NI: Eleazar Acampado
Usa ka Paghandom sa Atong Inahan
KARONG adlawa, gisaulog sa tibuok kalibotan ang Mother’s Day. Apan alang kanato nga nakasaksi sa hilom nga sakripisyo sa usa ka inahan, ang matag adlaw usa ka paghandom sa usa ka matang sa gugma nga dili masukod ug dili gayod nato mabalosan.
Sa paghandom nako sa akong inahan, mosumbalik sa akong panumdoman ang usa ka esena didto sa among gamay nga talad-kan-anan. Usa ka higayon nga ang pagkaon igo ra gayod kanamong mga anak. Nakita nako si anhing Nanay nga mopahiyom lang, moingon og, “Busog pa ko,” o kaha mokaon lamang sa mga mumho nga nabilin. Karon ko lang nasabtan nga ang iyang pag-ingon nga busog dili diay tungod sa pagkaon, kondili tungod sa pagtan-aw kanamo nga nangaon og tarong samtang siya nagpaluyo sa kahilom.
Iyang gihalad ang iyang panahon, ang iyang kusog, ug bisan ang iyang kaugalingong panginahanglan aron lamang kami mapakaon ug mapatungha. Ang iyang gugma nahisama sa usa ka kandila, hinay-hinay nga naugdaw ang iyang kaugalingon pinaagi sa pagpaninda og isda aron lamang mahatagan kami og kahayag sa among kaugmaon.
Sa akong pagpaningkamot sa kinabuhi, sa akong pagserbisyo sa barangay, ug sa akong pagpamalak, kanunay nakong mahinumdoman ang iyang mga pagtulun-an. Kanunay niya akong giisip nga usa ka kusgan nga anak, apan sa tinuod lang, siya ang akong tinuod nga sandigan. Ingon sa akong nasulat sa usa ka balak:
“Akong manluluwas bisan sa mga higayon nga hapit na ko mapukan. Kay bisan sa mga gutlo nga morag dili na nako maahom ang tanan, ang imong gugma sa gihapon ang nagdala nako paingon sa unahan.”
Kini ang kasingkasing sa usa ka inahan. Usa ka manluluwas nga dili mogamit og espada, kondili mogamit sa iyang walay kataposang pailob ug pag-antos aron lamang maseguro nga ang iyang mga anak dili mahisalaag sa kangitngit.
Alang kaninyo nga anaa pa ang inyong mga inahan, ayaw pasagdi nga molabay ang adlaw nga wala kamo makapasalamat. Ayaw paghulat sa higayon nga kahilom na lamang ang molungtad ug ang inyong mga pulong igo na lang ihalad sa hangin. Gaksa sila samtang aduna pa silay kainit, ug paminawa ang ilang mga tingog samtang aduna pa silay kusog nga makigduyog kaninyo sa mga awit sa kinabuhi.
Alang kanimo, Nay Lalia, ug sa tanang mga inahan sa Garcia Hernandez ug sa tibuok Bohol, kamo ang tinuod nga pundasyon sa atong katilingban. Ang inyong gugma maoy nagpabiling buhi sa atong paglaom bisan pa man sa mga unos ug dag-om nga atong giatubang.
Daghang salamat sa paghatag sa tanan, bisan wala nay nabilin alang sa imong kaugalingon. Ang imong ngalan magpabilin nga usa ka pag-ampo sa akong mga ngabil.
Happy Mother’s Day sa kaninyong tanan!