Bohol Light naghimo’g Barangayan Information Drive
Sinulat ni Sheryl B. Paga
Sa pagsulod sa bulan sa Hunyo, nagsugod ang Bohol Light sa paghimo sa Barangayan Information Drive aron mapaabot ngadto sa mga konsumidor ang mahitungod sa mas sayon nga pamaagi sa pagbayad sa bill sa kuryente.
Dili na kinahanglan nga magpila og dugay sa Bohol Light Collection Center. Aduna na kini daghan nga mga accredited payment partners ug online platforms diin pwde na kitang adto mobayad sa bisan unsang oras, adlaw o dapit. Mao kini ang mga lakang nga gihimo:
✔ Pagbisita sa 15 ka mga barangay sa Tagbilaran City. Ang Bohol Light, pinaagi sa Customer Care Department, naka eskedyul na sa pag-anha sa mga kabarangayan sugod sa petsa Hunyo 4 -26, 2025 ug sa Tagbilaran City Hall alang sa pag-install sa mga apps para sa online payment.
✔ Paghimo ug Tutorials ug Demos. Gipasabot ngadto sa mga konsumidor ang step-by-step nga pamaagi sa pag-gamit sa digital payment platforms ug kon unsaon paghimo sa over the counter payments ngadto sa mga non-banking partners sama sa MLhuillier, Palawan Express, Gcash, PayMaya, Seven-Eleven ug uban pang mga sangang ahensya sa ECPay.
✔ Pagdistribyut sa mga Standee Ads ngadto sa tanang mga branches sa MLhuillier ug Palawan Express sulod sa Tagbilaran City. Kini gihimo aron mas madasig ang mga katawhan sa pagbayad na ngadto sa ilang pilakaduol nga mga payment centers.
✔ Pagpasabot sa ka importante sa Third-Party Collection Agency – Derecho nga gitubag sa Bohol Light ang mga pangutana sa mga konsumidor kabahin sa ilang billing ug payment options. Gipasabot usab nga ma post ang mga bayad ngadto sa account sa konsumidor usa ka adlaw gikan sa pagbayad niini kon sa sunod nga adlaw’ng trabahuan.
Kini nga kalihukan sa Bohol Light nagpakita sa matinudanon nga serbisyo ngadto sa mga taga Tagbilaranon diin gihatagan gayud ug bili ang dugay na nga gihandum nga mas dali ug sayon nga mga pamaagi. Makadaginot pa sa pletehan.
Bag-o nga mga linya giladlad sa BWUI sa Brgy. Tiptip, Cabawan ug San Isidro
Sinulat ni Victor L. Tambis
Hulagway sa wala: Mga tinugyanan nga nagladlad sa linya sa Esabo St, padulong sa Brgy. Tiptip, samtang sa tuo: linya nga giladlad sa Lacosta St. Brgy. San Isidro
Sa nagpadayon nga pagpalapad sa serbisyo sa panubig sa Barangay San Isidro, Cabawan ug Tiptip ning syudad, ang maong proyekto sa Bohol Water anaa na karon sa 75% nga mahuman ang pagladlad sa mga linya niini.
Nakompleto na ang pagladlad sa linya subay sa Lacosta St, ug Kinampay St, padulong sa Lindaville Phase II diin maagian niini ang Kinampay urban neighborhood, San Isidro area, samtang nagpadayon ug hapit na mahuman ang pagladlad ug linya sa mga dapit sa Esabo St, diin ang maong linya dili kini moabot sa sentro sa Barangay Tiptip.
Isunod usab ang pagladlad sa linya subay sa kalsada sa Cabawan-BJMP road, gikan sa eskina serenity ug hangtod sa konkreto nga taytayan nga dili pa moabot sa BJMP sa maong kalsada.
Human ma kompleto ang pagladlad sa mga linya, isunod dayon ang hydro testing niini aron pagsiguro nga walay leak kon aduna nay pressure ang maong linya sa tubig.
