Bohol Light mikunhod sa presyo sa Kuryente
Sinulat ni Sheryl B. Paga
Tagbilaran City – Ang residential ug commercial rates sa kuryente sa bulan sa Hunyo 2025 sa Bohol Light mikunhod ug ₱0.75 kada kWh kon ikumpara sa Mayo 2025.
Ang matag kilowatt-hour (kWh) sa residential magabayad na lamang ug ₱10.32 samtang ang commercial anaa na kini sa P9.74.
Kini nga maayong balita gumikan sa pagkunhod sa generation ug transmission charges diin mao kini ang adunay dako nga porsyento diha sa rate components.
Samtang ang Distribution Charge nagpabiling permanente sa kantidad nga P0.98 matag kilowatt lamang sugod pa niadtong tuig 2015.
Pananglitan, ang mga residente nga adunay average nga konsumo nga 200 kWh kada bulan makatipid ug ₱150.00 ilang bayranan sa kuryente.
Ang Bohol Light padayon nga nangita ug mga pamaagi aron mas makunhuran o mamentenar ang presyo sa kuryente pinaagi sa maampingon nga pagpangita ug pagmonitor sa kumprada diha sa Wholesale Electricity Spot Market (WESM) gawas sa mga nakontrata nga Power Generator.
Sa kanunay nagpahinumdum ang Bohol Light nga ang presyo sa kuryente matag bulan dili permanente busa gipahinumduman ang mga konsumidor nga matngunan sa kanunay sa mga Energy Saving Tips.
Gipaningkamutan sa Bohol Light nga makahatag ug pinakabarato ug kasaligan nga kuryente ngadto sa mga konsumidor.
Alang sa ubang mga pangutana ug kasayuran, mahimo kitang mobisita sa Bohol Light Facebook Page, website sa https://www.bohollight.com, o tawag sa service hotline: (038) 427-2372 / 0920-960-2372.
Gihimo ang pag-ugmad sa mga linya sa Bohol Water
Sinulat ni Victor L. Tambis
Makita sa hulagway sa itaas ang pag instalar sa mga bag-ong linya sa Bohol Water
Subay sa programa pag-ugmad sa mga linya aron mapadangat ang sakto nga bul-og sa tubig ngadto sa mga konsumidor, ang Bohol Water mihatag ug dakong pagtagad sa pag-ugmad sa mga linya pinaagi sa pag instalar ug dugang bag-o nga mga linya ug lakip ang pagpuli sa daan nga linya nga naka sinati ug pagbara o clogging.
Pagkakaron, nagpadayon ang Bohol Water pagladlad ug dugang bag-o nga linya sa Barangay Cabawan nga anaa na kini sa 90% nga mahuman. Kining maong linya motadlas padulong sa parte sa Barangay San Isidro ug lain usab ang paingon parte sa Barangay Tiptip ug mahimo na kining magamit sa mga konsumidor nga maagian sa maong linya sa bulan sa Hulyo ning tuiga.
Mahitungod sa pagpuli sa daan nga mga linya, ang Bohol Water nagpadayon karon sa pag puli sa daan nga linya sa Habitat, Barangay Bool. Nagagumikan kini sa nagpadayon nga road concreting sa maong dapit diin naapektohan kining maong linya nga adunay gilay-on nga 450 meters. Isunod usab niini ang pagpuli sa daan nga linya nga nakasinati ug pagbara o clogging subay sa Capayas St, Barangay Bool, pasaka ug padulong sa Habitat Village nga adunay gila-on nga 950 meters.
Sa samang bahin, ipahigayon usab sa Bohol Water ang pagbalhin sa main line nga nagasubay sa Sitio Kandait, Barangay Dampas nga adunay gilay-on nga 72 meters. Mopahibalo ra unya ang maong Kompanya kon pagasugdan na ang maong pagtrabaho nga gibanabana nga himoon kini sunod bulan o sa bulan sa Hulyo ning tuiga.
DOH wala nag-endorso og bisan unsang produkto; Mag-amping sa pekeng DOH accounts
Sinulat ni Elvira Bongosia
Ang Department of Health (DOH) ning bag-o lang nipasidaan sa publiko batok sa malinglahong mga website ug social media accounts nga nagsundog sa ahensya sa pagpamaligya ug mga produkto nga wala pa mapamatud-i, ilabina kadtong mga gibaligya isip tambal sa alta presyon.
