Ika-2 nga kaso sa positibo nga COVID-19 sa Bohol ang natala 

TAGBILARAN CITY, (PIA)—Ang lalawigan sa Bohol nakatala sa ikaduha niining kaso sa corona virus disease (COVID-19) sa adlaw’ng Miyerkoles, Mayo 13.

Si Gob. Arthur Yap nipahibalo niini pinaagi sa Facebook diin iyang gibutyag nga usa sa 2 ka repatriated overseas Filipino workers (OFWs) ang nagpositibo sa COVID-19.

Matud pa ni Yap nga ang confirmatory result niabot Miyerkoles sa buntag, Mayo 13 sa dihang gipahibalo kini kaniya mismo ni Department of Health (DOH) 7 Regional Director Jaime Bernadas.

Matud pa sa gobernador nga ang usa ka OFW, nagnegatibo ang resulta sa COVID-19 test.

Ning bag-o lang, gikumpirmar ni Yap nga 2 ka OFWs ang nagpositibo ang resulta sa COVID-19 test diin gikonsiderar kining ‘inconclusive’ ug gipaubos sa retesting.

“Pasado alas 8:50 karong buntag (Miyerkoles, Mayo 13), nakadawat ko ug tawag gikan ni DOH-7 Director Jaime Bernadas. Ingon niya nga naa nay resulta sa confirmatory PCR test gikan sa duha ka OFWs nga gikan sa Manila nga nag false positive sa unang PCR test, usa kanila ang nagpositibo sa COVID-19 ug ang laing usa, nagnegatibo,” matud pa ni Yap.

“Sa pagka-karon, base sa atong protocol, tungod kay nagpabilin nga asymptomatic (walay gibating asimtomas) ang pasyente, ang usa nga nagpositibo sa COVID-19, magpabilin nga i-isolate siya sa iyang kwarto sa atong quarantine facility. Ingon ang DOH, magpahigayon sila ug laing PCR test karong adlawa (Miyerkoles, Mayo 13),” dugang pa sa gobernador.

Kahinumdoman nga 65 ka OFWs ang niabot sa Bohol niadtong Abril 28. Nahuman na nila ang ika-14 nga adlaw sa kwarantina niadtong Mayo 12, sa 3 kapasilidad sa Bohol.

Samtang laing 51 ka OFWs usab ang niabot sa lalawigan niadtong Mayo 9.

Ang unang kasong natala sa COVID-19 sa Bohol mao ang 60 anyos nga babayeng turista gikan China nga niabot sa lalawigan niadtong buwan sa Enero. Nakagawas kini sa tambalanan niadtong Enero 31 og naayo sa maong sakit.

Tungod niining bag-ong kalamboan, ang gobernador sa lalawigan nanawagan sa mga Bol-anon sa hingpit nga pagsunod sa social distancing ug pagsul-ob og face mask.

“Sa akong gisulti sa-una, andam kita nga mo-atubang sa hulga sa virus ug kaya nato kining i-manage kung magtinabangay kitang tanan. Sundon nato ang mga mando kabahin sa social distancing, pagsul-ob sa face masks, hygiene and sanitation, curfew hours ug magpa bilin sa balay kung walay importante’ng lakwon. Busa, awhagon ko kamo nga maghi-usa kita ug atong i-ampo ang atong pinalangga’ng lalawigan sa Bohol,” matud pa ni Gob. Yap. (ecb/PIA7-Bohol)