Bohol Light padayon nga naghimo sa Clearing Operation
Sinulat ni Sheryl B. Paga
Obligasyon sa usa ka distribution utility ang pagmintenar sa mga distribution line facilities aron masiguro nga luwas sa kadaot ang mga konsumidor ug aron mahatagan ug husto nga power reliability ang mga lugar nga nasakop sa franchise area niini.
Ang Bohol Light Company, Inc. padayon nga naghimo ug mga clearing operations dinhi sa syudad sa Tagbilaran sa tinguha nga makapadayon sa paghatag ug de kalidad nga serbisyo sa kuryente.
Aduna kitay mga kalihokan nga gihimo sama sa modification sa mga over sagging secondary lines; pagpuli sa mga kahoy nga poste ngadto sa concrete poles; stringing ug upgrading sa mga primary nga distribution lines; splitting of loads sa mga common distribution transformers; ug pakorek sa mga nabantayang hotspots aron malikayan ang mga low voltages or power fluctuations. Aduna usab kitay gihimo nga pagpamutol sa mga sanga o punoan sa kahoy nga hapit na nga motakdo sa distribution lines.
Operasyon sa BWUI wala maapektohi sa bagyong Tino
Sinulat ni Victor L. Tambis
Makita sa itaas ang usa sa pumping stations ug ang filtration equipment nga anaa sa R6 A&B.
Sigun sa inspection o pagsusi nga gihimo sa mga tinugyanan sa Bohol Water paghuman sa pagtadlas ni bagyong Tino sa lalawigan sa Bohol niadtong kaadlawon sa adlawng Martes, Novyembre 4, 2025, nasuta nga walay kadaot nga nahimo ang maong bagyo ngadto sa mga fasilidad, ilabi na sa mga pumping stations nga nahimutang sa Tagbilaran City ug lungsod sa Corella; gawas lamang sa pagkawala sa koryente gikan sa Boheco sugod sa tungang gabii sa adlawng lunes ug nakabalik kini sa sayong buntag sa sunod adlaw diin nakaapekto kini sa supply sa tubig tungod sa pagkapalong sa mga pumping stations.
Sa adlawng Lunes, o usa ka adlaw sa wala pa moabot ang maong bagyo, ang Quick Response Team (QRT) sa Bohol Water naghimo sa emergency nga panagtigum diin gihisgutan niini ang pagpangandam sa mga posibilidad nga mahitabo sa mga pumping stations ug reservoirs kon ugaling mokusog ang hangin nga dala sa maong bagyo. Ang pagpangandam nagalakip sa mga mosunod: (1) Pagsiguro nga walay mga kahoy o sanga haduol sa mga pumping stations ug reservoirs nga possibly mitumba o masiak gumikan sa kakusog sa hangin; (2) Pagpundo ug crudo alang sa mga generator sets kon ugaling adunay taas nga brownout aron maka-andar ang mga pumping stations; (3) Standby nga personahe ug mga chain saw nga mo atende kon adunay mga kahoy nga maka apekto sa operation sa mga pumping stations; (4)Open communication with CDRRMO ug MDRRMO sa Corella kon adunay mga kahoy nga mtumba sa mga pumping stations, ug uban pang pagpangandam sigun sa nasinati sa miaging bagyong Odette sa.
Sigun sa pinakaulahing weather forecast sa PAG-ASA mahitungod sa umaabot nga laing bagyo nga ang pangan Uwan kon mosulod na kini sa PAR, ang daotang panahon possibly nga mahimong super typhoon diin gibanabana nga mo igo sa Luzon. Apan bisan pa niini, ang BWUI mihimo sa susamang pagpangandam aron pagsiguro nga dili maapektohan ang mga pasilidad ilabi na ang mga pumping stations sa Bohol Water.
ATI nipasidaan sa batok sa mga mangingilad
Sinulat ni Elvira C. Bongosia
Gi-klaro sa Agricultural Training Institute (ATI) nga walay mga indibiduwal o organisasyon ang awtorisado nga mogamit sa ngalan sa buhatan, mga opisyal ug kawani niini, alang sa pag-solicit ug pangayo ug pondo.
Gipasidan-an sa ATI ang ilang mga suppliers, contractor, consultant, mga ahensya sa gobyerno, ug ang kinatibuk-ang publiko nga magmabinantayon pag-ayo sa mga transaksyon ilabina niadtong naglambigit ug mga bayad.
Kini human sa pipila ka gikataho nga dili maayo nga mga kalihokan nga nagpakaaron-ingnon nga mga opisyal o kawani sa ATI aron ipatuman ang mga ilegal nga kalihokan, ug alang sa bisan unsang paagi ug kapasidad.
Ang ATI usa ka ahensya sa gobyerno sa Pilipinas ubos sa Department of Agriculture (DA) nga responsable sa pagbansay sa mga mamumuo sa pagpalawig sa agrikultura ug sa ilang mga kliyente; pagpahigayon ug multi-level nga mga programa sa pagbansay aron sa pagpalambo ug pagpadali sa kauswagan sa kabanikanhan; ug pagsiguro nga ang mga resulta sa panukiduki ipahibalo sa mga mag-uuma pinaagi sa angay nga pagbansay ug mga kalihokan sa extension.
