Bohol Light, “Magduwa 2025”
Sinulat ni Sheryl B. Paga
Bohol Light, madasigon nga nagpahigayon sa Sports Fest ngadto sa mga empleyado nga gisugdan niadtong Septyimbre 16 ug mahuman hangtud sa katapusan niining bulan nga puno sa kasadya sa mga paplarong pinoy.
Kini gihimo aron paghatag ug kalingawang pisikal ngadto sa mga trabahante ug makabaton ug tinud-anay nga kooperasyon isip usa ka pamilya.
Ang mga aktibidadis naghatag ug mga makapahimuot nga mga dula, lig-on nga panaghiusa, ug tinuod nga diwa sa sportsmanship ug pagtamud sa tema nga, “Kusog sa Panaghiusa, Kadaugan sa Tanan.” Daghang kaayong salamat sa tanang ni-apil ug nisuporta.
Padayon ang sports fest hangtod Septyimbre 30. Gihimo ang mga sports games sa Bool Covered Court sugod sa may alas singko sa hapon hangtud sa alas nuybe sa kagabhion. Busa, magpadayon kita sa pagduwa, pagpalakpak, ug paghiusa isip usa ka pamilya sa Bohol Light.
Linya sa Bohol Water subay sa Darunday St. Brgy. Dao, gisugdan na
Sinulat ni Victor L. Tambis
Makita sa hulagway ang kalihokan pag “but-fused” o pasumpay sa PE pie nga gamiton pagladlad sa linya subay sa Darunday Street, Barangay, Dao.
Sigun sa naha-unang mga balita mahitungod sa programa pagladlad ug dugang mga linya ngadto sa mga konsumidor, ang Bohol Water mopahibalo nga misugod na kini sa trabaho pagladlad ug linya subay sa Darunday St, Barangay Dao. Ang maong linya adunay gilay-on o distansya nga 1,087 meters, nga nagsugod haduol sa Dao Health Center ug hangtod na kini sa eskina Dominic Drive Barangay tiptip ning syudad. Ang maong proyekto gisugdan niadtong Sept. 24, 2025 human nahatagan ang BWUI ug excavation permit gikan sa City Engineering Office (CEO).
Sa susamang programa, lakip usab sa maong excavation permit mao ang mga dapit sa Zamora St. Brgy. Dao diin pagapulihan ang 2 inch diameter nga linya ngadto sa 4 inches nga adunay gilay-on nga 1,650 meters from corner J.A. Clarin ug hangtod kini haduol sa V. Rama/Bohol Tech’l Training Center. Pagkubkob alang sa bag-ong linya nga magasubay sa Toledo St, (Sitio Lanao) gikan sa eskina J.A. Clarin ug hangtod kini sa Calichan Subdivion, nga adunay distancia nga dul-an sa usa ka kilometro, apil usab sa maong permit.
Ang maong nahisgutang proyekto mahuman sulod sa 120 days, kana kon walay kakulian nga mahinagbuan, sama sa klima sa panahon o mga legal issues nga dili kontrolado sa BWUI.
Kon mahatagan na ug excavation permit ang BWUI gikan sa DPWH, pagasugdan usab niini ang pagladlad ug bag-ong linya sa matag pikas sa kalsada subay sa CPG North Ave. gikan sa eskina Baguio Drive ug hangtod sa eskina Salazar St, Brgy. Ubujan nga adunay gilay-on nga 486 meters.
ERC Juan ming-depensa sa giprotestahan nga CSP
Sinulat ni Rey Anthony Chiu
Gidepensahan sa mismong chairman sa Energy Regulatory Commission (ERC) ang pagpatuman na karon sa Competitive Selection Process (CSP) isip sistema sa pagtumbok sa presyo sa serbisyo sa koryente nga maoy mas kasaligan nga panalipod sa mga konsumidor.
