Pagkunsad sa Espiritu Santo (A)
Mayo 31, 2020
EBANGHELYO (Juan 20:19-23)
19Sa pagkagabii na niadtong Domingoha, nagtigom ang mga tinun-an sulod sa lawak ug gitrangkahan nila ang pultahan kay nahadlok man sila sa mga kadagkoan sa mga Judio. Unya mitungha si Jesus sa taliwala nila ug miingon, “Mainyo unta ang kalinaw.” 20Human siya makasulti niini, iyang gipakita kanila ang iyang mga kamut ug ang iyang kilid. Nalipay pag-ayo ang mga tinun-an sa ilang pagkakita sa Ginoo. 21Unya si Jesus miingon kanila pag-usab, “Mainyo unta ang kalinaw. Ingon nga gipadala ako sa Amahan, ako usab nagpadala kaninyo.” 22Gisulti niya kini ug unya gihuypan niya sila ug giingnan, “Dawata ninyo ang Espiritu Santo. 23Kon pasayloon ninyo ang mga sala sa mga tawo, gipasaylo kini; kon ang ilang mga sala dili ninyo pasayloon, dili usab kini pasayloon.” Ang Ebanghelyo sa Ginoo.
oOo
KAHULOGAN SA EBANGHELYO (Juan 20:19-23)
19a Sa pagkagabii na niadtong Domingoha…
Niining unang adlaw sa semana usa ka bag-ong kalibutan ang natawo, usa ka bag-ong Binuhat (new Creation) ang nahitabo. Bag-ong Pagsugod (new Genesis), diin ang Ginoo mokuha sa tawo sa Iyang kamot aron sa pagbag-o sa iyang hulma!
Sukad niadtong adlawa, ang mga Kristyanos wala gayoy hunong sa panagtapok o panagtigum sa maong adlaw, Domingo. Gikan sa miaging Domingo ngadto sa sunod nga Domingo, ang Simbahan nagtigum sa iyang mga katawhan.
Ang adlaw nga Domingo diay kinahanglanon gayod sa kinabuhi sa usa ka Kristohanon. Sa adlaw sa Domingo atong gisaulog ug gipanagsalohan ang Buhing Cristo!
19b nagtigom ang mga tinun-an sulod sa lawak ug gitrangkahan nila ang pultahan kay nahadlok man sila sa mga kadagkoan sa mga Judio…
Kahadlok! Ang kalibutan natingban sa kahadlok! Bisan gani sa atong kaugalingong nahimutangan!
Unsa may mga kahadlok nga nakapatrangka kanako? Situwasyon? Sala? Kabalaka? Suliran? Kalisod?
19c Unya mitungha si Jesus sa taliwala nila ug miingon, “Mainyo unta ang kalinaw.”
Si Jesus mitumpag sa tanang babag. Ang Iyang katingalahang pagtungha taliwala sa mga tinun-an nagmatuod gayod nga Siya makabarog uban sa iyang mga sumusunod. Gumikan niini ania ang kamatuoran: gikan sa kahadlok ngadto sa kalinaw!
20Human siya makasulti niini, iyang gipakita kanila ang iyang mga kamut ug ang iyang kilid. Nalipay pag-ayo ang mga tinun-an sa ilang pagkakita sa Ginoo.
Naglisod pa ba ikaw sa pagsinati sa Dios diha sa imong kinabuhi? Naglisod pa ba ikaw sa pagsabot sa presensya sa Espiritu Santo diha kanimo? Sulayi kuno sa pagpangita sa mga samad nga imong nahiaguman. Ang atong mga samad maoy kamatuoran sa atong pagpakabuhi. Kon hain ang samad anaa ang kinabuhi; kon hain ang kinabuhi anaa ang Dios!
21Unya si Jesus miingon kanila pag-usab, “Mainyo unta ang kalinaw. Ingon nga gipadala ako sa Amahan, ako usab nagpadala kaninyo.”
Kanhi sila mga “tinagoan” tungod sa kahadlok; karon sila mga “pinadala” tungod sa kalinaw. Kining ilang pagkapinadala nga may misyon dili usa ka estratehiya sama sa usa ka organisasyon. Ang misyon sa Simbahan dili misyon nga minugna sa tawo, kondili usa ka misyon nga Iya gayod sa langitnong Amahan!
Alang kang Jesus usa lamang ka butang ang labing mahinungdanon: Ang Iyang kadugtungan sa Iyang Amahan. Sa ato pa, aduna lamay usa ka misyon: Ang misyon sa Amahan nga mao usab ang misyon sa Anak, ug mao usab ang misyon sa Simbahan.
22 Gisulti niya kini ug unya gihuypan niya sila ug giingnan, “Dawata ninyo ang Espiritu Santo.
Diha sa Credo atong gilitok: Mituo ako sa Espiritu Santo, ang Maghahatag og Kinabuhi. Si Jesus mao ang unang gihatagan niining maong kinabuhi sa dihang gibuntog Niya ang kamatayong dayon pinaagi sa Pagkabanhaw!
Si San Juan mikutlo sa duha ka inilang mga bersekulo sa Kasulatan: 1) sa unang pagmugna (first creation): “…gihuypan niya ang buho sa ilong sa tawo sa makapabuhing gininhawa ug ang tawo nakabaton og kinabuhi” (Genesis 2:7); 2) sa ika-duhang pagmugna (second creation):
“… Ako, ang Ginoong Dios, nagsugo kaniya paghuros ug paghatag og gininhawa niining patayng mga lawas aron mabuhi sila pag-usab” (Ezequiel 37:9).
Samtang anaa ang unang pagmugna, aduna usay umaabot pang laing pagmugna. Apan sa taliwala niini—sulod sa atong panahon karon—ania ang gipadayon nga “pagginhawa” sa Ginoo.
Diha sa atong paglihoklihok, diha sa atong pagpadayon sa atong mga buluhaton sa kinabuhi, diha sa atong tagsatagsa ka mga kasinatian sa kinabuhi, anaa ang “pagginhawa” sa Dios. Ako ba kining nabati?
“Dawata ninyo ang Espiritu Santo…” Kinahanglan nga dawaton gayod nato kining maong tanyag. Tagamtamon ta ang Iyang gasa. Makapabuhi kini kanato isip sakop sa Simbahan, isip sakop sa Gaymayng Simbahanong Katilingban (GSK).
Ang katumanan sa misyon sa Simbahan anaa manukad sa pag-agak sa Espiritu Santo.
23 Kon pasayloon ninyo ang mga sala sa mga tawo, gipasaylo kini; kon ang ilang mga sala dili ninyo pasayloon, dili usab kini pasayloon.”
Kining maong misyon sa Simbahan makita diha sa pagproklamar sa kapasayloan sa sala, sa pagpakig-uli sa mga katawhan balik sa sabakan sa Dios, ug sa paghatag sa Kaluwasan.