Proseso pag-aplay’g koneksyon sa kuryente gipahibalo sa Bohol Light
Sinulat ni Sheryl B. Paga
Tumong sa Bohol Light ang paghatag ug mas kasaligan nga panuga dinhi sa dakbayan sa Tagbilaran diin gihimong sayon ang mga proseso niini.
Gihimo karon ang Bohol Light “Konek Program” – usa ka inisyatibo nga nagtumong alang sa pagpalapad sa serbisyo publiko ngadto sa mga barangay, aron mas sayon kini ma-access, ug mapauswag pinaagi sa pagsunod nga mga proseso ug requirements nga makita sa ubos:
Lakip sa maong pasalig ang pagbaton sa mas maayo ug episyente nga serbisyo ngadto sa atong mga konsumidor. Gipaningkamutan sa Bohol Light paghatag ug mas kombenyente nga proseso alang sa aplikasyon niadtong gusto magpa-konek ug kaugalingon koneksyon. Ang mga requirements alang sa mga residential nga konsumidor mao lamang kining musunod:
- ⮚ Certificate of Final Electrical Connection
- ⮚ Phopocopy of one Government Identification Card
- ⮚ Proof of ownership or consent
Kung makumpleto ang mga gilista nga mga dokumento sa itaas, isumiter kini ngadto sa opisina sa Bohol Light nga nahimutang diha sa R. enerio St., Poblacion III, Tagbilaran City across land Transportation Office (LTO).
Kalamboan sa pagpuli sa linya sa Habitat, Bool
Sinulat ni Leizel C. Butawan
Makita sa hulagway sa itaas ang kalamboan sa pagpuli sa linya sa Habitat, Bool.
Sigun sa nahaunang balita kabahin sa pagpuli sa mga linya nga nakasinati ug pagbara o clogging sa Barangay Bool, madasigon nga nagpadayon ang Bohol Water sa maong proyekto isip kabahin sa ilang serbisyo alang sa mas lig-on ug limpyo nga suplay sa tubig.
Atong mahinumduman nga kaniadtong Hunyo 23, 2025, opisyal nga gisugdan ang maong proyekto. Ang hinungdan sa inisyatiba mao ang pagbara sa karaan nga mga linya, nga resulta sa dugay nang paggamit ug epekto sa mga trabaho sa kalsada. Tungod niini, gamay na lamang ang tubig nga modiretso sa mga konsumidor, ilabi na kadtong nagsalig sa Reservoir No. 7 sa Banat-i Hill.
Sa kasamtangan, ang trabaho sa Capayas Street, gikan sa Habitat entrance paingon sa Bool junction, anaa na sa 98% nga completion. Gitakda ang interconnection sa mga linya sa sunod semana, nga gitumong aron maibalik ang normal nga suplay sa tubig sa Barangay Bool, usa sa mga lugar nga grabe kaapektohan sa kakuwang sa tubig.
Samtang, ang revamp sa mainline sa Habitat Village kasamtangang naa na sa 30% nga completion. Hinay pa ang kalambuan sa maong parte sa proyekto tungod sa nagpadayon nga trabaho sa kanal sa nasangpit nga lugar, nga nakaapekto sa operasyon sa maong team.
Padayon ang paningkamot sa BWUI aron masulbad ang problema sa tubig ug matuman ang tumong nga siguruhong limpyo ug lig-on nga suplay sa tubig ngadto sa mga konsumidor sa maong barangay. Gihangyo gihapon sa BWUI ang publiko nga mopadayon sa pagpangandam ug pagpundo ug tubig, ilabi na kadtong nalambigit sa mga lugar nga posibleng maapektohan sa padayon nga trabaho.
Grupo sa mga mananagat sa lungsod sa Anda nanguna sa paghatag og gahum sa komunidad, kalamboan
Sinulat ni Elvira Bongosia
Sa baybayon nga barangay sa Badiang sa lungsod sa Anda, usa ka grupo sa mga mananagat ang nag-organisa sa ilang kaugalingon ug nagtukod sa Badiang Fishermen’s Association (BAFIAS), nga nahimong usa ka modelo sa grassroots organization sa malungtarong pangisda, environmental stewardship, ug empowerment sa komunidad.