Sa us aka pahayag, matud ni abogado ug ERC Chairman nga si Saturnino Juan, ang labing kasaligan nga panagang batok sa mahal nga presyo, dili ang discretionary power sa ERC nga magtudlo sa kinsa ang makakuha sa supply contract kon dili ang pagseguro nga makatanyag ang mga suppliers sa labing barato nga supply aron maoy makadaug sa kontrata.
Kahinumduman nga ang kwalisyon sa Power for the People (P4P) nga gilangkoban sa mga progresibong grupo sama sa Philippine Movement for Climate Justice, Sanlakas, ug Murang Koryente ming protesta batok sa ERC tungod sa gipasangil niining mingpabor sa mga power players ug power suppliers nga mao nay magbuot nga nagpasaka sa presyo nga wala maglantaw sa epekto niini sa mga ordinaryong konsumidor.
Gipadayag ni P4P Convenor Gerry Arances nga ang unang mandatus sa ERC mao ang pagpanalipod sa mga interes sa konsumidor, ug apil niana ang pagtuki sa mga giduso nga kontrata aron pugngan ang abuso ug ipaneguro nga barato ang koryente.
Apan, dason ni tsirman Juan nga, gani kana ang sistema nga gipatuman sa CSP ug ang mandu sa Korte Suprema sa iyang desisyon kabahin sa reklamo sa Alyansa ng Bagong Pilipinas.
Ang CSP usa ka mekanismo nga gidesinyo sa Department of Energy pagpatuman sa mandato sa Electric Power Industry Reform Act (EPIRA) nga mohimo ug competitive process.
Gipasabut ni Juan nga ang CSP dayag ug bukas sa publiko nga competitive bidding diin ang mga Distribution Utilities makapili sa ilang nakit-an nga labing barato nga supply alang sa ilang mga konsumidor.
Ang proseso gidesinyo aron makuha ang matuod, maki-angayon nga presyo sa koryente base usab sa supply ug sa panginahanglan, ug dili pinaagi sa pagsabutsabut lamang nga dili maka-apil ang katawhan, dugang ni Juan.
Gani, gidugang sa ERC pag-ingon nga wala makuhai ang ilang trabaho, na-usab lamang kay sama sa gihapon, ang tuyo mao ang pagbantay nga tinuod nga competitive process ang nahitabo aron ikapanumpa nila ang integridad niini.
Ang trabaho sa ERC nga magtumbok sa presyo nagsandig sa resulta sa usa ka dayag, katuohan ug maki-angayon nga CSP kay kini magpadayag sa matuod nga tubag sa pangutana kon unsa ang labing barato nga koryente, kay kini makit-an sa labing ubos nga bid sa supplier, dason sa ERC.
ENERGY TRADING. Gawas sa gipatuman sa ERC nga Competitive Selection Process, ang mga Distribution Utilities usab makakita sa dagan sa pamaligya sa realtime, mao nga makapili sila kon mopalit sa supply samtang barato pa ang presyo kay se WESM, dili kanunay magpundo ang presyo nga ubos, mao nga makaseguro ang mga konsumidor sa labing ubos nga rates. (Hulagway gikan sa PIABohol)
GAWAS NGA SEC REGISTERED… Lisensya sa pagnegosyo, namaligya sutaon, sa di’ pa mobuhi’g puhunan
Sinulat ni Rey Anthony Chiu
Dili lamang rehistro sa Securities and Exchange Commission (SEC) ang pangayoon kon may magpangaghat nga mamuhunan o mobayad sa unsa may gitanyag nga makahaylo.
Pahimangno ni SEC Information Officer Dion Drew Diano, ang registration sa SEC, nagmatuod lang nga anaa ang kompanya nga narehistro, apan kinahanglan pa usab nga ilang irehistro ang ilang negosyo nga gisudlan.
Magkinahanglan pa sila ug secondary license para sa ilang securities, dason sa opisyal sa SEC Region 7 kinsa mianhi sa Bohol aon mapadayag ang pahimangno ngadto sa mga Bol-anon, taliwala sa nagkagrabe nga negosyo sa pangilad karon.