Pagkakaron, kining mga lugara gialagaran sa City Waterworks, usa ka panubig nga gidumala sa syudad sa Tagbilaran.
Gibanabana nga kon walay mga kakulian mahinagbo-an nga dili kontrolado sa Bohol Water, ang maong proyekto makompleto ug magamit na sa mga konsumidor sa bulan sa Agosto ning tuiga.
Mopahibalo ra unya ang Bohol Water sa kalamboan sa maong mga bag-ong linya aron magiyahan ang mga konsumidor sa pag apply sa mga water connection sa nahisgutang mga dapit.
Sa kasaulogan sa ika-62 nga anibersaryo sa NIA-7, grocery package ihatag alang sa modonar ug dugo
Sinulat ni Elvira Bongosia
Sa pagsaulog sa ika-62 nga anibersaryo sa pagkatukod niini, ang National Irrigation Administration (NIA) Region VII gitakdang mopahigayon ug Bloodletting Activity karong Hunyo 9, 2025 gikan alas 9 sa buntag taman alas 3 sa hapon sa NIA R7 CVTC Function Hall sa Barangay Dao, ning syudad sa Tagbilaran.
Ang bloodletting drive bukas sa publiko, mga empleyado o dili mga empleyado, mga estudyante, ug mga miyembro sa komunidad nga nag-edad 18 anyos pataas nga andam ug angayan nga modonar.
Kining kalihokan gihimo uban sa pakigtambayayong sa Philippine Red Cross – Bohol Chapter ug nagtumong sa pagtabang sa pagtubag sa kritikal nga panginahanglan sa dugo sa mga lokal nga ospital ug pasilidad sa panglawas sa probinsiya.
Tungod kay ang ahensya nagsaulog sa 62 ka tuig sa pagserbisyo, ang unang 62 ka malampuson nga mga donor makadawat ug grocery package gikan sa NIA Region VII isip timaan sa pasalamat.
Matud pa ni NIA Region VII Regional Manager Engr. Antonio B. Gujeling, kini nga kalihokan maoy ilang paagi sa paghatag ug balik sa komunidad samtang nagsaulog sa kabilin sa serbisyo sa NIA.
Tungod niini, gidapit ni Gujeling ang tanan nga mahimong kabahin niining makaluwas sa kinabuhi nga inisyatibo diin ang usa ka donasyon makahimo ug dakong kalainan.
Bukas ang buhatan sa mga walk-in donors, apan ang mga partisipante gi-awhag nga magparehistro daan aron matabangan ang mga organizer sa pag-andam ug pagsiguro sa hapsay nga dagan sa panahon sa maong kalihokan.
Ang NIA nagpadayon sa pag-alagad sa katawhang Pilipino pinaagi sa dili lamang pagpalambo sa mga sistema sa irigasyon apan pinaagi usab sa pagpasiugda sa panglawas sa publiko ug sosyal nga responsibilidad.
Alang sa dugang impormasyon, mahimong motawag sa 09301575842 ni Ms. Gretchen Hilot- Nurse I).
Isip pagsaulog sa ahensya sa 62 ka tuig nga pagserbisyo, ang unang 62 ka malampuson nga mga donor makadawat ug grocery package gikan sa NIA Region VII isip timaan sa pasalamat sa Hunyo 9, 2025 gikan alas 9 sa buntag taman alas 3 sa hapon sa NIA R7 CVTC Function Hall sa Barangay Dao, ning syudad sa Tagbilaran. (Hulagway gikan sa NIA/PIA)
Bohol info officers, volunteers nipahigayon ug clean-up activity sa isla sa Balicasag
Sinulat ni Elvira Bongosia
Sa pagtapos sa Month of the Ocean (MOO) 2025, ang Association of United Development Information Officers (AUDIO)-Bohol nagpahigayon ug coastal ug underwater clean-up sa isla sa Balicasag, lungsod sa Panglao niadtong Mayo 30.
