Sinulat ni Elvira Bongosia
Mahimo nang makadawat sa unang booster shot ang mga batang may edad 12 hangtod 17 anyos isip dugang proteksyon batok sa Coronavirus disease (Covid).
Base sa pahinumdom sa Department of Health (DOH), Pfizer vaccines lamang ang ihatag sa maong age group isip unang booster dose.
Giklaro usab sa DOH nga mahimong makadawat ug Pfizer vaccine ang mga bata bisan natupokan ug laing brand sa bakuna sa unang duha ka dose.
Giseguro usab sa departamento nga libre, luwas ug epektibo ang maong bakuna sa mga kabataan.
Gipahinumdom pa niini nga gitugotang maka walk-in sa mga gitakdang vaccination site ug temporary vaccination post. Kini basta siguradohong dalhon ang tanang importanteng dokumento.
Kahinumdoman nga sa niaging semana, wala gidayon sa gobyerno ang paghatag ug Covid booster dose sa mga kabataang non-immunocompromised tungod sa pipila ka “glitches.”
Samtang matud pa ni DOH Undersecretary Maria Rosario Vergeire, bisan unsang adlawa mahimo nang sugdan sa mga lokal nga kagamhanan ang ilang Covid booster vaccination basta andam na sila.