“Hindi nag-eendorso ng kahit anong produkto ang DOH. Mag-ingat sa DOH fake accounts,” matud pa sa public advisory sa departamento.
Ang ahensya nag-ingon nga ang maong mga peke nga mga panid sayop nga naggamit sa ngalan sa DOH ug sa mga opisyal niini sa pagbaligya sa mga komersyal nga produkto, ilabi na kadtong gipamaligya isip tambal sa alta presyon.
Matud pa sa DOH, walay napamatud-an nga tambal ang maong mga produkto ug dili usab mo-endorso ang departamento ug bisan unsang commercial product.
Gipakita sa advisory ang screenshot sa usa ka fraudulent page nga adunay logo sa DOH ug ang ngalan sa usa ka medical expert nga giingong nag-endorso sa usa ka blood vessel-cleansing product.
Giklaro sa DOH nga ang website ra nga www.doh.gov.ph ang opisyal nga gigamit sa departamento.
Gipahimangnoan usab sa DOH ang publiko nga magbinantayon batok sa malimbungon nga mga estratehiya sa pagpamaligya nga naglakip sa mga peke nga testimonial, bakak nga pag-endorso gikan sa mga eksperto, ug nagpahisalaag nga pag-angkon sa kahimsog.
“Naireport na ng DOH sa DICT ang pekeng account at gumagawa na ng hakbang ang kagawaran para mapanagot sa batas ang mga nasa likod nito,” dugang sa ahensya.
Gi-awhag sa departamento sa panglawas nga i-report ang maong mga peke nga account.
Matud pa nga ang DOH opisyal nga social media accounts mao ang Facebook: DOHgovph, Instagram: @doh.philippines, ug ilang opisyal nga website: www.doh.gov.ph.
Taliwala sa pagkuyanap sa mga pekeng DOH accounts, gi-awhag sa departamento sa panglawas ang publiko nga e-report kini ug nipahinumdom nga ang website ra nga www.doh.gov.ph ang opisyal nga gigamit nila. (Hulagway gikan ni Elvira Bongosia)
DTI nanawagan ug suporta sa Sandugo Trade Fair ‘25
Sinulat ni Rey Anthony Chiu
Lain na usab nga hugna sa bantawan ang buksan alang sa kahigayonan sa mga Bol-anon nga micros, small ug medium enterprises nga makit-an ang ilang mga produkto ug mapalit gikan sa kamerkadohan diha nga buksan na usab ang Sandugo One Town One Product Trade Expo 2025, sa Hunyo 15-20 didto sa Island City Mall.
Sa Kapihan sa PIA, ang Department of Trade and Industry nga maoy nanguna nga ahensya nga nagtutok sa paghatag ug suporta sa industriya sa Bohol, mibutyag nga ang Product Trade Expo niining tuiga, maoy ika 17 na ka tuig nga kini nahimong Regional Trade Fair human kini masugdi niadtong 1989.
Usa sa mga labing dugay na ug guitamod nga mga trade Fairs sa nasud, ang Sandugo Trade Fair and Expo, matud ni DTI Bohol Provincial Director Vierna Teresa C. Ligan, nakatala na sa mga kalendarto sa mga mamalitay sa Manila ug international nga mga buyers, mao nga nahimong tumong usab sa gagmayng mamumuhunan.
Nahimong regular nga Trade Fair nga dalhanan sa mga local manufacturers nga gitabangan sa DTI aron mapakita ang ilang mga mugna, ang Sandugo expo niining tuiga magtanyag sa mga produkto sama sa mga baskets, mga pwede isuot nga sapot, mga panggasa, dekorasyon sa balay, accessories sa buhatan ug sa mga hotels, mga pagkaon, mga materyales nga mamahimong produkto, pagkaon, produkto sa health and wellness ug furniture.
Gibuksan aron makahatag ug lugar nga ikapadayag ang mga local nga produkto, ang Sandugo Trade Expo gidugok na usab sa mga dili taga Bohol human gibuksan ang promosyon sa One Town One Product, pasabut ni Trade and Industry Development Specialist Rey Anthony Regis sa DTI.
Human sa pipila n aka tuig nga pagbukas sa Sandugo, ang bantawan nahimo nga espasyo alang sa mga bag-ong produkto, nga mahimong hinimo sa susamang mga materyales apan nagpakita na sa desinyo nga makaaghat, mao na nga permi gyud nga gi-anha, dugang ni Regis.
