Bohol Light nagpahibalo sa implimentasyon sa Consumer Protection sa tanang Industriya sa Electric Power
Sinulat ni Sheryl B. Paga
Ang buhatan sa Bohol Light buot magpahibalo ngadto sa mga konsumidor kabahin sa gipagawas nga advisory gikan sa Energy Regulatory Commission mahitungod sa implementasyon sa pagprotektar sa mga konsumidor gikan sa sa tanang Electric Power Industry Stakeholders.
Kini ubos sa Executive Order No. 110 nga gi-isyu sa buhatan sa Presidente niadtong Marso 24, 2026, nga nagdeklarar ug State of Energy Emergency tungod sa nagpadayon nga kagubot sa Middle East tali sa Amerika, Israel, ug Iran, nga maoy hinungdan sa krisis sa suplay sa enerhiya ug nakaapekto usab sa nasud sa Pilipinas.
Base sa maong mandato, ipatuman ang mosunod nga mga lakang sa tanang Electric Distribution Utilities sa tibuok nasud:
1. Pagsuspende sa diskoneksyon sa mga residensyal ug dili-residensyal nga klase sa konsumidor tungod sa wala pagbayad sa ilang electricity bills sulod sa billing period sa Mayo, Hunyo, ug Hulyo 2026.
2. Paghatag ug Payment Option Plan alang sa mga konsumidor nga adunay konsumo nga dili molapas sa 200 kWh, sama sa paghatag ug palugit sa pagbayad hangtod sa tulo ka bulan.
Ang konsumidor kinahanglan mosumite ug promissory note sa buhatan sa Bohol Light pinaagi sa atong Customer Welfare Desk Associate aron maproseso ang maong aplikasyon.
Mao kini ang pananglitan sa komputasyon sa balayrunon sa matag bulan:
Apan gihangyo usab sa maong direktiba nga ang mga konsumidor nga adunay kapasidad sa pagbayad sa hustong panahon, magpadayon sa pag-atiman sa ilang mga bayrunon aron malikayan ang posibleng kahasol sa umaabot nga mga bulan ug makatabang sa pagpalig-on sa cash flow sa operasyon.
Alang sa ubang mga pangutana ug kasayuran, mahimo kitang motan-aw sa Bohol Light FB Page, website sa www.boholpower.ph, o tawag sa service hotline: ☎ (038) 427-2372 / 0920-960-2372.
“WASH Caravan” padayon nga gihimo sa Bohol Water
Sinulat ni Victor L. Tambis
“WASH” caravan padayon nga gihimo sa Bohol Water sa Barangay Cogon, Tagbilaran City.
Atong mahinumduman nga ang Bohol Water mihimo sa maong kalihokan nga gisugdan didto sa Barangay Cogon niadtong Abril 24, 2026 diin ang katuyuan niini mao ang pagdala sa tubig ngadto sa tanang hut-ong sa katilingban sulod sa gialagaran nga mga dapit.
Ang WASH o “Water Sanitation and Hygiene” usa ka programa sa United Nations, ug gisagop sa atong nasod, diin ang tumong niini mao ang pagdala sa tubig ngadto sa tanang hut-ong sa katilingban. Subay usab sa programa sa Bohol Water nga mao ang “Connect now pay later” diin ang usa ka aplikante walay mabayaran nga kantidad tungod kay ang application fee/processing fee ug uban pang balayronon sa mga fittings nga gamiton aron makonektahan sa linya sa tubig pagabayaran sa “installment basis” dungan sa binulan nga water bills. Tungod niini, ang mga tinugyanan sa Customer Service section sa maong Kompanya mobalik sa sunod semana, Mayo 14, 2026 didto mismo sa maong dapit aron pag attender ug pag proseso sa mga aplikasyon aron mahatagan ug kasayon ang mga konsumidor niini.
Human sa Barangay Cogon, himoon sa Bohol Water ang WASH caravan didto sa Barangay Tiptip ning syudad, ilabi na ang nanimuyo sa mga urban poor community.
