BOHOL LIGHT nagpahibalo sa bag-o nga paagi sa pagbayad sa kuryente
Sinulat ni Sheryl B. Paga
Ang Bohol Light Company, Inc. malipayon nga magpahibalo ngadto sa mga konsumidor sa kuryente dinhi sa dakbayan sa Tagbilaran mahitungod sa bag-o ug mas sayon nga pasilidad sa pagbayad sa atong electric utility bills pinaagi sa e-payment nga gitanyag sa Security Bank.
Pinaagi niining maong kabag-ohan, mahimo na kitang mubayad pinaagi sa atong tagsa-tagsa ka mga mobile phone ug kung sa bisan asang lugar kita nahimutang.
Mao kini ang mga pamaagi aron mahimong mas dali ang atong pagbayad:
1. Pagkuha ug QR Code – Magpadala lamang kita ug mensahe sa buhatan sa Bohol Light ug ihatag ang atong registered Account Number ug Account Name pinaagi sa Bohol Light Company Inc. Facebook Page. Mahimo usab kitang magpadala ug e-mail sa accounting_blci@bohollight.com o i-text sa mobile number. Adunay in-charge nga maoy mogenerate sa individual unique QR Code alang sa matag registered account.
2. Unsaon Paggamit ang QR Scan Code – Gamita ang imong mobile banking app o bisan unsang QR code scanning app aron ma-scan ang code gamit niining musunod nga mga online facilities. Isulod ang kantidad sa bayad, ug kompletoha ang transaksyon.
3. Mga anagyan nga hinumduman kung kita mubayad pinaagi sa e-payment – Ang matag QR Code permanente, talagsaon, ug dili mabalhin sa bisan kinsa nga customer. Kini nga e-payment applicable lamang ngadto sa mga konsumidor nga WALAY OVERDUE o WALAY NAKATATAK NGA NOTICE OF DISCONNECTION aron pagsiguro nga malikay sa kahaol kon kita maputlan.
Nagdasig ang Bohol Light niining maong pamaagi sa paggamit sa QR Pay Code diin pwde natong gamiton bisan kanus-a ug bisan asang asang dapita.
Alang sa dugang mga kasayuran, mahimo kitang motawag sa telephone numbers (038) 412-3503/ 501-7762 local 208.
BWUI nagtrabaho sa kalsada nga naka-apekto sa ilang linya sa tubig
Sinulat ni Victor L. Tambis
Makita sa hulagway ang pagtrabaho sa drainage sa Ligones Street, Brgy. Bool nga nakaapekto sa linya sa BWUI
Subay sa proyekto sa kalamboan sa mga kalsada sa syudad, ang Bohol Water mipahibalo nga subsub kini nga nagmonitor sa maong mga trabaho aron pagsiguro nga mahatagan gilayon ug dinalian nga pagtagad ang mga linya nga maapektohan sa maong mga trabaho.
Ang mga dapit nga adunay nagpadayon nga pagsemento sa kalsada o road concreting mao ang mosunod: (1) J.A. Clarin Street, gikan sa San Isidro Church hangtod sa NIA Office; (2) gikan sa Cor. Budlong Street, padulong sa Barangay Libertad, Baclayon, ug sa (3) Ligones Street, Brgy. Bool (drainage works).
Aron mahatagan ug dinalian nga pagtagad, sama sa pag-relocate sa mga linya nga maapektohan, ug pag-giya sa kontraktor kung asa ang mga linya sa tubo, ang mga tinugyanan sa Bohol Water subsub nga nagmonitor niining maong mga trabaho aron malikayan ang kadaot sa linya nga makaapekto sa supply sa tubig ngadto sa mga konsumidor.
Tungod niining maong kalihokan, ang Bohol Water mipahibalo sa mga konsumidor sa nahisgotang mga dapit nga adunay mga higayon nga mawala ang supply sa tubig tungod sa mga kalihokan pagpahigayon sa mga linya ilabi na kon “main line” ang maapektohan.
Gipaningkamutan sa maong kompanya nga mahuman sa labing dali nga panahon kon ugaling adunay mga trabaho sa linya nga maapektohan aron dili hataas ang panahon nga mawala ang tubig tungod sa maong kalihokan.
1,200 MEGAWATT CEBU-BOHOL GRID SIGURADO NA
Sinulat ni Kevin Damalerio
Panigurado nga makadawat ang Bohol ug 1,200 Megawatt nga suplay sa kuryente sa Disyembre ning tuiga.
Kini ang gi-update sa Department of Energy (DOE) atol sa miting ni Energy Secretary Popo Lotilla ug Cong. Edgar Chatto niadtong Setyembre 9.
Ang National Grid Corporation of the Philippines (NGCP) nagreport sa energization sa Line 1 sa Cebu-Bohol Interconnection Project (CBIP) niadtong Agosto 12, 2024, nga karon naghatag og 600MW nga suplay sa kuryente sa Bohol.
