Usa kini sa mga nag-unang destinasyon sa pagbiyahe sa Pilipinas tungod sa nindot nga puti nga balas nga baybayon, nindot nga asul nga tubig, world class diving ug tours. (Hulagway gikan sa PIA7-Bohol)
Hiposa na ang mga campaign materials
Sinulat ni Rey Anthony Chiu
Sulod sa lima ka adlaw mahuman ang piniliay, gimanduan ang mag kandidato u gang ilang mga partido sa paglangkat ug pagtangtang na sa ilang mga campaign materials ug tarpaulins, ilabi na kon kini nakasagabal sa mga pangpubliko nga lugar.
Segun sa Section 30 sa Commission on Elections (COMELEC) Resolution No. 11086, dili na kinahanglan pa nga mandu-an ug ipahibaw sa Comelec, ang kandidato u gang partido diin siya mipasilong, mao nay molangkat sa tanan nilang election propaganda, personal ma nila nga gasto o sa partido nga maoy nakabenepisyo sa propaganda nga gipatik, gipadayag ug gipakatap.
Kini samtang gipanawagan na usab sa mga environmentalists ang pagpatangtang sa mga election posters ug tarpaulins nga nakaduhig sa kaanindot sa kalikopan.
“Win or lose, remove your faces from public spaces,” aghat sa Plastic Free Bohol.
Kahugpungan nga nanguna sa kampanya pagpasalikway sa plastic nga dili madunot hangtud nga maoy kinaingnan sa kadaut sa kalikopan, ang Plastic Free Bohol nagkanayon: Naglaum kami nga inyo na nga kuhaon an gang mga tarpaulins, banners, posters, ug tanang matang sa campaign materials gikan sa kadalanan, mga poste sa koryente ug telepono, hangtud sa matag lugar sa mga pangpubliko nga espasyo.
Partikular usab nga gipanawagan sa grupo ang mga campaign material ug propaganda nga gipangbitaw sa mga kahoy ug gilansang dinhi.
Niini usab, si Obispo Alberto Uy, namahayag: Daghan ang nag-ingon nga ang mga Pilipino, maayo lang mupahimutang, apan dili kamao mo hipos, Dinhi sa Bohol, ato nga ipakita nga dili kini tinuod.
Atoa na nga sugdan ug pangtangtang ang mga tarpaulis ug campaign posters ug sugdan na nato ug limpyo ang atong palibot.
Nahuman na ang elekesyon, mao nga daug man o pildi, kinahanglang atong limpyohan ang atong mga gipangkatag, panapos ni bishop Uy.
Aplikasyon alang sa Civil Service exam karong Agosto, gibuksan na sa Mayo 13
Sinulat ni Elvira Bongosia
Ang Civil Service Commission Region VII (CSCRO VII) nagpahibalo sa pagpahigayon sa Career Service Examination, Pen and Paper Test (CSE-PPT) alang sa Professional ug SubProfessional Levels sa Agosto 10, 2025.
Ang pagduso sa aplikasyon nagsugod niadtong Mayo 13 ug matapos sa Hunyo 11, 2025 o hangtod mapuno ang tanan nga mga slot sa eksaminasyon, kung asa ang mauna.
Matud pa sa CSC nga ang examination fee naa sa lima ka gatos ka pesos (P500.00).
Sa pagdawat sa mga aplikasyon, ipatuman ang FIRST-COME, FIRST-SERVED basis ug siradoan bisan unsang orasa sa dili pa ang deadline sa higayon nga mapuno na ang available nga mga slots.
Ang paagi sa pag-file sa mga aplikasyon hugot nga ipahigayon ONLINE sa usa ka FIRST-COME-FIRST-SERVED basis gihapon.
Alang sa mga mabdos, gipahibalo sa CSC nga kadto lamang dili lapas sa ilang ika-6 nga bulan sa pagmabdos sa Agosto 10, 2025 ang tugotan nga mag-aplay alang sa eksaminasyon subay sa CSC OM No. 10, s. 2021.