Sa laing bahin, ang Bohol Water mipahibalo nga ang bag-ong linya nga giladlad subay sa CPG North Ave. gikan sa eskina baguio drive hangtod sa eskina Salazar St, Barangay Ubujan, mahimo na nga aplayan alang sa water koneksyon sugod karong Mayo 18, ning tuiga. Giawhag ang mga konsumidor sa maong dapit sa pag proseso sa aplikasyon didto sa buhatan sa Bohol Water aron makonektaran sa linya sa tubig. Alang sa dugang kasayoran mahitungod niini, mahimong motawag sa buhatan sa Bohol Water pinaagi sa mga mosunod nga numero: 412-3154/411-0210 ug cellphone nos. 09177208672 / 09177306331. Mahimo usab mo login sa FB page: boholwaterutilities.com.
Kwalipikadong OFWs makakuha ug dugang Civil Service exam points sugod 2026
Sinulat ni Elvira C. Bongosia
Gi-anunsyo sa Civil Service Commission (CSC) nga ilang ihatag ang overseas Filipino workers-Preference Rating (OFW-PR) sa mga kwalipikadong OFWs sugod karong tuiga.
Sa usa ka post sa social media, ang CSC miingon nga ang usa ka resolusyon nga bag-o lang gipasa (CSC Resolution No. 2600596) naghatag ug dalan alang sa mga kwalipikadong OFWs nga nakakuha sa kinatibuk-ang rating nga dili moubos sa 70.00 aron mahatagan ug dugang nga civil service exam points, ubos sa guidelines sa komisyon.
Ang bag-ong polisiya ipatuman sugod sa Agosto 9, 2026 Civil Service examination.
Matud pa sa CSC nga kini nga inisyatiba nag-ila sa propesyonalismo, dedikasyon, ug sakripisyo sa atong mga OFWs ug nagbukas sa laing dalan alang kanila sa pagpadayon sa pagserbisyo sa nasud isip Lingkod Bayani.
Kwalipikado nga mag-aplay mao ang mga OFW nga nakatrabaho, karon nagtrabaho o nag-apil sa bayad nga mga kalihokan sa gawas sa nasud, bisan unsa pa ang nasud nga destinasyon, kinaiyahan sa trabaho, lebel sa sweldo o kahimtang sa trabaho.
Mahimo usab nga mo-apply ang mga OFWs nga nakontrata na alang sa trabaho sa gawas sa nasud apan wala pa makabiya sa Pilipinas.
Ang CSC nagkanayon nga ang mga aplikante kinahanglang adunay mga mosunod nga batakang kwalipikasyon: Kinahanglan nga nakahatag ug aggregate sa labing menos lima ka tuig nga trabaho sa gawas sa nasud gikan Enero 1, 2000, hangtod sa petsa sa pag-aplay, mapadayonon man o putol-putol; ug kinahanglan nga nag-aplay ug nagkuha sa gikatakda nga CSE sugod sa Agosto 9, 2026 ug pagkahuman, pinaagi man sa pen-and-paper o uban pang mga paagi, ug nakakuha ug usa ka failed general rating nga dili ubos sa 70.
Pinaagi sa CSC Resolution No. 2600596 pinetsahan Abril 30, 2026, ang Civil Service Commission maghatag sa Overseas Filipino Workers–Preference Rating (OFW-PR) ngadto sa mga kwalipikadong OFW base sa gidugayon sa trabaho sa gawas sa nasud o langyaw nga trabaho ug performance sa trabaho sugod sa Agosto 9, 2026 Civil Service Examination. (Hulagway gikan sa CSC/PIA)
DSWD gipanghimakak ang AI-generated post kalabot sa pagpanghatag og aircon sa 4Ps beneficiaries
Sinulat ni Elvira C. Bongosia
Gipanghimakak sa Department of Social Welfare and Development (DSWD) niadtong Huwebes ang mga online claims nga nag-apod-apod kini ug air-conditioning units ngadto sa mga benepisyaryo sa Pantawid Pamilyang Pilipino Program (4Ps), nga nag-ingon nga ang mga post gibase sa AI-generated images ug false information.
Atol sa media forum sa DSWD niadtong Mayo 7, gi-awhag ni Assistant Secretary Irene Dumlao ang publiko nga mahimong mas kritikal sa mga impormasyon nga gipaambit sa social media, nga nagpahimangno nga ang mga wala mapamatud-an nga mga post mahimong makatampo sa pagkaylap sa disinformation ug social division.
“Unang-una, nais po natin banggitin na hindi po sana tayo, o mas maging maingat po sana tayo sa pag-review, pag-usisa, pag-verify ng mga information na nakikita po natin sa social media,” awhag ni Dumlao.
