Bohol Light nagpasidungog sa mga empleyado ug media partners
Sinulat ni Sheryl B. Paga
Nagpadangat ang Bohol Light ug dakong pasalamat ngadto sa mga empleyado ug partner agencies isip pag rekognisar sa mga serbisyo alang sa malapuson nga operayon niining tuig 2025 ug hangtud sa umaabot pang mga katuigan.
Niadtong Disymbre 5, 2025 gihimo ang pagpanghatag ug service awards sa mga empleyado nga naapil sa unto pika lima, ikanapulo, ika-kinse ug ika-byente na ka tuig nga nag serbisyo sa Bohol Light. Gihatag ang maong awards atol usab sa pagsaulog sa 2025 Christmas party tali sa tanang mga empleyado niini nga gipanguluhan sa Presidente ug CEO sa Primelectric Holdings, Inc., Mr. Roel Z. Castro inubanan sa mga lederes sa matag departmento nga nahitabo didto sa Fortdrige Pavillio, Totolan Dauis, Bohol.
Dako ang pasalamat sa mga empleyado sa maong rekognasyon tungod kay ang ilang pagpanerbisyo tungod sa paghatag niini ug pasidungog diin ang maong trabaho gihimo dili lamang alang sa kompanya kon dili alang usab sa matag pamilya.
Sa laing bahin, niadtong Disyembre 10, 2025 gihimo usab ang Bohol Light – Media Night didto sa Rosella Dome, Panda Tea Garden Suite.
Gitambungan kiini sa mga kawani gikan sa tanang mga media outlets dinhi sa dakbayan o lalawigan sa Bohol sama sa The Bohol Tribune, Station DYTR, The Bohol Chronicle, Station DYRD, Bohol Island News, Bohol Daily News ug BEE 92.7.
Ang maong kalihukan, usa ka pasalamat ngadto sa tanang mga media persons nga sa kanunay nihatag sa ilang makanunayon nga suporta ilabi na sa mga programa sa radio, pagpublikar sa mga impotante nga mga impormasyon kabahin sa operayon ug mga updates sa Bohol Light aron mas mapalapdan ang pagpahibalo ngadto sa publiko.
Sulod sa usa ka tuig na ang nakalabay, pasalig sa Bohol Light ang paghatag ug mas sadya ug walay puas nga paghatag ug inspirasyon alang sa taga Tagbilaranon.
Sa Bohol Light, Panuga Para sa Tanan, Kalipay sa Tanan!
Promo sa Bohol Water nagpadayon hangtod Dec. 31
Sinulat ni Victor L. Tambis
Aron mahatagan ug kagaan ang mga konsumidor nga nagplano nga mo apply for new water connection, nagpadayon pagkakaron ang Bohol Water sa pag implementar sa “pakonektar karon-unya ra ang bayad” promo diin ma konektar ang linya nga dili kinahanglan bayaran dayon ang application fee.
Subay niini, ang balayronon sa pag apply alang sa bag-o nga koneksyon nga nagkantidad sa P6,000.00 alang sa residential ug P7,000.00 sa commercial mahimong bayaran sulod sa 6 ngadto sa 12 ka bulan, depende sa kapasidad sa aplikante ug ang pagbayad niini ikarga sa matag bulan nga water bill sa konsumidor. Pinaagi sa maong promo, e konektar sulod sa 24 oras ang linya kon ma kompleto ang requirements human ma inspection sa tinugyanan sa BWUI ang linya ug human ma aprobahan ang aplikasyon.
Ang maong promo nagsugod niadtong December 1 ug hangtod kini sa December 31 ning tuiga. Atong mahinumduman nga ang Bohol Water adunay mga bag-ong linya nga mahimo na nga aplayan sa mga konsumidor nga naagian nga anaa sa mga dapit sa Barangay sa Taloto, Cabawan, Tiptip, San Isidro ug Dao.
Ang maong promo nagahatag ug kahigayonan sa konsumidor nga ma konektahan sa tubig nga walay kantidad nga magasto, gawas lamang sa mga fittings nga gikinanglan aron masumpay ang linya ngadto sa panimalay.
