Usa Ka Sekreto Aron Dili Dayon Matigulang
Ni ELEAZAR TUTOR ACAMPADO
SAMTANG nagkatigulang ang tawo, nagkadugang usab ang mga selula sa masel nga mamatay. Kini ang mga dili kalikayang kausaban nga maghatod sa tawo ngadto sa kamatayon. Mao kini ang kamatuoran sa tawo. Dili gayod siya mohangtod. Dunay kataposan ang iyang hinulamang kinabuhi. Apan adunay paagi aron dili dayon matigulang ug mamatay.
Ang mga yogi nga nagtuon sa yoga (ang praktis sa kompletong konsentrasyon sa pagbalanse sa hunahuna ug lawas) dili modawat sa daling pagtigulang. Ug pinaagi sa gahom sa ilang panghunahuna napugngan nila ang daling pagkalawos. Wala sila modawat sa kamatuoran nga sa matag adlaw nga miabot sa ilang kanabuhi sila nagkatigulang. Gilantaw nila ang ilang kaugalingon nga kanunayng nagpabilin sa edad nga ilang napilian, pananglitan 26 (nga maoy gihimong ideyal nga edad ning tagsulat bisan pa og milapas na sa kalim-an) Kining gamhanang panghunahuna, napamatud-an sa mga yogi nga makapahinay sa dis-og sa kausaban sa mga selula samtang nagkaedad. Gimandoan nila ang ilang lawas pinaagi sa alimpatakan nga dili magpatigulang. Ug ang lawas misanong usab sa mando sa pangulo.
Kon gusto nimong sulayan ang sekretong ideyal nga edad sa yoga, ingon ani ang pag-aplay. Pagpili og ideyal nga edad alang kanimo nga gusto nimong kanunay magpabilin. Pananglitan 28. Kining maong edad kasagaran maoy gipili sa mga yogi tungod kay niining edara ingnon nato nga matured na ang ilang panabot ug nakaabot na sa kinapungkayan sa pisikal nga aspeto.
Kon miabot ka na sa kinapungkayan sa imong edad nga sayo pa sa 28 sa mental man ug sa pisikal, pilia ang maong edad, sugyot sa mga yogi. Kon miabot ang mental peak sa 35 ug ang pisikal sa 24, hulagwaya ang imong utok nga magpabilin ang imong edad sa 35 sa tibuok mong kinabuhi, ug ang lawas sa 24. Kon ang panghunahuna magpadayon sa iyang pag-mature ug pag-usbaw ngadto pananglit sa 54 apan ang lawas milapas na sa iyang kinapungkayan nga pagtubo sa edad nga 23, hulagwaya ang utok nga nagpabilin sa 54 ug ang lawas sa 23. Pilia ang unsa mang mental ug pisikal nga edad nga gusto nimong magpabilin ka sa tibuok mong kinabuhi. Kalimtan ang edad matag birthday. Mahimong saulogon ang birthday kon gusto apan kalimti ang numero sa tuig nga natala sa imong birth certificate. Unya ipadayon ang paghulagway ug paglihok-lihok nga sama sa ideyal nga edad sa mental ug pisikal nga imong napilian.
Hulagwaya ang ideyal nga edad nga mabulokon aron makanunayon ang paghipnotismo sa utok ug lawas nga mobalik ug magpabilin sa edad nga imong napilian. Ang pagbalik-balik sa paghunahuna, maghatod ug makanunayong mensahe gikan sa utok paingon sa matag selula sa lawas ug mag-usab niini ngadto sa matang sa selula nga gihulagwayng mahimo, sama sa alimpatakan sa miracle healer nga nag-usab sa masakitong mga selula ngadto sa himsog nga mga selula.
Ayaw paipsota ang ideyal nga hulagway sa panglawas diha sa imong hunahuna bisan pa og ang imong tinuod nga edad maoy imong gibutang sa mga opisyal nga dokumento. Pasagding ang imong tinuod nga edad mahimong laing numero sa imong kinabuhi. Ug pasagding ang imong gihulagway nga ideyal nga edad mahimong aktuwal nga reyalidad. Kon manamin ka, tan-awa kanunay ang imong kaugalingon nga kanunayng anaa sa ideyal nga edad. Kon mag-apil-apil sa mga paugnat sa kusog, isipa gihapon ang ideyal nga edad. Ayaw pabuntog sa negatibong panghunahuna.
Apan moapil lang sa kompetisyon sa mga batan-on kon himsog ug maarang sa lawas. Ug ayaw pugsa ang kaugalingon sa pag-apil sa mga kompetisyon hangtod nga mahubsan sa enerhiya. Duna pa bitaw laing adlaw nga makasalga ka sa kompetisyon.
Busa sa tanan nimong buhaton, hulagwayon kanunay nga nagpabilin ug wala ka mobiya sa ideyal nga edad sa mental man o sa pisikal nga aspeto. Sama sa mga yogi, mahimo usab nimong mapahinay ang dis-og sa imong pagtigulang ug magpuyo sa hataas nga panahon nga adunay batan-ong kinabuhi.
Sulayi ang paghimo sa sekreto sa mga yogi, dili ka gyod magmahay.
(Si Eleazar Tutor Acampado, kanhi staff writer sa Bisaya Magazine. Nakadaog na sa Don Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.)