Ang organisasyon, nga orihinal nga naporma aron matubag ang mga hagit nga giatubang sa lokal nga mga mangingisda, sa ulahi nahimong kabahin sa frontline sa mga boluntaryo nga mihimo sa empowerment ug kausaban nga posible pinaagi sa KALAHI-CIDSS program.
Sulod sa mga katuigan, ang mga mangingisda sa Badiang nag-atubang sa nagkagamay nga mga isda, karaan nga gamit sa pangisda, ug limitadong akses sa merkado. Ang ilegal nga pagpangisda ug pagkadaot sa kalikopan dugang nga gihulga ang ilang pamaagi sa kinabuhi. Daghang mga pamilya ang nanlimbasug aron mabuhi, ug ang mga batan-on nga henerasyon nagsugod sa pagpangita sa laing dapit alang sa oportunidad.
Aron matubag ang sitwasyon, usa ka grupo sa mga lokal nga mangingisda ang nagtigom niadtong 2020 aron maporma ang BAFIAS. Uban sa suporta gikan sa lokal nga kagamhanan ug sa Bureau of Fisheries and Aquatic Resources (BFAR), ang mga miyembro nagsugod sa pag-organisa sa ilang kaugalingon ngadto sa usa ka pormal nga asosasyon.
Tumong sa BAFIAS sa pagpanalipod sa ilang mga kahinguhaan sa dagat, pagpalambo sa ilang panginabuhian, ug pagpataas sa ilang komunidad.
Ang unang hugna sa tabang ug kalamboan alang sa BAFIAS mao sa dihang nakadawat kini ug 5,000 bangus (milkfish) fingerlings ug 120 ka sako sa isda gipakaon pinaagi sa Special Area para sa Agricultural Development (SAAD) nga programa. Kini nga suporta nakapahimo kanila sa paglansad og marine floating fish cage project sa Sitio Big-ot, Barangay Badiang.
Ang asosasyon wala mohunong sa aquaculture. Nagpatuman sila ug rotational monitoring system diin ang mga miyembro nagpule-pule sa pagbantay sa mga fish cage aron malikayan ang kawat ug masiguro ang hustong pag-atiman.
Nagtukod pa gani sila ug temporaryong kapuy-an duol sa mga hawla aron puy-an sa mga boluntaryo nga nag-duty.
Kini nga pagbati sa gipaambit nga responsibilidad nahimong backbone sa BAFIAS. Gibansay ang mga miyembro sa pagdumala sa fish cage, pinansyal nga literasiya, ug pagkonserba sa kinaiyahan.
Nagsugod usab sila sa pagsuhid sa mga oportunidad sa eco-tourism. Nagtanyag ang BAFIAS ug mga guided tour sa duol kultural ug ekolohikal nga mga dapit, sama sa Lamanok Point, diin ang prehistoric rock art ug lubnganan nga mga dapit isaysay ang istorya sa karaang sibilisasyon.
Sa pipila lang ka tuig, ang BAFIAS nakab-ot ang talagsaong mga kalamposan.
Ang mga miyembro niini nagdugang sa ilang kita gikan sa mga ani sa bangus, nga adunay projected revenues nga P130,000 matag cycle; pagkunhod sa ilegal nga pagpangisda; nagsugod sa pagpananom ug bakhaw ug pagpanglimpyo sa kabaybayonan, ug nahimong mas lig-on ang pakiglambigit sa komunidad sa kababayen-an ug kabatan-onan nga aktibong nalambigit sa panginabuhian ug mga paningkamot sa konserbasyon.