Uban sa tema nga “Isla sa Balicasag, Ampingan ta, Limpyohan ta!,” ang inisyatiba naghatag ug gibug-aton sa kamahinungdanon sa pagpanalipod ug pagpreserbar sa adunahang marine ecosystem sa isla.
Gipasiugdahan sa Philippine Coast Guard (PCG), sa pakigtambayayong sa Philippine Information Agency (PIA), ang kalihokan naghiusa sa mga information officers gikan sa nagkalain-laing ahensya sa nasudnong kagamhanan ug mga local government units aron sa pagpasiugda sa pagkonserba ug malungtarong pagdumala sa kabaybayonan ug kadagatan sa nasod.
“Ang atong panagtigom karon dili lang usa ka kalihokan, kini usa ka pasalig. Pasalig nga magtinabangay kita sa pagpanalipod sa atong kinaiyahan, sa pagpadayag sa importansya sa limpyo ug luwas nga kadagatan, ug sa pagpakita nga ang panaghiusa ug pagbati sa serbisyo publiko mao ang yawe sa kausaban,” matud pa ni Coast Guard Station Western Bohol Commander Lieutenant Junior Grade Romulo Balonga Jr. sa iyang mensahe.
Dugang pa ni Balonga nga ang atong kalibutan, ilabi na ang mga lugar sama sa isla sa Balicasag, nagkinahanglan sa atong proteksyon. Ug karon, kini na ang motubag sa tawag.
Gikan sa baybayon hangtod sa salog sa dagat, ang maisog nga mga information officer ug mga boluntaryo naghiusa aron mapanalipdan ang usa sa labing matahum nga santuwaryo sa dagat sa Bohol.
Atol sa pagpanglimpyo, baynte dos (22) ka sako sa basura ang nakolekta, apil na ang daghang mga plastik nga butang. Ang mga debris naglakip sa mga grocery bags, botelya sa ilimnon, lata, takub, upos sa sigarilyo, straw, food wrappers, styrofoams, tabon, mga pukot, ug lain-laing mga basura.
“It was a great experience and it greatly made an impact to maintain the cleanliness to sustain the eco system of Balicasag Island (Nindot kini nga kasinatian ug dako kaayo ang epekto niini sa pagpadayon sa kalimpyo aron mapadayon ang eco system sa isla sa Balicasag), paambit sa information officer nga volunteer-diver nga si FO1 Gian Paolo Dolotina sa Bureau of Fire Protection.
Samtang si Leah Grace Largo, information officer sa LGU-Alburquerque mipaambit nga ang kalihokan sa pagpanglimpyo nagpasiugda sa nagpadayon nga panginahanglan alang sa responsable nga turismo ug makanunayon nga pagpanalipod sa kinaiyahan aron mapreserbar ang natural nga katahum sa isla.
Human sa pagpanglimpyo, usa ka Basic Life Support–Cardiopulmonary Resuscitation (BLS–CPR) Training ang gipahigayon sa PCG, inubanan sa Municipal Disaster Risk Reduction and Management Office (MDRRMO) sa lungsod sa Dimiao.
Ang mga partisipante nakadawat sa teoretikal nga input ug hands-on nga pagbansay, nga nagsangkap kanila sa hinungdanon nga mga kahanas sa pagluwas sa kinabuhi.
Kining hiniusa nga kalihokan wala lamang nagpalig-on sa kaamgohan sa kinaiyahan apan naghatag usab ug gahum sa mga information officers sa tibuok Bohol sa pagtubag dayon ug epektibo sa mga emerhensya sa panglawas—dugang pagpalig-on sa kalig-on ug kaandam sa komunidad.
