Ni Elvira Bongosia, (PIA)
Gideklarar ni Presidente Rodrigo Duterte ang Mayo 25, adlaw nga Lunes, isip regular holiday sa tibuok nasod agi og pag-obserbar sa Eid’l Fitr o Feast of Ramadan.
Pinaagi sa Proclamation No. 944 nga gilagdaan ni Executive Secretary Salvador Medialdea, gideklarar nga holiday ang maong adlaw isip pagpaabot sa religious ug cultural nga kamahinungdanon sa Eid’l Fitr sa tibuok nasod.
“The entire Filipino nation should have the full opportunity to join their Muslim brothers and sisters in peace and harmony in the observance and celebration of Eid’l Fitr,” matud pa sa proklamasyon.
Gi-base ang maong deklarasyon sa rekomendasyon mismo sa National Commission on Muslim Filipinos.
Nagpahinumdom usab ang Presidente nga bisan holiday, angay sundon gihapon ang gipatuman nga mga lagda kalabot sa coronavirus disease (COVID) 19 pandemic.
Ang Eid’l Fitr ginasaulog sa mga Muslim sa tibuok kalibotan sulod sa tulo ka adlaw pagtapos sa Ramadan.
Ginapahinumdoman sa panahon sa Ramadan ang unang pagpahayag sa Quran sa propetang si Muhammad.
Dili susama sa ubang regular holiday, managlahi ang petsa sa maong okasyon. (ecb/PIA7-Bohol)