Ang securities nagpasabut sa gibaligya nga mga kabtangan sa kompanya o korporasyon, o mga sertipiko nga magpakita sa kantidad nga gipamuhunan sama na lang sa stocks sa kompanya.
Kini nga mga financial instruments gigamit sa mga corporasyon aron makatigum ug dugang pang ipamuhunan samtang mang-aghat sa mga tawo nga mo-apil sa pamuhunan aron makaganansya.
Ang SEC maog magpatuman ug magregulate sa patigayon niining mga tanyag sa mga kompanya ug korporasyon ngadto na sa mga mamumuhunan.
Subay usab niini, may mga nagpasuroy sa mga kabalayan ug mga buhatan nga mang-aghat sa pagbuhi ug puhunan, ilabi na kon pakapinan sa dagkong saad sa paspas nga ginansya, pasabut ni Diano.
Tambag sa SEC, pangitaa ang rehistro sa SEC, apil na ang pagsuta kon registrado ug lisensyado ba ang ilang pamaligya, usa kadokumento gikan sa SEC alang niini ang angay nga ikapakita.
Dugang pa, sa ingon niini nga pagpanghaylo sa puhunan, gidugang sa SEC nga bisan gani ang mga tawo nga gitugyanan sa kompanya o korporasyon nga magsuroysuroy aron magsolicit ug puhunan, kinahanglan usab gihapon nga rehistrado sa SEC
KON HALOS DI NA KATUOHAN. Tambag sa SEC, kon may manghaylo ug pamuhunan nga nagtanyag ug daku ug paspas nga ganansya, ayaw pagdalidali. Sutaa daan kon dili ba kini ilad, matud ni Dion Drew Diano sa SEC. (Hulagway gikan sa PIABohol)
4.27% pag-ubos sa kaso sa krimen sa 2025, namatikdan
Sinulat ni Rey Anthony Chiu
Bisan pa ug mingsaka ug 31 ka kaso o katumbas sa 1.41% ang kadaghanon sa mga kaso nga nagtimaan sa krimen batok sa kalinaw ug kahapsay, kinatibuk-ang nga 218 ka kaso o 4.27% usab ang gi-us-os sa sumada sa mga insidente sa krimen nga natala sa mga blotter sa kapolisan sa Bohol gikan sa Enero 1 ngadto sa Septyimbre 19, 2025.
Kini kay mikabat lamang usab sa 8.54% o 249 ka mga kaso nga nagtimaan sa public safety ang diperensya sa mga krimen nga nagpanghitabo sa susamang panahon sa i-aging tuig.
Gitaho ni Police Senior Superintendent Patricio Degay, Jr., bag-ong hepe sa Bohol Provincial Police Office nga sa Enero 1 ngadto sa Septyimber 12, 2024, may 2,917 ka mga kaso sa public safety ang natala.
Sa samang panahon niining 2025, mitala sa mga blotters sa kapolisan sa Bohol ang 2,668 ka nga insidente, diin napakita ang 249 ka kaso nga nakapaubos sa kadaghanon sa kaso sa 2025, tumbok ni Colonel Degay.
Sa mga insidente sa mga kaso ubos sa kahapsay ug kalinaw, gawas sa kaso sa pagpatay nga tinuyo ug dili tinuyo, ang tanang timan-anan, nagpakita sa pag-us-os sa mga kaso.
Ang kaso sa kawat mingatal ug 56% nga pag-us-os gikan sa 217 ngadto sa 96, ang physical injuries may 27% nga pag-us-os gikan sa 146 ngadto na sa 106.
Ang kaso sa tulis: gikan sa 40 sa imaging tuig, 38 na karon, ang kaso sa paglugos gikan sa 68 karon kay 59 na, o 13% nga us-os alang sa 9 ka kaso nga diperensya.
Ang pagpangawat sa motor, gikan sa 22, 13 na lang samtang kon may us aka kaso sa pagpangawat sa sakyanan sa 2024, wala pay natala alang sa 2025.
