Ang Bag-ong Tingog sa Kabag-ohan
Ni ELEAZAR TUTOR ACAMPADO
DAGHAN ang miingon nga naay diperensiya ang iyang pangutok. Apan kon ang kadaghanan ang pasultion, ilabi na sa mga tawong gisum-olan na sa grabeng korapsiyon, siya usa ka batan-ong Miriam Defensor Santiago, sa bag-ong panahon. Isog, way lipod-lipod, diretsong mosulti sa unsay naa sa iyang hunahuna.
Ingon niani karon ang 27 nga anyos nga Kongresista Francisco “Kiko” Austria Barzaga sa ikaupat nga Distrito sa Cavite, ang ikaduhang batan-on sa kasamtangang mga magbabalaod sa Ubos Balay Balaoranan.
Ning bag-o lang, gipadayag ni Kiko Barzaga nga mopasaka siya og impeachment complaint batok ni Presidente Bongbong Marcos Jr. Ang basehan sa iyang reklamo mao ang “betrayal of public trust,” gumikan sa giingong pagkapakyas sa administrasyon sa pagtubag sa mga anomaliya sa flood control projects.
Iyang gilaoman nga sa pagduso niya sa reklamong impeachment batok sa pangulo, matangtang kini sa puwesto sa daling panahon ug makasugod og pag-imbestigar ngadto sa tanang nalambigit sa anomaliya sa flood control.
Apan ang iyang panawagan alang sa kabag-ohan gisugat og kontrobersiya.
Samtang walay kongresista ang gidakop o gipasakaan og kaso human sa upat ka bulan nga imbestigasyon, usa ka vlogger ang gidakop gumikan sa Facebook post niini batok sa Presidente. Kini nga panghitabo nagpakita sa dako nga kalainan sa pagtratar sa balaod.
Ang mga gagmayng tawo dali rang pasakaan og kaso, apan ang mga dagko sama sa mga politiko, nga nalambigit sa mga bilyones nga korapsiyon, nagpabilin nga gawasnon.
Si Kongresista Barzaga nagpakita og kaisog sa iyang pagbarog batok sa mga gipang-akusar. Apan, ang iyang impeachment complaint, kon madawat man sa Secretary General sa Kongreso, dili pa makalihok tungod kay dili kini prayoridad karon, sumala ni Speaker Faustino “Bojie” Dy III. Apan kini naghatag og impresyon nga ang impeachment nahimong dula-dula sa politika imbis nga himan sa pagpatuman sa moralidad ug hustisya.
Ang iyang panawagan sa usa ka linaw nga people power aron ikapadayag ang mga yangungo batok sa grabeng korapsiyon sa nasod ubos sa kasamtangang administrasyon, usa ka pag-awhag sa tanan nga dili kita angay mahadlok sa kausaban, kondili atong ablihan ang pultahan sa mga bag-ong kahigayonan.
Ang iyang ehemplo naghatag og inspirasyon sa mga batan-ong lider sa atong probinsiya sa Bohol nga molihok uban sa kaisog ug panglantaw alang sa usa ka labing maayong kaugmaon.
Ang pangutana nga nagpabilin, makahimo ba siya og tinuod nga kausaban? O magpabilin kini nga usa ka hagit nga walay epekto sa sistema?
Unsa man ang atong papel sa pagsuporta niini nga matang sa kabag-ohan?
Ang pagka aktibo ug pagpangayo og accountability gikan sa atong mga lider maoy labing dako natong kontribusyon.
Bahin sa Tagsulat:
(Si Eleazar Tutor Acampado, kanhi staff writer sa Bisaya Magazine. Nakadaog na sa Don Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.)