Sinulat ni Dave Albarado
Mipa-ambit si Gov. Arthur Yap sa iyang mensahe atol sa gipahigayong virtual Provincial Task Force-End Local Communist Armed Conflict (PTF-ELCAC) leveling sessions niadtong adlaw nga Martes, Hunyo 22, 2021.
Ang maong virtual event gipangunahan sa mga kadagkoan sa Bohol PTF-ELCAC diin nagtumong nga makamugna ug mga han-ay, maayo ug epektibong mga lakang alang sa pagsumpo kontra sa mga makalilisang nga mga lihok sa mga Communist Terrorist Group (CTG).
Sa iyang mesahe, gihatagan sa gobernador ug importansya ang Presidential Executive Order 70 ni Presidente Duterte ug ang iyang Executive Order 18 nga naglangkob sa pagmugna ug mga nasudnong estratehiya nga tumong ang pagsustener sa kahapsay ug kalinaw sa nasud labi na ang paghuman sa mga lokal nga mga teroristang grupo pinaagi sa nasudong task force sa ELCAC.
Si Yap miingon nga bisan anaa kita sa pandemya ug gi-deklara nga insurgency-free ang Bohol, dili gyud kita muhonong sa pagmatngon ug mga paningkamot kontra sa mga lihok sa mga terrorista tungod kay dili pasabot wala usab muhonong ang ilang mga dautan ug bandidong mga buhat dinhi sa atong lalawigan maong kinahanglan gyud nga magpadayon ang pagplano kontra sa mga terorista.
Sukad sa iyang pagka-Gobernador, adunay 14 ka mga gipatay nga konektado sa buhat sa mga CTG ug bisan nga gideklara nga insurgency-free ang Bohol, kinahanglan gihapon nga magpabiling malinawon ang paghatod sa mga serbisyo sa kagamhanang probinsyal.