Mga Mahinungdanong Ideya sa Pagpatubo og Orkids

Ni ELEAZAR TUTOR ACAMPADO

Daghang Bol-anon nga mga ginang nga ampay ang pagpananom og orkids. Gani, duna na may nanagnegosyo niini ug namaligya og mga orkids nga namuwak na o semilya pa.

Sa mga gustong mosulod sa pagnegosyo og orkidyas, aniay mahinungdanong ideya nga atong nakutlo sa magtiayong Edwin ug Gina Veneracion nga nagpadagan usab og negosyo sa orkids sa San Rafael, Bulacan, kon giunsa pag-amuma ang mga tanom, ang mga teknik aron ang mga tanom magmahimsog ug magpamuwak.

Sa pagpatubo og orkids, labing mahinungdanon ang presensiya sa tag-iya diha sa iyang farm, sa pagsubang sa Adlaw hangtod na sa pagsalop niini. Aron maatiman dayon ang mga problema kon ugaling duna may motumaw. Pananglitan, dili ang tanang liboan ka nanagtubo nga mga orkid susama ang pagtubo. Dunay paspas motubo kaysa uban. Niining bahina, ang mga tanom sa samang gidak-on ipahimutang pareho sa usa ka seksiyon. Niining paagiha, mahatagag kahigayonan ang mga gagmay nga makatubog maayo ug makaapas sa paspas motubo nga mga orkid.

Ang mga tanom nga gipatubo ilawom sa net bisbisan matag adlaw. Ang pagpamisbis mahimong hayahay kon dunay mamontar nga overhead water system nga popular kaayo sa Israel.

Ang bag-ong mga semilya angay hatagag espesyal nga atensiyon pinaagi sa paghatag sa hustong nutrina ug hormones sugod gayod sa sinugdanan. Ang mga semilya kinahanglang ipamutang sa kaang sulod sa tulo ka adlaw gikan sa pag-abot.

Sulod sa duha ka semana, dili abonohan ang mga tanom. Esprehan ra kini og hormone matag duha ka adlaw. Sa ikatulo nga semana, ang mga semilya abonohan sa solusyon nga naglangkob sa Peters 30-10-10, Peters STEM (soluble trace elements mix) plus hormone (Superthrive). Ang solusyon gilangkob sa 400 ka gramo sa Peters 30-10-10, 200 ka gramo sa STEM, ug 50 ml sa hormone matag 200 ka litro nga tubig (usa ka dram). Ang mga tanom esprehan ning maong solusyon kausa sa usa ka semana hangtod nga motangkod sa lima ka buwan gikan sa pagpahiluna niini sa kaang.

Human sa lima ka buwan, ang duha ka managlahing pormulasyon i-alternate sa pagbutang matag semana. Ang unang solusyon mao ang Peters 20-20-20, Peters STEM plus hormone. Sa matag 200 ka litro nga tubig, 400 ka gramo sa Peters 20-20-20, 200 ka gramo sa STEM ug 50 ml sa hormone ang isagol sa 200 ka litro nga tubig.

Ang lain nga solusyon gilangkob sa 400 ka gramo sa Peters 10-52-10, 200 ka gramo sa STEM, plus 50 ml sa hormone, nga gisagol sa 200 ka litro nga tubig. Ug tungod kay daghan ang phosphorus ning maong pormulasyon, mapadali ang pagpamuwak. Ang pormulasyon gitawag usab og bloom booster.

Kon ang flower spike magsugod na sa paggataw, duha ka pormulasyon ang i-apply usab nga i-alternate matag semana. Ang unang pormulasyon naglangkob sa 400 ka gramo sa Peters 20-20-20, 200 ka gramo sa STEM ug 50 ml hormone matag 200 ka litro nga tubig.

Ang laing pormulasyon nagbaton og taas nga potassium. Kini gilangkob sa 400 ka gramo sa Peters 15-15-30, 200 ka gramo sa STEM ug 50 ml sa hormone. Kining pormulasyon nga nagbaton og taas nga potassium magpalig-on sa flower stems ug magpadugang sa bulok sa mga buwak.

Usab, kon ang mga tanom tulo ngadto sa upat na ka buwan, ang pignit sa Osmocote slow release fertilizer ipahimutang sa matag kaang. Ang gamayng bahin sa bunot nga gigamit isip medyum buhoan aron kapahimutangan sa slow-release fertilizer. Kausa lang kini ipahimutang kay ang abono molungtad og tulo ngadto sa upat ka buwan.

Mahinungdanon ang regular nga pagpakaon sa mga orkid sa haom nga mga pormulasyon sa abono. Kanunay kitang makabati og reklamo sa mga pumapalit nga moingon nga ang orkids nga ilang napalit nindot kaayo ug himuwakon sa panahon nga kini ilang gipalit. Apan human niana, ang mga tanom nawad-an sa iyang mga dahon ug wala na kini mamuwak. Ang kasagarang hinungdan niini mao ang dili regular nga paghatag sa mga tanom sa gikinahanglan nilang nutrina.

Naay daghang brand sa abono sa merkado, apil na ang organikong mga pormulasyon, busa ang mga orchid grower kanunay nga makapili sa unsay ilang gusto. Ang labing mahinungdanon niini mao ang paghatag sa husto nga pormulasyon alang sa managlahing hugna sa pagtubo sa mga tanom. Aron magmalamposon sa pagpananom og orkids, mahimong sagopon ang pormulasyon nga giaplay sa mga Veneracion.