Anti-Epal Policy: alang sa tinood nga serbisyo, dili sa pasikatero!
Sinulat ni Carl Hinlo
(Mahitungod sa Manunulat:
Usa ka dedikadong alagad sa katilingban ug award-winning nga lider nga nagsilbi isip SK Chairperson (2018-2023) ug kasamtangang Barangay Council Member sa Poblacion, Catigbian. Gawas sa iyang trabaho sa lehislatura isip pangulo sa edukasyon ug turismo, siya usa usab ka certified paralegal, compliance officer, ug lig-on nga manlalaban sa kultura ug kabilin ubos sa NCCA. Isip kanhi campus journalist, iyang gipadayon ang iyang hilig sa pagsuwat ug pagpanalipod sa kamatuoran isip kolumnista sa The Bohol Tribune ug Anchorman sa programang “Kabataan Alang sa Kausaban” sa Newsmakers radio program sa DYTR-Bohol).
Atong makita ang nagkagrabe nga kultura sa “Epal Politics” sa nasud, diin ang mga proyekto nga gipundohan sa buhis sa katawhan, gigamit sa mga opisyales alang sa ilang personal nga promosyon.
Ang paglaksi sa mga poster nga naghambin sa hulagway ug pangalan sa mga politiko, usa ka tima-ilhan nga nagmata na ang atong katilingban.
Dili na mailad ang atong mga kaigsoonan.
Dili na sila mopili ug lider gamit ang “brand” sa politiko kundili sa iyang tinguha sa tinuod ug tiunay nga serbisyo.
Dugay na natong naandan sa Pilipinas nga ang nawong sa politiko mas dako pa kaysa iyang agi sa proyekto.
Gikan sa “Welcome” nga sign sa lungsod, hangtod sa luyo nga bahin sa ambulansya, dili mosipyat nga Ikaw makakita gayud sa klaro kaayo nga dagway ni “Honorable”.
Kanang ilang hulagway nga atong makita sa mga sakyanan sa kadalanan, nagpasabot ba nga angay nato silang pasalamatan kay gikan sa ilang bulsa ang salapi nga gigamit sa mga proyekto?
Apan pinaagi sa memorandum gikan sa Department of the Interior and Local Government (DILG), gipahinumduman na usab ang mga opisyal nga ang kwarta sa gobyerno dili ilahang personal nga “marketing budget”.
Kining maong mando nagpahinumdom sa
baruganan batok sa kultura sa “pagpangutang ug kabubut-on” gikan sa katawhan gamit ang kaugalingon natong buhis nga atong gibayaran.
Kinahanglan natong sabton nga ang pondo nga gigamit alang sa mga relief goods, kalsada, ug waiting sheds, dili gikan sa bulsa sa mga politiko, kun dili gikan sa singot sa mga tawo, mga negosyante ug mga trabahante.
Ang pagbutang sa ilang pangalan ug hulagway sa mga tarpaulin duol sa proyekto sa gobyerno, usa ka matang sa pagpangilad tungod kay gipatuo nila ang publiko nga ang maong serbisyo usa ka “pabor” nga ilang gihatag sa katawhan.
Sa tinuod lang, obligasyon sa mga politiko ang paghatag ug serbisyo tungod kay kini ang ilang gipanumpaan nga trabaho.
Ang paggamit sa
pondo sa GOBYERNO alang sa pagpatik sa ilang mga hulagway ug pangalan diha sa mga tarpaulin, usa ka dakong kamatooran sa ilang pagka EPAL.
Ang problema lang kay susama na nga gidawat sa atong mga katawhan nga lakip na sa atong kultura Ang pagka EPAL sa atong mga politiko
Tan-awa kung kinsang mga hulagway ug pangalan ang dagko kaayong napatik sa
mga sakyanan, sa mga plaka sa mga tricycle, sa mga tent, sa mga sako sa ayuda nga bugas, ug uban.
Sa memo sa DILG, klaro kaayo ang mensahe nga ang serbisyo publiko kinahanglan nga limpyo ug dili mag endorso sa personal nga promosyon ni bisan kinsang politiko.
Ang USA ka lider nga mapahi-ubsanon wala magkinahanglan ug billboard nga musapnay sa iyang hulagway.
Sumala pa sa usa ka sanglitanan: LET YOUR SUCCESS MAKE YOUR NOISE!
Kun ang usa ka lider tinuod nga moserbisyo, dili niya kinahanglan ug billboard aron mahinumdoman sa mga tawo.
Apan dili lang ang DILG ang magbantay SA MGA EPAL sa atong katilingban.
Kitang tanan nga mga
lungsuranon kinahanglan nga mabinantayon sa ka-EPALAN sa atong mga politiko.
* Tama na!
* Husto na!
* Tangtanga na ug kuskusa na ang inyong mga hulagway ug pangalan nga nahipatik sa mga butang ug dapit nga binayran sa KATAWHAN
Hinumdomi nga ang TINOOD nga lider , dili pasikatero apan TINU-ORAY nga nagserbisyo.