Ang Mga Multo sa Flood Control Projects
Ni Eleazar Tutor Acampado
ANG pagbaha og pag-ulan dinhi sa atong nasod dili lang bunga sa kinaiyahan. Apan usa kini ka problema nga gipasamot sa grabeng korapsiyon ug pagpangawkaw sa pundo sa goberno.
Ning bag-o lang gibutyag nii Senador Panfilo Lacson ang mga iregularidad sa mga flood control project sa tibuok nasod, ilabina sa Bulacan diin ang mga proyekto morag mga.multo ug wala gayod gipanghimo.
Matod pa sa senador nga usa kini ka sistematikong korapsiyon diin ang mga pundo nga alang sa.mga proyekto gikibhangam ug gibahinbahin sa lainlaing mga opisyal, kontraktor ug politiko.
Gibutyag sa senador nga 8-10 porsyento sa pondo sa proyekto nabulsa sa mga opisyal sa Department of Public Works and Highways (DPWH), samtang 20-25 porsyento ang makuha sa politiko nga nag-propose sa maong proyekto. Sa himanhiman, ang mabilin nga pundo alang sa aktuwal nga pagpatuman sa proyekto, kon aduna man galing, moabot lang sa 40 porsento.
Dios Mio Marimar!
Usa kini ka makauulaw nga panghitabo nga nagpakita sa kawalay puangod nga pagpangawat sa salapi sa katawhan.
Samtang ang mga komunidad sa tibuok nasod nag-antos sa pagbaha, ang kuwarta nga unta gamiton sa pagpanalipod sa mga kinabuhi ug kabtangan, nasibot sa dakong bulsa sa korap nga mga opisyal sa kagamhanan.
Bisan kon ang exposè ni Lacson nagpokus sa mga proyekto sa ubang rehiyon, dili kini kalikayan nga maghatag og pangutana sa estado sa mga proyektong flood control sa Bohol.
Mahinungdanon nga ang mga lokal nga opisyal ug ang mga Bol-anon mismo magpakabana, magbantay ug magsusi sa mga proyekto sa ilang tagsa-tagsa ka mga dapit.
Kinahanglan nato nga segurohon nga ang matag proyekto, dagko man kini ug gagmay, dinhi sa atong pinanggang lalawigan, hapsay ang pagka-implementar ug dili mahimong usa sa mga “ghost project” nga gihisgotan sa senador.
Ang pagsulbad sa problema sa baha dili lang mahitungod sa pagtukod og mga imprastraktura, apan sa pagsumpo sa korapsyon nga nahimo nang gangrena sa atong gobyerno, bisan si kinsa man ang mga namunoan.
Kay ang korapsiyon nga dut na sa bukog misuhop.na bisan ngadto sa kabarangayan sa nasod ingon man dinhi sa Bohol.