NI:RONIE ORILLOSA

Ang Aso sa Kapakysan


Akong itumong karon ang akong hisgot kung giunsa pag-abuso sa mga tawo ang mga droga alang sa kahilayan imbes sa ilang orihinal nga katuyoan nga mao ang paghatag ug alibyo sa mga gibati nga sakit sa mga tawo.

Atua unta nga gamiton ang droga aron mabalik ang kahimsog sa atong panglawas.

Apan unsa mang pagka-unsaa nga ang pag-gamit niini nahimo naman nga problema? Tungod kay kini gi-abusohan sa daghanan nga tawo sa atong katilingban.

Ang tanang droga adunay hustong katuyu-an. Ug kon ang usa ka tawo mogamit og druga bisan wala niya kini kinahanglana alang sa himsog nga panglawas, nahulog na kining maong binuhatan padulong sa lakang sa kaparutan ug kapakyasan.

Daghan na nga mga tawo ang nahimong biktima sa kabangis nga epekto sa droga. Ngani pa man, adunay mga kusog nga hungihong nga adunay mga opisyal sa pangagamhan nga nalulong sa ginadili nga droga. Apan gipanghimakak kini sa mga hingtungdan. 

Niining tungora, ato silang gihagit nga mugawas sa ilang gipangtagoan nga bakak nga sila mismo limpyo batok sa pag-gamit sa ginadili nga droga.

Ako andam nga mopailawom sa gitawag ug drug testing aron pagmatuod nga wala gyud ko  moabuso sa drugas ilabi na kadtong gikonsiderar nga illegal. Hinaut unta pud nga ang mga opisyales sa atong gobyerno kanunay nga andam sa pagpailawom sa drug testing..

Sa datus sa Dangerous Drugs Board (DDB), ang shabu mao ang labing kaylap nga gigamit nga ilegal nga substansiya diin dul-an sa 92 porsyento sa mga nag-abuso sa droga nag gamit og shabu. Gisundan kini sa marijuana ug ecstasy.

Akong namatikdan nga samtang ang mga ordinaryong Pilipino nga mo-aplay og trabaho sagad ipaubos sa drug test, ang mga opisyal sa publiko wala pa ma-testing sa dili pa molingkod sa katungdanan. Ngano man?

Ang publiko adunay katungod nga makahibalo kung ang opisyal nga gihatagan sa pagdumala sa gobyerno, wala ba’y kalabotan sa pag-abuso sa droga.

Isip kabahin sa akong adbokasiya alang sa maayong pang-gobyerno, akong gihimug-atan nga ang mga tawo nga nagkupot sa renda sa pangagamhanan, kinahanglang dili mag-abuso sa droga sa ilang mga buhatan


Tinood ba nga adunay mga opisyal nga giingong nalambigit sa pag-abuso sa drugas?

Apan bisan pa sa mga hungihon, walay konkretong kompirmasyon nga wala nag-abuso sa drugas ang mga opisyal tungod kay wala pay gihimo nga drug testing kanila.

Matod nila dili makuha sa katawhan ang labing maayong gobyerno kung ang mga nag-abuso sa droga mao ang magdumala sa mga renda.

Busa isinggit nato nga ang mga nag-abuso sa droga, walay bisan gamay nga katungod nga mosalmot sa mga kalihokan sa gobyerno tungod kay sila ang nagdala sa ASO SA KAPARUTAN.  

isinggit nato sa tanang su-ok sa kalibutan nga kining mga nag-abuso sa droga, makapukan lang sa katungod sa mga tawo sa limpyo nga palibot ug makiangayon nga panag-igsoonay.

Kay matud pa sa sanglitanan, “Ang maayong binuhatan dili gyud magbunga ug dautan.”

(Bahin sa Magsusulat: Si Ronie Orillosa mao ang Co-Founder sa Youth Lead Philippines, Inc. diin siya aktibo nga sakop hangtud karong panahona. Director for Membership usab siya sa Rotary Club Downtown San Juan, Metro Manila. Napili siyang Barangay SK Kagawad kanhi sa Dao, Dakbayan sa Tagbilaran ug siya ang Presidente sa Pangagamhanan sa mga Tinun-an sa PMI Colleges, Bohol sa tuig 2012-2013. Presidente usab siya sa Bohol Alliance of Student Councils sa susamang tuig.)