Ang Bohol Water nag-awhag sa mga konsumidor nga nagplano nga magpakonektar, sa pag avail sa maong promo diin aplicable kini sa bisan asa nga dapit sulod sa service area sa Bohol Water.
5 ka adlaw nga ‘Wellness leave’ alang sa mga trabahante sa gobyerno, aprobado sa CSC
Sinulat ni Elvira C. Bongosia
Aron mapalig-on pa ang mga estratehiya sa trabahoan nga nahisubay sa Republic Act 11036 o ang Mental Health Act, giaprobahan sa Civil Service Commission (CSC) ang paghatag ug labing taas nga lima ka adlaw nga “Wellness Leave” alang sa mga kwalipikadong opisyal ug empleyado sa gobyerno.
Ubos sa CSC Resolution No. 2501292, gipasiugda sa Komisyon ang mga probisyon sa Joint Administrative Order No. 2023-000 nga gi-issue sa Department of Labor and Employment (DOLE) ug sa Department of Health (DOH), nga nag-ila sa kahimsog sa pangisip isip usa sa mga prayoridad nga lugar alang sa mga interbensyon sa promosyon sa kahimsog sa trabahoan.
Gipalig-on kini sa mga nadiskobrehan gikan sa 2025 Global Workplace Report nga nagpakita nga ang mga trabahanteng Pilipino adunay ikaduha sa pinakataas nga lebel sa stress sa Southeast Asia, nga gimaneho sa dili maayo nga estilo sa kinabuhi ug bug-at nga trabaho.
Kini nagpasiugda sa panginahanglan sa mga palisiya sa trabahoan nga nagpasiugda sa mental ug pisikal nga kaayohan.
Ang Wellness Leave mahimong magsunod-sunod sulod sa labing taas nga tulo ka adlaw sa usa ka higayon o sa lain nga dili sunod-sunod nga mga adlaw. Kini mao ang non-cumulative, non-commutable ug forfeited kon dili gamiton sulod sa tuig sa kalendaryo.
Ang wellness leave mahimong magamit alang sa mental health care, physical wellness activities, o alang sa general break from work.
Lahi kini sa kasamtangan nga mga benepisyo sa leave sama sa vacation ug sick leave ug gituyo alang sa kaayohan ug pagkaayo.
Ang mga aplikasyon kinahanglang irekomendar sa diha-diha nga superbisor ug isumite sa ulohan sa buhatan alang sa pag-apruba. Ang pag-file kinahanglan nga magsunod sa parehas nga mga pamaagi alang sa vacation leave, sick leave ug uban pang mga pribilehiyo sa leave nga gisagop sa ahensya.
Ang mga aplikasyon kinahanglang ipasaka labing menos lima ka adlaw sa dili pa ang gituyo nga petsa sa pag-avail. Alang sa mga emerhensya nga kaso, ang pag-file kinahanglan buhaton dayon sa pagbalik sa trabaho.
Aron ma-promote ang usa ka luwas nga luna alang niadtong nag-avail sa WL alang sa mga hinungdan sa kahimsog sa pangisip, ang tanan nga kasayuran nga may kalabutan sa kahimtang sa kahimsog sa pangisip sa aplikante kinahanglan nga tagdon nga adunay estrikto nga kompidensyal ug pagsunod sa Data Privacy Act of 2012.
Ang polisiya magaepekto 15 ka adlaw human sa pagpatik niini sa usa ka pamantalaan nga may kinatibuk-ang sirkulasyon, uban ang usa ka follow-up advisory aron ipahibalo ang opisyal nga publikasyon ug petsa sa pagkaepektibo.
Uban sa bag-ong naaprobahan nga Wellness Leave, ang Philippine Civil Service Commission naghimo ug mahinungdanong lakang sa pagsuporta sa mental ug pisikal nga kaayohan sa mga trabahante sa gobyerno pinaagi sa pagpalig-on sa serbisyo publiko pinaagi sa pag-atiman, balanse, ug kalig-on. (Hulagway gikan sa PIA)
DSWD nipasidaan sa publiko batok sa pekeng Christmas bonus posts sa mga sakop sa 4Ps
Sinulat ni Elvira C. Bongosia
Ang Department of Social Welfare and Development (DSWD) niadtong Miyerkules nipasidaan sa publiko batok sa nikatap nga mga post sa Facebook nga nagpahibalo sa giingong Christmas bonus payout alang sa Pantawid Pamilyang Pilipino Program (4Ps) beneficiaries.
