Bulawanong Oportunidad alang sa Organic Agripreneurship!
Ni ELEAZAR TUTOR ACAMPADO
SA paglabay sa panahon, nagkagamay ang mga yuta nga gitikad sa mga Bol-anon. Nagkatiguwang ang mga mag-uuma samtang ang kabataan nangita sa ilang kapalaran sa dagkong dakbayan biniyaan ang banika nga nagpanawag kanila.
Maong dako ang atong kalipay nga masayod nga adunay programa nga mag-aghat kanila nga tan-awon og balik ang umahan isip tinubdan sa kaugmaon. Kini dili na lang damgo, kondili usa na ka tinuod nga oportunidad!
Karon, ang Department of Agriculture – Agricultural Training Institute (DA-ATI) nag-awhag sa mga batan-on (18-35 anyos) nga moapil na sa Youth Internship Program on Organic Agriculture kun YIPOA.
Kining YIPOA usa ka 21-ka-bulan nga comprehensive scholarship program nga gidesinyo aron makamugna og bag-ong henerasyon sa mga organic agripreneurs. Kining inisyatiba usa ka kolaborasyon sa DA-NOAP (National Organic Agriculture Program) ug sa DA-ATI, diin ang tumong mao ang paghatag og komprehensibong suporta aron ang mga negosyo sa mga scholar mahimong malig-on ug financially sustainable.
Tan-awa, Sano, ug hunahunaa unsa kadako kining maong kahigayonan ug mga benepisyo kon mapili nga mahiapil sa maong programa.
· ₱150,000 START-UP CAPITAL!
Dili ni utang. Ang gobyerno ang mo-invest aron makasugod ka sa imong kaugalingong negosyo sa uma, pinasubay sa prinsipyo sa Organic Agriculture! Kining maong pundo ihatag isip start-up support sa intern sa unang tuig human sa malamposong pagtapos sa internship phase.
· LIBRENG TRAINING, Stipend, ug Mentorship! Ang programa naglangkob og usa ka 9-ka-bulan nga rigorous internship (ang unang hugna sa programa) diin moapil ka sa hands-on learning sa mga designated agricultural sites o farm partners. Ang mga scholar sa miaging batch, pananglitan, gi-assign sa mga inila nga farm partners sa Visayas.
Duha ka Bol-anon, sila si Joshua T. Hinojales ug Sheryl Lane Mar, malamposong nakatapos sa ilang internship sa Tree Topz Integrated Farm sa Pantad, Barangay Bahi, Alburquerque.
· Makadawat ka og ₱5,000.00 nga binulan nga allowance isip intern.
· Dugang Suporta sa Negosyo: Human sa tuig, kung makita nga malamposon ang implementasyon sa imong Business Enterprise, makadawat ka pa og dugang ₱120,000.00 nga suporta sa Ikaduhang Tuig sa programa. Ang kinatibuk-ang suporta, Start-up ug Implementation, moabot og ₱270,000.00!
Kinsa ang Makasulod?
Angay lang nga ikaw:
· Nag-edad og 18 ngadto sa 35 anyos (bisan out-of-school youth o gradwado sa bisan unsang 4-year course).
· Kinahanglan nga natural born Filipino citizen.
· Interesado nga mosulod sa industriya sa agrikultura, labi na sa organic agriculture.
· Adunay dakong kagustohan nga mo-commit sa 21-ka-bulan nga internship ug hands-on practice contract.
· Physically and mentally fit, ug adunay maayo nga moral nga karakter (good community standing) nga gisertipikahan sa LGU.
· Bisan dili ka Agriculture graduate, pwede ka mamahimong tinuod nga Organic Agripreneur!
Unsaon Pag-Apply?
Ang Application Deadline karong Oktubre 28, 2025.
Alang sa mga kinahanglanon nga dokumento, kinahanglan nimo andamon ang:
· Application Form ug Simplified Enterprise Plan.
· Birth Certificate (gikan sa PSA) ug scanned copy sa valid government ID.
· Certification sa imong bona fide residency ug good community standing gikan sa inyong Barangay Chairman.
· Notarized Sworn Statement sa imong dakong gusto nga mo-commit sa training.
“Ang YIPOA usa ka malamposong programa nga nakasuportar nako, sa panghunahuna ug sa panalapi. Pinaagi niini, nadiskobre nako ang dakong oportunidad sa organic farming,” pung pa ni Joshua.
Sa laing bahin, si Sheryl Lane miingon, “Sa wala pa magsugod ang programa, dili pa ko segurado sa katuyoan sa akong kinabuhi. Ug sa paglabay sa panahon, ang konsepto sa organic agriculture nagkalig-on. Ang dag-om nga imahe nahimong klaro.”
Si Joshua ug Sheryl Lane mga inspirasyon karon sa mga Bol-anon. Ug magpamatuod nga mahimo usab nga magmalamposon ang mga batan-on sa organikong pagpanguma.
Andam ka ba nga mosunod sa mga lakang nila ni Joshua ug Sheryl Lane? Andam ka bang molambo ug makakuwarta sa panguma?
Ayaw palabya ang maong kahigayonan! Bisitaha o kontaka ang Municipal Agriculture Office sa inyong lungsod. O di ba sa Agricultural Training Institute RTC 7, sa Cabawan District, Tagbilaran City, Boholaron masayod sa kompletong mga detalye ug sa pagduso sa imong aplikasyon.
Sano, ang pagkat-on ug pagpaningkamot anaa sa imong mga kamot!
(Si Eleazar Tutor Acampado, kanhi staff writer sa Bisaya Magazine. Nakadaog na sa Don Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.)