Kwalipikadong konsumidor sa Bohol Light, mahimo’ng mo-claim sa Bill Deposit Refund

Sinulat ni Sheryl B. Paga

Maayong balita! Kon ikaw kwalipikado alang sa Refund sa Bill Deposit diin nasuta nga walay penalties sulod sa nilabay’ng tulo ka tuig ug nagpabilin ka nga maayo ang payment record gikan sa pagbayad sa “Customer Deposit”, pwde na kining makuha.

Padayon and Bohol Light sa pagdawat sa mga aplikante nga pwede makakuha sa maong refund. 

Gipahibalo kini pinaagi sa barangayan nga gihimo sa Bohol Light, pagbutang ug mga pahibalo diha sa mga billing statement nga giapod-apod ngadto sa mga konsumidor, sa pag anunsyo diha sa mga radio programs, ug pagpostada diha sa Bohol Light opisyal nga facebook page.

Kung ikaw usa sa mga nakabayad sa Bill Deposit ug nakahibalo ka nga wala kay palta sa imong pagbayad sa binuwan nga billing sa dili pa ang due date, palihog ug bisita gilayon diha sa opisina sa Bohol Light ug pakigkita-I lamang ang application associate nga si Iris Leparto.

Mao kini ang mga requirements:

Adunay duha ka paagi sa pag-claim sa refund: mahimong deretso ihatag ngadto sa customer pinaagi sa cheque; o e-deduct ang kantidad sa refund deretso sa account sa konsumidor ngadto sa mosunod nga billing period.

Ang pag-refund sa bill deposits mandato kini ubos sa Article 7 ug Article 28 sa Magna Carta for Residential Electricity Consumers diin gilatid nga ang usa ka konsumidor nga relihiyosong gabayad sa iyang electric bills “on time” sulod sa milabay nga tulo ka tuig (o 36 months) ug walay record ug nga giputlan sa serbisyo sa kuryente maka-claim ug 100% refund sa deposit ug ang obligasyon usab sa pagbayad niini.

Kung aduna kitay mga pangutana kabahin sa proseso sa Customer Bill Deposit Refund palihog ug tawag lamang sa atong hotline numbers at (038) 427-2372, 0920-960-2372, ug padala ug mensahe sa Bohol Light opisyal chat box.

Ayaw palabya kining maong kahigayunan. Apply na!

Refund sa gibayran nga water bill sa mga hingtungdan nga katuigan ihatag ngadto sa mga konsumidor

Sinulat ni Victor L. Tambis

Mkita sa itaas ang stub-out diin anaa ang mga metro sa tubig ug ang metro diin marehistro ang tubig nga makunsumo

Atol sa pakigpulong sa nasubli-an nga chief executive sa lalawigan sa Bohol nga si Gov. Aristotle Aumentado, iyang gimandu-an ang opisina sa mamahandi sa probinsya o Provincial Treasurer’s Office (PTO) sa pakig-alayon sa Bohol Water Utilities, Inc. (BWUI) sa pag-implementar sa mando sa korte pag refund o pagbalik sa kantidad sa sobra nga gikolekta sa kanhi Provincial Waterworks system (PWS) isip bayad sa tubig sa mga konsumidor sukad sa tuig 1997 hangtod sa tuig 2000 o sulod sa tulo ka tuig.

Ang maong pakigpulong gihimo ni Gov. Aumentado atol sa programa pagpanumpa ug pag-instalar sa bag-o nga mga napili nga opisyales sa kagamhang Probinsyal sa Bohol nga gihimo niadtong Hunyo 30, 2025 didto sa Bohol Cultural Center.

Subay niining maong kalambo-an, ang BWUI ug ang PTO nagpadayon pagkakaron sa pagtambayayong aron pagsuta kon kinsa kining maong mga konsumidor nga makadawat sa refund ug pila ang madawat matag usa niini base sa konsumo ug nabayad niining mga panahona. 

Human makapagawas ang PTO ug listahan sa mga kalipikado nga konsumidor ug clearance sa matag usa niini, ang maong opisina mopagawas sa maong refund pinaagi sa BWUI nga gibanabana sa bulan sa Enero tuig 2026.

Atong mahinumduman nga sulod niining mga panahona (1997-2000), ang nagdumala sa panubig mao pa ang kanhi PWS, diin ubos kini sa kagamhang Probinsyal sa Bohol. 

Ang BWUI misugod pag dumala sa panubig niadtong December 28, 2000 diin mi-ubos ang taripa nga gisingil sa mga konsumidor.