Kini human nakadawat ang DSWD ug mga taho bahin sa mga post sa social media nga nag-alegar sa pag-apod-apod sa Christmas bonus alang sa mga benepisyaryo sa 4Ps.
Matud pa ni DSWD Assistant Secretary Irene Dumlao sa usa ka pahayag nga dili kini tinuod ug kini mahimong mekanismo alang sa mga online scammers nga makakuha ug pribadong impormasyon sa mga benepisyaryo.
Gipahimangnoan sa tigpamaba sa DSWD ang mga benepisyaryo sa 4Ps sa dili pag-click sa mga link ug pag-repost sa nasangpit nga mga post aron malikayan ang kalibog sa publiko.
Iyang gipahinumdoman ang tanan nga dili ihatag ang ilang pribadong impormasyon niining matang sa mga post sa social media ug matud pa ang tanang impormasyon nga gikan sa DSWD nagagikan lamang sa mga municipal ug city links, ingon man sa opisyal nga social media page sa 4Ps ug sa DSWD.
Si Dumlao, kinsa mao usab ang Data Protection Officer sa DSWD, nitumbok nga ang departamento nagsiguro nga ang mga detalye sa benepisyaryo dili gayud ma-post sa publiko agig pagsunod sa Data Privacy Act of 2012.
Iyang gi-awhag ang tanan nga magpabiling magbinantayon batok sa bisan unsang sayop nga impormasyon ug dili na lang ihatag ang pribadong impormasyon sa social media.
“Hinihimok namin ang lahat na maging mapagmatyag laban sa anumang maling impormasyon at huwag pong basta-basta magbibigay ng inyong mga pribadong impormasyon sa social media,” awhag pa ni Dumlao.
Ang tigpamaba sa DSWD nanawagan sa publiko nga i-report ang bisan unsang kadudahang mga kalihokan nga naglambigit sa mga programa ug serbisyo sa departamento pinaagi sa Integrated Grievance Redress Management System (IGRMS) sa https://i-grs.dswd.gov.ph./ o pinaagi sa opisyal nga 4Ps Facebook page sa https://www.facebook.com/DSWDPantawidPamilya.
Gipahayag sa DSWD nga dili tinuod ang nikatap nga Facebook post kalabot sa giingong Christmas Bonus nga P5,000 o P7,000 alang sa mga beneficiaries ug non-beneficiaries sa Pantawid Pamilyang Pilipino Program (4Ps) nga gipakatap sa Facebook page nga “PH News Update: Today’s Headlines” (https://www.facebook.com/share/17qiZuZ3j6/?mibextid=wwXIfr). (Hulagway gikan sa DSWD/PIA)
Palasyo miklaro: Disyembre 26, 29 holidays, ‘fake news’
Sinulat ni Elvira C. Bongosia
Gihimakak niadtong Huwebes ug giingong “fake news” sa Malacañang ang pag-isyu sa memorandum circular (MC) nga nagsuspenso sa trabaho sa mga buhatan sa gobyerno sa tibuok nasod sa Disyembre 26 ug Disyembre 29 sa panahon sa holiday season.
Si Executive Secretary Ralph Recto, sa usa ka text message ngadto sa mga tigbalita sa Palasyo, mihimakak sa pagmando sa pagsuspenso sa trabaho sa gobyerno sa maong mga petsa.
Ang pagdumili nahitabo human nikatap sa social media ang kopya sa gituohang MC 47, nga adunay peke nga pirma ni Recto.
Ang peke nga MC 47 nga dokumento nag-ingon nga ang usa ka “extended break” gideklarar alang sa mga opisina sa gobyerno aron matud pa mapalambo ang balanse sa trabaho-kinabuhi ug pagsuporta sa emosyonal ug sosyal nga kaayohan sa mga alagad sa publiko.
Dugang pa niini nga ang pagsuspenso sa trabaho gitumong kuno sa pagpalambo sa diwa sa panag-uban ug pagtugot sa mga kawani sa gobyerno nga makagugol ug panahon uban sa ilang mga pamilya ug mga minahal sa panahon sa kapaskuhan.