Ang mga sakop sa Badiang Fishermen’s Association (BAFIAS) uban sa KALAHI-CIDSS team sa lungsod sa Anda, Bohol. (Hulagway gikan sa DSWD-7 photo)
BYH dili una modawat ug babaye nga CICL
Sinulat ni Rey Anthony Chiu
Dala sa mga potensyal nga mga suliran kon buksan ug dungan ang serbisyo ngadto sa mga kababayen-an, dili manawat ang Bohol Youth Home (BYH) sa mga babaye nga children in conflict with the law (CICL) nga iduso alang sa temporaryo nga pagpuyo niini sa provincial youth rehabilitation center sa Cortes.
Kini ang gipadayag ni Provincial Social Welfare and Development Officer Carmelita Tecson, kang kinsa nga buhatan, natahasan sa pagsupervise ug pagdumala sa pagpadagan sa puloy-anan sa mga kabataan.
Madawat didto ang mga menor de edad nga criminal, 13 anyos ngadto sa ubos sa 18 anyos nga nakahimo ug salaod ug nasentensyahan sa korte nga ipailawom sa pag-atiman isip bata nga criminal.
Subay sa Juvenile Justice Act, gidili sa balaod nga ang mga menor de edad nga makahimo ug salaod, isagol sa prisohan sa mga hamtong, tungod sa dako niini nga posibilidad nga matakdan ug mahimo na hinuon nga bagtik nga criminal, hinungdan sa panginahanglan sa youth rehabilitation center.
Human sa pila na ka dekada, natukod ra gayud ug gibuksan ang BYH, nga maoy katumbas sa Bahay Pag-asa sa nasudnong kagamhanan.
Ug sanglit napabarug gamit ang P69 milyones nga pundo sa kagamhanan sa Bohol, ang lalawigan maoy magdumala niini subay usab sa mga lagda nga gipatuman sa Department of Social Welfare and Development (DSWD).
Gitukod sa usa ka luna nga iya sa kagamhanang probinsyal sa Bohol, ang pasilidad unta magkantidad ug P80 milyones, apan wala kini kapundohi sa nasudnong kagamhanan, hinungdan nga ang P69M nga kwarta sa Bohol maoy gipaigo-an sa katukuran niini, matud ni Tecson.
Ug sanglit, kuwang ang kwarta alang sa pagkompleto sa mga pasilidad alang niini, napabarug man ang dormitorya alang sa mga babaye nga manimuyo, wala pa mapahimutang ang labat nga maghuwa sa duha ka mga dormitoryo.
Matud mni Tecson, ang pagdili una sa pagdawat sa mga babaye, usa ka paagi sa paglikay unya sa pagsahog sa babaye ug lalaki nga children in conflict with the law (CICL), nga mahimong may dili maayong resulta.
Ang BYH nagsugod na ug dawat sa mga lalaki nga CICL sa mi-aging semana bisan pa nga makigsabut pa usab ang BYH sa mga kalungsuran nga mopadala sa ilang mga kabataan sa pasilidad alang sa ilang tampo sa pagpatunhay sa operasyon sa restorative services niini.
KUWANG PA SA PARIL. Kinahanglan nga mapahimutang ang paril nga maghuwa sa mga babaye nga CICL sa mga lalaki nga anaa na sa BYH, aron malikayan ang pagsagol sa mga CICL nga mahimong may dili maayong resulta, matud ni PSWDO Carmelita Tecson. Ang naa sa hulagway, ang female dormitory, samtang ang building nga tupad mao ang training center ug classrooms. (PIAbohol)
SP nanawagan sa mga CSO, NGO, POS aron maakredit
Sinulat ni Rey Anthony Chiu
Gipanawagan na sa Sangguniang Panlalawigan (SP) ang tanan nga civil society organizations, (CSO) non-government organizations (NGO), peoples organizations (PO) ug kooperatiba dinhi sa Bohol sa pag-apply sa accreditation sa Provincial government pinaagi sa SP.
Pinaagi sa Resolution No. 2025-727, ang pagpa-accredit sa SP uyon sa Section 15 sa 1987 Philippine Constitution nga nag-ingon nga respetohon ang mga kahugpungan sa katawhan aron ilang kapanalipdan sumay sa mga prinsipyo sa demokrasya , ang ilang matud ug lehitimo nga interes ug pangandoy pinaagi sa linaw ug legal nga pamaagi, matud pa ni Board Member Lucille Lagunay, ang sponsor sa resolusyon.