Samtang, ang 230kV Line 2, kumpleto na usab ug andam na para energization. Kini nagpaabot na lang nga mahuman ang Corella Substation karong Disyembre 2024.
Kahinumdoman nga si Chatto, sa dihang gobernador pa siya, nagmugna sa Bohol Energy Development Advisory Group (BEDAG) pinaagi sa usa ka executive order nga nahimong usa ka Provincial Ordinance, nga maoy nagmugna sa One Bohol Power.
Kini ang nagbukas sa pamaagi alang sa pagmugna sa Bohol Energy Development Plan aron matubag ang mga hagit bahin sa Power Generation ug Power Transmission.
Ang Cebu-Bohol Power Interconnection Project gilauman nga makatubag sa panginahanglan sa probinsya alang sa usa ka resilient, cost-efficient, ug environment-friendly nga suplay sa kuryente.
Sa higayon nga ma-energize na kini sa hingpit, gilauman usab nga makapadani kini og mga investors sa power generation labi na sa renewable energy, tungod kay ang sobra nga kuryente mahimong ipasa na ngadto sa grid pinaagi sa Wholesale Electricity Spot Market (WESM), ang trading system sa elektrisidad sa Pilipinas.
Si Chatto padayon nga nag-monitor sa dali nga pagtapos niining maong proyekto, lakip ang One Bohol Power land-based standby power plant sa Ubay, usa ka kabahin sa 2-pronged nga proposal sa BEDAG nga tubag sa mga hagit nga nitumaw human sa 7.2 magnitude nga linog ug bagyong Yolanda niadtong 2013.
Ang klarong panglantaw ug long-range nga plano importante para sa malungtarong kalamboan, matod ni Chatto.
DFA Consular Office sa Dakbayan sa Tagbilaran ablihan na karong Nobyembre: Cong. Chatto
Ang gipaabot nga consular office sa Department of Foreign Affairs (DFA) sa Dakbayan sa Tagbilaran magsugod na sa ilang operasyon karong Nobyembre.
Kini ang pinakaulahing taho ni DFA Office for Consular Affairs Chief Asec. Adel Cruz ngadto kang Cong. Edgar Chatto.
Ang Alturas Mall nagpadayon sa pagtukod sa mga gikinahanglan nga espasyo alang sa DFA.
Meanwhile, the recruitment process for the 16 positions that will complement the office has begun.
Sa laing bahin, nagsugod na usab ang proseso sa pagdawat ug mga empleyado alang sa 16 ka mga posisyon sa maong buhatan.
Ang DBM nag-isyu sa Notice of Staffing and Compensation Action niadtong Setyembre 5 ug gipublikar sa DFA ang mga posisyon alang sa aplikasyon niadtong Setyembre 10.
Ang proseso sa pagdawat sa mga aplikasyon gitakda karong Oktubre uban ang target nga pag-abli sa Consular Office karong Nobyembre.
Kahinumduman nga si Chatto ang nag-lobby alang sa pagkatukod sa consular office sa Dakbayan sa Tagbilaran ug nag-facilitate nga mapundohan kini alang sa operasyon sa maong buhatan.
Unang distrito sa Bohol misalmot sa “Handog ng Pangulo”
Sinulat ni Kathy Laquinta
Cong. Edgar Chatto
Ang unang distrito sa Bohol misalmot sa kalihokan sa nasudnong pag-apod-apod sa nagkadaiyang ayuda gikan sa gobyerno kaniadtong Septiyembre 13.
Si Cong. Edgar Chatto nanguna sa pag-apod-apod sa tabang pinaagi sa programa nga Ayuda para sa Kapos ang Kita Program (AKAP) nga gipahigayon sa Bohol Cultural Center.
Ang Department of Social Welfare and Development (DSWD) nga gipangulohan ni Jimmy Crusio mao ang nagdumala sa paghatag sa hinabang para sa mga benepisaryo nga nalakip sa “near poor” nga kategoriya sa Dakbayan sa Tagbilaran.
Ang programa gipakita live sa tibuok nasud, diin gi-highlight ang paglusad sa “Agri-Puhunan at Pantawid Program” sa Nueva Ecija nga gitambongan ni Presidente Bongbong Marcos, kinsa nagsaulog usab sa iyang ika-67 nga adlawng natawhan.
Si Chatto mapasalamaton kang Marcos ug House Speaker Martin Romualdez tungod sa ilang suporta sa unang distrito, dili lamang pinaagi sa AKAP apan apil na usab ang daghang programa nga gipatuman sa mga ahensya sa nasyonal nga pangagamhanan sa distrito.
Kauban ni Chatto sa maong kalihokan sila si Balilihan Mayor Pureza Veloso-Chatto, mga Board Member Aldner Damalerio ug Benjie Arcamo, uban usab sa mga Konsehal sa Tagbilaran nga sila si Atoy Torralba ug Ody Glovasa, ug kanhi bise mayor Toto Veloso.
