NI: Eleazar Acampado
Ang Pagbangon sa Gugma ug Paglaom
KON ang Pasko sa Pagkatawo ni Hesus giisip nato nga labing malipayong panahon alang kanatong halos 115 ka milyon ka Pilipino, ang Pasko sa Pagkabanhaw mao ang kasingkasing sa atong pagtuo.
Kay human sa kangitngit nga nasinati sa Biyernes Santo ug sa kahilom sa Sabado de Gloria, kitang tanan karon nagasinggit sa kalipay.
Nabanhaw na ang atong Manunubos!
Maingon nga ang pagsaulog nato sa Pasko usa ka oportunidad sa pagsabwag sa espiritu sa gugma. Ug niining Pasko sa Pagkabanhaw, kini nga gugma nahingpit na. Kay dili lang usa ka milagro sa kasaysayan ang pagkabanhaw ni Kristo. Usa kini ka buhing mensahe nga bisan unsa kadako ang nasinati nato nga mga problema, kalamidad, kapit-os, o kamingaw sa kinabuhi, anaa kanunay ang pagbangon nga nagpaabot kanato sa tanang panahon.
Sama sa nasinati nato sa pagdawat sa diwa sa Pasko, kini usab ang maayong panahon nga sayon nato mahusay ang nagkabingkil nga mga hunahuna, sa politika, sa negosyo, o sa personal nga panagsungi. Kon ang pagkatawo ni Hesus nagtudlo kanato nga magpainubsanon, ang Iyang pagkabanhaw nagtudlo kanato sa pagpasaylo.
Ang lubnganan ni Hesus naablihan ug nahimong walay sulod aron ang atong mga kasingkasing, nga sa kaniadto napuno sa kasakit ug kaligutgot ngadto sa atong isigkatawo, mapuno usab sa bag-ong kinabuhi. Kon ugaling gikaaway man nato ang atong mga ginikanan, igsoon, o katagibarangay, kini ang labing maayong panahon nga banhawon ug ipasig-uli ang maayong relasyon sa usag usa. Kay ang pagbuhat niini usa ka dakong kadaogan batok sa kangitngit sa pagdumot.
Ang pagtuo sa nabanhaw nga Ginoo naghatag kanatog liboan ka boltahe sa enerhiyasa pag-atubang sa mga hagit niining tuiga. Niining panahona sa National Emergency ug krisis sa lana nga atong giatubang, ang Pasko sa Pagkabanhaw nagpahinumdom kanato nga ang kalisod temporaryo lamang, apan ang paglaom walay kataposan. Kini nga enerhiya mao ang magtukmod kanato sa pagtinabangay diha sa atong komunidad, sa pag-atiman sa atong isigkatawo ug sa pagpabilin nga lig-on taliwala sa mga unos.
Ang pagpahiubos wala magpasabot sa atong kahuyangan, apan nagpaila kini nga nagkalawom ang atong panabot sa kinabuhi diha sa gugma sa Dios. Sa Pasko sa Pagkabanhaw, gipakita ni Hesus nga ang dalan padulong sa himaya moagi gayod sa pagpaubos didto sa Krus.
Kita man ang sad-an o dili, mas maayo nga kita na ang unang moduol aron makig-uli. Kay ang nabanhaw nga Kristo wala magtan-aw sa atong mga sayop, kondili sa atong katakos ug kalig-on nga mobangon ug magsugod pag-usab.
Niining adlawa, gawas sa pagpangaligo sa dagat o pagpangaon uban sa pamilya, hangpon nato ang tinuod nga diwa sa Pasko sa Pagkabanhaw ni Hesus.
Hinaot nga ang gugma, pagtuo, ug paglaom dili lang magpabilin sa simbahan, kondili maanaa kanunay sa atong tagsa-tagsa ka kasingkasing samtang kita magpadayon sa atong panaw ning kinabuhi nga puno sa pagsulay.
Mga Sano, nabanhaw na Siya. Ug uban Kaniya, mobangon usab ang atong paglaom alang sa mas hayag nga ugma.