Ang Pagkat-on Walay Kinutoban

Ni ELEAZAR TUTOR ACAMPADO

USA sa makapahingangha sa kadaghanan ang pagbalik og eskuyla. Daghan ang matingala ug makakatawa kon 54 anyos ka na unya mobalik og eskuyla.

Daghan lagi ang mangutana.

“Ngano man?

Dili na man na kinahanglan?

Kini mismo ang akong naagian dihang gipadayag nako nga moeskuyla ko og balik. Gikataw-an ko sa akong mga anak, sa mga silingan, ug mga kaila.

Tinuod, ang akong sitwasyon lahi sa kadaghanan.

Gawas sa pagserbisyo isip Sangguniang Barangay member, ang trabaho na ang nagpangita nako isip usa ka tingsangyaw og mga produkto sa mga online seller sa Amerika ug Australia. Dili na ko kinahanglan pa og dugang titulo aron makab-ot ang akong mga panginahanglan.

Apan ang akong rason sa pagbalik sa tunghaan lapas pa sa panginabuhi. Nibalik ko aron mobalik ang gana sa pagkat-on, aron mahagit ko sa sulod sa upat ka suok sa lawak-saringan, ug aron mapuga og balik ang utok sama sa pagpuga sa utok sa mga batan-on.

Ang pag-eskuyla og balik dili lang bahin sa diploma o sertipiko. Kini bahin sa pagpadayon sa pagtubo isip usa ka tawo. Sama ra nga ang sapa dili mohunong sa pagdagayday sa tubig, ang atong utok kinahanglan sab nga padayong buhion ug dasigon.

Kay sa padayon nga pagdasig, padayon usab nga mabansay ang utok sa paglig-on sa pagkat-on.

Ang paghunong sa pagkat-on sama ra sa pagkatulog nga dili na makadungog sa bagting sa kampana. Dili ka na makakab-ot sa mga bag-ong ideya, bag-ong kahibalo, ug bag-ong oportunidad.

Sa kalibotan nga padayong nag-usab-usab, ang pagkahimong bukas sa pagkat-on mao ang yawe aron magpabilin nga makabatyag sa kapuslanan nga mabuhi ning kalibotan.

Ang pagkat-on dili limitado sa edad o sa eskuylahan. Kini usa ka biyahe nga walay hunong. Wala kiniy kinutoban samtang may kinabuhi. Busa, ayaw kahadlok sa pagsuhid og bag-ong mga kahanas, pagbasa og bag-ong mga libro, o pagkat-on og bag-ong mga ideya.

Kay ang pagkat-on, dili lamang alang sa trabaho, kondili alang sa atong pagpakabuhi. 

Bahin sa Tagsulat:
(Si Eleazar Tutor Acampado, kanhi staff writer sa Bisaya Magazine. Nakadaog na sa Don Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.)