Nunot niini, giaghat sa mga tinugyanan sa DTI nga suroyon ang Sandugo Trade Fair aron katabangan pa ang mga mga local manufacturers nga mao usab ang nagbuhi sa local nga ekonomiya
SUPPORT, BUY LOCAL. Sayo nga nanawagan ang DTI Bohol sa mga Bol-anon sa susamang init nga suporta ngadto sa mga Bol-anong MSMEs sailing pagpagawas sa ilang mga bag-ong produkto sa umaabut nga Sandugo Trade Expo karong Hulyo 15-20, 2025 didto sa Island City Mall. (Hulagway gikan sa PIA-Bohol)
Mga 4Ps giaghat sa BLCI pag-aplay sa ERC LRP
Sinulat ni Rey Anthony Chiu
Padayon ang pag-aghat sa mga distribution utilities sa serbisyo sa suga nga dagitab ngadto sa mga kabus ug mga sakop sa Pantawid Pamilyang Pilipino Program (4Ps) sa pag-aplay sa Lifeline Rates Program (LRP) sa Energy Regulations Commission (ERC).
PInaagi sa Republic Act No. 11552, pormal na nga gipatuman ang LRP.
Si Sheryl Paga, kinsa tigpamaba sa Bohol Light Company Incorporated (BLCI), mibutyag nga hangtud karon, padayon pa gihapon ag BLCI sa pagpatuman sa programa sa ERC.
The ERC LRP nagtanyag ug mga diskwento sa balayranans a koryente ngadto sa mga panimalay nga kwalipekado sa programa.
Sa programa, kadtong mga kabus nga panimalay nga mokonsumo sa binuwan nga gamit sa suga, ubos sa 100 KW, may makuhang kaltas sa ilang balayranan.
Sa katungod sa BLCI, matud ni Paga, kadtong mga kabus nga konsumidor sa BLCI nga nagkonsumno ug labing ubos sa 100 kw matag buwan, pwede mo-aplay.
Sa BLCI, ang mokunsumo ug 0 ngadto 20 kilowatts, libre, matud ni Paga.
Kadtong mokunsumo ug 21 ngadto sa 35 kilowatts, katunga ra ang bayaran. Ang mokonsumo ug 36 ngadtop sa 55 ka kilowatts may 40 % nga diskwento.
Ang mokunsumo ug 56 ngadto sa 65 kilowatts may 30% nga diskwento ug kadtong mokunsumo ug 66 ngadto sa 75 ka kilowatts, may 20% nga diskento, subay sa aprobado nga taripa sa ERC.
Kini usab samtang ang mga regular nga residential nga konsumidor sa kompanya, makasinati ug pagkubos sa rates sa ilang balayranan sa buwan sa Hunyo.
Gi-anunsyo sa More Power, ang igsoon nga kompanya sa BLCI nga ang mga konsumidor sa Tagbilaran City, makasinati ug P0.75 centavos nga kibra sa balayranan sa matag kilowatt nga konsumo sa Hunyo nga billings, o gikan sa ₱11.07/kWh ngadto sa ₱10.32/kWh.
Ang pagkubos sa rates sa koryente dala sa sistema nga gisagop sa kompanya nga strategic energy trading sa Wholesale Electricity Spot Market (WESM) apil na ang napaubos nga transmission charges, dala usab sa napakunhoran nga Ancillary Services ug Reserve Market rates, matud ni Jonathan Cabrera, tigpamaba sa Prime Electric Holding Inc, ang inahang kompanya sa BLCI ug More Power.
INAY LAAYON. Gawas sa napaubos nga mga rates tungod sa energy trading sa WESM, naghimo ug mga pakulo ang BLCI ngadto sa mga konsumidor nga nakasinati ug brownouts, pinaagi sa mga pacontest diin ang mga mananaug, makadawat ug mga premyo. (Hulagway gikan sa PIA-Bohol/SP)
PhilHealth nipasidaan batok sa text scam nga mangayo ug kwarta
Sinulat ni Elvira Bongosia
Ang Philippine Health Insurance Corporation (PhilHealth) nipagawas ug pasidaan sa publiko batok sa mga malimbongong mensahe nga bakak gamit ang ngalan sa Presidente ug Chief Executive officer niini nga si Edwin Mercado.