Gihatagan niini ug gibug-aton nga ang publiko kinahanglan nga magsalig lamang sa opisyal nga mga plataporma sa komunikasyon sa gobyerno alang sa tukma nga mga update sa mga programa ug serbisyo sa gobyerno.
“Mas maging mapanuri po sana tayo, tumingin tayo sa mga official communication platforms ng ating pong pamahalaan,” dugang niini nga nagpasiugda nga ang sayop nga impormasyon mahimong makatampo sa destabilisasyon sa atong nasud ug pagpalapad sa mga kal-ang sa katilingban taliwala sa mga sektor sa katilingban.
“Ang Department of Social Welfare and Development ay hindi po namamahagi ng air conditioning units sa ating mga 4Ps beneficiaries,” pag-klaro ni Dumalao.
Wala gipahibalo sa ahensya ang bisan unsang programa nga naglambigit sa pag-apod-apod sa mga airconditioning unit sa mga panimalay sa 4Ps ug gipahinumdoman ang publiko nga susihon ang kasayuran sa dili pa kini ipaambit online.
Bohol niduso sa conversion sa 29 ka probinsiyal nga dalan ngadto sa nasyonal nga dalan
Sinulat ni Elvira C. Bongosia
Ang Kagamhanan sa Probinsiya sa Bohol nagpadayon sa pagpalig-on sa mga inisyatibo sa pagpalambo sa imprastraktura pagkahuman sa usa ka produktibo nga meeting ni Gob. Erico Aristotle Aumentado uban ni Department of Public Works and Highways (DPWH) Kalihim Vince Dizon sa Manila niadtong Mayo 5, 2026.
Atol sa tigom, giduso ni Aumentado ang pagbalhin sa 29 ka provincial roads sa Bohol ngadto sa national roads, nga makapahimo sa nasudnong kagamhanan, pinaagi sa DPWH, sa paggahin ug pondo alang sa ilang pagpaayo, rehabilitasyon, ug pagmentinar.
Gipasiugda ni Aumentado ang kamahinungdanon sa pagpalig-on sa imprastraktura ug kalamboan sa Bohol human sa maong tigom.
Gipaambit niini nga mabungahon ang ilang pakighinabi kang DPWH Kalihim Dizon sa kaulohan diin ilang giduso sa ilang buhatan ang pag-convert sa pipila ka mga provincial roads sa Bohol ngadto na sa pagka-national roads.
Gipasabot sa gobernador nga ang pag-convert sa mga provincial roads ngadto sa national roads makahimo ug mas dako nga suporta sa nasudnong gobyerno alang sa pagpalambo sa imprastraktura.
Ang gisugyot nga road conversions, gi-endorso sa Sangguniang Panlalawigan nga naglakip sa estratehikong mga ruta sa tibuok probinsya.
Ang Area 1 naglangkob sa mga dalan nga nagkonektar sa Corella, Balilihan, Baclayon, San Isidro, Catigbian, Antequera, Alburquerque, Maribojoc, Candavid, Basak, Loon, ug sa palibot nga junction roads nga nagkonektar sa major provincial corridors.
Ang Area 2 naglakip sa road networks nga nag-konektar sa San Miguel, Ubay, Danao, Inabanga, Buenavista, Alicia, Getafe, Mabini, Trinidad, Bien Unido, ug Pres. Carlos P. Garcia, apil na ang access roads paingon sa mga pantalan nga nagsuporta sa inter-island ug local transport connectivity.
Ang Area 3 naglakip sa ruta nga nag-konektar sa Loboc, Sevilla, Balilihan, Guindulman, Pilar, Bilar, Candijay, Anda, Mabini, ug Sikatuna, pagpalig-on sa agianan sa sulod sa probinsiya ug silangang mga lungsod.
Dugang nga dalan nga gisugyot for conversion naglakip sa mga ruta gikan sa San Miguel via Kauswagan ug Magsaysay ngadto sa Cangmundo sa Getafe; San Vicente sa Dagohoy via Estaca ngadto sa Taming sa lungsod sa Danao; Candelaria nga nagkonektar sa Pilar ug Sierra Bullones; ug ang Talibon via San Isidro–Nueva Esperanza Bridge corridor nga nagsumpay sa Bien Unido ngadto sa Ubay.