P70 million Bohol PPO building ug upat ka brand new patrol car gi-inagurahan
Gi-inagurahan, gi-blessingan ug gitugyan ang upat ka andana nga bag-ong Bohol Provincial Police Office (BPPO) PNP Building, duha ka andana nga officers quarters nga nagkantidad og P70 million pesos ug upat ka brand new PNP 4×4 patrol car para sa upat ka lungsod kagahapon, Sept. 2, 2024.
Gihimo ang kalihokan didto sa Bohol PPO Camp Francisco Dagohoy dinhe sa dakbayan sa Tagbilaran.
Gipangulohan ang kalihokan ni BPPO Provincial Director PCol. Lorenzo Batuan, PCol. Roy Parena, PRO7 Deputy Regional Director for Administration nga nagrepresentar ni PRO7 Regional Director PBGen. Anthony Aberin ug ang Bohol PPO Command Staff.
Si Department of Education (DepEd) Undersecretary Trygve Olaivar, kinsa lumad nga taga Candijay, Bohol ang pinasidunggang dinapit sa kalihokan.
Gitambongan sab ang kalihokan nila ni Governor Aris Aumentado, City Mayor Jane Yap ug Bohol Mayors, 1st District District DPWH Engineer John Paul Gascon, Atty. Abeleon Damalerio, chief of staff ni 1st District Cong. Edgar Chatto, Yanyan Tutor tinugyanan ni Congresswoman Alexie Tutor ug ubang dinapit nga bisita.
Si Undersecretary Olaivar nahimong taytayan sa katukoran sa P70 million facility sa Bohol PPO nga napapundohan ni kanhi ug karon DepEd Secretary Sonny Angara niadtong chief of staff kini sa iyang buhatan.
Natabangan sab ni Usec. Olaivar nga makaangkon sa upat ka brand news 4×4 patrol car ang Bohol PPO nga para kini sa lungsod sa Guindulman, Sevilla, Mabini ug ang Provincial Headquarters.
Sa iyang mensahe, si Usec. Olaivar ni-ila sa role sa PNP nga frontliner sa serbisyo ilabina sa peace and order maong angayan lamang hatagan sila sa saktong kahimanan ug facilidad ug duol sab sa iyang dughan ang PNP tungod kay ang iyang amahan sakop sab sa organisasyon.
Bohol mosalmot sa International Coastal Cleanup Day
Ang lalawigan sa Bohol mosalmot sa umaabot nga International Coastal Cleanup Day nga gikatakda karong umaabot Septiyembre 21.
Si Jovencia Ganub, ang pangulo sa Bohol Provincial Environment Management Office (BPEMO), nihatag ug gibug-aton sa partisipasyon sa probinsiya sa tinuig nga global event sa ika tulong Sabado sa Septiyembre.
Sa ika-39 nga selebrasyon karong tuiga, ang matag partisipante nga LGU dungan nga magpahigayon ug coastal clean-up sa ilang tagsa-tagsa ka lungsod aron ma-edukar ang publiko kabahin sa epekto sa polusyon sa dagat, sa kinaiyahan ug marine species ug aron madasig ang mga tawo nga molihok aron malikayan ang polusyon.
Ang ingon nga kalihokan nagpasiugda usab sa pagsagop sa malungtarong mga gawi ug pamatasan sama sa pagkunhod sa paggamit sa plastik ug pagpaayo sa pagdumala sa basura aron malikayan ang umaabot nga polusyon.
Ang kagamhanang probinsyal, ubos sa pagpangulo ni Gob. Aris Aumentado, nagpasiugda sa pagkamalahutayon sa kinaiyahan sa pagtinguha sa usa ka lig-on ug berdeng Bohol pinaagi sa iyang Strategic Governance Roadmap.
BALAK
ANG KADUNGGANAN
Sinulat ni Engr. Rogelio Podelino
Kini ang hiyas sa tawo nga guibantayan
Guiampingan pag-ayo mora’g bulawan
Kay kon kini ang mabu-ong
Dili na mahi-uli ug tarong
Guimatngonan pag-ayo sa taknang tanan
Guibantayan nga dili madungisan
Guiamoma mora’g nag-alima ug puya
Guipanalipdan kanunay sa walay kaluya
Sa familya kadungganan usa ka bahandi
Matag usa kanila nagbantay nga dili mapakli
Guimatoto guikan pa sa ilang katigulangan
Sumosunod sa ilang kahimtang guigabayan
Aron pagbantay sa kadungganan dili kalimtan
Sa adlaw’ng Dominggo mosimba ang tanan
Guitudloan sa DIOSNONG mga kasugoan
Aron tanan nagtubo nga nagbinuotan
Labi na ang mga kadalagahan sa familya
Nagmatngon kanunay nga dili madisgrasya
Sa higayon nga duna nay gustong mosiba
Sa iyang kaalimyon sa dakung tinguha
Higayon gusto mosulod sa sag sa kaminyoon
Nagsabot guinikanan sa hustong panahon
Regalong ikahatag niya sa iyang pamanhonon
ANG KADUNGGANAN guiampingan sa dayon