Giisip sa kagamhanan nga mga katambayayong sa local nga pangagamhanan nga makatampo og daku alang sa pagduso sa gisawhan nga demokrasya, lukop nga kaugmaran, pag-ako sa mga binuhatan ug ang pagtubag sa mga panginahanlan, ang mga CSO, NGO, PO ug kooperatiba.
Nagtuo usab ang SP nga sa pag-akredit sa mga CSOs sa SP, kini magseguro nga kahatagan og makahuloganon nga representasyon sa mga local nga mga special bodies ang mga CSO, NGO, PO ug kooperatiba.
Ang mga local nga special bodies mao panaglitan ang Provincial Development Council, Provincial School Board, Provincial Health Board, ug uban pang mga konseho nga gikonsulta ug tighimog polisiya subay sa mandu sa Local Government Code.
Pinaagi sa akreditasyon, o pag-ila sa SP sa nasampit nga CSO, mapatunhay ang dayag nga pangalagad, pagmugna sa mga polisiya nga nagtubag sa panginahanglan ug nagpakayab sa prinsipyo sa lukop nga pangagamhanan.
Sa pag-ila sa SP, ang CSO, PO ug NGOS nagpasabut nga nakasubay sa pormal nga panginahanglan sa legitimacy, kapasidad sa pagpadagan sa kahugpungan, ug ang paghimog mga kalihukan sa pagpanginlabut sa katilingban.
Kahinumduman nga napanday na ang Provincial Ordinance No. 2024-010 nga nagtala sa mga rekisitos aron ang kalugpungan, ilhon na sa SP.
Kasagaran nga mga akreditado nga nga CSO, NGOs ug POs maoy permi mauna sa mga hinabang nga ikatanyag sa kagamhanan, ilabi na sa Bohol, mao nga importante nga ma-ilhan kini sa SP, dugang ni BM Lagunay.
Kini naglakip sa pagkarehistrado sa Securities and Exchange Commission (SEC), Department of Labor and Employment (DOLE) o sa Cooperative Development Authority (CDA), may ikapakita na nga usak ka tuig nga kalihukan nga nagtumong sa kaugmaran, tinuig nga taho (Annual Report), Financial Statement, Han-ay sa mga oipisyales ug sakop apil ang staff uban sa mga contact numbers ug addresses.
Pangitaon usab sa SP ang Board Resolution nga naghangyo sa SP alang sa accreditation, ug ang mga gilaraw nga kalihukan alangs a sunod nga tuig human sila moduso sa application sa SP.
Nunot sa resolusyon, gihangyo usab sa SP ang Provincial Cooperative Development Office (PCDO), lakip na ang Provincial Planning and Development Office (PPDO) ug ubang mga departamento sa pagpakatag sa aghat sa akreditasyon, paghatag og teknikal nga tabang sa mga CSO aron makakompleto s amga rekisitos, ug paghimog orientation sessions o capacity-building activities aron magiyahan ang mga kahugpungan sa proseso sa pag-ila.
Bohol mipalig-on sa mga lakang batok sa online sexual exploitation
sa mga bata taliwala sa pagsaka sa mga kaso, base sa pagtuon
Sinulat ni Elvira Bongosia
Opisyal nga gilusad sa Plan International Pilipinas ang ilang panukiduki nga giulohan ug “Safeguarding Young People from the Dark Path of Self-Facilitated Live-Streaming of Child Sexual Exploitation and Abuse (CSEA)” niadtong Hulyo 24 sa syudad sa Tagbilaran.
Gipasiugda sa panukiduki ang nagkadako nga peligro sa mga bata nga mapahimuslan pinaagi sa live-streamed nga pag-abuso-kasagaan nga gimaneho sa kakabus, kakulang sa kahibalo, ug dali nga pag-access sa mga digital platform.
