Sinulat ni Elvira Bongosia
Giklaro sa Department of Information and Communications Technology (DICT) nga dili na kinahanglan pang mag-reapply sa VaxCertPH ang mga indibidwal nga naka rehistro na dinhi sa wala pa ang Peb. 7,
2022
Sa usa ka pahayag, miingon si DICT Kalihim Emmanuel Rey Caintic nga kinahanglan na lamang nilang mag-regenerate sa ilang data ug QR code sa VaxCertPH.
Ang mga indibidwal nga adunay Vaxcert.ph certificate kaniadto kinahanglan na lamang nga mag-log in sa Vaxcert.doh.gov.ph ug mag-fill up sa ilang pangalan, ug date of vaccination aron makakuha sila ug bag-ong certificate.
Gipasabot ni Caintic nga nagpahigayon karon ug update ang ilang buhatan sa database niini diin gidugangan pa kini ug security features, ug uban pang impormasyon sama sa booster, pediatric vaccination, ug linkage sa umaabot European Union nga hinungdan kun nganong dili na mogana ug balik ang daang QR code niini.
Matud pa nga isip pagpangandam na usab kini alang sa compatibility sa ubang mga nasod nga nigamit usab niini.
Sa pagkakaron, naa sa 39 na ka mga nasod ang miila sa VaxCertPH nga gilangkoban sa Australia, Canada, United States, Hong Kong, India, United Kingdom, ug Singapore.
Samtang giseguro ni Caintic nga ang maong system upgrade padayon nga nagsunod sa certificate issuance standards sa World Health Organization (WHO).