Hingpit nga gitambagan ang mga aplikante sa paghimo sa account sa dili pa ang Mayo 13, 2025, tungod kay ang grabe nga trapiko sa server gilauman sa unang adlaw sa pag-file sa mga aplikasyon sa eksaminasyon.
Alang sa kompletong pamaagi sa pag-apply, mahimong bisitahon kining link aron ma-access ang tibuok nga sulod niini nga advisory: https://tinyurl.com/CSEPPT10Aug2025.
Ang mga testing centers sa Central Visayas naglakip sa Cebu City, Danao City, Dumaguete City, Guihulngan City, Tagbilaran City, lungsod sa Talibon, Talisay City ug sa Larena, Siquijor.
Gipahibalo sa Civil Service Commission (CSC) nga ang Career Service Examination – Pen and Paper Test (CSE-PPT) para sa Professional ug Subprofessional nga lebel ipahigayon sa Agosto 10, 2025. Ang panahon sa aplikasyon magsugod sa Mayo 13 ug matapos sa Hunyo 11, 2025. (Hulagway gikan sa CSC/PIA)
Dugang ruta sa pangpublikong sakyanan, hapit na matinuod
Sinulat ni Rey Anthony Chiu
Nagkaduol na sa katumanan ang pangandoy sa mga kalungsuran nga mabutangan na ug mga ruta sa mga sakyanan ang ilang mga kadalanan aron may pangpublikong kasakyan ang ilang mga katawhan.
Kini kay gitunol na sa Land Transportation Franchising and Regulatory Board (LTFRB) ang Notice of Compliance (NOC) ug Special Notice of Compliance (SNOC) sngadto sa mga kalungsuran nga nagkugi ug himo sa ilang napasagdan nga Local Public Transport Route Plans (LPTRPs), nga karon, naaprobahan na sa buhatan.
Ang LPTRP maoy plano gikan sa mga kalungsuran nga nagdetalye sa mga ruta, mga klase sa sakyanan nga ipadagan dinhi, pila ka mga pangpubliko nga sakyanan ang magserbisyo sa ruta, ang gintang sa oras sa turno, mga pasilidad nga anaa sa ruta, ug giduso sa LGU ngadto sa LTFRB, aron mahatagan kini ug pagtugot nga makabaton ug Certificate of Public Convenience ang mga tag-iyahag public nga sakyanan nga mamasaheo sa natumbok nga mga ruta.
Sa usa ka yano nga seremonyas ditto sa Capitol, si LTFRB Region VII Director Engr. Eduardo Montealto Jr. uban ni Public Transport Modernization Program VII Planning Officer III Victor Cosep ang mitunol sa NOC ngadto sa lungsod sa Maribojoc samtang gitunol usab ang SNOC ngadto sa mga kalungsuran sa Alburquerque, Baclayon, Dagohoy, Dimiao, Garcia Hernandez, Loboc, San Isidro, San Miguel, and Ubay.
Hinuon, ang mga Local Public Transport Route Plans nga giduso sa Carmen, Danao, ug Panglao, kasamtangan pa nga gituki sa panel sa LTFRB ug Department of Transportation aron maaprobahan na.
Ang NOC itunol ngadto sa mga LGUS nga nagduso na ngadto sa LTFRB sa ilang draft nga Local Public Transport Route Plans nga may mga gisugyot nga mga ruta, ug nakit-an sa technical panel sa LTFRB nga sakto ug nahasubay sa kasamtangan nga sumbanan nga gilatid sa balaod.
Ang SNOC sa laing bahin, ihatag ngadto sa mga LGUS nga nagduso na sa ilang LPTRP apan wala pay gisugyot nga mga ruta.
Human sa SNOC ug NOC, moisyu na dayun ang LTFRB sa mga prangkisa pinaagi sa CPC ug makasugod nag pahimutang sa mga byahe nga subay sa LPTRP nga gihimo sa LGUIS.
Si Gobernador Erico Aristotle Aumentado, Provincial Administrator Asteria Caberte, Provincial Planning and Development Coordinator Atty. John Titus Vistal maoy nahan-okan sa wala malihok nga LPTRP nga napasagdan sa nanglabay nga administrasyon, hinungdan nga nagkamalisud ang mga tawo ug pangita ug kasakyan paingon ug gikan sa mga trabahoan ug tunghaan.