Usa sa gitino sa pagtuon mao ang probinsya sa Bohol, diin ang mga kaso sa online sexual abuse and exploitation of children (OSAEC) nahimong usa ka nagkadako nga lugar nga gikabalak-an sa mga lokal nga awtoridad ug mga tigpasiugda.
Sa wala pa ipagawas ang pagtuon, ang kagamhanang probinsiyal dinhi mihimo na ug mga lakang aron matubag kining maong problema.
Niadtong Abril 8, 2025, ang Sangguniang Panlalawigan nipasar ug ordinansa, nga gi-author ni Second District Board Member Jamie Aumentado-Villamor, nga nagpakita sa lig-on nga pasalig sa probinsiya sa child online safety.
Si Villamor, kinsa mitambong sa paglusad sa panukiduki, nanguna sa simbolikong paglagda sa manifesto aron magpabiling aktibo, konektado ug mapasaligon sa pagpabiling luwas sa mga bata online.
Isip author sa Anti-OSAEC nga ordinansa, si Villamor namahayag nga dala niya ang lawom nga pagbati sa responsibilidad sa pagpahinumdom sa tanan nga kini nga lakang labaw pa sa usa ka palisiya. Kini usa ka proteksyon nga gitukod alang sa mga bata, kinsa usa sa mga labing huyang sa digital age.
“We must draw a clear line: our children deserve to grow up free from harm, especially in spaces meant to educate, connect, and inspire them, such as the internet (Kinahanglan nga maghimo kita ug tin-aw nga linya: ang atong mga anak angayan nga magdako nga wala’y kadaot, labi na sa mga lugar nga gitumong sa pag-edukar, pagkonektar, ug pagdasig kanila, sama sa internet),” matud pa ni Villamor.
Si Presidente Ferdinand R. Marcos Jr. sa miaging tuig nag-awhag sa gobyerno ug sa publiko sa paghimo ug kolektibong aksyon ug pagpaningkamot sa pagwagtang sa mga kaso sa OSAEC atol sa “Iisang Nasyon, Iisang Aksyon: Tapusin ang Online Sexual Abuse or Exploitation of Children (OSAEC) Ngayon Summit 2024” sa Makati City.
Gihatagan ug gibug-aton sa Presidente ang panginahanglan sa gobyerno nga palig-onon ang mga paningkamot niini batok sa sekswal nga pagpahimulos sa mga bata online.
Si Cathy Soco, Program Director sa Plan International Pilipinas, nagpasiugda sa panginahanglan sa koordinado ug multi-sectoral nga aksyon. Matud pa ni Soco nga ang mga lokal nga gobyerno sama sa Bohol nanguna pinaagi sa pakigtambayayong sa mga NGOs, komunidad, ug mga ahensya sa pagpatuman aron matubag ang online nga sekswal nga pagpahimulos sa mga bata sa lokal nga lebel. (Hulagway gikan sa PIA7-Bohol)
SSS mipahibalo sa tinuig nga 10% nga umento sa pension hangtod sa 2027
Sinulat ni Elvira Bongosia
Ang Social Security System (SSS) molusad ug pension reform program (PRP) sugod sa Setyembre, nga maghatag ug mas taas nga binuwan nga pensiyon, nga adunay kinatibuk-ang 33 porsiyento nga umento alang sa retirement ug disability beneficiaries sulod sa tulo ka tuig.
Ang mga retirement ug disability private pensioners ubos sa SSS makadawat ug kinatibuk-ang 33 porsyento nga usbaw sa ilang binuwan nga pensyon gikan sa 2025 hangtud 2027, samtang ang mga death o survivor pensioners makadawat ug 16-porsyento nga usbaw.
Sa Hulyo 31 nga pahayag, ang SSS miingon nga kini nga reporma nagtubag sa dugay na nga panawagan alang sa mas taas nga pensyon. Kini nga lakang gibase usab sa Social Security Act of 2018, nga naghatag gahum sa SSC sa pag-adjust sa mga benepisyo sa pensyon.
