Bohol Light, nagpahibalo sa Electrical Fire Safety Tips
Sinulat ni Sheryl B. Paga
Ang Bohol Light magpahimatngon ngadto sa mga katawhan mahitungod sa mga basic Electrical Fire Safety Tips ilabi na gayud karong panahon sa kasaulogan sa bag-ong tuig.
Atong bantayan ang insaktong paggamit sa mga extension cords ug sockets nganha sa mga electrical outlets susama niining musunod:
- Likayi ang pagamit sa depektibong electrical cords ilabi na kung anaay napanit sa wiring niini.
- Pagbantay sa mga guba-on nga saksakanan/sockets. Aron paglikay sa heat build-up (overheating) nga moresulta sa paglanay sa insulation ug posibleng mokayo kini ug makaingon na hinuon sa sunog.
- Likayi ang pagtingob ug saksak sa usa ka socket/outlet kon oktupos koneksyon ilabi na sa mga high-powered appliances, aron dili kini mo-overheat.
- Likayan usab ang pagsumpay-sumpay sa mga extension cords o kon flying nga koneksyon gikan sa us aka lungar ngadto sa laing lugar o panimalay.
- Sutaa o tan-awa ang wattage sa imong appliances kon kini igo paba sa kapasidad sa imong metro o service wire nga gigamit.
- Ang mga appliances nga dunay deperensya sa cord or internal faults pwedeng moresulta sa short circuits o grabeng pagpanginit (overheating).
- Regular kining e-echeck una gamiton. Mas maayong dili na kini gamiton, kung adunay kitay namatikdan nga mga abnormalities niini.
Regular nga pagatan-awon ang mga sockets/outlets ug plugs kung dunay nikupot nga mga hugaw ug abog. Mahimo kining fuel nga sayon rang dakpon sa enerhiya ug maoy hinungdan sa mga sparking ug overheating.
Ang tubig dili igsuon sa kuryente, busa matngunan nato nga kinahanglang dili basa ang atong mga kamot kung kita musaksak sa mga appliances ngadto sa mga sockets aron malikayan ang electrocution. Piligro sa short circuit nga mosangpot sa kalit nga pag-spark o pagkayo ang pagamit ug extension cord o socket/outlet nga nabasa o nasudlan ug tubig
Batasanon ang pag un-plug sa mga appliances kung wala kini gamita ilabi na sa gabie (overnight) or kung mobiya sa panimalay.
- Kung makamatikod nga dunay mga Damage sa wiring sa electrical cords or kung magdugang ug sockets/outlets, tawag ug usa ka electrician nga adunay kahibalo sa insaktong pagtaod niini.
- Kung makasinati ug mga insedente sa pag-spark/pagkayo sa plug o socket/outlet, palonga ang power supply diha sa main breaker ug kontak ug accredited electrician aron ma-inspect ug ma-repair kini or tawag sa opisina sa Bohol Light alang sa temporaryong pagpalong niini.
- Ayaw pagsuway ug repair sa mga electrical problems kung dili ikaw suhito ug walay kahibalo.
Ang kuryente dili makita busa atong matngunan and siguridad alang tanan.
Fire Drill gihimo sa Bohol Water
Sinulat ni Leizel C. Butawan
Makita sa hulagway sa itaas ang mga empleyado sa Bohol Water, sinaksihan sa mga personahe sa Bureau of Fire Protection, naghimo sa tinuig nga Fire Drill didto sa opisina sa BWUI.
Sa tinguha nga kanunayng andam ilabi na sa panahon sa mga katalagman sama sa sunog, ang Bohol Water Utilities, Inc. (BWUI) nagpahigayon ug Fire Drill nga gihimo sa BWUI Compound, Dampas, Tagbilaran City. Ang maong kalihokan gipahigayon niadtong Disyembre 22, 2025, ubos sa supervision ug pag-obserbar sa Bureau of Fire Protection (BFP).
Niadtong bulan sa Hunyo ning tuiga, ang mga tinugyanan sa BFP nagpahigayon usab ug fire lecture nga nagalangkob mahitungod sa mga unang angay buhaton ug hustong pamaagi sa pag-atubang sa sunog ug uban pang emerhensiya. Ang Fire Drill usa ka tinuig nga kalihokan nga nagpakita sa aktuwal nga pagpatuman sa tagsa-tagsa ka katungdanan o papel nga gihatag sa mga miyembro sa Emergency Preparedness and Response Team (EPRT) sa Kompanya.
Gawas nga mando kini sa Department of Labor and Employment (DOLE), mahinungdanon usab kaayo alang sa usa ka establisimento sama sa Bohol Water nga adunay organisado ug andam nga grupo nga gitahasan sa dali ug epektibong pagtubag sa mga katalagman. Ang EPRT sa Bohol Water gilangkoban sa Chief Marshal nga mao ang General Manager nga si Christine Ranay, Deputy Chief Marshal nga ang Operations Manager nga si Clement George Chiu, Safety Coordinator nga si Leizel Butawan, ug ang duha ka Fire Captains nga sila Nilo Miculob ug Patrick Gutierrez.
Mapasalamaton ang Bohol Water sa Bureau of Fire Protection, ilabina sa mga tinugyanan nga pinangulohan ni FSupt. Matt Reil C. Puno, sa ilang bililhon nga giya ug kooperasyon nga nakatampo sa malampusong pagpatuman sa maong Fire Drill.
BALAK
ANG GINOO AY GUGMA
Sinulat ni Engr. Rogelio Podelino
Wala’y tawo makatugkad sa gahum sa GINOO
Kon unsa’y IYANG gibuhat para sa tawo
Tanan’g kaayuhan gihatag NIYA
Aron ang tawo mabulahan siya
Gipahiluna ang tawo sa harden sa Eden
Wala tumana sa tawo ang IYANG gibilin
Mikaon sa prutas nga gidili
Gipapahawa ang tawo sa Eden ug dali dali
Bisan pa sa pagka makasasala sa tawo
Gihigugma gihapon ang tawo sa GINOO
Nagbilin SIYA ug saad sa tawo
Nga luwason ra ang tawo sa GINOO
Kay ang tawo masupilon man pag-ayo
Gipa-antos ug dugay sa GINOO
Ang mga Israelitas pinili nga mga tawo
Nag-antos pagka ulipon sa taga Egypto
Hangtud mi-abot si Moses aron mahaw-as sila
Sa pagka ulipon sa taas nga panahon na
Kay ang Pharaoh sa Egypto nagmagahi man
Napulo ka milagro ang gikinahanglan
Mi-abot ang panahon katawhan luwason na
Si Birhen Maria ang ANAK gipanamkon niya
Sa lalang sa ESPIRITU SANTO
Ang BUGTONG ANAK nahimo’ng tawo
Nagpuyo isip tawo dinhi sa kalibutan
Gisakit ug namatay diha sa krus labihan
Sa kamatayon sa BUGTONG ANAK
Ang kara-an’g templo nabu-ak
Sa kamatayon sa ANAK mihilak ang langit
Ug nabalot ang kalibutan sa kangitngit
Dayon naghimaya kay luwas na ang karawkan
Ug ang gangha-an sa langit naablihan
Tungod sa daku’ng gugma sa GINOO
Gisakripisyo ang ANAK aron maluwas ang tawo
Ang gugma sa GINOO sa mga katawhan
Dili ni bisan kinsa’ng linalang matumbasan
Dili matugkad ang gugma sa GINOO
Gikinahanglan lang hugot ang pagtuo sa tawo
Kay kita’ng tawo kang Adan mang kaliwat
ANG GINOO AY GUGMA sa tanan’g binuhat