Kini nga pagkapakyas sa mga nanglabay nga administrasyon mao ang nagpatambok sa mga colorum nga sakyanan, nga mahal ang kubra sa pletehan.
Kini usab ang hinungdan nga mapugos na lang ang tanan ug palit ug motor ug mogasolina aron makapanarbaho nga dili malangan.
30 ka Mayor napili’g usab; Napulo niini, wa’y kontra
Sinulat ni Rey Anthony Chiu
Katloan ka mga mayor nga una na nga napili sa imaging piniliay, lakip na niini ang napulo ka mga mayor nga wala’y mga kaatbang sa ilang mga pwesto, ang nahatagan ug bag-ong mandatus, sa milabay nga National ug Local Elections 2025 niadtong Mayo 12.
Sa Bohol, napulo sa katloan ka mayor nga nakakuhag bag-ong termino ang walay nangahas ug paatbang sa politikanhong kalihukan: sila si Mayor Thamar Oliavar (Candijay); Conchita Toribio (Carmen); Eugene Ibarra (Clarin); Juan Manuel Lim (Corella); Arturo Piollo (Lila); Hilario Ayuban (Loay); Restituto Jr., Suarez (Sagbayan); Diosdado Gementiza (San Isidro); Juanita Ellorimo (Sikatuna) ug Emmanuel Caberte (Sevilla).
Si Caberte, bisan bag-o nga napili nga mayor sa Sevilla, midagan nga walay kontra.
Lain nga napulo ug walo usab ka mga mayor ang mga bag-o nga napili human sa init nga kampanya ug pagbansay sa politikanhong katungod.
Sila mao si Marciano “Junjun” Ayuban Jr. (Alicia), Atty. Esther Patrisha “Trisha” Veloso Chatto (Balilihan), Atty. Emmanuel “Mawel” Tumanda (Batuan), “Janjan” Garcia (Bien Unido); Jose “Junnie” Yu (Calape); Benjie Olive (Catigbian); Rodrigo Dennis Uy (Cortes); Sofronio “Moloy” Apat (Dagohoy); Celeste Lerion (Danao); Meriam Sumaylo (Dauis), Dexter Ancla (Inabanga); Mark Louie Monungolh (Jagna); Dr. Cesar Tomas “Yul” Lopez (Loon), Jojo Roxas (Maribojoc); Kenneth Estavilla (Pres Carlos P. Garcia); Junin Caberte (Sevilla); Marlon Amila (Tubigon), ug Violeta “Violy” Reyes (Ubay).
Ang mga nahatagan sa bag-ong mandato bisag daan na nga mga mayor mao sila si: Don Ritchie Buates (Alburquerque), Angelina Simacio (Anda), Jose Mario Pahang (Antequera), Atty. Alvin Uy (Baclayon), Norman “Tata” Palacio (Bilar); Atty Dave Duallo (Buenavista); Thamar Olaivar (Candijay); Conchita “Che” Toribio-delos Reyes (Carmen); Jane Censoria Yap (Tagbilaran City), Eugene Ibarra (Clarin); Juan Manuel “Manju” Lim (Corella), Randolf Ang (Dimiao); Al “AlTacs” Taculad (Duero), Filadelfo “Jess” Baja (Garcia Hernandez); Carrieboy Camacho (Getafe); Albino “Ben” Balo (Guindulman); Atty. Arturo Piollo (Lila), Raymund Jala (Loboc); Grace “Ongie” Bernales-Lim (Mabini); Edgardo “Boy” Arcay (Panglao); Engr. Wilson Pajo (Pilar); Restituto Jr “Jun” Suarez (Sagbayan); Atty. Diosdado Gementiza (San Isidro); Ian Gil Mendez (San Miguel); Atty. Michael Doria (Sierra Bullones), Juanita “Jecjec” Ellorimo (Sikatuna); Janet Garcia (Talibon); Atty. Roberto “Bob” Cajes (Trinidad), and Neil Dionisio “Neil” Balite (Valencia).