Sa mga krimen sa public safety gikan sa 150 ka kaso, napun-an ug 8 ang nadakpan sa 2025, sa espseyal nga balaod sa illegal nga drugas, gikan sa 649 nga nadakpans a 2024, 823 na karon, ug ang balaod sa armas nga mobuto, gikan sa 31 ka kaso sa 2024, 109 na karon sa 2025.
Sa mga pagsupak sa uban nga special laws, gikan sa 311, may 374 na ka kaso karon, samtang sa mga kaso sa Revised Penal Code nga dili sukip sa non-index crimes, gikan sa 446, 338 na.
UNTA MAPATUNHAY. Nasinati sa Bohol ang 4% ng pag-ubos sa kaso sa kinatibuk-ang mga krimen sa 2025 kompara sa 2024, samtang anaa pa sa pipila ka adlaw nga pagpangulo sa Bohol provincial Police ni Police Colonel Patricio Degay, Jr. (Hulagway gikan sa PIABohol)
In-house drug rehab center ma-operational na sa 2026
Sinulat ni Rey Anthony Chiu
Sa tungatunga sa sunod tuig, mahimong operational na ang inhouse nga Drug Rehabilitation Facility sa Bohol.
Kini maoy gipaambit ni Provincial Health Officer Dr. Fruserma Mary Uy, atul sa Provincial Peace and Order Council Meeting didto sa Capitol Ceremonial Hall, Septembre 23.
Ang Drug Rehabilitation Facility nga gipasabut ni Dr Uy, maoa ang gilaraw alang sa Maribojoc Community Hospital, nga sirad-an aron himoon na nga drug rehabilitation center, subay sa laraw sa Administrasyon ni Gob Erico Aristotle Aumentado.
Ug tungod kay wala nay kinahanglan pang dagkong pagtukod, mas dali kini nga humanon, dugang ni Dr Uy.
Matud niya, nahuman na ang team sa PHO sa paghimo ug benchmarking sa programa alang sa rehab, pagpahiluna sa operational budget alang sa 2026, samtang nahimo na usab sa Provincial Engineers Office ug sa Provincail general Services Office ang program of Works alang sa dyutay na nga mga trabahoon alang sa pagconvert sa hospital nagdto na sa drug rehab center.
Kini usab maoy basehan aron makakuha na sa mga gikinahanglang permits sa operasyon sa pasilidad.
Gitaho usab sa PHO nga dyutay na lang ang gikinahanglang manpower supplement alang sa operation sa pasilidad kay may mga kasamtangan na nga mga manpower sa hospital.
Hinuon, manginahanglan pa usab ang kagamhanang probinsyal nga manghire ug psychologists ug drug specialists alang sa kompleto nga serbisyo sa pasilidad.
DI NA KINAHANGLANG MAGTUKOD. Kay naa na ang Maribojoc Community Hospital, dyutay na lang nga retrofit, mahimo na kini nga operational inhouse drug rehab center sa Bohol, ug sa mga manpower nga naa sa hospital, sayon na sa provincial government ang pagpuno sa kakuwangon sa manpower, matud ni Dr. Fruserma Mary ‘Emem’ Uy didto sa PPOC. (Hulagway gikan sa PIABohol)
Senior citizens commission ubos na sa pagdumala sa DSWD
Sinulat in Elvira C. Bongosia
Gibutang ni Presidente Ferdinand R. Marcos Jr. ang National Commission of Senior Citizens (NCSC) ubos sa pagdumala sa Department of Social Welfare and Development (DSWD) sa tinguha nga mapalig-on ang mga polisiya ug programa alang sa mga tigulang.
Ang Executive Order (EO) 96, nga gilagdaan sa Presidente niadtong Setyembre 18, ug mi-epekto dayon, nagmando sa pagbalhin sa NCSC ngadto sa DSWD gikan sa Office of the President (OP) alang sa katuyoan sa polisiya ug koordinasyon sa programa.
