Ang Kaisog sa Pagpadayon

Ni ELEAZAR TUTOR ACAMPADO

SA atong panahisgot sa kasikas sa kinabuhi, kanunay natong mahunahuna ang dagkong selebrasyon o ang saba nga dagan sa politika dinhi sa atong nasod ilabina dinhi sa Bohol. Apan angkonon man nato ug dili, usahay ang labing mahinungdanong kasikas mao kadtong mahitabo sa kahilom. Ang hilom nga kumpas sa usa ka tawo nga nakahukom nga mobangon human sa pagkadam-ag, magpadayon sa pagpakabuhi human makaangkon og sakit nga kapakyasan sa kinabuhi.

Aniay sugilanon sa duha ka maisog nga linalang nga naghatag kanakog lawom nga pamalandong. Ang nahauna taudtaod nang nagsugod sa iyang freelancing career sugod niadtong pagbuto sa pandemic ug ang naulahi, bag-o lang nagsugod sa iyang pagkat-on unsaon nga mokita isip VA kun virtual assistance.

Napulo ka tuig na ang milabay, niadtong 2016, ang kalibotan ni Jozelle daw nahugno. Sa edad nga 25, dungan niyang nasinati ang sunod-sunod nga dagkong mga hagit sa kinabuhi. Nawad-an siyag trabaho, na-scam sa negosyo, napakyas sa gugma, ug ang labing pait sa tanan, nadayagnos siya nga adunay thyroid cancer. Buslot ang iyang bulsa ug ang iyang hunahuna nagkalandrakas sa kangitngit.

Miabot siya sa higayon nga mihangyo siya sa uniberso nga kuhaon na ang hinulamang kinabuhi. Dili na niya gustong mabuhi pa og dugay kay dili na niya maahom ang tanang kasakitan nga nahiagoman.

Apan usahay, ang Ginoo motubag pinaagi sa inosenteng tingog sa usa ka bata. Sa dihang ang iyang pag-umangkon nga si Julia nitanyag sa P90 niini aron lang makapalit sila og pagkaon, nahinol ang kasingkasing ni Jozelle. Nakaamgo siya nga ang kapakyasan mahimo lang permanente kon pilion niya ang dili na mobangon.

Karon, sa edad nga 35, si Jozelle usa na ka malamposon nga tag-iya sa usa ka freelancing agency. Ang iyang kasakitan gihimo niyang hagdanan sa iyang kalamposan.

Gipamatud-an niya nga ang kaisog dili kinahanglan nga saba. Usahay, ang kaisog mao lang ang pagpili nga mabuhi, mobangon gikan sa pagkatumba, himoong leksiyon ang mga kapakyasan ug mosulay pag-usab sa sunod nga adlaw.

Sa laing bahin, anaa ang sugilanon ni Bernard. Sa kalibotan sa online work, daghan kanato ang daling moreklamo kon hinay ang internet o kon lisod ang mga gimbuhaton nga gitahas sa kliyente. Apan lahi si Bernard. Ang iyang tibuok lawas dili na makalihok, gawas lang sa iyang mga tudlo.

Aron makatrabaho ug makakat-on, dili pisikal nga keyboard ang iyang gamit kondili usa ka on-screen keyboard diin tagsa-tagsaon niya pag-click ang mga letra. Walay reklamo, walay rason, duna ray lunsay nga determinasyon. Gipakita ni Bernard nga ang internet nahimong dalan aron ang mga limitasyon sa lawas dili mahimong babag aron makab-ot niya ang iyang mga pangandoy sa kinabuhi.

Unsa man ang mga pagtulun-an nga atong makuha nila ni Jozelle ug Bernard?

Sa atong lalawigan sa Bohol, daghan kanato ang nag-atubang usab og tagsa-tagsa ka kanser. Mahimong sakit sa lawas, kalisod sa kuwarta, o kaguol sa kasingkasing.

Apan ang sugilanon ni Jozelle nagpahinumdom kanato nga ang atong kagahapon dili maoy magbuot sa atong ugma. Ug ang sugilanon ni Bernard nagpakita nga ang kinadak-ang babag sa kalamposan dili ang atong abilidad, kondili ang atong limitasyon sa pagtuo sa kaugalingon. Silang duha parehong nanginabuhi karon isip online freelancer ug parehong nahigot sa ilang wheel chair.

Kon ikaw karon nawad-ag sa paglaom ug ingon sa gidat-ogan sa kalibotan, hinumdomi kini: Hangtod nga nagginhawa pa ka, wala pa mahuman ang imong sugilanon. Ang internet ug ang bag-ong teknolohiya naghatag og daghang oportunidad sa tanan. Bisan pa og nagsugod ka sa wala o bisan pa kon ang imong tudlo ra ang makalihok, dunay nagpaabot nga pahat alang sa tawong maningkamot nga mausab ang dagan kinabuhi.

Ang tinuod nga kaisog sa kinabuhi mao ang pagpili nga dili mosurender. Sama ni Jozelle ug Bernard, padayon lang. Kay sa matag pagmata nimo sa buntag, duna kay bag-ong higayon nga usbon ang dagan sa imong kinabuhi.

Maong inigmatag nimo ugma, duha ra gyod imong kapilian. Mobalik ka sa pagkatulog o mobangon unya molihok agad sa gitakda nimong buluhaton nga magdala kanimo sa pagkab-ot sa gipangandoy nimong  tingusbawan.