Sumala pa sa state insurer, alang sa mga empleyado sa pribadong sektor, ang pagsaka ipatuman sa tulo ka tranches matag Setyembre sugod sa 2025.
Sa partikular, ang mga pensiyonado sa Agosto 31 matag tuig makadawat ug 10-porsiyento (retirement/disability) o lima-porsiyento (death/survivor) nga pagsaka kada tuig sulod sa tulo ka tuig nga yugto.
Gi-klaro sa SSS nga kini nga reporma dili magkinahanglan ug bisan unsang umento sa kontribusyon, dili sama sa ₱1,000 nga dugang allowance sa benepisyo nga gihatag sa tanang pensioner sugod sa 2017, nga nagkinahanglan dayon ug umento sa kontribusyon aron mabalik ang pinansyal nga kalig-on sa pondo sa SSS.
Sumala sa SSS Chief Actuary, ang reporma magresulta lamang sa usa ka madumala nga pagkunhod sa kinabuhi sa pundo gikan sa 2053 ngadto sa 2049, nga gibalanse sa mas kusog nga cash flow gikan sa nangaging mga reporma sa kontribusyon ug gipalambo nga mga paningkamot sa pagkolekta.
Samtang gipasiugda ni SSS Commissioner Robert Joseph M. De Claro, nga gikutlo ang actuary team, nga ang pondo nagpabilin nga maayo sa pinansyal nga nagpasalig sa dugang nga ang ahensya nga komitado sa pagpasig-uli sa kinabuhi sa pondo balik sa 2053 pinaagi sa pagpalapad sa coverage ug pagpauswag sa kahusayan sa pagkolekta.
Sakop sa reporma ang kapin sa 3.8 ka milyon nga mga pensiyonado—2.6 ka milyon ubos sa pagretiro ug pagkabaldado, ug 1.2 ka milyon nga survivor nga mga pensiyonado—ug gilauman nga moduso sa ₱92.8 ka bilyon ngadto sa ekonomiya gikan sa 2025 ngadto sa 2027.
Ilusad sa SSS ang makasaysayanon nga Pension Reform Program sugod sa Setyembre 2025 sulod sa 3 ka tuig nga maka-benepisyo sa tanang klase sa pensioners. Naka-angkla sa Republic Act No. 11199 (Social Security Act of 2018), partikular na sa Section 4 nga naghatag ug gahom sa SSC sa pag-adjust sa mga benepisyo sa pension, kini nga reporma nagtubag sa dugay nang panawagan alang sa mas taas nga pensyon samtang nagsiguro sa dugay nga kalig-on sa pondo. (Hulagway gikan sa SSS/PIA)
Gobyerno mogahin ug P60B alang sa libreng edukasyon sa kolehiyo, tech-voc programs sa 2026
Sinulat ni Elvira Bongosia
Aron mapadayon ang taas nga edukasyon nga ma-access sa mga Pilipino, si Presidente Ferdinand R. Marcos Jr. mipahibalo niadtong Lunes nga mas daghang pamuhonan sa libre nga edukasyon sa kolehiyo sa publiko ug mga programa sa pagbansay sa technical-vocational (TechVoc).
Sa iyang ika-4 nga State of the Nation Address (SONA) sa Batasang Pambansa, si Marcos niingon nga dul-an sa P60 bilyones ang igahin alang sa libreng tuition sa minilyon ka mga tinun-an sa mga pampublikong kolehiyo ug mga programa sa TechVoc.
“Kung tutungtong naman sa kolehiyo, nakahanda ang malaking pondo para sa pagtutustos sa libreng pampublikong edukasyon sa kolehiyo. Pati na rin ang mga subsidy at financial assistance para sa mas higit pang nangangailangang estudyante,” matud pa sa Presidente.
“Sa susunod na taon, maglalaan pa rin tayo ng halos 60 bilyong piso para sa libreng edukasyon sa pampublikong kolehiyo at sa TechVoc,” dugang pa sa Presidente.