Matud pa sa EO, ang DSWD magpabilin nga responsable sa pagpatuman sa Social Pension for Indigent Senior Citizens (SPISC) program ug mahimong makigtambayayong sa NCSC aron makatabang sa pagsiguro sa kalampusan niini.
Ang NCSC gitukod pinaagi sa Republic Act (RA) 11350 niadtong 2019 aron maseguro ang hingpit nga pagpatuman sa mga balaod, polisiya, ug mga programa alang sa pagpasiugda ug pagpanalipod sa mga katungod ug kaayohan sa mga senior citizens.
Ubos sa RA 11350, ang tanang gimbuhaton, programa, proyekto, ug aktibidad sa DSWD alang sa mga kabus, huyang, ug kabus nga mga senior citizens ibalhin ngadto sa NCSC, nga gilakip sa OP.
Sa laing bahin, ang SPISC natukod pinaagi sa RA 9994 o ang Expanded Senior Citizens Act of 2010 aron sa paghatag ug monetary grant sa mga eligible nga senior citizens aron masuportahan ang ilang inadlaw nga panginabuhi ug medikal nga panginahanglan.
Ang RA 11916, nga gilagdaan nga balaod niadtong 2022, nagpataas sa binuwan nga social pension sa mga indigent senior citizen gikan sa P500 ngadto sa P1,000.
Nakalatid sa Executive Order 96 nga subay sa walo ka punto nga socioeconomic agenda sa Administrasyon nga naglakip sa pagpalambo sa bureaucratic efficiency, usa ka lig-on nga organisasyonal nga link tali sa NCSC ug DSWD kinahanglan nga matukod aron mas mapalig-on ang mga palisiya ug programa alang sa mga senior citizens, uban ang tumong sa pagpalambo sa paghatag sa serbisyo sosyal ug pagpalambo sa kinatibuk-ang kaayohan ug pagpanalipod sa mga tigulang. (Hulagway gikan ni Elvira C. Bongosia/PIA7-Bohol)
DSWD mi-awhag sa publiko sa pagpresentar sa PhilSys Nat’l ID kun mo-avail og hinabang
Sinulat in Elvira C. Bongosia
Ang Department of Social Welfare and Development (DSWD) Field Office 7–Central Visayas nag-awhag sa publiko sa pagpresentar sa Philippine Statistics Authority (PSA)-issued PhilSys National ID sa pag-avail sa mga programa sa pagtabang sa departamento, lakip ang Ayuda sa Kapos ang Kita Program (AKAP) ug ang Assistance to Individuals in Crisis Situations (AICS).
Aron paggiya sa pagpatuman sa AKAP, ang DSWD, Department of Labor and Employment (DOLE), ug Department of Economy, Planning, and Development (DEPDev) nag-isyu ug Joint Memorandum Circular No. 2025-01.
Ang circular espesipikong naglatid nga ang mga kliyente nga nag-avail sa laing hugna sa tabang ubos sa AKAP kinahanglang magparehistro sa PSA o sa DSWD-PSA co-location areas aron pagsiguro sa usa ka nasyonal nga ID, bisan sa pisikal o elektronik nga pormat.
Matud pa ni DSWD 7 Regional Director Shalaine Marie S. Lucero, tumong sa maong direktiba aron ipasiugda ug i-normalize ang paggamit sa national ID system sa gobyerno. Gipasabot niini nga ang inisyatiba makabenepisyo sa mga kliyente ug sa ahensya, tungod kay kini nag-streamline sa mga kinahanglanon sa pag-ila ug nagpalig-on sa paggamit sa national ID.
Gi-klaro ni Lucero nga ang lagda magamit lamang sa mga nagbalikbalik nga kliyente o kadtong adunay naka-avail kaniadto sa tabang sa DSWD.
Alang sa mga first-time nga kliyente, bisan unsa nga balido nga government-issued ID dawaton gihapon kung ilang buhaton wala pa ang national ID.