Ang Disyembre 26 ug 29 wala maapil sa listahan sa regular holidays ug special non-working days alang sa 2025.
Si Executive Secretary Ralph Recto niadtong Huwebes, Disyembre 11, 2025, nibasura isip “fake news” sa mga taho nga nag-ingon nga siya nagpagula ug memorandum circular nga nagsuspinde sa trabaho sa gobyerno sa tibuok nasud sa Disyembre 26 ug 29 alang sa holidays. (Hulagway gikan sa PIA)
P6.3M pag-ayo sa Choco Hills, Tampohan sa Carmen, Bohol
Sinulat ni Rey Anthony Chiu
Gibanabana nga mapundohan sa Kapitolyo ug sa local nga kagamhanan sa Carmen ang P6.3 milyones nga gikinahanglan sa pag-paayo sa naguba nga dalan pasaka sa Chocolate Hills.
Kini maoy napalutaw atul sa tigum sa katapusang kwarter sa Provincial Disaster and Risk Reduction Management Council (PDRRMC) Disyembre 9, didto sa Capitol Ceremonial Hall.
Niini, ang LGU Carmen may pahat na nga P3 milyones segun sa mga tinubdan sa Kapitolyo samtang ang Bohol ubos bi Gob Erico Aristotle Aumentado mao na ang magdugangs a P3.6 milyones nga magasto sa pagpahiuli niini.
Kahinumduman nga ang naguba nga bahin sa dalan nga pasaka sa Chocolate Hills, nagsugod ug ka grabe ang problema human ang mga uwan nga dala sa bagyo.
Ang kanhi nga dala, walay tukma nga mga drainage canals, sidewalks ug walay tataw nga slope protection, mga butang nga ipahimutang na sa pagpatrabaho niini.
Kay ang kanhi nga konstruksyon gipasibu lamang usab sa kadaghanon sa daginoton nga traffic kaniadto, gipasalig sa Office of the Provincial Engineer nga ang pagpatrabaho karon, magpahimutang na sa steel reinforcements, mga tubo nga imburnal, lined canal nga kaagian sa tubig, mga metal frames ug grating ug grouted riprap, stone masonly ug curb ug gutter nga kongkreto sa 7 metros nga kalapdon sa duha ka lane nga karsada nga .23 metros ang kabagaon.
Ang pagpagahi sa semento nga karsda molanat pa ug 14 ka adlaw.
Niini, naglaraw ang mga tinugyanan nga ipatuman pa gihapon ang shuttle service sa Carman ang tugotal sa pagsaka aron mas dali nga dumalahon ang trapiko.
BALAK
KAHIBULONGAN
Sinulat ni Engr. Rogelio Podelino
Ang kinabuhi sa tawo napuno sa mga tanghaga
Dili matugkad ni kinsa’ng mortal nga bathala
Ngano nga ang tawo bati-on ug gugma
Bisan kon wala siya sugo-a
Ang gugma dili nimo masabtan
Motungha ni bisan kinsa’ng may balati-an
Wala’y pagtan-aw sa tawo’ng higugma-on
Kay iya mang kaugalingon’g kabubut-on
Harangan man ug mga bangkaw ang dalan
Mangita ug paagi nga iya’ng kalutsan
Dili balehon ang mga kalisdanan
Basta ang kagustuhan matuman
Daghan’g ginghari-an ang gibiya-an
Kay supak sa ilang tradisyon’g naandan
Nga mahigugma sa dili nila kahan-ay
Wala baleha bisan siya isalikway
Mga tanghaga sa kinabuhi dili maapas
Bisan unsa kalantip sa salabutan’g mangagpas
Kon gugma na ang magsugo
Wala’y bisan kinsa’ng Herodes makasumpo
Kon ang tawo bati-on na ug paghigugma
Sangko sa langit ang kalipay makita lang siya
Dili gusto nga mahibulag sa iyaha
Sa tanan’g takna gusto makita niya
Kining tanan pagbuot sa KAHITAS-AN
Aron magsinabtanay ang mga katawhan
Samtang buhi pa ang tawo
Ang gugma sa tawo KAHIBULONGAN pag-ayo