Gihatagan ug gibug-aton sa gobernador nga ang paghimo niini nga mga dalan ngadto sa nasudnong mga dalan makatabang sa pagpagaan sa pinansyal nga palas-anon sa kagamhanang probinsiyal samtang gipaspasan ang imprastrakturang kalamboan sa Bohol.
Bohol nakatala ug 2.52% nga underweight rate; prov’l nutri council naghikyad sa 2026 action plan
Sinulat ni Elvira C. Bongosia
Ang Provincial Nutrition Council sa Bohol bag-o lang nagpatawag sa ilang 2nd quarter meeting sa syudad sa Tagbilaran, nga nagtigom sa mga representante gikan sa mga importanteng ahensya sa probinsiya aron pagpalig-on sa pagdumala sa nutrisyon, pagpalambo sa mga programa sa seguridad sa pagkaon, ug pagsiguro sa maayong resulta sa panglawas alang sa tanang Boholanos.
Si OIC-Provincial Health Officer ug Provincial Nutrition Action Officer nga si Dr. Fruserma Mary Uy maoy nangulo sa maong tigom ug namahayag nga ang maong tigom nagtakda sa direksyon alang sa pagpalig-on sa kolaborasyon sa mga miyembro nga ahensya sa pagtubag sa mga problema sa nutrisyon.
Si Nutritionist-Dietitian II nga si Ardin Abrea, RND, nagpresentar og mga update gikan sa 4th quarter 2025 meeting, nga naglangkob sa Provincial Nutrition Action Plan 2026–2028, nutrition surveillance pinaagi sa eOPT 2025 system, ug policy concerns sa local nutrition committees ug personnel.
Si Leon Parac Jr. sa Office of the Provincial Agriculturist nihisgot sa epekto sa El Niño ug sa krisis sa enerhiya sa agrikultura ug pangisda.
Naka-angkla sa Sagip Saka Act, o Republic Act 11321, siya miingon nga ang mga interbensyon naglakip sa crop protection, drought-resistant seeds, drip irrigation systems, organic fertilizers, ug cloud seeding operations.
Gituki usab sa konseho ang Rice Distribution Project ubos sa Assistance to Indigent Individuals or Families – Food Assistance program, nga nahiuyon sa Philippine Development Plan 2023–2028.
Ang proyekto nag-apod-apod og 10 ka kilo nga bugas sa tibuok 47 ka lungsod ug usa ka syudad sa Bohol, nga adunay tulo ka teams nga naglangkob sa tulo ka lungsod matag adlaw ug naglihok upat ka adlaw sa usa ka semana.
Ang Provincial Program Coordinator nga si Glenda Grafilo, RND, nipresentar sa nutrition surveillance data nga nagpakita sa ubos sa timbang nga prevalence sa Bohol sa 2.52% sa regional level niadtong 2025, uban sa stunting sa 5.62%, wasting sa 0.90%, ug overweight ug obesity sa 1.86%.
Ang Department of Education ug Department of Social Welfare and Development feeding programs, lakip ang 120 ka adlaw nga feeding program, padayon nga nagsuporta sa nutrition interventions sa tibuok probinsya.
Gihisgotan usab ang Salt Iodization Program, diin gipasiugda ang pagpalig-on sa Bantay Asin Task Force aron masiguro ang pagsunod sa Republic Act 8172. Ang mga sugyot naglakip sa pagkuha sa mga kagamitan sa pagsulay sa asin ug gipakusog nga pagmonitor.
Ang konseho nangandam usab alang sa 2026 Nutrition Month celebration ubos sa tema nga “Sa PPAN: Sama-sama sa Nutrisyon Sapat Para sa Lahat! Nutrisyon at Kalikasan, Ating Pangalagaan!” – paghatag og gibug-aton sa giambitan nga responsibilidad sa pagsiguro sa access sa luwas ug masustansya nga pagkaon.
Ang mga update sa Barangay Nutrition Scholars Program naglakip sa mga sugyot sa pagdugang sa honoraria ug pagpalapad sa pinansyal nga akses. 60% sa mga iskolar ang naka-enrol na sa mga sistema sa ATM pinaagi sa Land Bank of the Philippines.
Si Ivonne Vine Reyes, RND, mipresentar sa Monitoring and Evaluation sa Local Level Plan Implementation Protocol evaluation system ug gikinahanglang dokumentasyon sa LGU.
Ang mga ebalwasyon gitakda sa Mayo 11-15, uban sa LGU assessments sa Mayo 11–13 ug PNC evaluation sa Mayo 14–15 sa PHO Function Hall.
