MANANANG-GOT
Ang pananggot usa ka dalaygong buhat;
Buntag, udto, hapon sa sangutan mokatkat,
Magbagyo man kuha-on jud ang tam-is nga dawat,
Kay daghang mga binuhat sa ubos nagahuwat.
Sa Bohol, ang tuba kinaham nga imnonon,
Paborito ni sa tanang pa-isano kong Bol-anon,
Maka-alim ni sa samad sa gugmang malu-ibon,
Dimdimon ang tuba hangtud malimot sa kaugalingon.
Ang pananggot Inday ayaw baya tamaya,
Halangdon nga trabaho angayan sa pag-abiba,
Sa tuba daghang nakalampos sa pag-eskwela,
Kay ang tuba kon ibaligya mahimong kwarta.
Busa kon ikaw Inday mangitag pamanhonon,
Ang mananangite unta Inday imong pili-on,
Kon matuman mo ikaw paga-swertihon,
Sama sa sangutan ikaw Inday pagakatkaton.
Gihigugma sa manangite ang iyang sangutan,
Dili jud ni mahimong biya-an o kalimtan,
Buntag, hapon gakson aron madu-ol sa dughan,
Pitlagongan, abisan aron sugong sa tuba masudlan.