NI: Eleazar Acampado
Ang Kudeta sa Senado ug ang Politika sa Kahadlok
DILI lang ang grabeng kainit sa panahon ang nakapaalindasay natong mga Bol-anon karong semanaha. Ang mas nakapainit sa panghunahuna sa katawhan mao ang kalit nga paglihok sa Senado aron mailisan si Senador Tito Sotto ni Senador Alan Peter Cayetano isip Senate President.
Apan sa wala pa kini, mibuto na daan ang lain pang kontrobersiya human gihisgotan ang posibleng pagdakop kang Senador Bato dela Rosa base sa warrant of arrest sa ICC ug ipatuman sa mga ahente sa NBI. Ang iyang kalit nga pagtungha sa hawanan sa Senado aron maihap ang iyang boto sa gitawag nga kudeta nahimong usa ka dramatikong hulagway sa kahimtang sa politika sa nasod.
Ug wala pa gani manginit ang lingkoranan sa bag-ong liderato sa Senado, migimok na dayon ang hungihong nga adunay plano nga sumbalik nga kudeta gikan sa minoriya karon nga nadawat na sa Senado ang Articles of Impeachment batok kang Bise Presidente Sara Duterte.
Sa tinuod lang, dili na nato kinahanglan limbongan ang atong kaugalingon. Kining away sa gahom sulod sa Senado dili mahitungod sa prinsipyo. Dili kini mahitungod sa maayong pagdumala. Ug labaw sa tanan, dili kini alang sa kaayohan sa katawhan.
Kini mahitungod sa kahadlok.
Usa ka hubo, klaro, ug dili ikalimod nga kahadlok.
Ang sunod-sunod nga lihok sa politika, ang mga alegasyon, ang mga pagsulay sa pagdakop, ug ang mga pag-usab sa alyansa adunay usa lamang ka sentro nga tuyo. Kini mao ang pagpugong sa kusog nga ilang nakita diha sa ngalan ni Bise Presidente Sara Duterte.
Kon ato kining hunahunaon, usa lamang siya ka tawo, ug usa ka babaye pa gyod. Apan ngano nga mora man og nagkurog ang daghang tradisyonal nga politiko? Nganong adunay mga tinagong sabot-sabot sa luyo sa pultahan? Nganong adunay grabeng paningkamot sa pagkontrolar sa Senado?
Kay adunay usa ka pangutana nga ilang gustong tubagon sa ilang kaugalingong pamaagi:
Unsaon pagpugong nga dili mahimong presidente si VP Sara?
Dili man bugo ang katawhan. Gihatagan man kita og panabot aron masabtan ang dagan sa mga panghitabo ug ang tinuod nga tumong sa mga lihok sa politika. Ug kon ato gyod tan-awon pag-ayo, ang kamatuoran daw nagngisi na lang sa atong atubangan.
Daghan ang nahadlok.
Daghan ang desperado.
Ug sa politika, ang desperasyon kasagaran mao ang labing dakong pagkompisal. Kay dili nimo palihokon ang tibuok makinarya sa kagamhanan batok sa usa ka tawo nga walay bili. Dili nimo sunogon ang mga alyansa ug isakripisyo ang imong kredibilidad alang sa usa ka tawo nga dili dakong hulga.
Kay ang mga walay gahom dili kahadlokan.
Ug ang mga dili delikado dili pugngan.
Mao kini ang hinungdan nganong daghan ang nagtuo nga ang impluwensiya ni VP Sara maoy nakapakurog sa korap nga mga politiko nga nanalid na sa ilang trono, ilabi na sa mga nalambigit sa flood control scandal.
Samtang nag-ilog sila sa gahom didto sa Manila, kitang ordinaryong Pilipino nagpabiling nagtan-aw ug naghunahuna unsay tinuod nga kaayohan alang sa nasod. Kay sa kataposan, dili man ang ilang politika ang atong ginabayran matag adlaw, kondili ang mahal nga bugas, mahal nga kuryente, ug uban pang palaliton nga padayon nga nagsakit sa ordinaryong pamilya.
Apan mas mahal pa gyod ang politika sa nasod kon ang gipusta niini mao ang kaugmaon sa sunod nga henerasyon. Kay kon ang gahom himoong puhunan sa kaugalingong interes, ang labing dakong mawad-an mao ang katawhan.
Busa magpabilin kitang mabinantayon ug manukiduki. Dili kita magpadala sa mga balita nga nagsilbi lamang sa usa ka naratibo samtang gipahilom ang pikas nga bahin. Atong tan-awon ang tibuok hulagway ug susihon pag-ayo ang kamatuoran luyo sa tabil.
Kay usahay, ang labing makapadayag sa kamatuoran dili ang ilang gisulti… kondili ang ilang gikahadlokan.