Ang Kahayag sa Cabawan
Ni ELEAZAR TUTOR ACAMPADO
SA umaabot nga Pebrero 2, magdasok na usab ang daghang tawo sa Sitio Cabawan sa West Lungsodaan, Garcia-Hernandez. Dili kini panagtapok sa komersiyalismo kondili panaghiusa sa mga nagdilaab nga mga kandila ug hinay nga pagduso sa mga pag-ampo. Dinhi ang katawhan magsaulog sa kapistahan sa Nuestra Señora de Candelaria kun Our Lady of the Candles, ang Pista sa Kahayag nga maghatag og kadasig sa kasingkasing sa mga deboto.
Ang Candelaria dili lang usa ka relihiyosong seremonyas. Usa kini ka dapit diin nagtagbo ang milagro ug mga pagpamatuod. Kon mangutana kag mga deboto nga kada tuig mosaka sa Cabawan, madungog nimo ang managlahi nilang mga sugilanon apan dunay usa ka butang nga managsama ang ilang isulti. Ginaingon nila nga dili kita pasagdan sa Kahitas-an kon duna kitay hugot nga pagtuo.
Gani daghan man sa atong kaigsoonan ang mobiyahe gikan sa lainlaing lagyong mga dapit aron lang gyod makatambong sa misa ug makadagkot og kandila sa Cabawan. Kahinumdom ko nga dihay usa ka inahan nga akong nahinabi nga kada tuig gyod motungas sa Cabawan aron magpasalamat. Kay matod pa niya, pinaagi sa iyang debosyon sa Candelaria, nakakaplag siyag kalinaw sa hunahuna taliwala sa dagkong mga suliran sa pamilya. Alang niya, ang kandila nga iyang dagkotan nagsimbolo sa kahayag nga mipatigbabaw sa kangitngit sa iyang mga kabalaka.
Duna usay moingon nga gihatagan silag kaayohan sa kasakitan sa panglawas ingon man kalamposan sa pagtungha, panarbaho ug uban pa. Naay mga batan-on nga maghalad og pag-ampo alang sa ilang umaabot nga mga eksam ug naay mga masakiton nga nangita ug kahupayan sa mga kasakit. Silang tanan nagkauyon nga ang pagtungas ngadto sa Cabawan maghatag kanila og espiritwal nga kabag-ohan. Dili lang yano ang makuha nilang mga tubag sa ilang mga pag-ampo. Kay magmalig-on man ang ilang mga kasingkasing nga moatubang sa mga hagit sa kinabuhi ugma damlag.
Sa akong yanong panabot, ang pagpanalangin sa mga kandila sa Pebrero 2 usa ka tradisyon nga magpahinumdom kanato nga si Kristo mao ang miabot nga Kahayag sa Kalibotan. Ug alang sa mga taga West Lungsodaan ug sa tibuok Garcia-Hernandez, kining maong kahayag maoy magsilbing giya sa kinatibuk-ang komunidad nga Kristohanon.
Ang matag kandila nga gidagkotan ug gunitan sa usa ka deboto sa Cabawan nagdala og personal nga hangyo. Mga hangyo alang sa maayong ani sa umahan, alang sa luwas nga paglawig sa mga mananagat, alang sa produktibong pagpanikaysikay matag adlaw, alang sa panaghiusa sa matag panimalay ug uban pa.
Samtang nagkapuliki kita pag-atubang sa adlaw-adlawg gimbuhaton, ang Candelaria sa Cabawan nagtawag kanato sa paghunong sa daklit ug mamalandong. Ang pagsaka sa Sitio Cabawan usa ka sakripisyo nga maglimpiyo usab sa atong hunahuna.
Sa matag dilaab sa kandila nga isayaw sa huyuhoy sa hangin, mopasunding usab ang presensiya sa Balaang Inahan nga nagkugos sa Batang Hesus. Kini magpahinumdom kanato nga bisan unsa pa kapait ang atong nasinati sa pagpakabuhi ning kalibotan nga puno sa mga pagsulay, anaa kitay kahayag nga kanunay makuptan.
Sa Pebrero 2, kon makalugar ka Sano, manungas kita sa Cabawan. Magdala kita og kandila, dili lang aron managkot, kondili magdala usab kitag kahayag ngadto sa uban.
Viva Nuestra Señora de Candelaria!