Kalihukan sa sports, pila ka mga establisemento  dili pa gihapon abrihan 

TAGBILARAN CITY, Bohol, April 30, (PIA)—Pugngan pa gihaponang pagpabukas sa pipila ka mga establisemento ug mga kalihukan dinhi sa Bohol samtang nagpadayon ang General Community Quarantine (GCH).

Segun sa Executive Order 28, nga gilagdaan ni Gobernador Arthur Yap niadtong Abril 29, 2020, bisan kong gipabuksan na ang pipila ka mga establisemento nga dumalahon na sa binag-ong kinaiya nga ipatuman sa mga mamaligya ug mamalitay, did-an pa gihapon ang pagpabukas sa mga pagtapok nga may kalambigitan sa sports.

Dugang sa EO nga ang sports related gatherings sama sa pagbansaybansay, paduwa, tournaments ug kampionato.

Usab gidid-an ang mga fitness gyms, internet shops, buwangan ug ang mga pasugal ug kalihukang susama niini.

Gani, subay sa EO 28, bisan pag pabuksan na og balik ang mga malls, dry goods ug department stores, gilatid sa bag-ong mandu nga kinahanglang butangan pa sa dugang mga panagang sa pagkatag sa kagaw.

Kini sama sa pagbukas sa online nga sistema sa pagpalit aron wala nay tag-as nga pila, ang pagpakunhod sa mga empleyado sa namaligya aron kubsan ang kadaghanon sa tawo sa sulod, pagpahimutang og mga badlis utlanan aron dumalahonang social distancing, regular nga pagpamatay sa kagaw sa matag duh aka oras sa mga lugar nga perming hikapon o makuptan sa tawo, u gang pagpahimutang sa nagsuroysuroy nga Safety Officer nga mamadlong ug magbantay aron ang tanang sumbanan sa sulod sa establismento, sundon gayud.

Alang sa mga barberohan, salon, spa, ug mga industriya nga nagtanyag sa personal care, pagabuksan man sila taliwala sa hulga sa COVID, ang ilang mga customer maghimo na og appointment aron kalikayan ang pagtapok ug paghinuwatay sa mga tawo, pagpandam sa 70% ethyl alcohol alang sa mga customer ug empleyado, paghatag og mas luag nga tag 2 metros nga lugar sa matag lingkoranan o sa lamesa nga higdaan sa customer.

Matag himan nga gamiton, kinahanglang himoan sa pagpamatay sa kagaw sa dili pa gamiton sa laing customer, samtang himoon ang regular nga paglimpyo ug pagpamatay kagaw sa mga ibabaw sa lamesa, lingkoranan, mga siradora sa pultahan gamit ang mga aprobado nga disinfectants labing menos ka tulo sa usa ka adlaw. (rahchiu/PIA-7/Bohol)