Ang Bitoon Nga Nawad-an sa Iyang Kahayag
Ni ELEAZAR TUTOR ACAMPADO
SA kalibotan sa Philippine National Police (PNP), si Heneral Nicolas Torre III usa ka bitoon nga nagsugod sa pagkidlap apan sulod lang sa 85 ka adlaw, nawad-an sa kahayag.
Nagsugod ang pagkidlap sa iyang bitoon sukad nga gilutos niya si Pastor Apollo Quiboloy ug pagsikop niini ug ngadto na sa pagdakop niya sa kanhi presidente nga si Rodrigo Duturte ug gipadala ngadto sa The Hague, Nethelands. Morag gilatid na ang iyang dalan padulong sa kinapungkayan sa pedestal. Apan sa kalit nga pagkatangtang isip hepe sa PNP, ang iyang kahayag kalit nga nahanaw human sa halos tulo ka buwan sa puwesto.
Ang nag-unang rason sa kalit nga pagkapawong sa iyang kahayag dili lang usa ka yano nga isyu sa command chain. Ang iyang pagpalagpot nagsugod dihang iyang gisupak ang awtoridad sa National Police Commission (NAPOLCOM), nga gipangulohan ni Interior Secretary Jonvic Remulla. Giisip nga usa kadto ka tin-awng manipestasyon sa iyang grabeng pagkaarogante sa iyang gihimong re-shuffle nga ibalhin ang 13 ka high-ranking nga mga opisyal sa kapolisan nga walay pagtugot sa NAPOLCOM.
Ang iyang personal nga mga gara-gara sama sa gihimo niyang charity boxing match batok kang Davao City Mayor Sebastian Duterte, nakadugang sa panan-aw nga mas gitagaan ni Heneral Torre og panahon nga mosikat kaysa sa pagserbisyo sa katawhan. Bisan pa sa iyang abilidad, ang iyang batasan nga daw labaw sa balaod maoy hinungdan nga nausab ang dagan sa iyang karera sa pagka polis.
Apan ang pagpalagpot kaniya nagmugna usab og laing krisis sa PNP. Isip kanhi hepe, si Torre naghupot sa ranggong 4-star general, usa ka ranggo nga kinahanglang usa ra ang maghupot matag higayon sa tibuok PNP. Ang problema, human siya gitangtang, si Torre nagpabilin pa sa aktibong serbisyo ug nagpagahigahi nga moretiro og sayo, bisan pa sa mga panawagan. Ang iyang mandatory retirement sa Marso 11, 2027 pa.
Kini naghatag og dili maayong sitwasyon diin ang bag-ong hepe nga si Lt. Gen. Jose Melencio Nartatez Jr. naghupot lang sa ranggong 3-star. Tungod niini, si Torre, nga wala na sa puwesto, nagpabilin sa floating status apan padayon nga magdawat sa 4-star nga suweldo, samtang ang tinuod nga lider sa PNP anaa ra sa ubos nga ranggo.
Alang sa PNP, ang iyang pagkatangtang magsilbing lig-on nga leksiyon nga walay bisan kinsa ang molabaw sa balaod. Gipakita niini nga ang tanang opisyal, bisan unsa kataas sa ilang ranggo, kinahanglang motahod sa mga institusyon ug dili sa personal nga ambisyon.
Alang sa gobyerno kini nagpalig-on sa prinsipyo sa accountability ug transparency. Nagpakita kini nga ang gobyerno andam mohimo og lisod nga desisyon aron maprotektahan ang integridad sa mga importanteng ahensiya sa nasod.
Ug alang sa katilingban, ilabi na sa mga Bol-anon, ang maong panghitabo naghatag og lig-ong mensahe sa tanang lokal nga opisyal, lakip na sa atong kapolisan dinhi sa Bohol, nga ang prinsipyo sa accountability gipatuman, gikan sa taas nga ranggo hangtod na sa kinaubsan. Nagpasabot kini nga ang mga opisyal sa atong probinsiya kinahanglang magbinut-an ug magpaubos sa ilang pagpagnerbisyo.
Ang sugilanon ni Heneral Torre nagsilbing usa ka pasidaan. Nga ang pagkawala sa kahayag sa iyang bitoon usa ka leksiyon nga ang labing maayo nga posisyon o ranggo, bisan unsa pa kini kanindot, mawad-an sa kinidlap kon ang tawo nga naghupot niini nahimong arogante, nawad-an sa pagtahod ug pagpaubos sa pagsilbi sa katawhan.
Bahin sa Tagsulat:
(Si Eleazar Tutor Acampado, kanhi staff writer sa Bisaya Magazine. Nakadaog na sa Don Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.)