Ang kalamposan sa maong kalihokan gipadako pag-ayo sa bililhong suporta sa mga boluntaryo nga mao ang Travel 29, Marios Dive Resort, Eco Dive, Mosoy Boat Rental, Sapphire Boat Rental Services, Haka Dive Center, Poseidon Water Sports, Diamond Water Sports, pipila ka mga miyembro sa Panglao Association of Dive Operators, 203rd Squadron nga gipangulohan ni CDR Ivy Kung PCGA, Bohol Woo uban sa TUSGA Free divers ug ubang mga boluntaryo nga mitanyag sa ilang kaugalingon sa akto sa boluntaryo ug dedikadong mga personahe sa PCG nga naghimo niining makahuluganon nga kalihokan nga possible.
Gikan sa baybayon hangtod sa salog sa dagat, ang mga information officers ug mga boluntaryo naghiusa sa pagpanglimyo aron mapanalipdan ang usa sa labing matahum nga santuwaryo sa dagat sa Bohol – ang isla sa Balicasag. (Hulagway gikan sa PIA ug PCG)
DOH: Walay lockdown tungod sa mpox publiko gipasidan-an batok sa fake news
Sinulat ni Elvira Bongosia
Gipanghimakak sa Department of Health (DOH) ang nikatap nga mga pag-angkon sa social media bahin sa giingon nga lockdown tungod sa mga kaso sa mpox sa nasud.
Ang departamento sa panglawas dugang nga nag-awhag sa publiko nga magpabilin nga mabinantayon batok sa mga peke nga panid sa Facebook nga nagpakaylap sa sayop nga kasayoran bahin sa mpox.
Sa public advisory nga gipagawas niadtong Sabado, Mayo 31, giklaro sa DOH nga walay gipatuman nga lockdown bisan asa sa Pilipinas tungod sa mpox.
“Walang pangangailangang magkaroon ng lockdown dahil sa mpox dahil hindi ito airborne.,” matud pa sa pahayag sa DOH.
Gipahinumdoman nila ang publiko nga mokuha lang ug health-related updates gikan sa mga opisyal nga tinubdan, partikular na sa verified Facebook page sa DOH.
Gidili usab nila ang pagpaambit sa mga wala mapamatud-an nga mga post, nga mahimong hinungdan sa wala kinahanglana nga kalisang o kalibog.
Giklaro sa DOH nga samtang adunay daghang natala nga mga kaso sa mpox kaniadtong 2024, ilabi na niadtong Abril kumpara sa Mayo 2025, ang kahimtang nagpabilin nga kontrolado.
Ang bag-o nga pagsulbong sa mga ulohan, sumala sa DOH, tungod sa dugang nga kalihokan ug mga anunsyo gikan sa mga local government units (LGUs), dili usa ka nagkagrabe nga outbreak.
Gipasaligan usab sa departamento sa panglawas ang publiko nga padayon nga nakig-alayon kini sa mga LGU aron mahatagan ug tukma nga serbisyong medikal alang sa mga kumpirmado ug gidudahang kaso sa mpox sa tibuok nasud.
Matud pa sa DOH nga wala pa’y mpox nga Clade I-b nga makita dinhi sa Pilipinas. Clade II ra ang naa. Mas ubos usab ang mortality rate sa Clade II, usa sa napulo, itandi sa 4-5 alang kang Clade I-b.
Gipahinumdoman sa DOH ang mga netizens nga ang pagpakaylap ug fake news, ilabina sa panahon sa public health situations, mahimong masilotan ubos sa mga balaod sa Pilipinas sama sa Cybercrime Prevention Act ug ang Bayanihan to Heal as One Act, kung mapamatud-an nga malisyoso. (Hulagway gikan sa DOH/PIA)
Mga mag-uumang Eskaya, mipaubos sa pagbansay sa produksyon sa mais, utanon
Sinulat ni Elvira Bongosia
Mokabat sa 25 ka mga mag-uumang miyembro sa Canta-ub Visayan Eskaya Farmers Association (CAVESFA) sa Tribu Eskaya sa Barangay Canta-ub, lungsod sa Sierra Bullones, ang nisalmot sa duha ka adlaw nga pagbansay-bansay sa produksyon sa mais ug utanon nga gipahigayon niadtong Mayo 22-23 sa ilang barangay hall.
