By Rey Anthony H. Chiu
TAGBILARAN CITY, (PIA) — Gimandu na sa Department of Justice ngadto sa tanang buhatan sa prosekusyon sa nasud nga unahon ang paghusay sa mga reklamo batok sa mga barangay officials nga naduhig sa mga anomalya kabahin sa pagpang-apud-apod sa salapi ubos sa Social Amelioration Program (SAP) sa kagamhanan.
Ang mandu giluwatan sa DOJ pinaagi ni National Prosecution Service chief Prosecutor General Benedicto Malcontento human nila usab madawat ang mga reklamo batok sa 23 ka opisyales sa barangay nga giduso ngadto kanila.
Gani, nagtuo ang DOJ nga may daghan pang kaso nga ipasaka human ang Department of the Interior and Local Government (DILG) mingtahas sa pagpasaka sa kaso sa mga nasipyat nga mga opisyal sa barangay, ngadto na sa Philippine National Police ug ang ilang Criminal Investigation and Detection Group (CIDG), kinsa may mas daghang kapasidad kaysa DILG.
Matud ni Malcontento, ang ilang nadawat nga mga kaso nga gipasaka, sa main office lamang ug daghan pa nga mga kaso nga giduso ngadto sa mga nagkadaiyang buhatan sa mga lalawigan.
“Ato na nga gisultihan ang mga hepe sa mga buhatan sa tibuok nasud aron sugdan na dayon ang pasiunang imbestigasyon, pagmonitor sa gidangatan ug sa pagtaho niini, matud ni Malcontento.
Mismo si Justice Secretary Menardo Guevarra na usab ang nagpagawas sa mga instruksyunes aron mapahiluna nga mauna ang pagpahigayon sa preliminary investigation sa mga kasong kriminal nga gipapas-an sa mga gikatahapang nga mga barangay officials.
Matud ni Guevarra, sanglit ang mga gipangduso nga kaso naghikaw sa mga kabus ug gipanggutom, sa tabang unta sa kagamhanan, misamot ang ka grabe sa ilang salaud.
Sa DOJ pa lamang, mikabat na sa 134 ka barangay officials ang kaso nga giduso sa Prosecutor’s Office sa Department of Justice (DOJ) tungod sa pasangil nga mga anomalya sa pagpang-apud-apod sa kwarta nga ayuda ubos sa SAP, segun pa sa DILG sa mga taho.
Gipaneguro usab ni DILG Secretary Eduardo Ano nga “dili nila maipsotan ang mga binoang nga gihimo sa pagpanghatag sa ayuda.”
“Gilumpag ninyo ang pagsalig sa kagamhanan ug ang pagsalig sa mga kabarangayanan, mao nga paslak kamo niining kalakiha,” pasalig ni Ano.
Kasagaran nga mga reklamo naglakip sa illegal nga pagkaltas gikan sa P50 ngadto sa P2,000 sa matag benepisaryo, pag-lakip sa mga dili kwalipekado nga modawat sa hinabang, mga kadugo ug kabanay, o ang paghikaw sa paghatag sa SAP sa barangay sanglit dili kini mga tigsuporta sa Mayor.
Sa lain nga bahin, mapasalamaton si DILG spokesperson ug Undersecretary Jonathan Malaya ngadto sa DOJ ug sa Prosecutor General sa pagmandu sa tanang city ug provincial prosecutors sa pagpa-una sa mga kasong may kalambigitan sa anomalya sa SAP.
“Samtang nagpasalamat kita sa DOJ ug sa Prosecutor General sa pagpa-una sa mga kasong anomaloso nga naglambigit sa SAP, buot usab nato nga mopalanug sa kusog nga mensahe ngadto sa mga opisyales sa barangay nga kurakot samtang atong ipadayag nga ang mga kalihukang kriminal, dili gayud ikatugot. (rahc/PIA-7/Bohol)