Sa usa ka pahayag nga gipagawas niadtong Lunes, ang PhilHealth miingon nga ang nagpalibot nga mensahe sa scam nag-ingon nga si Mercado naghangyo sa mga indibidwal nga magdeposito ug salapi alang kaniya.
Ang mensahe nag-ingon nga si Mercado anaa sa usa ka krusyal nga meeting ug iuli ang kantidad pagkahuman.
Kini naglakip sa mosunod nga mga detalye:
GCash Number: 0938-4354071
Name: MIEEL BRIIN LIIN
Viber Name: PCEO MERCADO EDWIN M
Viber Number: 0961-8296586
Ang state insurer miingon nga si Mercado wala maghimo sa ingon nga hangyo.
Gitambagan ang publiko nga dili makiglambigit sa nagpadala o magpadala bisan unsang kantidad sa salapi.
Kung makadawat sa ingon nga mga mensahe, mahimong i-report dayon ang insidente sa PhilHealth o sa hingtungdang awtoridad.
Mahimo usab nga kontakon ang PhilHealth Corporate Action Center pinaagi sa ilang 24/7 hotlines: Landline: (02) 8662-2588; Smart: 0998-857-2957 / 0968-865-4670; Globe: 0917-127-5987 / 0917-110-9812.
10 pa ka mga tambal exempted na sa VAT
Sinulat ni Elvira Bongosia
Ang Bureau of Internal Revenue (BIR) nipahibalo nga 10 pa ka tambal alang sa cancer, high cholesterol, hypertension, ug mental illness ang exempted na sa value-added tax (VAT).
Sa usa ka pahayag niadtong Lunes, ang BIR nagkanayon nga si Commissioner Romeo Lumagui Jr. niisyu sa Revenue Memorandum Circular No. 62-2025 niadtong Hunyo 20 nga nagpalapad pa sa listahan sa mga tambal nga wala nay VAT.
Matud pa sa BIR nga kini nga mga pagbag-o nagtumong sa pagpauswag sa pag-access sa mga kritikal nga tambal pinaagi sa pagkunhod sa gasto sa pagtambal alang sa mga pasyente ug ilang mga pamilya.
Ang pipila ka mga tambal sa lista mao ang Tegafur + Gimeracil + Oteracil Potassium para sa cancer, Metformin Hydrochloride + Teneligliptin para sa diabetes, Atorvastatin (as calcium) + Fenobribrate para sa high cholesterol, Metoprolol tartrate + Ivabradine (as hydrochloride) para hypertension, ug Lamotrigine para sa mental illness.
Ang VAT exemption, subay sa Republic Act No. 10963, o ang Tax Reform for Acceleration and Inclusion (TRAIN) Law, ug Republic Act No. 11534, o ang Corporate Recovery and Tax Incentives for Enterprises (CREATE) Act, gitumong aron mahimong responsive ug adaptive sa kasamtangang panginahanglanon sa panglawas sa publiko, nga gigiyahan sa pinakaulahing ebalwasyon sa Food and Drug Administration (FDA).
Si Lumagui namahayag nga ang pag-access sa barato nga mga tambal kabahin sa Excellent Taxpayer Service sa BIR.
146 Prov’l roads isukip sa FMRNP
Sinulat ni Rey Anthony Chiu
Usa ka gatus ug kap-atag upat (146) ka mga Provincial Roads nga may kinatibuk-an nga katas-on nga 920.169 kilometros ang buot karon nga isukip na sa Farm-to-Market Road Network Plan (FMRNP) sa Bohol, segun sa rekomendasyon sa usa ka Komitiba sa Sangguniang Panlalawigan.
Ang SP Committee on Public Works, Highways ug Related Infrastructure pinaagi ni Board Member Nathaniel Binlod ug mga sakop niini nga sila BM Greg Crispinito L. Jala, ug Venzencio B. Arcamo kinsa maoy mingtuki sa hangyo sa Provincial Engineers Office sa conversion subay usab sa Joint Administrative Order No 1, series of 2023 sa mga ahensya.
Ang nahisgutang Joint Administrative Order giluwatan sa Department of Agriculture (DA), Department of the Interior and Local Government (DILG), Department of Public Works and Highways (DPWH), Department of Tourism (DOT), ug Department of Trade and Industry (DTI), ug naglatid sa gabayan sa paghipno, pagpatuman ug pagpabag-o sa National Network of Farm-to-Market Roads (NNFMR).