Ang pagbansay-bansay nga gipahigayon sa Department of Agriculture-Central Visayas (DA7) pinaagi sa Kabuhayan at Kaunlaran ng Kababayang Katutubo (4Ks) gitumong aron mahatagan ang mga indigenous people (IP) ug bag-ong teknolohiya sa pagpanguma ug makadugang sa ilang mga lagda ug kultura.
Ang 4Ks usa ka espesyal nga programa sa DA nga nagtumong sa pagpalambo sa ancestral domains sa mga IPs aron mapalambo ang produktibidad niini pinaagi sa paghatag ug mga oportunidad nga may kalabotan sa agri-fishery ug suporta nga mga serbisyo, isip konsiderasyon sa ilang mga kostumbre, traiditon, mithi, pagtuo ug interes.
Si Leonila Gono, ang 4K Regional Focal sa DA7, nipaambit nga anaa ang DA aron suportahan ang mga IPs sama sa Tribu Eskaya sa Bohol, aron makat-on sila sa mga bag-ong teknolohiya sa produksiyon sa mais aron makab-ot ang pagsaka sa produksiyon ug pagpausbaw sa kita sa mag-uuma.
“Sa unom ka tuig na sa 4Ks, kanunay namo iapil ang trainings, kabalo naman pud mo magtanom ug mais, so, mga doctorate namo ani nga training. Siguro gamay na lang nga needs ninyo sama sa pest and diseases management. Nanghinaot pud ko, ug ang 4Ks, nga dili lang ta kutob sa production or consumption, kundi naa napud unta tay ma-market puhon, kay mao gyud nay tumong sa atong programa,” pamahayag ni Gono.
Ang pagbansay-bansay naghatag sa mga miyembro sa CAVESFA ug mga topiko bahin sa produksyon sa mais, pagdumala sa mga peste ug sakit, paggamit sa mga abono, lokal nga paagi sa pagpananom, pag-andam sa yuta, ug potensyal nga abot sa paggamit sa angay nga barayti.
Si James Datahan, ang 4K Bohol Coordinator sa DA7, naghisgot sa gisugyot nga pagtukod sa usa ka komunal nga produksiyon sa mais, nga nagpaambit sa mga piho nga tahas ug responsibilidad sa mga opisyal sa CAVESFA sa pagdumala, pagpangulo, ug pagpamaligya sa ilang mga produkto, dili lamang sa mais kon dili sa mga utanon.
Gawas sa pagbansay-bansay, ang grupo nakadawat ug foliar fertilizers, high-breed yellow corn seeds, ug farm inputs sama sa seedling trays, ug pala.
Si Eskaya tribal chieftain sa Canta-ub, Carina Juyad, nagpahayag sa iyang pasalamat sa DA sa padayon nga pagsuporta sa ilang mga kalihokan sa pagpanguma.
“Wala koy laing masulti sa 4Ks kundi daghang salamat sa inyong pagsuporta labi na sa inyong gipanghatag na seeds sauna na amo nang napahimuslan, naharvest, ug nabaligya. Unya karon, aduna napuy laing binhi,” matud pa ni Juyad.
Dugang nga organikong abono ug high-breed corn seeds ang ihatod sa grupo agig suporta sa ting-ani sa ting-init.