Ang tigum nagpamatuod pag-usab sa pag-ila sa Bohol isip Green Banner Awardee sa ikatulong sunodsunod nga tuig, ug naglakip sa mga report sa accomplishment sa ahensya ug mga update gikan sa DSWD sa supplementary feeding programs.
Si OIC-Provincial Health Officer ug Provincial Nutrition Action Officer Dr. Fruserma Mary Uy atol sa 2nd quarter meeting sa Provincial Nutrition Council (PNC) niadtong Mayo 5, 2026, nagpasiugda nga ang maong tigom, ang una sa tuig, nagtakda sa direksyon alang sa pagpalig-on sa kolaborasyon sa mga miyembrong ahensya sa pagtubag sa mga problema sa nutrisyon sa lalawigan sa Bohol. (Hulagway gikan ni Elvira C. Bongosia/PIA7-Bohol)
Kada barangay makadawat og ₱200K, paggamit sa LGU support fund gimando
Sinulat ni Elvira C. Bongosia
Gilusad ni Presidente Ferdinand R. Marcos Jr. ang ‘Bawat Barangay Makikinabang’ welfare program niadtong Domingo, nga nagtumong sa pagsulbad sa dugay nang mga kabalaka bahin sa sayop nga paggamit sa Local Government Support Fund (LGSF).
Ang inisyatiba, nga gipadayag sa General Trias, Cavite, naghiusa sa hinabang sa bugas, mga scholarship, ug direktang alokasyon sa salapi ubos sa usa ka gambalay nga gilaraw aron mapausbaw ang transparency ug episyente.
Giila ni Marcos ang kasaysayan sa mga pondo sa LGSF nga wala kaayo gigamit o nasayop sa direksyon, nga misangpot sa sayop nga pagdumala sa miaging mga tuig.
Ubos sa programa, ang matag barangay makadawat ug P200,000, diin ang katunga gigahin alang sa scholarship. Lima ka scholar matag barangay makadawat ug P20,000 matag usa. Ang nahabilin nga mga pondo ipunting ngadto sa lokal nga kalamboan, diin ang mga probinsya, syudad, ug lungsod giila usab nga nakadawat sa ilawom sa balangkas sa programa. Kini nga pamaagi nagtumong sa pagtubag sa mga panginahanglanon sa edukasyon ug suporta sa lokal nga imprastraktura.
Gawas sa pinansyal nga tabang, ang programa naglakip sa pag-apod-apod sa bugas. Ang mga panimalay makadawat ug 10 kilos nga bugas unom ka beses sa usa ka tuig, mga kausa matag duha ka bulan. Gihigot kini ni Marcos sa global nga pag-usab-usab sa presyo sa gasolina, nga nagpatin-aw nga ang pagtaas sa gasto sa lana kanunay nga mosangpot sa pagtaas sa presyo sa mga batakang palaliton.
Giila usab ni Marcos ang mga hagit sa LGSF, nga nag-ingon nga ang pondo wala gigamit sa husto ug gibalhin sa ubang lugar. Iyang gilaraw ang programa isip usa ka pagbalhin ngadto sa mas may tulobagon nga paggamit sa mga kahinguhaan sa gobyerno, nga nagpasiugda niini nga inisyatiba isip usa ka lakang padulong sa mas maayong pagdumala.Ang programa sa ‘Bawat Barangay Makikinabang’ sa pagkakaron usa ka piloto, nga adunay mga plano nga sutaon ang kalampusan niini ug palapdan ang pondo sa 2027.
Ang pag-anunsyo ni Presidente Ferdinand R. Marcos Jr. kalabot sa ‘Bawat Barangay Makikinabang’ welfare program sa General Trias, Cavite diin iyang gipadayag nga ang administrasyon nagpadayon sa mga paningkamot aron mapagaan ang epekto sa inflation ug pagtaas sa presyo sa mga palaliton sa mga panimalay nga Pilipino. Matud pa niini nga ang gobyerno nagpabilin sa pasalig sa pagpangita ug mga paagi aron mapagaan ang palas-anon sa mga pamilya samtang nagpalig-on sa mga istruktura sa lokal nga pagdumala. (Hulagway gikan sa PIA)
PCA nagpatukod planta sa puti nga kopras sa Mabini
Sinulat ni Rey Anthony Chiu
Aron motaas pa ang kalidad sa kopras nga itumod sa Bohol ngadto sa gawas sa nasud, sa dili madugay, sugdan na sa usa ka kooperatiba sa Bohol ang pagproseso sa lubi nga mahimo nga puti nga kopras.