Kahinumduman nga ang SP nakapagawas na sa Ordinance No. 2024-017, nga opisyal na nga nagdeklara sa 146 ka mga provincial roads.
Sa lain nga bahin, ang Farm-to-Market Roads (FMRs) maoy kritikal nga agi-anan nga nagsumpay sa mga umahan ug pangisdaan apil na ang mga dungguanan ug mga galinganan ug prosesohanan sa mga ani ngadto sa mga merkado ug sa mga major highways.
Ang kalidad ug ang kasayon sudlon sa mga FMRs, dako og ikatampo sa pagkubos sa pletehan nga gastohon sa mga mag-uuma pagpadangat sa ilang produkto sa kamerkadohan kay ang maayong pagkamintinar nga mga kadalanan paingon sa mga umahan makapaubos sa bili sa pagpakargada, ug makatampo sa maayong kalidad sa abut paghaw-as niini sa mga merkado.
Ang FMRNP sa laing bahin, usa ka a comprehensibo ug sistematiko nga roadmap nga magatumbok sa mga pagabuksan nga FMRs nga magpaduol sa agri-fishery production areas, processing ug post-harvest facilities, bagsakan centers, local nga kamerkadohan, ug agri-tourism sites ngadto sa kasaligang mga kadalanan ngadto na sa mga dagkong highways.
HInuon, aron mahisukip sa FMRNP, nagkinahanglan kini og resolusyon o ordinansa gikan sa Sangguniang Panlalawigan.
Ug, sa pagsuporta sa Joint Admin Order, ikapakita sa Bohol ang pag-abin niini sa pag-ugmad sa mga kabarangayan ug malungtaron nga pagplano sa mga imprastraktura.
DOST, CVisnet, LGU Inabanga Nag-alayonay sa Project BYTE
Sinulat ni Rey Anthony Chiu
Pormal na nga gilusad sa ang usa ka programa nga maghatag sa ilang pili nga mga estudyante sa mas advanced nga kahibawo sa advanced computer programming nga gipadagan sa tag-as nga level sa programming languages.
Sa pagpakigtambayayong sa Department of Science and Technology (DOST) uban sa Central Visayas Information System Network Foundation Incorporated (CVisNet) ug sa PROCESS Bohol, gibuksan usab sa InbCAS ang training program ug facilities alang sa Project Bridging Youth through Technology Empowerment (BYTE).
Pinaagi niining innovative nga proyekto, mahimong mas mapamaayo pa ang level sa abilidad sa mga estudyante ug mga magtutudlo sa paggamit sa Linux, pinaagi sa mga bansaybansay nga ilang makuha gikan sa kapartner niini nga DOST-CVisNET.
Ang Linux, usa lamang sa daghan nga mga computer programming languages apan ang labing sikat tungod sa iyang pagka open source platform alang sa halos tanang mga nagdagan nga mga teknolohiya nga gigamit karon, pasabut ni Engr. Jeffrey Llanto, Executive Director sa CVisNet Fdn.
PInaagi sa Project BYTE, naglaum ang Local Government Unit sa Inabanga sa pagpamatuod sa ilang panglantaw nga himoon ang lungsod nga local nga version sa “Silicon Valley,”pinaagi sa pagpahimutang sa usa ka komunidad nga gigamhan sa digital nga mga sistema.
Kini ang ugma, ug kon magpabilin kita nga dili mosakay niini, mabiyaan kita, butang nga dili nato buot nga mahitabo sa atong lungsod, saysay ni Mayor Jose Jono Jumamoy, didto sa katapusan nga opisyal nga kalihukan sa lungsod nga gitambongan sa kompleto nga linya sa mga opisyal sa dili pa sila motapos sa ilang termino.
Matud ni DOST Bohol Provincial Science and Technology Center Director VIna Antopina, ang Inabanga pa ang una ug bugtong LGU sa Rehiyon 7 nga nakapahiluna sa SB Committee on Science and Technology, isip usa ka kritikal nga komitiba nga makahatag og siyentipiko nga inputs isip giya sa mga lihuk pangkaugmaran sa lungsod.
“Diha nga atong gisugdan ang Smart Community Program sa DOST, atong gitutokan ang pagpang-apud-apod sa mga smart technologies. Apan uban sa panglantaw ni DOST Bohol’s PD Vina Antopina’s nga kon walay mga tawo nga makapadagan ug makapasabut sa dagan sa teknologiya, dili kining mga programaha molampus. Kinahanglan kini nga sugdan pinaagi sa paggahum ug pagbansay sa mga tawo nga makaatiman niining mga teknolohiya, mao kanay rasaon nga ania kami dinhi, matud ni DOST Officer In Charge Regional Director Engr Tristan Abando.
