Transition process sa BLCI gisugdan na
Sinulat ni Sheryl B. Paga
Kaniadtong September 16, 2024, pormal na nga gisugdan ang due diligence alang sa transition tali sa Bohol Light Company, Inc. (BLCI) ug sa Primelectric Holdings Inc. (PHI) nga mao na karon ang bag-ong tag-iya sa 70% shares sa BLCI.
Aron mahatagan ug hapsay nga pamaagi, gihimo pag-una ang orientation ngadto sa tanang division managers ug department supervisors. Adunay gipadala nga Transition Team gikan sa PHI Manila, ug uban pang miyembro gikan sa ilang buhatan sa Iloilo nganha sa BlCI aron paghimo sa due diligence audit sa lain-laing departamento aron mahatagan ug alignment ang mga existing nga pamaagi sa BLCI tandi sa MORE Electric Power nga usa ka distribution utility nga gipanag-iya sa PHI.
Nagpahigayon usab sila ug actual nga inspeksyon sa mga distribution line facilities sa Bohol Light ug sa atong substation equipment.
Gani pa man, pipila ka mga kawani sa BLCI nagpahigayon ug benchmarking sa MORE Electric Power sa Iloilo City ug Negros Electric Power sa Bacolod, nga susama nga gipanag-iya sa PHI kaniadtong September 12-14, 2024.
Gipangulohan ang kalihukan ni Engr. Paulino G. Almedilla, ang General Manager sa BLCI.
Ang tumong sa maong pagbisita mao ang pag-familiarize ug pagpakisusi sa sistema ug operasyon sa pag-apod-apod sa kuryente isip usa ka power distribution company.
Ang PHI mao na ang mother company sa Bohol Light human kini makapalit sa 70% nga shares gikan sa Salcon consortium.
Gipakita sa MORE ug Negros Electric Power ang tanang aspeto sa ilang sistema ug operasyon sa franchise areas, diin ang paghatag ug dakong atensyon sa mga reklamo sa konsumidor gihatagan gayud ug dakong pagtagad.
Sa bag-ong pagpanag-iya, gusto natong ipahibalo sa mga konsumidor nga magdahom ug dugang kalamboan sa atong serbisyo dinhi sa dakbayan sa Tagbilaran. Walay angay nga kabalak-an, tungod kay ang katuyoan mao ang kaayohan alang sa tanan.
Sa pagkakaron, nagsugod na usab ang pagpakig-alayon sa PHI sa pag-proseso sa renewal sa prangkisa ngadto sa kongreso aron masiguro nga walay pagkabalda ang paghatag sa serbisyo sa kuryente dinhi sa Tagbilaran City.
BWUI nagpahigayon sa kasayon sa pagdawat ug bayad sa water bill
Sinulat ni Victor L. Tambis
Makita sa itaas ang mga establisimyento nga modawat ug bayad sa bills sa Bohol Water Utilities Inc. (BWUI) nga mao ang sugod sa itaas sa wala: 1.) First Consolidated Bank/FCBpay App; 2.) Bank of Commerce; 3.) M Luiller/ML Wallet; 4.) Land Bank; 5.) Palawan Express/ Palawanpay App; 6.) Security Bank; 7.) BLCI ug ang 8.) Bayad Center App.
Sa tinguha nga mahatagan ug kasayon ang mga konsumidor, ang BWUI nakig alayon sa mga establisimyento ug bangko aron puede kini nga modawat sa bayad gikan sa water bill ug ang pagdawat sa bill puede na himoon pinaagi sa email.
Pagkakaron, ang maong kompanya adunay pito (7) nga mga payment partners nga mao ang mosunod: (1) First Consolidated Bank ug ang ilang FCBPay app; (2) Land Bank of the Philippines; (3) Bank of Commerce; (4) Security Bank; (5) M. Lhuiller ug ang ilang ML Wallet app; (6) Palawan Express/Pawnshop ug ang ilang Palawan Pay app.; (7) Bayad Center app, ug ang ika pito ang (7) Bohol Light Company.
Puede usab himoon ang pagbayad pinaagi sa “G-Cash” diin usa kini ka pasilidad nga moagi sa Security Bank. Aron ikaw maka avail sa G-Cash payment, kinahanglan nga adunay QR Code ang usa ka account nga himoon sa opisina sa Bohol Water.
Kining maong mga establisimyento ug bangko modawat lamang ug bayad sa current bill sa tubig o bill nga wala pa molapas sa due date.
Dugang kasayon sa konsumidor, ang water bill puede na kini madawat sa konsumidor pinaagi sa email segun sa email address sa maong konsumidor.
Kon ang usa ka konsumidor mopili sa “e-billing” o pinaagi sa email, dili na siya maapil sa delivery sa bill nga himoon sa mga bill courier ngadto sa mga tagsa-tagsa ka panimalay.
BALAK
ANG BALAY DANGPANAN
Sinulat ni Engr. Rogelio Podelino
Sa atong katilingban karon
Nagkuyanap ang bisyo sa mga batan-on
Kinahanglan nga madali kini pagpakgang
Dautang bisyo sa mga batan-on maundang
Nagkadaiyang bisyo sa mga batan-on
Labihan kalabad sa ulo hunahuna-on
Mga namunoan nangita ug paagui
Unsaon pagsugpo sa ilang kalaki
Mga batan-on guipahimuslan sa syndikato
Sila ang padalhon sa droga nga sekreto
Aron kapulisan dili mahibalo
Tighatud sa droga maoy ilang trabaho
Aron masulbad ang suliran sa katilingban
Kinahanglan motabang tanang katawhan
Santa-on dautang bisyo sa mga batan-on
Guinikanan ilang mga anak suhitohon
Dad-on tanang batan-on nga nagbisyo
Tudloan sila sa pamatasang maayo
Tug-anan sa linugdangan bahin sa droga
Hatagan sa higayon makabalik pag-eskwela
May panahon pa kabatan-onan magbag-o
Guiyahan pag-ayo aron mosalig ug husto
Mga tawo nagsakripisyo gapahigayon tanan
Didto sa: ANG BALAY DANGPANAN