2025 CBCP annual retreat ug ika-130 nga plenary assembly nagpasiugda sa ‘faith tourism’ sa Bohol

Sinulat ni Elvira Bongosia

Ang pag-host sa probinsya sa ika-130 nga Annual Retreat ug Plenary Assembly sa Catholic Bishops’ Conference of the Philippines (CBCP) nagpasiugda sa turismo sa pagtuo sa Bohol.

Kapin sa 80 ka mga obispo ug kapin sa 100 ka mga delegado sa Synodal — apil ang mga pari, gikonsagrar nga mga tawo, ug mga laygo — nagtigom sa Bohol karong semanaha alang sa usa ka makasaysayanon nga pagpamalandong sa tibuok Simbahan ug espirituhanong pagbag-o.

Ang retreat ug plenary assembly nga gipahigayon sa probinsiya sa unang higayon sulod sa 130 ka tuig sukad sa pagsugod niini, nagbutang usab sa adunahang relihiyoso ug kultural nga kabilin sa Bohol ngadto sa nasudnong spotlight.

Sa gipahigayong welcome mass sa Our Lady of the Assumption Shrine and Parish sa lungsod sa Dauis niadtong Hunyo 30, mainiton nga gitimbaya ni Bishop Alberto Uy sa Diocese of Tagbilaran ang mga delegado.

“The bishop’s decision to come to Bohol is not just for a change in venue. It is deeply symbolic (Ang desisyon sa obispo sa pag-anhi sa Bohol dili lang alang sa kausaban sa venue. Kini hilabihan ka simboliko), matud pa ni Uy.

Sama ni Hesus nga nagbalhinbalhin sa usa ka baryo ngadto sa usa ka baryo, matod niya, ang mga obispo mianhi dili lang aron mopahulay kondili aron mamalandong, mag-ampo ug maglakaw uban sa mga tawo.

Si Uy sa usa ka press conference sa miaging semana nagkanayon nga siya nagtuo nga ang mga nailhan nga tourist spots sa Bohol maoy usa sa mga hinungdan nga nakaaghat sa CBCP sa pagpili sa probinsiya isip venue sa tibuok semana nga kalihukan.

Ang tinuig nga retreat sa mga obispo gipahigayon sa Bohol Tropics Resort sa Tagbilaran City gikan Hunyo 30 hangtod Hulyo 4, samtang ang Plenary Assembly adto sa Bugnaw Si-e Resort sa lungsod sa Anda gikan Hulyo 5 hangtod 7.

Sa pagpasidungog sa okasyon, ang Probinsiya sa Bohol nagpahigayon ug welcome dinner alang sa mga obispo ug mga delegado sa synodal niadtong Hulyo 1, 2025, sa Bohol Cultural Center diin ang mga bisita gilingaw sa usa ka gabii sa musika ug kultural nga mga pasundayag nga nagpakita sa kainit ug arte sa Boholano.

Sa iyang mensahe, si Gobernador Erico Aristotle Aumentado nipadayag ug dakong garbo sa Bohol nga nagsilbi nga host sa asembliya karong tuiga. Siya miingon nga ang pag-host sa probinsya sa panagtapok nagpamatuod sa potensyal niini isip sentro sa relihiyoso ug espirituhanong turismo.

Matud pa ni Aumentado nga dili lang kini usa ka kalihokan sa Simbahan apan kini usa ka pag-ila kung unsa ang ikatanyag sa Bohol.

Gidugang pa niini nga ang mga makasaysayan nga simbahan, tradisyon sa relihiyon, ug mainit nga mga komunidad nagmugna sa usa ka hingpit nga palibot alang sa pagpamalandong ug pagbiyahe.

Atol sa gipahigayong misa niadtong Hulyo 1, si Cardinal Pablo Virgilio David, kasamtangang presidente sa CBCP, nipahinumdom sa mga kaubang obispo bahin sa panginahanglan sa lig-ong pagtuo, ilabina taliwala sa mga pagsulay.

Ang iyang mensahe sa pagkadisipulo ug pagpangulo kusog nga milanog sa usa ka probinsya nga dugay na nga giisip nga kuta sa tradisyon sa Katoliko. 