Taliwala sa mga pagduhaduha, si Antopina perming nagpahinumdom nga kon pwede nimo mahunahuna, pwede kini mahimo, ug kinahanglan kining himoon, dugang ni Abando.
Sa PROJECT BYTE sa InbCAS, tumong niini nga pamaayohon poa ang bugtong kurso nga gitutokan sa LGU ug DOST alang sa municipal college: ang BS Information Systems uban sa iyang pinahaum nga curriculum, pinaagi sa teknikal nga abag sa CViSNET.
Usa na niini ang pagpasumpay sa open-source software development, network administration, ug AI applications nga maghatag sa mga mogradwar sa kolehiyo sa kompleto nga hands-on experience ug practical, industry-relevant ICT skills didto sa ilang gibuksan nga skills laboratory sa ikatulong andana sa kolehiyo.
Dinhi, may 12 ka desktop computers, 2 laptop units, usa ka 55” touch interactive computer uban sa kiosk, us aka AI server taban sa iyang mga accessories, network toolkits, ug sa 500 mbps nga business grade internet para sa tibuok tuig, matud pa sa DOST.
KATAPUSANG OPISYAL NGA EVENT. Nagpahulagway ang mga opisyales sa Inabanga sa ilang katapusan nga formal official event sa lungsod sa dili pa nila itugyan ang pagpanguna sa lungsod sa mga bag-ong napili nga mga opisyales, human gilusad ang Project BYTE uban sa DOST-CVisNet. (Hulagway gikan sa PIA-Bohol)
KASALIGAN NGA PARTNERS. Si Engr Jeffrey Llanto (tunga) maoy labing unang Pinoy nga nakakonek sa internet sa Pilipinas, butang nga kaniadto, us aka dili maisip nga kalambuan. Niadtong adlawa, labing una nga gika-estorya ni Llanto si Bohol DOST PSTC Director Vina Antopina, samtang si DOST OIC RD Tristan Abando maoy naghimo sa documentation sa breakthrough. SIla karon ang partner sa LGU Inabanga sa ilang BYTE Project. (Hulagway gikan sa PIA-Bohol)
BALAK
ANG LINTUNGANAY SA ATONG PAGPAKABUHI
Sinulat ni Engr. Rogelio Podelino
Matag tawo sa ibabaw ning kalibutan
Tagsatagsa ug alan nga gi-agi-an
Kay tawo gihatagan ka man ug kagawasan
Ikaw ang magbuot sa imong kagustuhan
Manginabuhi sa pa-agi nga matarong
Aron sa katilingban ikaw makaharong
Dili magbuhat nga supak sa IYANG mga sugo
Hikalimti ayaw ang matag adlaw nga pag-ampo
Apan kalibutan sa mga buhi malinglahon
Na-a sa palibot ang mga matentalon
Agnihon ka sa kalibutanon’g kalipay
Aron imong kasub-anan mahupay
Tawhanon kina-iya ang kasaypanan
Magupok ang iyang baroganan
Mopasulabi ang lawasnon’g kahidlaw
Ang iyang pagka maligdong mahanaw
Ang pagpakgang sa mga tental dili tiaw
Kay ang balati-an labihan’g gi-uhaw
Kinahanglan bug-os ang imong baroganan
Aron kahigayonan pagpakasala mapugngan
Kay dinhi sa walug sa mga buhi
Nagkadaiya ang mga buluhaton nga hiwi
Magbaton ka ug baroganan’g timgas
Aron sa mga kasal-anan dili ka magasgas
Kay sa matag adlaw nimo’ng pakigbisog
Sungsungon ang makusog nga sulog
Likayan ang mga kahilayan
Aron mopadayon ka sa unahan
Kay katapusan sa kinabuhi dili man kapugngan
Ang tanan aduna may utlanan
Magsubay sa matarong nga dalan
Aron wala kay kabilinggan
Kay atong tinguha makaabot unta sa langit
Paghimaya sa GINOO sa hingpit
Magmatngon ka tawo sa imong kinabuhi
KINI ANG LINTUNGANAY SA PAGPAKABUHI