NI: Eleazar Acampado

Ang Kahayag ug Dalangpanan sa Mga Bol-anon

IKAWALO karon ka adlaw diin matag gabii midagsa ang katawhan, nagnobena ug nag-ampo nga hingpit misalig sa usa ka Inahan nga wala gayod mobiya iyang mga anak. Siya ang atong Inahan sa Kanunay Panabang kun Our Lady of Perpetual Help.

Alang kanatong mga Bol-anon, ang debosyon sa Inahan dili lamang usa ka tradisyon. Usa kini ka kinabuhi. Ang iyang imahe nga nagpakita kang Maria nga nagkugos sa Batang Jesus, uban sa mga anghel nga nagdala sa mga simbolo sa Iyang pasyon, naghulagway sa usa ka dakong paglaom alang sa matag pamilya nga nag-atubang og pagsulay.

Ang debosyon sa Inahan sa Kanunay nga Panabang sa atong lalawigan nagsugod na sukad pa kaniadto. Kini nga tradisyon gipadangat kanato sa mga misyonero ug sa atong mga katigulangan, kinsa nakakita sa gahom sa pag-ampo pinaagi sa pagpataliwala ni Maria. Gani, sa matag barangay sa Garcia-Hernandez, dunay duha o tulo ka mga kapilya diin makita nato ang iyang imahe sa altar. Kini nagpahinumdom kanato nga bisan asa kita moadto, duna kitay Inahan nga andam maminaw.

Ang atong mga simbahan nahimong sentro sa pagpasalamat tungod kay dinhi, ang mga luha sa kaguol nahimong mga luha sa pagpasalamat.

Daghan na ang nakasaksi sa kanunay nga panabang. Adunay mga ginikanan nga nag-ampo alang sa kaayohan sa ilang mga anak nga masakiton. Adunay mga mananagat nga nag-ampo alang sa luwas nga paglawig ngadto sa lawod. Aduna say mga batan-on nga nangayo og giya alang sa ilang mga pagtuon, exam ug pangandoy sa kinabuhi. Ug uban pa.

Ang labing nindot nga testimonya dili lang ang mga dagkong milagro, kondili ang adlaw-adlaw nga panabang nga nadawat. Apil na niini ang pag-ampo nato nga hatagan kita og kalinaw sa kasingkasing taliwala sa krisis sa lana. Ang paghupay sa kaguol sa mga pasyente. Ang kabaskog sa panglawas sa mga tawo nga nagluya ilabi na sa mga tawong nagsagubang og pisikal nga limitasyon. Ang Inahan sa Kanunay nga Panabang wala nagpasaad og kinabuhi nga walay problema, apan gipasaligan kita nga dili kita mag-inusara sa pag-atubang niini.

Niining panahona sa National Emergency ug kalisod sa ekonomiya, ang debosyon ngadto sa Inahan sa Kanunay Panabang nagtudlo kanato sa pagsalig. Siya nagpahinumdom kanato nga ang tinuod nga panabang nagsugod sa pag-ampo, apan kinahanglan usab nga sundan nato sa paglihok.

Sama sa mga programa sa atong kagamhanan, ang pag-ampo uban sa paglihok maoy pormula sa atong kalamposan. Ang panabang sa Ginoo dili man ihatag kanato nga direkta apan moabot pinaagi sa atong mga silingan, pinaagi sa mga lider nga nagtinguha sa atong kaayohan, pinaagi sa kahayag sa kahibalo nga atong gipangita ug uban pa.

Sa pagsaulog nato sa kapistahan sa Inahan sa Kanunay Panabang ugmang adlawa, April 27, modagkot kita og kandila ug ipaabot ang atong mga pag-ampo nga makalingkawas kita sa mga kalisdahan samtang nagpadayon kita sa atong pagdaginot isip austerity measures gumikan sa krisis sa lana sa Tunga-tungang Sidlakan ug uban pang krisis nga giatubang sa kinabuhi.

Hinumdoman nga ang Inahan kanunay nag-abli sa iyang mga kamot alang kanato. Ang atong tahas mao ang pag-abli usab sa atong mga kasingkasing sa atong isigkatawo.

Inahan sa Kanunay nga Panabang, i-ampo mo kami!