Unsay Mapaabot Nato sa SONA?
Ni ELEAZAR TUTOR ACAMPADO
USA Sa labing gipangandaman sa kagamhanan matag kataposang semana sa Hulyo ang mao ang SONA nga ipahigayon ni Presidente Ferdinand Romualdez Marcos Jr. didto sa Ubos Balay Balaoranan sa Batasang Pambansa Complex sa dakbayan sa Quezon. Kini ang labing mahinungdanong higayon nga ipadayag sa pangulo ang mga kalamposan nga nakab-ot sa iyang pamunoan ug unsa pa man ang mga gimbuhaton nga angay himoon sa nahibilin nga halos tulo ka tuig sa iyang pangagamhanan.
Ang pagpangandam niining maong okasyon dili basta-basta kay nagpahigayon og pag-ayom-ayom sa mga guba nga pasilidad ug pagpamintura sa kadalanan nga maagian sa mga dumuduong paingon sa Batasan Complex. Gipatuman usab ang higpit nga seguridad sa kapulisan nga mokabat sa 12,00 nga ipahimutang sa palibot sa Batasan Complex ug wala pay labot ang uban pang security personnel nga magbantay sa sulod sa maong lugar nga mokabat og 27,000 tanan. Apil na usab niini ang pagpangandam sa pagkaon alang sa mga diplomat sa nagkainlaing nasod sa kalibotan ug ubang mga opisyal sa kagamhanan apil na ang mga magbabalaod sa Kamara ug Senado nga may badyet nga dili momenos sa P700 kada ulo ug ikatandi na sa eat-all-you-can treat sa iladong mga restawran sa Kaulohan.
Ug mahingangha na usab kita dinhi sa isul-ob nga gown ni Riza Hontiveros nga usa ka dakong palahi sa iyang gisul-ob sa miaging tuig. Ug gituohan nga duna na usay maghimo og meme sahi sa nahitabo sa gisul-ob niya sa miaging SONA.
O mag-atang na usab kita kon unsay isul-ob ni Heart Evangelista ug kon mora ba gihapon og iya sa white lady o sa engkantada na. Ug sa daghan pang mga magbabalaod, personalidad ug diplomat nga mahimong magsub-ob usab sa mga minugna nila ni Mich Dulce, Sassa Jimenez, Monique Lhuillier, Rafe Totengco, Michael Cinco, Rajo Laurel, Pitoy Moreno, Josie Natori ug uban pa.
Di pa man magsugod ang pagpamulong sa pangulo, seguradong magsugod na ang kabanha sa mga raliyista nga magpahigayon usab sa ilang SONA sa kadalanan duol sa Batasan. Magpahayag usab sila sa ilang nakita nga mga kasaypanan ug kakuwangan sa kasamtangang pangagamhanan.
Ug sa pagpamulong sa Pangulong Bongbong Marcos, gipaabot nga itingal na usab niya nga angay natong dawaton ug suportahan ang iyang mga programa nga gituohang maoy hingpit nga maghatod ngadto sa kalamboan.
Ug dayon, iyang pahimug-atan ang mga kalamboan sa gilatid niyang “Bagong Pilipinas” sa pagdumala sa kagamhanan diha sa paghinlo sa korapsiyon sa burukrasya, sa pagmugna og daghang trabaho dinhi sa nasod ug sa pagpadala sa daghang mga Pilipino ngadto sa gawas sa nasod, sa pagpanalipod sa atong soberenya ug pagpanalipod sa atong katungod nga mapahimuslan ang bahandi sa kadagatan ilabi na diha sa West Philippine Sea nga gipangangkon usab sa Tsina, sa pagpatunhay sa kahusayg kalinaw diha sa padayong paglutos sa mga kriminal ug tigpayuhot sa gidiling mga droga, sa paglambo sa ekonomiya nga nakahimo og 5.4% nga pagtubo sa GDP sa unang kwarter sa tuig, ubp. Ug manaad na usab nga ipadayon kining mga kalamboan, ug uban pa… ug uban pa.
Apan ang dakong pangutana sa mga anaa sa ubos nga hut-ong sa katilingban kon ang ipanaad nga dugang kalamboan hingpit ba gayod nga mosampong sa ilang mga talan-kan-anan ug makakaon usab og bacon wrapped chicken rolls, chicken barbecue kebabs, eastern shrimp rolls with sweet chili sauce, chicken asparagus rolls, tuna pinwheels crab ug fresh fruit pannacotta, ug makainom usab og green tea ug raspberry iced tea, ubp. sahi sa mga bisita sa SONA. Ug kon dili man, ang SONA mahimo na lang moro-moro sa usa ka fashion show.
(Si Eleazar Tutor Acampado, kanhi staff writer sa Bisaya Magazine. Nakadaog na sa Don Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.)