Balaod nga magpamenos sa silot sa mga motorcycle violators gilagdaan ni PBBM
Sinulat ni Elvira Bongosia
Gilagdaan ni Presidente Ferdinand R. Marcos Jr. ang balaod nga usa ka lakang nga magpaubos sa mga silot sa pipila ka mga paglapas nga nahimo sa mga tag-iya sa motorsiklo pinaagi sa pag-amendar sa mga bahin sa Republic Act No. 11235, o ang Motorcycle Crime Prevention Act.
Ang Republic Act No. 12209, nga gilagdaan sa Presidente niadtong Mayo 9 ug gi-post sa Official Gazette niadtong Miyerkules, usa ka consolidation sa Senate Bill No. 2555 ug House Bill No. 11113.
Ang duha ka balaodnon nagtinguha nga pakunhoran ang mga multa ug tangtangon ang mga termino sa pagkabilanggo alang sa pipila ka mga paglapas aron ang balaod dili kaayo “discriminatory” batok sa mga regulasyon sa gobyerno sa mga nagsakay ug motorsiklo.
Ubos sa RA 12209, ang dealer, orihinal nga tag-iya, o bag-ong tag-iya sa motorsiklo nga mapakyas sa pagtuman sa mga rekisitos sa rehistrasyon magbayad ug P5,000 nga multa, ubos sa orihinal nga silot nga P20,000 ngadto sa P50,000 nga multa ubos sa karaang balaod plus, ang pagkapriso gikan sa usa ka bulan ngadto sa unom ka tuig ug usa ka adlaw.
Ang pag-drive nga walay plate number o mabasa nga number plate pahamtangan na karon ug silot nga P5,000, gikan sa kanhi P50,000 ngadto sa P100,000.
Gipakunhod ang mga silot
Ang pagkapakyas sa pag-report sa pagkawala, kadaot, o pagpangawat sa usa ka plate number sulod sa 72 ka oras magkahulogan ug multa nga P5,000, kung itandi sa miaging P20,000 hangtod P50,000.
Ang erasing, tampering, altering, forging, imitating, covering, o concealing sa plate number o paggamit ug tampered adunay silot nga P10,000 dugang sa pagkapriso ug unom ka buwan ug usa ka adlaw o hangtod sa duha ka tuig.
Ang RA 11235 orihinal nga nagmando sa pagkapriso ug unom ka tuig ug usa ka adlaw ngadto sa 12 ka tuig ug multa gikan sa P50,000 ngadto sa P100,000.
Gamit ang kinawat nga number plate adunay multa nga ubos sa P20,000, pagkunhod sa karaang silot nga pagkapriso nga unom ka tuig ug usa ka adlaw hangtod sa 12 ka tuig ug multa nga P50,000 ngadto sa P100,000.
Bag-ong mga plate numbers
Ang mga tag-iya ug motorsiklo kansang mga plaka wala mahisubay sa probisyon sa RA 12209 kinahanglang mo-renew sa ilang rehistrasyon ug mo-apply sa gikinahanglang mabasa nga number plate sa dili pa matapos ang tuig.
Ubos sa bag-ong balaod, ang bag-ong mga plate number kinahanglang mas dagko, mabasa, color-coded, ug mosunod sa font style ug size nga itakda sa implementing rules and regulations.
Ang datos sa mga plate number kinahanglan usab nga mabasa labing menos 15 metros gikan sa likod sa motorsiklo.
Gihatagan ang Land Transportation Office (LTO) hangtod Hunyo 30, 2026, sa paghimo, pagpagawas, ug pag-isyu sa bag-ong mga plaka.
Gilagdaan ni Presidente Ferdinand R. Marcos Jr. ang Republic Act No.12209–ang bag-ong giamendar nga balaod nagtutok sa pagpauswag sa kaluwasan sa mga nag-motorsiklo ug pag-usab sa mga silot sa mga kalapasan—usa ka dakong lakang padulong sa mas luwas nga mga dalan alang sa tanan. (Hulagway gikan sa PIA)
Balaod nga magpakusog sa pag-amuma sa 0-5 anyos nga mga bata gilagdaan na
Sinulat ni Elvira Bongosia
Gilagdaan na ni Presidente Ferdinand R. Marcos Jr. ang Republic Act No. 12199, nga unahon ang sayo nga edukasyon, saktong nutrisyon, ug suportang mag-amuma aron mahatagan ang mga bata, ilabi na ang may edad ‘zero to five,’ ug usa ka lig-on nga pagsugod sa kinabuhi.