Ang mga obispo nga Katoliko uban sa kaparian sa Diocese of Tagbilaran sa wala pa ang Misa sa Tagbilaran Cathedral niadtong Hulyo 1, 2025, sa ikaduhang adlaw sa CBCP annual retreat. (Hulagway gikan sa CBCP)

AVSEC Unit: Wala pay dagkong kausaban sa Airport Security

Sinulat ni Rey Anthoy Chiu

Hangtud nga makapili na ang Aboitiz Infra Capital  (AIC) sa ilang liaison officer ngadto sa security cluster sa Panglao Bohol International Airport, diha na makit-an ang mga kabag-ohan sa security protocols sa ika siyam nga labing busy nga airport sa nasud.

Kini maoy gibutyag ni Police Captain Jonry C. Enaya, ang Officer in-Charge sa Aviation Security Group sa Philippine National Police Detachment sa sulod sa tugpahanan sa Panglao.

Si Capt Enaya, kinsa may dugo nga Bol-anon apan didto na nagdaku sa kaulohan, mipadayag usab nga nagpaabut sila sa mga ipatuman nga mga kabag-ohan human ang pagdumala sa airport gibalhin na gikan sa Civil Aviation Authority of the Philippines (CAAP) ngadto na sa AIC.

Niadtong Hunyo 15, pormal na nga gitugyan sa CAAP ang pagdumala sa Airport, uban sa laraw sa nga binilyon nga pag-ugmad sa tugpahanan sama sa pagpa-upgrade sa aviation facilities, physical nga building set-up sa land side ug air-side sa airport lakip na ang laraw nga himoon ang airport mga makaalagas sa doble pa sa mga pasahero nga migamit niini sa pagka karon.

Sa nagka-ugmad nga tugpahanan, giangkon ni Capt Enaya nga kini usa  ka dako nga hagit sa iyang pagkalider kay ang una nga assignment niini mas abin sa administrative jobs.

Hinuon, sa pagkakaron, padayon pa gihapon ang pag-abag sa mga sakop sa kapolisan sa airport sa pagpatunhay sa kahapsay ug kalinaw, pagpugong sa mga buhat terorismo ug pag-alagad sa mga turista nga moabut.

NANGANDAM. Si PNP OIC sa AVSEGROUP sa Panglao Airport mibutyag nga sa security protocols sa airport, hangtud nga mahipno na sa AIC ang liaison officer ngadto sa PNP, wala pay dinagko nga kausaban sa airport. Hinuon, napatuman na ang bag-ong polisiya sa parking sa pasilidad. (Hulagway gikan sa PIABohol)

Nutrition Programs nagatutok sa agri, food security-Gov Aris

Sinulat ni Rey Anthoy Chiu

Abay sa pagtutok sa ikaduhang termino sa Administratsyon ni Gobernador Erico Aristotle Aumentado nga agrikultura ug seguridad sa pagkaon , gipadayag pa sa gobernador didto sa Provincial Nutrition Month Opening Celebrations ang panglantaw sa tukmang tinubdan sa makapahimsog nga pagkaon ug  pagpalapad sa mga maka-abut niini diha sa mga kalungsuran.

Sa iyang mensahe nga gibasa ni Executive Assistant Oscar Valles, si Aumentado mipalanog nga sa temang “Food and Nutrition Security Maging Priority! Sapat na Pagkain Karapatan Natin!,” gihatagan ug importansya ang pagkab-ot sa atong gipangandoy nga food security ug self-sufficiency sa Bohol pinaagi sa saktong suplay sa healthy foods ug pagpalapad sa availability sa serbisyo ngadto sa mga kalungsuran.”

Gidasonan usab sa gobernador ang importante nga papel sa nutrisyon sa paghulma sa mga sunod nga henerasyon sa mga Bol-anon, ug mihangyo sa mga Bol-anon nga dili kalimtan ang mga natural nga tinubdan sa pagkaon nga sukad pa kaniadto nga naghatag na sa igo nga minerals ug bitamina.

Kini bisan pa sa mga nakab-ot sa teknolohiya sa paghimog mga pagkaon nga nakatabang sa pagpataas sa kinabuhi.

“Dili nato ma-angkon ang gipangandoy natong kalamboan kung dili himsog ang atong katawhan ug wala sila’y kusog nga mutabang sa pagtukod sa usa ka mas lig-on nga katilingban,” segun pa sa gibasa ni Valles atubangan sa mga sakop sa konseho. 