Human mipaubos sa pagbansay-bansay kalabot sa bag-ong teknolohiya sa produksiyon sa mais ug utanon, ang 25 ka mga mag-uumang miyembro sa Canta-ub Visayan Eskaya Farmers Association (CAVESFA) sa Tribu Eskaya sa Barangay Canta-ub, lungsod sa Sierra Bullones, nakadawat usab ug foliar fertilizers, high-breed yellow corn seeds, ug farm inputs sama sa seedling trays, ug pala. (Hulagway gikan sa DA-7)
DOLE nagtakda og mga lagda sa pagbayad alang sa Hunyo 6 ug 12 nga regular holidays
Sinulat ni Elvira Bongosia
Ang mga empleyado sa pribadong sektor nga mo-report alang sa trabaho sa Biyernes, Hunyo 6, isip pag-obserbar sa Eid’l Adha, ug sa Huwebes, Hunyo 12, alang sa Independence Day adunay katungod sa espesyal nga suholan, tungod kay ang duha ka petsa gideklarar nga regular holiday, ang Department of Labor and Employment (DOLE) mipahibalo.
Sa labor advisory nga gipagawas niadtong Mayo 28, si DOLE Kalihim Bienvenido E. Laguesma nipahinumdom sa mga employer nga ang pagkwenta sa suholan alang niining mga holidays kinahanglang mosunod sa guidelines nga gitakda ubos sa Proclamation Nos. 727 ug 911.
Matud pa ni Laguesma nga ang mga empleyado nga motrabaho sa regular holiday adunay katungod sa 200 porsyento sa ilang inadlaw nga sweldo alang sa unang walo ka oras nga serbisyo.
Kadtong motrabaho lapas sa walo ka oras kinahanglang makadawat ug dugang 30 porsiyento sa ilang hourly rate dugang sa holiday pay.
Kung ang holiday matunong sa adlaw sa pagpahulay sa usa ka empleyado, kinahanglan nga ang mga trabahante suholan ug dugang nga 30 porsyento sa 200 porsyento nga holiday rate.
Alang sa overtime nga trabaho nga gihimo sa mao nga adlaw, kinahanglan usab nga makadawat sila ug dugang nga 30 porsyento sa ilang inoras nga rate labaw pa sa kinatibuk-ang sweldo.
Sa laing bahin, gipahinumdom usab ni Laguesma nga ang mga empleyado nga dili mo-report sa trabaho sa Hunyo 6 o Hunyo 12 adunay katungod gihapon sa 100 porsyento sa ilang inadlaw nga sweldo, basta anaa sila o adunay naaprobahang paid leave sa adlaw sa trabaho sa wala pa ang holiday.
Sa GSIS ‘Digital GINHAWA’ sobra sa 99% sa mga transaksyon karon online na
Sinulat ni Elvira Bongosia
Ang mga miyembro ug pensiyonado sa Government Service Insurance System (GSIS) nakatagamtam na karon sa “digital GINHAWA”—kasayon ug kaayohan pinaagi sa teknolohiya—sama sa report sa pension fund nga kapin sa 99% sa mga transaksyon niini sa unang tunga sa 2025 ang nahuman online.
Gikan sa Enero hangtod Hunyo, halos tanang serbisyo sa GSIS, lakip na ang mga aplikasyon sa pautang ug mga pangutana sa impormasyon sa miyembro, na-access pinaagi sa GSIS Touch mobile app ug GWAPS (GSIS Wireless Automated Processing System) kiosks.
Kini nga digital nga pagbag-o naghubad sa mas dako nga kasayon: ang mga miyembro mahimong makatransaksyon bisan kanus-a, bisan asa, nga dili maghulat sa linya sa mga opisina sa GSIS.
“Digital GINHAWA means comfort, accessibility, and peace of mind for our members. Now, applying for loans, checking records and accessing benefits can all be done with just a few taps on your phone (Ang digital GINHAWA nagpasabut ug kaharuhay, accessibility, ug kalinaw sa hunahuna alang sa atong mga miyembro. Karon, ang pag-apply alang sa mga pautang, pagsusi sa mga rekord ug pag-access sa mga benepisyo mahimo na tanan sa pipila lang nga pag-tap sa imong telepono),” ingon ni GSIS President ug General Manager Wick Veloso.
