Ang Pilipili Nga Hustisya

Ni Eleazar Tutor Acampado

NANGINIT na usab ang balita sa Kaulohan. Aduna na poy bag-ong drama. Ang pipila ka grupo sa

civil society midangop sa Ombudsman aron pasakaan og kasong plunder si Vice President Sara Duterte.

Sa unang tan-aw, moingon ta, “Maayo! Aron malimpyo ang goberno.” Pero kon atong hinuktokan og maayo, dili malikayan nga makangutana ta. Hustisya ba gyod ang tumong ani, o usa lang kini ka dakong pagpanginhas nga ang gustong mabiktima usa ka iho? Pagpangandam na ba kini sa lain na usab nga ipasakang impeachment batok sa bise presidente?

Kon atong sutaon, ang mga alegasyon batok kang VP Sara, morag dili man bag-o. Mora kinig bahaw nga kan-on nga gipainit og balik aron ipakaon sa publiko. Nganong karon man gyod? Nganong dungan man sa pag-init sa ubang isyu?

Daghan ang nagduda nga kining kaso usa ka balik-balik nga alegasyon. Gibalik-balik ang istorya dili aron mangita og kamatuoran, kondili aron mangita og bikil ug padayon nga mamansahan ang ngalan sa bise presidente, nga nakita sa kadaghanan nga maoy nanguna sa pagka presidente kon magpapili man ugaling kini sa umaabot nga nasodnong piniliay sa 2028.

Nanginhas sila apan naghinaot nga naay makuha nga dakong isda aron adunay ikabandilyo. Ug nganong gusto nilang paablihan ang bank account ni Inday Sara kon aduna man silay lig-ong ebidensiya nga nangawat ang bise sa kuwarta sa katawhan.

Atong hinumdoman ang nahitabo sa niaging mga semana. Nagkaguliyang ang nasod tungod sa binilyon nga pondo sa flood control nga daw nahilis lang sa tubig baha. Dako ang kasuko sa katawhan. Dako ang pangutana kon asa nipaingon ang kuwarta sa goberno ni Presidente Marcos samtang nalunopan ang Bicol, Batangas, ug uban pang dapit.

Dili ba kaha kini usa ka paagi aron malipat ta og mabalhin ang atensiyon? Samtang nagtutok ang tanan sa confidential funds ni Sara, kinsa pa may maghisgot sa bilyones nga flood control scam? Kinsa pa may mangutana bahin sa korapsiyon nga naghasol karon sa administrasyon?

Karon, mangutana ta sa mga nagpasaka sa kaso. Kon tinuod man nga accountability ang inyong gipangita, nganong si Sara ra man? Nganong wala man ninyo apila pagpasaka og kaso ang Presidente ug ang iyang mga tawo?

Kon naglagot mo sa korapsiyon, nganong namili man mo og kontra? Ang hustisya nga mamili og kinsa ang gukdon ug kinsa ang protektahan, dili na hustisya. Ang tawag ana, pamolitika.

Klaro kaayo ang dagan sa naratibo. Gukdon ang kaaway sa politika, pero piyongan ang mga mata kon ang maapektohan anaa sa gahom. Gusto nila limpyohan ang nataran, pero ang ilang silhig igo ra man manilhig sa pikas suok, samtang ang pikas nga nagtapok ang abog, gipasagdan lang.

Mao nga mga Sano, dili ta magpadala sa kasikas nga walay unod. Dili ta makaingon nga dili angay imbestigaron si VP Sara. Kon naay sala, angay manubag. Pero angay nga patas ang dula. Kon mopasakag kaso kay nangilkil og kuwarta sa kaban sa nasod, ayaw pagpili. Iapil ang tanan. Iapil ang misuyop sa kuwarta sa flood control. Iapil ang gidudahang nagmaniobra sa anomaliya sa mga proyekto sa administrasyon.

Kay kon si Inday Sara ra ang inyong gukdon samtang nagpahayahay ang uban nga nalambigit usab sa dagkong anomaliya, ayaw na lang ta og hisgot og hustisya. Ang tawag ana, pilipili nga hustisya. Sa mata sa ordinaryong Bol-anon, ang piniling hustisya, walay kalainan sa inhustisya.

Magbinantayon ta. Dili nato tugotan nga gamiton ang korte alang sa ilang pamolitika ug political survival.