Kini maoy gibutyag ni Philippine Coconut Authority provincial manager Jovencio Felisilda, samtang ang kasamtangan nga pamaagi sa pagkopras sa mga Bol-anong mag-uuma, anaa pa gihapon sa pagdangka o pagluto niini pinaagi sa pagpaaso sa landahan, o sa direkta nga pagbuwad sa adlaw.
Matud ni Felisilda, ang pagdangka ug ang pagbuwad sa gilugi nga lubi, magbutang sa koprasonon sa dili kontrolado nga environment, dili permi ang init, ug ang resulta, ang kopras mahimong brown, kuwang sa pagkaluto ug usahay usab iabut sa kapan-os.
Ang kopras, gibaligya sa gawas sa nasud alang sa pagkuha sa edible oil, sapaw o dessicated coconut, ug nga bio additives sama sa ibutang sa sabon.
Sa dili tataw nga pamaagi sa pagluto sa kopras, maoy kasagaran hinungdan nga ang kopras, tubuan sa kemikal nga makahilo ug maka-ingon sa kanser.
Ang dili maayo nga kalidad nga kopras maoy hinungdan nga dili makakuha ang mga mangoprasay sa tukma nga presyo, samtang daghan usab sa kopras nga dili makapasar sa international standard alang sa food grade processes.
Ug kay ang PCA maoy direktang natahasan sa pagpahibalik sa kalagsik sa industriya sa pagpanglubihan, gitutokan karon ang pasilidad nga makaproseso sa 5,000 ka lubi matag adlaw, aron himoon nga puti nga kopras.
Ang Aguipo Coconut Farmers Multi Purpose Cooperative, mingsaad nga kon makahunat na ang ilang planta, makapagawas na ang Bohol sa de kalidad nga puti nga kopras nga maoy kuhaan sa limpyo, walay baho ug maayong kalidad sa mga giproseso nga food grade nga mga produkto gikan sa lubi.
Niini usab nga panahon, mahimo nga ang mga mag-uuma sa lubi, dili na kinahanglang maghago pa, kay pwede na nga mabaligya ang tibuok lubi, sa mas maayong presyo aron makalahutay sa pagpadagan ang planta.
KOPRAS NGA RESECADA. Mas maayo nga pagkaluto tungod kay kontrolado ang kainit, ang puti nga kopras giila nga primera klase nga kopras nga magtanyag sa mas maayong presyo ug ang edible oil nga makuha niini, segurado kay walay amag, dili maka-ingon sa sakit sa lawas o makahilo. Ang planta sa puti nga kopras, matud sa PCA, anaa sa Aguipo Mabini, Bohol. (PIAbohol)
ANG GIPANGANDOY NGA HIMAYA
Sinulat ni Engr. Rogelio Podelino
Sa kapunawpunawan didto sa kalangitan
Mga angheles ug mga kerubines nag-ambahan
Naghimaya sa LANGITNON’G HARI
Ang tinubdan sa tanan’g kinabuhi
Ang pagpuyo sa tawo dinhi sa kalibutan
Sa hinulaman nga kinabuhi angay ampingan
Kay ang tanan aduna’y kinutuban
Busa mangandam sa takna nga tanan
Ang kalipay nga kalibutanon lumalabay
Sa katagbawan sa tawo dili makahumpay
Daw duna’y haw-ang sa imong galamhan
Nga gusto nimo nga pagahulipan
Kay ang tawo ulipon man sa sala
Ang iyang baruganan labihan kahaguka
Aron makalampas sa mga pagsulay
Dangop KANIYA aron dili ka magmahay
Ang kinauyokan nga tuyo pagpakabuhi sa tawo
Nga madagaya-on ang kahimtang sa husto
Kon unsa’y buhaton aron mahidangat sa langit
Ang dapit nga wala na ang mga kasakit
Matag tawo nga mituo nga aduna’y GINOO
Nangandoy nga sa IYANG gingharian makaadto
Didto ang tanan nagmaya sa wala’y katapusan
ANG GIPANGANDOY NGA HIMAYA kon motaliwan na kita ning kalibutan