Hapsay ug Malinawon Kaha Ang Piniliay 2025?
Ni ELEAZAR TUTOR ACAMPADO
NAGSUGOD na gyod ang opisyal nga kampanya sa mga kandidato sa national ug mosunod usab ang kampanya sa lokal sa sunod nga buwan.
Karon nag-iyahay nag diskarte ang mga magpapili sa pag-apod-apod sa ilang mga campaign material ug uban pa aron sa pagpaila-ila ug pagpahibawo sa ilang mga programa.
Ug halos kadaghanan, namutang og tarpaulin ug posters sa kadalanan, morag mga banderitas sa pista. Aw, karon pa diay ta? Dugay na man na nga morag pista ang eleksiyon sa Pilipinas!
Karon, nakurat kita nga daghan nang gipagawas nga birada ang administrasyon batok sa mga kaatbang. Gipangunahan pa gyod ni Pangulong Ferdinand R. Marcos diin gipakaubos niya ang mga midagan nga senador nga kakompetensiya sa iyang mga senador, kay lagi gipapalit lang og suka nahimo na dayong kandidato sa pagka senador.
Hay, Long, hambugerit lagi kaayo. Kini seguradong nakahaling og samot sa mga kasuko sa daghang mga tawo nga gisumhan ug kasukaon na sa iyang panggobyerno.
Mahapsay kaha ug magmalinawon ang piniliay karong Mayo 2025?
Atong iampo nga maingon.
Manghinaot kita nga dunay manguna og magduso og inisyatibo nga magbuhat og pakigsaad alang sa tinud-anay, hapsay ug malinawon nga piniliay sa umaabot nga Mayo 12, 2025.
Ang mga kandidato manumpa nga pinaagi sa ilang mga pulong ug buhat, pagasundon nila ang gitakda sa atong Batakang Balaod kabahin sa eleksiyon. Manaad sila nga mosunod sa mga balaod nga gipatuman pasig-uyon sa mga mando ug regulasyon sa piniliay. Kining tanan ilang buhaton aron makabaton og usa ka hinlo ug tinud-anay nga piniliay, diin ang mga Pilipino gawasnong makapili sa moalagad kanila nga walay kahadlok ug kabalaka. Ug labaw sa tanan, walay pagpanghaylo og salapi, bugas, sardinas, noodles, posporo nga sudlan og kuwarta ug uban pang mga butang nga ipangdani sa mga botante aron makuha ang ilang mga boto. Labaw na ang AICS, MAIP, AKAP ug TUPAD.
Ang pagkigsaad mahimong ipahigayon ug pirmahan sa kandidato panahon sa hiniusang pagpaila-ila sa mga kandidato tinambongan sa mga representante sa Comelec, DILG ug PNP, religious groups ug uban pa.
Maayo ang tumong ning maong pakigsaad aron ang mga kandidato maaghat gayod nga molihok nga nahisubay ug nahalatid sa balaod. Ug aron ang alagad sa katawhan magpabiling matinud-anon ug may integridad.
Kon kini mapahigayon, atong iampo nga ang tanang mga kandidato may baroganan ug mosunod sa ilang gipanumpaan ug dili mobalik sa naandan nga pagpanghatag og kuwarta, pangpanghatag og grocery items, pagpanghulga ug uban pa aron makakuha og mga boto.
Bahin sa Tagsulat:
(Si Eleazar Tutor Acampado, kanhi staff writer sa Bisaya Magazine. Nakadaog na sa Carlos Palanca Memorial Awards for Literature in Cebuano Short Stories. Ug kasamtangang nagserbisyo isip ikaduhang Sangguniang Barangay member sa West Poblacion, Garcia-Hernandez, Bohol.)