Sa pagkakaron, kapin sa duha ka milyon ka mga estudyante ang nakabenepisyo gikan sa libreng programa sa higher education sa gobyerno kada tuig.
Ubos sa administrasyon ni Presidente Marcos, dugang nga 260,000 ka mga batan-on ang nakakuha sa libre nga programa sa edukasyon sa kolehiyo, nagtabang sa daghang mga kabatan-onan nga matuman ang ilang mga damgo.
Si Presidente Marcos niingon nga hatagan ug prayoridad sa gobyerno ang mga anak sa mga miyembro sa Pantawid Pamilyang Pilipino Program (4Ps) alang sa libreng mga programa sa kolehiyo ug TechVoc.
Gipasiugda usab sa Presidente ang nagkadaghang mga scholarship nga gihatag sa Technical Education and Skills Development Authority (TESDA).
Sa 2024 lamang, ang TESDA nakahatag ug labaw sa 200,000 ka dugang nga mga scholarship, nga nakapahimo sa daghang mga Pilipino nga makakuha ug mga kahanas ug pagbansay nga andam sa trabaho.
Gi-awhag sa Presidente ang mga ginikanan sa hingpit nga pagpahimulos niini nga mga oportunidad sa edukasyon, gipasiugda nga ang tumong sa gobyerno mao nga ang matag pamilyang Pilipino adunay labing menos usa ka miyembro nga nakatapos sa kolehiyo o nakatapos sa programa sa TESDA.
BALAK
ANG LIG-ON NGA GABAYAN SA TAWO
Sinulat ni Engr. Rogelio Podelino
Tungod sa sala sa una tang mga ginikanan
Ang tawo huyang ug baroganan
Nagkinahanglan ang tawo ug gabay
Aron dili siya mahisalaag sa dalan’g gisubay
Kay ang kinabuhi daghan ug katalagman
Nahimo kini’ng kalbaryo sa katawhan
Nagkada-iya ang gibuhat aron lang mabuhi
Kay ang mga pama-agi managlahi
Sa dinhi pa si KRISTO sa kalibutan
Gitukod NIYA ang IYANG simbahan
Ibabaw sa usa ka.bato
Nga ang ngalan Pedro
Ang IYANG mga pagtulun-an ug mga wali
Gisulat sa IYANG mga sumusunod sigi
Gisulod sa mga sugong gitago-an sa kweba
Aron dili mawala ug masubay sa kaliwatan nila
Sa diha’ng wala na si KRISTO sa kalibutan
Ang IYANG mga apostoles nagsangyaw tanan
Hasta uban’g sumusunod nagsangyaw gihapon
Sa maayo’ng balita sa tanan’g panahon
Ang mga tawo uhaw kaayo sa maayo’ng balita
Nga ang katawhan gitubos na sa ilang sala
Pinaagi sa pagkamatay ni JESUS sa krus
Kay gimahal sa GINOO ang tawo sa lubos
Milibkas pa ang gatusan ka tuig sa hingpit
Human mokayab si KRISTO paingon sa langit
Anha pa namugna sa simbahan’g Katoliko
Ang usa ka talagsa-on’g libro
Kini nga basahon o libro naghatag ug kalig-on
Sa pagtuo sa tawo sa GINOO dayon
Mabasa sa tawo ang angay buhaton
Sa pagdayeg sa GINOO sa tanan’g panahon
Maghatag kini ug kasibot sa balati-an
Nga daghan ka pa angay pagatun-an
Nga ikahimu-ot sa ato’ng GINOO
Sa pagsigi ug repaso sa mga psalmo
Kon batasanon nimo ang pagsigi ug basa
Mohugot ug.motim-os ang imong gugma
Sa ato’ng GAMHANAN’G MAGBUBUHAT
Nga maoy nagbuot sa tanan’g binuhat
Kini nga libro angayan basahon sa tanan
Aron ka makasubay sa tul-id.nga dalan
Sa imong pagbasa mohugot ang imong pagtuo
KINI ANG LIG-ON NGA GABAYAN SA TAWO