Human sa Balota, Unsa Na Man Karon, Bol-anon?
Ni ELEAZAR TUTOR ACAMPADO
GIIHAP na ang mga balota ug giproklamar na ang mga mananaog.
Ang abog sa laing tuyok sa eleksiyon inanay nang mihalok sa yutang tabunon. Human sa mga rally, mga debate, ang madasigon nga mga argumento sa online, sa kadalanan ug sa mga tabi-tabi sa kasilinganan, nag-atubang kita karon sa hilom apan mahinungdanong mosunod nga higayon. Unsa na may buhaton nato karon, katawhang Bol-anon?
Una, atong giila ang demokratikong proseso sa pagpili sa atong mga mamunoan. Midaog man o wala ang atong piniling mga kandidato, natapos na ang eleksiyon, ug ang atong bag-ong mga lider gikatakdang manumpa. Ang pagtahod niining sangpotanan, samtang gisuportahan ang atong mga katungod sa pagpadayag sa pagsupak ug pagpangayo og husay pinaagi sa husto nga mga agianan kon gikinahanglan, mao ang sukaranan sa atong pagka lalawigan.
Apan ang atong mga tahas wala matapos sa dapit botaranan. Karon nagsugod ang mahinungdanong buluhaton sa aktibong pagkalungsoranon. Kinahanglang molikoy ta gikan sa pagpangampanya sa mga kandidato ngadto sa pagpanubag sa atong mga piniling opisyal. Atong bantayan ang ilang mga binuhatan, pahinumdoman sila sa ilang mga saad, ug pangayoon ang tin-aw, masihag ug maayong pagdumala sa matag lakang nila sa dalan sa pangagamhanan.
Kini usab ang panahon sa pagtan-aw labaw pa sa politika ug pagkonektar pag-usab sa atong mga komunidad. Ang kusog ug kahinam nga gibubo sa eleksyon mahimong mapahiuyon nato ngadto sa mga lokal nga inisyatiba, pagboluntaryo, ug pagsulbad sa nagpadayon nga mga isyu sa katilingban bisan kinsa pa ang naglingkod sa katungdanan.
Ning panahona, kinahanglan natong ayohon ang mga dili kalikayan nga pagkabahinbahin nga nahimo sa mga kampanya. Atong tabangan ang mga higala, pamilya, ug silingan sa matag habig sa linya sa politika. Paminawon nato, sabton, ug pangitaan og komon nga basehan aron mapasig-uli ang nalahapan nga mga kasingkasing sa miaging piniliay. Ang atong hiniusang gugma alang sa Bohol ug ang atong tinguha alang sa mas maayong kaugmaon kinahanglan nga mas lig-on kaysa bisan unsang temporaryo nga pagkabahinbahin sa politika.
Nahuman na ang eleksyon, apan nagpadayon ang atong panaw isip mga lungsoranon. Magpadayon kita sa unahan uban ang pagkamabinantayon, pag-apil-apil sa mga kalihokang pangkomunidad nga adunay interest sa kadaghanan, makighiusa ug lig-onon ang paglaom alang sa atong lalawigang Bol-anon.
Ang kaugmaon sa atong pinalanggang Bohol, wala lamang magliyok sa mga kamot sa atong napili nga mga lider apan anaa kini sa atoa, sa kinatibuk-an. Ato kining makab-ot kon magkahiusa ug tinguhaon.
(Si Eleazar Tutor Acampado, kanhi staff writer sa Bisaya Magazine. Nakadaog na sa Don Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.)