Gipahinumdum usab sa gobernador ang pagduso sa mga polisiya nga maglaban sa nutrisyon ug sa dugang nga pamuhunan sa agrikultura, pag-apud-apod sa pagkaon, kasanihan sa publiko aron mas mapadaghan pa ang pagpahimsog pinaagi sa tukmang pagkaon ngadto sa mga kabus ug atua sa  mga layo nga dapit.

Dinhi gipanawagan usab niya ngadto sa tanan ang inabagan ug gisawhan nga responsibilidad, nga nanginahanglan sa pagpakigtambayayongay sa tanan.

Didto usab sa kalihukan sa sulod sa Atrium sa Kapitolyo, gilusad ang Supplemental Milk Feeding ug  pagtugyan sa financial assistance ngadto sa konseho, gikan sa ang Bohol Provincial Employees Multi Purpose Cooperative  ngadto sa Konseho nga maoy tigplano sa mga kalihukan sa kaumahan nga tambongan usab sa kadaghanan.

Ang hamubo nga kalihukan, gitapos pinaagi sa Nutri Zumba sa mga mingtambong.

SI EA5 OSCAR VALLES nga maoy mingtubos ni Gob Erico Aristotle Aumentado didto sa pagbukas nga kalihukan sa nutrisyon, diin gilusad ang Supplemental Milk Feeding Program ug turn-over sa financial assistance gikan sa mga empleyado  ngadto konseho. (Hulagway gikan sa PIA-Bohol)

3 ka 4Ps self-help nga grupo nakadawat ug Enhanced Support Services Intervention nga pondo

Sinulat ni Elvira Bongosia

Tulo ka Pantawid Pamilyang Pilipino Program (4Ps) Self-Help Groups sa lungsod sa Sierra Bullones ang nakadawat ug pondo alang sa ilang Enhanced Support Services Intervention (ESSI) nga proyekto.

Ang Department of Social Welfare and Development Field Office 7—Central Visayas migahin ug P660,000, diin ang matag grupo makadawat ug P220,000 isip revolving fund alang sa ilang gipili nga proyekto. Matag grupo adunay 20 ka miyembro, ug ang tanan kauban sa 4Ps- mga benepisyaryo.

Ang unang grupo nga Binintia-an Bugsoc United Parents for Sustainable Livelihood Association (BIBU-UPSULA) nag-abli sa ilang tindahan niadtong Marso 28, 2025.

Ang asosasyon nalambigit sa pagpamaligya ug bugas ug pagkaon sa hayop. Naghimo usab sila ug liquid detergent, liquid dishwashing, ug fabric conditioner.

“Gipili kini namo nga proyekto kay kini maoy gikinahanglan sa among komunidad diri sa Binintia-an Bugsoc. Dako kini ug gitabang tungod kay nakahatag ug dugang nga panginabuhian sa matag miyembro sa among grupo),” matud pa ni Cecil Valmoria, Chairperson sa BIBU-UPSULA.

Gidugang usab niini nga ang ilang mga silingan wala na mogasto sa transportasyon sa pag-adto sa town proper nga mopalit ug mga butang kay naa na silay ilang tindahan nga mo-cater sa ilang mga nag-unang panginahanglan, sama sa bugas ug uban pang mga palaliton alang sa matag adlaw nga konsumo.

Laing grupo mao ang Anibongan United Parents for Sustainable Livelihood Association (AUPSULA), nga nipili sa rice ug feed retailing diin gibuksan ang ilang tindahan niadtong Abril 8, 2025.

Mipili usab ang kataposang grupo nga Man-od Pantawid Livelihood Association (MAPALIA) ug usa ka negosyo nga retailing sa bugas ug feed diin bag-o lang nagbukas sa ilang tindahan niadtong Hunyo 25, 2025.

Ang mga kawani sa DSWD Field Office 7, mga opisyal sa munisipyo sa Sierra Bullones, ug mga opisyal sa barangay gikan sa ilang tagsa-tagsa ka barangay ang mitambong sa pagbukas sa tindahan sa matag asosasyon.

Ang ESSI sa DSWD nagtumong sa paghatag ug mga supplemental interventions sa kauban sa 4Ps benepisyaryo, ilabi na kadtong sakop sa indigenous peoples (IP), walay puy-anan nga pamilya, ug uban pang huyang nga mga grupo sama sa mga mag-uuma, mangingisda, ug mga nagpuyo sa Geographically Isolated and Disadvantaged Areas (GIDAs), aron mahibaw-an ang ilang nag-unang mga panginahanglan pinaagi sa panagtapok sa mga programa ug mga serbisyo ug sa pagsiguro nga sila motuman sa lain-laing mga kondisyon sa 4Ps.