Kalabot niini, gidasig sa buhatan ang publiko nga magparehistro ug PhilSys aron sa sunod nilang pagpangayo ug hinabang, makapresentar na sila sa ilang national ID isip balido nga pruweba.
Ang gidawat nga PhilSys National ID mao kadtong gi-isyu sa PSA, bisan sa Polyvinyl Chloride (PVC) o plastic card format, o ang Electronic Philippine ID (ePhilID), nga kasagaran gi-imprinta sa papel ug mahimong laminated. Usa ka gi-imprinta nga kopya sa national ID nga gihimo pinaagi sa eGovPH mobile application gidawat usab kung nag-avail sa tabang.
DSWD-7 payout alang sa Ayuda sa Kapos ang Kita Program (AKAP). (Hulagway gikan sa DSWD)
EO 97 nga nagpalig-on sa mga katungod sa mga mamumuo, nagsiguro sa kagawasan sa asosasyon, gilagdaan ni PBBM
Sinulat in Elvira C. Bongosia
Gilagdaan ni Presidente Ferdinand R. Marcos Jr. ang Executive Order No. 97 nga magsiguro nga ang mga mamumuo gawasnon nga makaporma ug mga unyon, moapil sa mga asosasyon, ug mogamit sa ilang mga katungod nga walay kahadlok.
Ang mando sa Presidente naglatid ug klaro nga mga lagda alang sa mga ahensya sa gobyerno sa pagpanalipod niini nga mga katungod ug pagsiguro nga ang mga rally ug kalihokan sa unyon magpabilin nga malinawon ug subay sa balaod.
Gisagop sa EO No. 97 ang Omnibus Guidelines on the Exercise of Freedom of Association and Civil Liberties, nga nagmando sa mga ahensya sa gobyerno sa pagpanalipod sa mga katungod sa mga mamumuo sa pag-unyon, pag-organisar, ug pag-apil sa malinawon nga hiniusang mga kalihokan subay sa Konstitusyon ug internasyonal nga mga sumbanan sa pamuo.
Ang lakang nagpalig-on sa mga garantiya sa konstitusyon nga nanalipod sa katungod sa mga mamumuo sa kaugalingon nga organisasyon, kolektibo nga bargaining, ug malinawon nga asembliya, pagtubag sa mga kabalaka nga gipatungha sa International Labor Organization (ILO) nga nanawagan sa gobyerno sa Pilipinas nga molihok sa gikataho nga mga kabalaka sa mga mamumuo.
Namatikdan sa EO 97 nga sa 108th Session of the International Labor Conference (ILC) niadtong Hunyo 2019, ang ILO nagtukod ug High-Level Tripartite Mission (HLTM) aron pagtabang sa gobyerno sa Pilipinas sa pagsulbad sa mga gitaho nga insidente sa kapintasan, red-tagging, ug pagsumpo sa katungod sa unyon.
Girekomenda usab sa HLTM ang diha-diha ug epektibo nga mga aksyon, lakip ang pagpugong sa kapintasan nga may kalabotan sa mga lehitimong kalihokan sa unyon; imbestigasyon ug tulubagon sa mga buhat sa kapintasan batok sa mga miyembro sa unyon; operationalization sa monitoring body; ug kasiguroan nga ang tanang mga mamumuo, nga walay kalainan, gawasnon nga makaporma ug makaapil sa mga organisasyon nga ilang gipili.
Niadtong 2023, aron ipatuman ang mga rekomendasyon sa HLTM, ang Presidente pinaagi sa Executive Order (EO) No. 23 nagmugna sa Inter-Agency Committee for the Protection of the Freedom of Association and Right to Organize of Workers, o ang Inter-Agency Committee, aron sa paghimo sa tanang gikinahanglang mga lakang aron matubag ang upat ka naila nga mga bahin sa gikabalak-an.
Ang mando magpasiugda ug manalipod usab sa mga katungod sa mga mamumuo sa kagawasan sa asosasyon, organisasyon sa kaugalingon, ug kolektibong pakigsabot, uban ang bug-os nga pagtamod sa tawhanong, sibil, politikanhon, ekonomikanhon, ug sosyal nga mga katungod ug kagawasan.
