Ang Hilom nga Paglupad sa Atong mga Nars
Ni ELEAZAR TUTOR ACAMPADO
MAMAHIMO kang usa ka bayani bisan pa unsa kagamay ang imong ginahimo apan dako og ikatabang sa imong isigkatawo.
Ingon niini ang mga nars. Gitan-aw sa uban nga ginagmay lang ang ilang mga ginahimo apan dakog gikatabang sa mga pasyenteng Bol-anon.
Mga bayani sila nga wala kaayo nato hatagig bili apan atong pangitaon ang ilang kabilhon kon sila manglupad na ngadto sa gawas sa nasod, sama sa Estados Unidos, Canada, Australia, UK, Italy ug uban pa nga nanginahanglan sa ilang mga serbisyo apan nagtagana og dagkong suweldo.
Naaghat kita pagbukas sa panid sa kinabuhi sa atong mga nars, ilabi na kadtong hilom nga nagserbisyo sa pribadong sektor dinhi sa Bohol.
Nahinabi nato ang usa ka batan-ong nars, nga tawgon nato og Kate, kinsa maisogong mipaambit sa iyang mga kasinatian ug hagit. Ang iyang sugilanon usa ka pagpadayag, usa ka hangyo, ug usa ka pagpahinumdom sa ilang bililhong papel sa ilang pag-atiman sa panglawas sa katilingbang Bol-anon.
Karong semanaha, usa ka dakong hagit ang miabot kaniya. Gibutyag niya ang usa ka insidente sa “Code Blue” sa ICU.
“Grabe ang kakapoy kay first time sad to namo mo-respond… pipila ra mi nakatubag, kasagaran mga ka-bae ra nako adto, so nagpuli-puli mi og CPR non-stop,” niya pa.
Makapaguol kaayo pamation ang kabug-at sa iyang mga kamot, nagpadayon sa pag-pump sa dughan, nga nasayod nga ang pagluwas sa kinabuhi maoy labing mahinungdanong katuyoan. Bisan sa kakapoy, ilang gihimo ang tanan. Gidayeg nato ang iyang dedikasyon, kay dili gyod tiaw ang ilang sakripisyo.
Ang Gikinahanglan nga Kausaban
Kon duna siyay usbon, tin-aw niyang ghisgotan ang ratio sa nars ngadto sa pasyente. Kay niya pa, “Kapoy kaayo mag-atiman og daghang pasyente nga halos walay break, unya delikado pa kung naay ma-miss.
Dugang pa mas makatagbaw ang ilang trabaho kon duna silay igong staff aron makahatag og saktong pag-atiman nga luwas ug epektibo.
Dili usab malikayan ang isyu sa suweldo. Mas labing malipayon ang mga nars kon ang suholan taas-taas aron dili na makahunahuna nga mag-abroad.
“We all know underpaid gyod mi, pero padayon gihapon mi bisan og gamay ra among sweldo—because we genuinely care about our patients’ health. That’s our passion as nurses,” maoy iyang asoy.
Usa kini ka pait nga kamatuoran sa atong pribadong mga ospital, nga maoy usa sa mga nag-unang rason sa paglupad sa atong mga nars ngadto sa gawas sa nasod. Bisan pa sa ubos nga suholan, ang ilang kasingkasing alang sa pasyente maoy nagpalihok kanila.
Pinasikad sa iyang kasinatian, gikinahanglan gyod sa atong mga nars ang makanunayon nga emosyonal ug mental nga suporta, ilabi na sa mga kritikal nga higayon. Ang klaro nga komunikasyon ug suporta gikan sa nanagdumala sa ospital, inubanan sa saktong pagbansay-bansay ug igong gidaghanon sa nars, makahatag og dako nga kausaban.
Pag-atiman sa Kaugalingon ug mga Damgo
Unsaon man ni Kate pagdumala sa iyang kaugalingon human sa makalapoy nga shift?
“Kada human sa duty, especially kon toxic jud akong shift, ang una nakong buhaton kay mangita gyod kog way nga makapahuway akong lawas ug utok. Sometimes, I just stay quiet in my room, magpaminaw og music, or mag-pray,” maoy iyang tubag.
Giila niya ang kakapoy, apan gipahinumdoman ang kaugalingon nga “I’m proud of what I do.”
Sa pagbalanse sa trabaho ug personal nga kinabuhi, giangkon niya nga lisod, apan naningkamot siya nga ipadaplin ang trabaho sa higayon nga makauli siya sa iyang pinuy-anan. Gihimo niya ang yano nga self-care routines sama sa mag-hot shower, motan-aw og Netflix, o mag-journal.
Ang pinakadako niyang stressor gawas sa trabaho mao ang pinansyal nga mga hagit ug ang internal nga pressure bahin sa NCLEX kun National Council Licensure Examination alang sa mga nars nga gustong maaplay ang ilang nakat-onan sa pagka nars didto sa Estados Unidos, Canada ug Australia. Bisan pa niini, nagpabilin siyang nakapokus sa iyang mga tumong ug pangandoy sa kinabuhi ug nagsalig sa plano sa Dios.
Daghan siya’g damgo, dili lang alang sa iyang kaugalingon, apan alang usab sa iyang pamilya.
“My next goal is to pass the NCLEX,” lakbit ni Kate.
Nangandoy siya nga mahimong US RN aron makatabang og mas dako sa iyang pamilya, makatigom, ug makasuhid sa kalibotan.
Sa mosunod nga duha ngadto sa tulo ka tuig, naglaom siyang makita ang iyang kaugalingon nga usa ka lisensyadong US RN, nagtrabaho sa gawas sa nasod, ug mas lig-on sa emosyonal ug mental.
Usa ka Pagdayeg ug Hagit
Saludo ko ni Kate ug kinasingkasing ang akong pagdayeg sa ilang gihatag nga serbisyo.
Usa siya sa labing maayong nars nga nag-atiman sa akong kapikas sa kinabuhi. Ang ilang mga kinaiya, usa ka tinuod nga hiyas sa usa ka mainampingong anghel. Naghatag og kapahulayan sa dughang nasakitan bisan pa og ang gibantayan nakong pasyente naggukod sa daginoton niyang gininhawa. Silang mga nars nagpahinumdom kanato sa ilang dili matukib nga papel sa atong kinabuhi.
Hinaot nga ang mga nanagdumala sa mga ospital dinhi sa Bohol, pribado man kini o publiko, makakita ug makabelib sa tanang kakugi, dedikasyon, ug mga sakripisyo nga gihimo sa atong mga nars. Sila ang mapinanggaong mga anghel sa atong mga ospital, ug ang ilang kaayohan kinahanglan usab nga atong unahon.
Ang paglupad sa mga nars dili lang usa ka estatistika, apan usa ka pagkawala sa kasingkasing ug kaalam nga gikinahanglan natong panalipdan dinhi sa atong kaugalingong Bohol.
Unsa pa kaha ang atong mahimo aron masuportahan ang atong mga nars dinhi sa Bohol?
Ikaw, Sano, unsay imong panahom?