Ang mga pondo sa ESSI gi-isip nga usa ka revolving fund. Ang napili nga mga proyekto nagsilbing plataporma sa paghatag gahum sa 4Ps self-help nga mga grupo pinaagi sa pagtukod o pagpalig-on sa ilang kaugalingon organisado nga People Organizations (PO).

Pinaagi sa paghatag gahum kanila, sila ang nagdumala sa ilang pag-uswag, nga nagdala ngadto sa dugay ug positibo nga mga resulta alang sa ilang kaugalingon, ilang pamilya, ug ilang komunidad.

Ang mga proyekto sa ESSI gikan sa eco-cultural livelihood assistance, income generation mga proyekto, mga proyekto sa pagpalambo sa komunidad ug kabatan-onan, gamay nga komunidad mga proyekto, alternatibong mga panimalay sa pamilya, ug cash-for-work.

Ang unang grupo nga Binintia-an Bugsoc United Parents for Sustainable Livelihood Association (BIBU-UPSULA) nga nagbukas sa ilang tindahan niadtong Marso 28, 2025. (Hulagway gikan sa DSWD-7)

MSAC PIACC naghipno sa katukoran sa LGRC

Sinulat ni Rey Anthoy Chiu

Pinaagi sa usa ka Multi Stakeholder Advisory Council Workshop (MSAC) sa napaduol sa Department of Interior and Local Government (DILG) and katumanan sa laraw niini nga ipabarug ang Local Governance Resource Center (LGRC) alang sa Bohol.

Atul sa MSAC Workshop, ang Provincial inter Agency Coordination Committee nagtampohay sa mga possible nga mga proyekto ug mga programa nga gipatuman sa matag buhatan nga makatampo sa pagpasayon sa mga local nga kagamhanan sa pagkab-ot sa Seal of Good Local Governance (SGLG), subay sa katukoran na usab sa LGRC.

Sa tigum dala nga workshop, si DILG Bohol Provincial Director Jerome Gonzales, mipasabut nga ang katukuran sa LGRC alang sa Bohol magpasayon sa tanang trabaho sa mga local nga kagamhanan nga mangita sa tabang sa pagpangita sa mga sumbanan alang sa may maayong pagpangalagad, ilabi na sa pagdeliver sa mga serbisyo ngadto sa katawhan.

Dugang pa niya, sa kadaghan sa mga kasat=yuran nga gihuptan sa mga buhatan nga wala ikapaambit, kon may usa ka common nga venue alang niini, mas mapasayon na sa mga LGUS ang pagpangita niini.

Kahinumduman nga may mga LGUS nga may mga maayong bansay nga sa ila lamang nahimo, kini ug uban pang mga best practices and pwede nga isulod sa LGRC aron, kon may LGUS nga interesado nga mopatuman ug programa, makapangita kini sa mga labing maayo aron mas dali kining masundog o may makatambag sa angayan nga buhaton.

Gawas pa, usa sa mga labing daku nga tumong sa LGRC mao ang pag-abag sa mga LGUs sa pagkab-ot sa dungod isip nakakuha sa Seal of Good Local Governance, pasabut ni DILG PD Jerome Gonzales.

Nunot niini, namugna ang Dasig-Dungan-Dungog alang sa pagkab-ot sa SGLG, ang labing prestihiyoso nga pasidungog nga sa us aka LGU nga nakabuhat na sa iyang anagy nga serbisyo nga ikapadangat sa katawhan.

MSAC-PIACC SA LGRC. Kini ang pipila sa mga national government agencies ug local government units nga nagtinabangay aron mapabarug ang LGRC sa Bohol kauban sa DILG. Ang LGRC. Mahimo na unya nga magpasayon sa mga buhaton sa LGUS sa pagcomply sa mga rekisitos sa SGLG, ug sa uban pang mga pasidungog alang sa mga nagtrabaho nga LGUS. (Hulagway gikan sa PIA-Bohol)

‘BPC’ papason na sa mga hulga sa Bohol

Sinulat ni Rey Anthoy Chiu

Irekomendar na sa 47th IB, ang pwersa nga nagtutok sa seguridad sa sulod sa Bohol batok sa mga teroristang komunista nga New People’s Army nga papason na sa mga listahan sa hulga sa kalinaw ang Bohol Party Committee (BPC) sa Komiteng Rehiyonal Sentral Bisayas (BPC-KRSB).