Gipakita sa datos sa GSIS ang matag pangutana sa impormasyon sa miyembro ug halos tanan nga pagkalkula ug aplikasyon sa pautang giproseso sa digital gikan sa Enero hangtod Hunyo.
Ang online loan applications misaka gikan sa 98.5% sa unang quarter ngadto sa 99.1% sa ikaduhang quarter, uban ang loan computation requests nga makanunayon nga labaw sa 99.5%.
Gitaho usab sa GSIS ang lig-on nga pagsagop sa mga miyembro sa digital channels alang sa mandatory active renewal sa status sa mga pensioner nga gitawag ug APIR (Annual Pensioners’ Information Revalidation).
Sa unang quarter sa 2025, 95% sa tanang transaksiyon sa APIR ang giproseso sa digital pinaagi sa GSIS Touch app ug GWAPS kiosk. Kini nga numero misaka ug mas taas pa ngadto sa 97% sa ikaduhang kwarter, nga nagpasiugda sa nagkadako nga pag-uyon sa mga miyembro alang sa “digital GINHAWA” ug ang kasayon sa pagdumala sa importante nga mga kinahanglanon online.
Uban sa kapin sa duha ka milyon nga mga rehistradong tiggamit, ang GSIS Touch app naghatag og 24/7 nga access sa mga aplikasyon sa pautang, pag-monitor sa benepisyo, aktibo nga pagbag-o ug pagsunod sa status sa mga pensyonado (APIR) ug uban pa—nagtugot sa mga miyembro, lakip niadtong anaa sa hilit o gawas nga mga dapit, sa pagdumala sa ilang mga account bisan kanus-a.
Si Veloso nagkanayon nga komitado ang GSIS sa pagpalapad sa ilang digital nga mga serbisyo aron ang matag miyembro makasinati sa digital GINHAWA, bisan asa sila ug gi-awhag niini kadtong wala pa maka-download sa GSIS Touch app nga buhaton na kini ug ipadayon ang ilang mga contact details nga updated alang sa walay hunong nga pag-access.
Ang mga miyembro sa GSIS ug mga pensiyonado mahimong magpabiling updated pinaagi sa opisyal nga website- www.gsis.gov.ph, o pinaagi sa pag-follow sa GSIS sa Facebook, Instagram, YouTube, ug TikTok. Alang sa tabang, mahimo usab silang motawag sa GSIS Contact Center sa numero 8847-4747.
CHED Merit Scholarship Program bukas na alang sa mga aplikante
Sinulat ni Elvira Bongosia
Gi-anunsyo sa Commission on Higher Education (CHED) nga bukas na ang pagpangdawat nila og aplikasyon alang sa CHED Merit Scholarship Program (CMSP) alang sa umaabot nga unang tuig nga mga estudyante sa kolehiyo alang sa academic year 2025-2026.
Ang CMSP usa ka competitive scholarship initiative sa CHED nga nagtumong sa pagsuporta sa academically talented ug deserving nga mga Pilipino nga estudyante.
Kini nga programa gituyo alang sa umaabot/kasamtangan nga unang tuig nga mga estudyante sa kolehiyo nga nagpakita sa talagsaong pasundayag sa akademya ug potensyal alang sa pagkamaayo sa mas taas nga edukasyon.
Partikular, ang CMSP bukas sa mga aplikante sa estudyante nga nakab-ot ang minimum nga General Weighted Average (GWA) nga 93% o katumbas niini sa ilang Grade 12 nga report card.
Dugang nga puntos sa ranking ang ihatag sa mga aplikante nga sakop sa special equity groups subay sa mosunod nga mga balaod: Underprivileged and Homeless Citizens ubos sa Republic Act No. 7279, Magna Carta Law alang sa mga kabus ubos sa RA No. 11291, Persons with Disabilities (PWDs) ubos sa RA No. 11861 nga giamendar, Senior Citizens ubos sa RA 9994, ug Indigenous Peoples (IPs) ubos sa RA 8371, ug uban pang may kalabotan nga balaod nga naghatag og prayoridad sa marginalized nga grupo, sama sa unang henerasyon nga mga estudyante nga maoy una sa ilang pamilya nga nakatungha sa kolehiyo o unibersidad.