Gipetsahan ug Mayo 8, ang RA No. 12199, o ang “Early Childhood Care and Development System Act,” gipalabang aron ipatuman ang polisiya sa estado sa pagpanalipod ug pagpasiugda sa katungod sa matag bata sa ‘holistic well-being, growth, and dedicated care.’
Ang ECCD System Act maoy usa sa mga importanteng balaod nga girekomenda sa Second Congressional Commission on Education (EDCOM 2) aron mapalambo ang sistema sa edukasyon sa nasud.
Gibasura sa bag-ong balaod ang RA No. 10410, nga mas nailhan nga “Early Years Act (EYA) of 2013.”
Sa RA No. 12199, ang ECCD Council gitahasan sa pag-atiman sa mga bata nga ubos sa singko anyos, samtang ang Department of Education (DepEd) maoy modumala niadtong nag-edad ug singko ngadto sa otso anyos, subay sa Enhanced Basic Education Act of 2013.
Ubos sa RA No. 11650, ang sistema sa ECCD nagpasiugda sa inklusibo nga edukasyon pinaagi sa pagsiguro nga ang mga bata nga adunay mga kakulangan makadawat ug saktong serbisyo, makatarunganon nga akomodasyon, ug maabot nga mga palibot.
Ang balaod nagtumong sa pagpakunhod sa mortalidad sa bata, pagsuporta sa tanang aspeto sa paglambo sa bata, pag-andam sa mga bata alang sa pormal nga edukasyon, ug pag-establisar ug early intervention system alang niadtong adunay espesyal nga panginahanglan.
Ang ECCD Council pagapalig-onon aron manguna sa mga programa sa kahimsog, nutrisyon, edukasyon, ug sosyal nga kalamboan, sa koordinasyon sa lainlaing mga ahensya.
Ang mga local government unit adunay importante nga papel sa pagpatuman sa mga programa sa ECCD pinaagi sa ilang tagsatagsa ka buhatan sa ECCD.
Sa RA No. 12199, ang ECCD Council gitahasan sa pag-atiman sa mga bata nga ubos sa singko anyos, samtang ang Department of Education (DepEd) maoy modumala niadtong nag-edad ug singko ngadto sa otso anyos, subay sa Enhanced Basic Education Act of 2013. (Hulagway gikan sa PIA7-Bohol)
BALAK
KON MAPALIT PA ANG GUGMA
Sinulat ni Engr. Rogelio Podelino
Dinhi sa kalibutan ang salapi gamhanan
Halos tanan’g butang mapalit sa adunahan
Kon ikaw adunahan tinahud ka sa tanan
Inila ka sa katilingban
Kon unsa’y imong gusto makuha sa kasayon
Bisan ang mga anak ni Eva nagoa-ulipon
Kay ang ilang tuyo ang imong ka-adunahan
Nga magpuyo sila nga bulahan
Daghan ang nanimpalad tungod sa gugma
Gisugal ang kinabuhi nila
Sa tinguha nga ilang makaplagan
Ang gugma’ng maidlas sangatanan
Kay ang gugma’ng tim-os ug dalisay
Lisud hikaplagan sa mga tawo’ng pasaway
Kay nagtago man sulod sa balati-an
Sa mga linalang nga buotan
Ang gugma dili.nimo mahibalo-an
Kon anus-a kini moturok sa imong dughan
Si kupido ra ang nasayod sa hinungdan
Kon mogitib na kini sa imong balati-an
Daghan unta’ng mga adunahan ang malipayon
Kon ang gugma mapalit pa gilayon
Apan sakgaw sa kinaiyahan ang tanan
KON MAPALIT PA ANG GUGMA SA BULAWAN