Kini maoy gibutyag ni Major Jayrod Cabahug, ang executive Officer sa 47th IB didto sa hiniusang tigun sa Provincial Peace and Order Council, Provincial Development Council ug sa Provincial Anti Drug Abuse Council didto sa Ceremonial Hall sa Kapitolyo Hunyo 23.

Ang 47th IB, nga gipangulohan ni kanhi Batallion Commander Lt. Col Magno Mapalad, nga karon ubos na sa pagpanguna ni Battallion Commander Lt. Col Dennis Martinez, mipadayag sa sitwasyon sa sa internal security sa Bohol didto sa hiniusang tigum.

Ug sa minglabay nga usa  ka tuig ug upat ka buwan, ang 47IB mingtaho nga wala na silay namatikdan nga presensya sa mga armadong sakop sa 35 anyos na nga BPC sa mga kabaranggayan nga ila kanhing mga pahuwayanan. 

Ang BPC usa sa tulo ka mga units sa Communist Party of the Philippines-New People’s Army (CPP-NPA) nga nag-operate dinhi sa Central Visayas, sa dugay na nga panahon.

Kanunay nga mahilambigit ang BPC sa mga armadong panagbangi, samtang gipangulohan ni Domingo Jaspe Compoc. Hinuon, sukad sa sayo nga 2000, hangtod sa 2010, hinayhinay nga gibuntog sa local nga goberno ang komunistang terorista pinaagi sa pagtutok sa mga kalihukan nga mopakunhod sa kawad-on ug magpabukas sa kapanarbahoan.

Sa 2010, ang Bohol gideklara nga insurgency free sa Armed Forces of the Philippines, bisan pa nga may nagpabilin pang pwersa nga dili na makahimo pa sa pagsamok sa goberno sa Bohol.

Nunot niini, gi-panawagan ni Gob Erico Aristotle Aumentado ngadto sa mga kanhi rebelde nga mobalik na sa dalan sa kalinaw, kay andam ang goberno nga moagak kanila balik sa katilingban.  

Apan niadtong Pebrero 2024, lima ka sakop sa BPC ang nakabsan sa kinabuhi sa panagbangi didto sa Bilar. Apil sa mga namatay si Compoc.

Sukad niadto, wala nay namatikdang mga paglihok ang BPC, bisan pa nga may nagkadaghan sa ilang mga kanhi sakop ang mibalik na sa sabakan sa balaod. 

Nunot niini, gipadayag ni Maj Cabahug nga ilaha na nga irekomendar ngadto sa Peace, Law Enforcement and Development Support (PLEDS) cluster ug sa National Joint Peace and Security Coordinating Council (JPSCC) nga ideklara na nga papas na ang BPC. 

WALA NAY HULGA. Gitaho ni Maj Jayrod Cabahug sa 47th IB nga ilang irekomendar nga papason na ang Bohol Party Committee sa mga hulga sa Central Visayas, samtang wala nay namatikdan nga paggimok sa pundok human mapatay si Kumander Silong nga nailhang si Domingo Compoc. (Hulagway gikan sa PIA-Bohol)

BALAK

NAHANAW DAW ASO
Sinulat ni Engr. Rogelio Podelino

Matag linalang ni kalibutan adunay pangandoy
Kayod sa husto dili balihon ang kakapoy
Tinguha niya nga kaugmaon mousbaw
Moasenso sa kinabuhi ang iiyang panglantaw

Tanang kinitaan iyang guihipos
Aron sa kapobrehon dili siya magapos
Guipanglimbasogan sa adlw’ng tanan
Kakugui sa gimbuhaton ang pohonan

Wala’y adlaw nga iyang gui-usikan
Katapul sa buluhaton wala sa alimpatakan
Panginabuhi sa kanunay maoy naghari
Haruhay sa kaugmaon iyang guimithi

Mi-abot na ang adlaw sa iyang katumanan
Usa na siya karon ka adunahan
Guikaibgan sa kadaghanan sa mga tawo
Patigayon nidaghan ug labihan pag-asenso

Usa ka butang ang iyang hikalimtan
Nalimot siya sa pagsimba sa AMAHAN
Sa labihan niyang pag-atiman sa patigayon
Nawala ang pagsimba matag Domingo dayon

Wala niya damha may dakung mahitabo
Miulbo ang dakung kalayo mora’g guibubo
Dakung sunog wala matabang sa bumbero
Tanang katigayonan NAHANAW DAW ASO