Sayaw sa Paglaom
Ni ELEAZAR TUTOR ACAMPADO
SA matag higayon nga motingog ang tambol ug mopatigbabaw ang bulhot sa trumpeta, mabati ang talagsaong kasikas sa atong kasingkasing. Usa kini ka kasikas sa pagtuo, usa ka himno nga dili lang madungog sa dalunggan, apan sa tibuok natong pagkatawo.
Gikan sa mabulukon nga Sinulog sa Sugbo, sa Ati-Atihan sa Aklan, sa Dinagyang sa Iloilo, sa mga inindak sa karaang dalan sa Tondo, Manila hangtod sa Valencia, Bohol, ang tibuok nasod nagkahiusa sa usa ka singgit: “Viva Pit Señor!”
Ning tuiga, ang pagsaulog namo sa pista sa Santo Niño diri sa among barangay, adunay mas lawom ug mas personal nga pagpahinumdom kanako.
Sa miaging tuig, sa tunga-tunga sa covered court, diin nagtapok ang mga pinili ug tinudlo nga mga opisyal sa barangay aron pagsaulog sa kapistahan sa Balaang Bata, usa ka talan-awon ang mipadut sa akong kasingkasing.
Nakita nako ang akong asawa, mapahiyomon kaayo ug lig-ong naggakos sa imahe sa Santo Niño samtang nagsayaw sa Sinulog. Sa mata sa mga nakakita niya, usa lamang kini ka tradisyon o halad. Apan alang kanako, nga nasayod unsa ang iyang giagian, usa kadto ka milagro. Kay usa ka adlaw sa wala pa ang maong okasyon, nanakit ang iyang kalawasan ug luya ang iyang paglihok-lihok. Maglisod siya og tindog.
Ang akong asawa usa ka colon cancer patient nga gioperahan ni Dr. Florence Cepedoza sa ACE niadtong Disyembre 17, 2022.
Kadtong iyang kataposang sayaw sa kapistahan ni Santo Niño, dili lang basta pagsunod sa ritmo sa musika. Ang matag lakang niya sa semento sa covered court, ang matag isa niya sa mga kamot dungan sa pagpataas sa imahe sa Santo Niño, usa kadto niya ka pag-ampo sa hilom. Usa kadto ka hangyo nga dugangan pa ang iyang kusog, lugwayan pa ang iyang kinabuhi ug hatagan pa og dugang higayon nga makauban pa ang iyang pamilya.
Ang iyang pagsayaw nagdala og lahi nga kasikas. Ang hinay nga kumpas sa iyang mga tiil bisan paman sa kakapoy sa lawas tungod sa sakit, wala gyod mobalibad sa paghalad. Mas mipatigbabaw ang iyang kaisog kaysa kadasig sa musika. Taliwala sa pagsaulog sa mga opisyal sa barangay, ang akong asawa nagsayaw isip usa ka sundalo sa pagtuo, nga bisan pa sa unos sa iyang panglawas, wala siya mobiya sa iyang debosyon.
Didto nako nahunahuna nga ang Santo Niño dili lang usa ka hari nga gipasidunggan. Siya ang kauban sa matag maggugubat nga nakigbugno sa sakit. Siya ang tighupay sa mga nag-antos. Siya ang kahayag sa kangitngit sa usa ka pasyente nga nangandoy og kaayohan sa gibating kasakit.
Ang pagsaulog sa kapistahan ni Santo Niño dili lang mahitungod sa kalingawan. Usa usab kini ka pagpasalamat sa kinabuhi, bisan pa og napuno sa mga pagsuway.
Human sa iyang pagsayaw, samtang hugot niyang gigakos ang imahe sa Santo Niño, akong nabatyagan nga wala kami mag-inusara sa maong gubat. Ang iyang kaisog maoy labing nindot nga balak nga nasulat sa akong panumdoman.
Ngadto sa akong pinanggang asawa, salamat sa imong pagtudlo kanako kon unsa ang tinuod nga kaisog. Ug ngadto sa Balaang Bata, daghang salamat sa paghatag kaniya og kusog sa pagsayaw bisan pa sa kasakit.
Ugma, mahuman na ang pista, ang mga dekorasyon tangtangon na, apan ang kumpas sa pagtuo padayong mabuhi sa atong mga kasingkasing samtang may kinabuhi.
Viva Pit Señor!
(Si Eleazar Tutor Acampado, kanhi staff writer sa Bisaya Magazine. Nakadaog na sa Don Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.)