Ang mga aplikante gikan niini nga mga grupo kinahanglan gihapon nga makab-ot ang minimum nga mga kinahanglanon sa kwalipikasyon ug i-ranggo pinauyon sa mga pamatasan sa pagpili sa programa.
Ang CMSP nagtanyag og pinansyal nga tabang sa mga takos nga mga estudyante, nga naglangkob sa tuition, ubang mga bayronon sa eskwelahan, book/connectivity allowance, ug mga stipend.
Ang financial package alang sa full ug half merit scholars sa pribadong Higher Education Institutions (HEIs) naglakip og hangtod sa ₱120,000 matag academic year.
Adunay 2,779 ka slots alang niini nga scholarship ug ang pag-apply mahimong pinaagi online pinaagi sa CHED Regional Offices.
Gitakda ang deadline sa pagsumite og aplikasyon sa Hunyo 20, 2025
Gi-awhag ang mga kwalipikadong estudyante sa pag-apply sa CHED Merit Scholarship Program diin bukas kini sa talagsaong mga estudyante sa unang tuig sa kolehiyo nga adunay labing menos 93% nga GWA. Ang deadline sa pagsumite og aplikasyon gitakda sa Hunyo 20, 2025. (Hulagway gikan sa PIA)
BALAK
ANG GINOO AY GUGMA
Sinulat ni Engr. Rogelio Podelino
Wala’y tawo makatugkad sa gahum sa GINOO
Kon unsa’y IYANG gibuhat para sa tawo
Tanan’g kaayuhan gihatag NIYA
Aron ang tawo mabulahan siya
Gipahiluna ang tawo sa harden sa Eden
Wala tumana sa tawo ang IYANG gibilin
Mikaon sa prutas nga gidili
Gipapahawa ang tawo sa Eden ug dali dali
Bisan pa sa pagka makasasala sa tawo
Gihigugma gihapon ang tawo sa GINOO
Nagbilin SIYA ug saad sa tawo
Nga luwason ra ang tawo sa GINOO
Kay ang tawo masupilon man pag-ayo
Gipa-antos ug dugay sa GINOO
Ang mga Israelitas pinili nga mga tawo
Nag-antos pagka ulipon sa taga Egypto
Hangtud mi-abot si Moses aron mahaw-as sila
Sa pagka ulipon sa taas nga panahon na
Kay ang Pharaoh sa Egypto nagmagahi man
Napulo ka milagro ang gikinahanglan
Mi-abot ang panahon katawhan luwason na
Si Birhen Maria ang ANAK gipanamkon niya
Sa lalang sa ESPIRITU SANTO
Ang BUGTONG ANAK nahimo’ng tawo
Nagpuyo isip tawo dinhi sa kalibutan
Gisakit ug namatay diha sa krus labihan
Sa kamatayon sa BUGTONG ANAK
Ang kara-an’g templo nabu-ak
Sa kamatayon sa ANAK mihilak ang langit
Ug nabalot ang kalibutan sa kangitngit
Dayon naghimaya kay luwas na ang karawkan
Ug ang gangha-an sa langit naablihan
Tungod sa daku’ng gugma sa GINOO
Gisakripisyo ang ANAK aron maluwas ang tawo
Ang gugma sa GINOO sa mga katawhan
Dili ni bisan kinsa’ng linalang matumbasan
Dili matugkad ang gugma sa GINOO
Gikinahanglan lang hugot ang pagtuo sa tawo
Kay kita’ng tawo kang Adan mang kaliwat
ANG GINOO AY GUGMA sa tanan’g binuhat