Nipasidaan ang ATI nga walay mga indibidwal o organisasyon ang awtorisado nga mogamit sa ngalan sa buhatan, mga opisyal ug kawani niini, alang sa mga kampanya sa pagpangayo ug pagtigom ug pondo. (Hulagway gikan sa ATI/PIA)
DOLE nipagawas ug ‘pay rules’ alang sa Kalag-kalag, Bonifacio Day holidays
Sinulat ni Elvira C. Bongosia
Ang mga empleyado sa pribadong sektor nga motrabaho sa pag-obserbar sa Bisperas sa Adlaw sa mga Santos sa Biyernes, Oktubre 31, Adlaw sa mga Santos sa Sabado, Nobyembre 1, ug Bonifacio Day sa Domingo, Nobyembre 30, adunay katungod sa dugang sweldo, gipahibalo sa Department of Labor and Employment (DOLE).
Gideklarar ni Presidente Ferdinand Marcos Jr. ang Oktubre 31 ug Nobyembre 1 isip special non-working holidays ug ang Nobyembre 30 isip regular holiday ubos sa Presidential Proclamation No. 727.
Sa gipagawas nga Labor Advisory No. 13-25, gipasabot sa DOLE nga ang mga empleyado nga dili motrabaho sa mga special non-working days sundon ang “no work, no pay” nga sumbanan gawas kun adunay paborableng polisiya, praktis o collective bargaining agreement nga gikasabotan.
Ang mga empleyado nga motrabaho sa mga special non-working days adunay katungod sa dugang 30 porsiyento sa ilang basic wage sa unang walo ka oras nga trabaho. Kung molapas sa walo ka oras, dugang 30 porsyento sa hourly rate ang magamit alang sa overtime nga ihatag.
Apan kun ang espesyal nga adlaw mahulog sa adlaw sa pagpahulay sa usa ka empleyado, sila adunay katungod sa dugang nga 50 porsyento sa ilang batakang sweldo sa unang walo ka oras.
Alang sa overtime nga trabaho nga gihimo sa maong mga adlaw sa pagpahulay, ang mga empleyado adunay katungod sa laing 30 porsyento sa matag oras nga rate.
Samtang alang sa Bonifacio Day nga usa ka regular holiday, ang mga empleyado nga dili motrabaho adunay katungod sa 100 porsyento sa ilang inadlaw nga sweldo, kung sila mo-report sa trabaho o adunay bayad nga bakasyon sa adlaw sa wala pa ang holiday.
Kung ang adlaw sa dili pa ang regular holiday usa ka non-working day o rest day, makadawat gihapon ang mga empleyado sa ilang holiday pay basta anaa sila o naka-leave with pay sa kataposang adlaw sa trabaho una pa niana.
Kadtong motrabaho sa Bonifacio Day kinahanglang bayran ug 200 porsiyento sa ilang batakang sweldo sa unang walo ka oras nga trabaho.
Ang mga empleyado nga mo-overtime sa maong adlaw adunay katungod sa dugang 30 porsyento sa ilang hourly rate.
Kung ang regular holiday mahulog sa adlaw sa pagpahulay sa usa ka empleyado, sila adunay katungod sa dugang nga 30 porsyento sa ilang sukaranan nga sweldo, nga nagdala sa kinatibuk-an nga 260 porsyento alang sa unang walo ka oras nga trabaho.
Samtang ang overtime nga gihimo sa maong mga rest days atol sa regular holiday bayran usab ug dugang 30 porsiyento sa hourly rate.
BALAK
MAAGHOP ANG BALATI-AN
Sinulat ni Engr. Rogelio Podelino
Ang tawo linalsng sa GINOO
Gihuypan aron may kinabuhi ug espiritu
Gipapuyo sa Eden aron magmalipayon
Apan ang gidangatan sukwahi hino-on
Hinungdan gihinginlan ang tawo sa paraiso
Diha nagsugod ang mga suliran sa tawo
Magpatulo sa singot aron mabuhi
Antuson ang mga kasakitan sa kinabuhi
Batasan sa tawo adunay duha ka matang
Masinugtanon sa tanan bisan unsay kahimtang
Ang usa masupilon nga wala sa husto
Suliran sa katilingban kay masupakon pag-ayo
Ang tawo nga buotan gihigugma sa tanan
Gikawilihan kon magpahilayo sa katilingban
Panahon sa kalisud dangpanan sa katawhan
Sa kanunay dili motalikod sa nagkinahanglan
Tawo nga buotan may kahadlok sa GINOO
May paghigugma ug timgas nga pagtuo
Nagsubay sa matarong nga dalan
Ang NAPULO KA SUGO maoy iyang talamdan
Pagtuo sa GINOO maoy gabayan sa kinabuhi
Mas lig-on pa sa kahoy kamagong dili mabali
Dili motalikod sa iyang husto nga baroganan
Ang tawo nga MAAGHOP ANG BALATI-AN