Ubos sa mando, ang mga mahinungdanong ahensya—lakip ang Department of Labor and Employment (DOLE), Department of Justice, Department of National Defense, Department of Trade and Industry, Armed Forces of the Philippines (AFP), Philippine National Police (PNP), ug National Security Council—gitahasan sa pagpahiuyon sa ilang mga polisiya ug operasyon sa guidelines.
Ang DOLE, pinaagi sa National Tripartite Industrial Peace Council, maoy mo-monitor sa implementasyon ug pagsunod, samtang ang Inter-Agency Committee nga gimugna niadtong 2023 mohatag ug periodic reports ngadto sa Office of the President.
Ang mga ahensya sa gobyerno gikinahanglan usab nga ilakip ang mga giya sa ilang pagbansay, mga operasyon, ug mga materyales sa impormasyon aron masiguro ang parehas nga aplikasyon.
Samtang ang mga local government units ug ang pribadong sektor gidasig sa pagpalapad sa hingpit nga kooperasyon.
Gisagop sa EO No. 97 ang Omnibus Guidelines on the Exercise of Freedom of Association and Civil Liberties, nga nagmando sa mga ahensya sa gobyerno sa pagpanalipod sa mga katungod sa mga mamumuo sa pag-unyon, pag-organisar, ug pag-apil sa malinawon nga hiniusang mga kalihokan subay sa Konstitusyon ug internasyonal nga mga sumbanan sa pamuo. (Hulagway gikan sa PCO-PIA)
BALAK
Kini nga balak naghubit sa dagan sa kinabuhi sa tawo, gikan sa iyang pagka undan ug buot ug
pagbugtaw sa walug sa kinabuhi ug ang iyang damgo nga makaabot sa dapit nga gitawag ug langit.
ANG KAGAHAPON ANG KARON ug ANG UGMA
Sinulat ni Engr. Rogelio Podelino
Ang kinabuhi sa tawo ning kalibutan
Daku ug tastason kon di-in ka gikan
Aron ang gumonhap sa imong pagka tawo
Malaksi ang mga pagduda sa imong pagtuo
Matag tawo adunay nangaging kagahapon
Bisan unsa ka dulom may paglaum gihapon
Panahon sa mangi-ob nga kahimtang
Ayaw padaug sa balati-an’g mahuyang
Kay ang tawo ulipon sa kasal-anan
Maoy hinungdan nga huyang ug baroganan
Bisan pa ang tawo ug masalaypon
Gihigugma sa GINOO gihapon
Kon ikaw nahilukapa bangon ug pamapha
Padayon pagbugtaw kon asa ka
Atubanga ang mga suliran karon
Hikalimti ang naglugitom mo’ng kagahapon
Kon kulang sa katimgas ang imong baroganan
Sangpita ang ana-a sa KAHITAS-AN
Aron ang gahum sa ESPIRITU SANTO
Mogabay sa imong pagharong sa husto
Sa adlaw adlaw nimong pakigbisog sa kinabuhi
Gipas-an ang tanang kaakohan aron mabuhi
Kay human sa makusog nga kulyada
Ang dakung lawod sa dagat linaw mora ug lana
Karon kay nakasagubang ka na sa kalisdanan
Tungod sa panabang sa KAHITAS-AN
Ang imong tumong nga molambo sa kinabuhi
Nga moyabong ang imong panginabuhi
Sa imong paningkamot para sa kaugma-on
Wala damha haruhay ka na karon
Apan ang kinapongkayan nga damgo sa tawo
Nga makaabot sa dapit nga gitagana sa GINOO
Kay kinabuhi sa kalibutan adunay katapusan
Kinabuhi luyo sa kamatayon gipangandaman
Sa paglaweg ning walug sa mga luha
ANG KAGAHAPON ANG KARON ug ANG UGMA
maoy imong hagdanan pagsaka sa langitnong himaya